Kon e Berdadero Santunan Por Yuda Bo?

NA KEN e palabra griego tradusí komo “santu” den e Skritura ta referí? An Expository Dictionary of New Testament Words ta remarká ku “den sentido plural, ora e ta referí na kreyente, e ta enserá tur kreyente, i no djis e personanan ku ta eksepshonalmente santu, òf esnan ku, despues ku nan a muri, a ser akreditá pa obranan eksepshonal di santidat.”

P’esei apòstel Pablo a referí na tur e promé kristiannan komo e berdadero santunan. Por ehèmpel, el a dirigí un karta skirbí den promé siglo di nos era “na e iglesia di Dios ku ta na Korinto, huntu ku tur e santunan ku ta den henter [e provinsia romano di] Akaya.” (2 Korintionan 1:1) Mas despues, Pablo a skirbi un karta “na tur Dios su stimánan na Roma, yamá pa ta santunan.” (Romanonan 1:7) Opviamente e santunan aki no a muri ainda, ni no tabatin un kualidat sobresaliente ku a distinguí nan for di e otro kreyentenan. Riba ki base a distinguí nan komo santu?

Santifiká dor di Dios

E Palabra di Dios ta mustra ku no ta hende òf un organisashon ta deklará un persona santu. E Skritura ta bisa: “[Dios] a salba nos i a yama nos ku un yamada santu, no konforme nos obranan, ma konforme su mes propósito i grasia.” (2 Timoteo 1:9) Ta Yehova ta deklará un persona santu, segun Su grasia òf bondat inmeresí, i na armonia ku Su propósito.

E santunan dje kongregashon kristian ta partisipá den “un aliansa nobo.” E sanger dramá di Hesukristu ta sirbi komo base dje aliansa aki i ta santifiká su partisipantenan. (Hebreonan 9:15; 10:29; 13:20, 24) Komo hende limpi den bista di Dios, nan ta ‘un saserdosio santu i ta ofresé sakrifisionan spiritual ku ta aseptabel pa Dios pa medio di Hesukristu.’—1 Pedro 2:5, 9.

Hende Ta Pidi Santu pa Yuda Nan i Intersedé pa Nan

Miónes di hende ta kere ku “santu” por drama poder spesial riba nan, i p’esei nan ta venerá nan dor di usa relikia òf dor di pidi nan pa intersedé pa nan. Beibel ta siña hende hasi esaki? Den e Sermon Riba Seru, Hesus a siña su siguidónan kon pa aserká Dios, bisando: “Pues, hasi orashon anto asin’aki: ‘Nos Tata ku ta den shelu, bo nòmber sea santifiká.’” (Mateo 6:9) Ta na Yehova Dios so hende mester dirigí nan orashonnan.

Algun teólogo ta sita Romanonan 15:30 den un intento pa proba ku e “santunan” por intersedé pa nos. Ei nos ta lesa: “Mi ta roga boso, rumannan, pa medio di nos Señor Hesukristu i pa medio di e amor di e spiritu, pa boso lucha huntu ku mi den boso orashonnan na Dios pa mi.” Akaso Pablo tabata animá e kreyentenan ei pa hasi orashon na dje òf pa invoká su nòmber ora di aserká Dios? Nò. Ounke Beibel ta animá hende pa hasi orashon na fabor di e berdadero santunan, ningun kaminda Dios ta manda nos hasi orashon na òf pa medio di e santunan ei.—Filipensenan 1:1, 3, 4.

Sin embargo, Dios a nombra un Intersesor pa nos orashonnan. “Ami ta e kaminda, i e bèrdat, i e bida,” Hesukristu a bisa. “Ni un hende no ta bin serka e Tata, sino pa medio di mi.” Tambe Hesus a bisa: “Tur loke boso pidi den mi nòmber, esei lo mi hasi, pa e Tata wòrdu glorifiká den e Yu. Si boso pidi algu den mi nòmber, lo mi hasié.” (Huan 14:6, 13, 14) Nos por tin e siguransa ku Yehova mes kier tende orashon hasí den e nòmber di Hesus. Beibel ta bisa relashoná ku Hesus: “Tambe e por salba pa semper esnan ku ta hala serka Dios pa medio di dje, komo ku semper e ta biba pa intersedé pa nan.”—Hebreonan 7:25.

Si Hesus ta dispuesto pa intersedé na nos fabor, pakiko hopi bes e fielnan den kristiandat ta invoká e “santunan” den orashon? Den su buki The Age of Faith, historiadó Will Durant ta bai bèk na orígen dje práktika aki. Ounke el a bisa ku hende ta teme Dios Todopoderoso i ku Hesus ta parse di ta mas aserkabel, Durant ta deklará: “Apénas hende a tribi na papia ku [Hesus] kara-kara despues ku nan a ignorá su deklarashonnan den e Sermon Riba Seru totalmente. A parse nan ku ta mas sabí pa resa, no na Kristu, sino na un persona ku a ser kanonisá komo santu i ku lo mester ta den shelu, i pa roga su interseshon.” E preokupashonnan aki tin base?

Beibel ta siña nos ku ora nos hasi orashon na Dios pa medio di Hesus, nos por tin “frankesa i entrada ku tur konfiansa pa medio di fe den dje.” (Efesionan 3:11, 12) Dios Todopoderoso no ta muchu leu for di humanidat pa por tende nos orashonnan. E salmista David a bisa ku konfiansa den orashon: “Abo ku ta skucha orashon, serka bo tur hende ta bin.” (Salmo 65:2) En bes di transmití poder mediante relikia di “santunan” defuntu, Yehova ta drama su spiritu santu riba esnan ku ta pidié den fe. Hesus a rasoná: “Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!”—Lukas 11:13.

E Papel dje Santunan

E santunan na kende Pablo a dirigí su kartanan a muri hopi siglo pasá i, ku tempu, nan mester a risibí “e korona di bida,” ku ta un resurekshon pa shelu. (Revelashon 2:10) Adoradónan di Yehova Dios ta realisá ku venerashon di e berdadero santunan aki no ta bíbliko i no por duna protekshon for di enfermedat, desaster natural, instabilidat ekonómiko, behes òf morto. P’esei, bo por puntra: ‘E santunan di Dios ta berdaderamente interesá den nos? Nos por ferwagt ku nan ta aktua na nos fabor?’

E profesia di Daniel a papia hopi di e santunan. Den siglo seis promé ku Era Komun el a mira un vishon konmovedor di kosnan ku ta kulminando den nos tempu. For di laman a sali kuater bestia spantoso ku ta simbolisá gobièrnunan humano ku no por satisfasé e berdadero nesesidatnan di humanidat. Anto Daniel a profetisá: “Ma e santunan di e Haltísimo lo risibí e reino i poseé e reino pa semper, pa tur siglo ku ta bin.”—Daniel 7:17, 18.

Pablo a konfirmá e “herensia [aki] p’e santunan,” esta di ta koheredero ku Kristu den shelu. (Efesionan 1:18-21, NW) E sanger di Hesus a habri kaminda pa 144.000 santu ser resusitá i haña e gloria selestial. Apòstel Huan a deklará: “Bendishoná i santu ta esun ku tin parti den e promé resurekshon; riba esakinan e di dos morto no tin poder, ma nan lo ta saserdotenan di Dios i di Kristu i lo reina huntu kuné pa mil aña.” (Revelashon 20:4, 6; 14:1, 3) Den vishon, Huan a tende un grupo grandi di kriatura selestial kanta dilanti Hesus glorifiká: “Ku bo sanger bo a kumpra pa Dios hende for di tur tribu i lenga i pueblo i nashon. I bo a hasi nan bira un reino i saserdotenan pa nos Dios; i nan lo reina riba tera.” (Revelashon 5:9, 10) Esta un konsuelo! Yehova Dios mes a skohe e hòmber i muhénan aki kuidadosamente. Ademas, nan a sirbi fielmente riba tera i a enfrentá práktikamente tur problema ku hende a yega di pasa aden. (1 Korintionan 10:13) P’esei nos por ta sigur ku e santunan resusitá aki lo ta gobernantenan yen di miserikòrdia i kompashon ku ta tene kuenta ku nos debilidatnan i limitashonnan.

Bendishon Bou di Gobernashon di Reino

Pronto e gobernashon di Reino lo tuma akshon pa eliminá tur maldat i sufrimentu for di tera. E tempu ei, hende lo ta mas serka di Dios ku nunka. Huan a skirbi: “Mi a tende un bos duru for di e trono, bisando: ‘Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan.’” Esaki lo trese bendishon sin fin pa humanidat, pasobra e profesia ta kontinuá: “E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—Revelashon 21:3, 4.

Ki un tempu di goso esei lo ta! E palabranan di Mikéas 4:3 i 4 ta deskribí mas aleu kiko ta e resultadonan dje gobernashon perfekto di Kristu Hesus i e 144.000 santunan: “[Yehova] lo huzga entre hopi pueblo i hasi desishon pa nashonnan leu i poderoso. E ora ei nan lo bati nan spadanan traha plug ku nan, i nan lo bati nan lansanan traha skèr-pa-snui ku nan; nashon lo no lanta spada kontra nashon, i nunka mas nan lo no tren pa guera. I kada un di nan lo sinta bou di su palu di wendrùif i bou di su palu di figo, i ningun hende lo no spanta nan, pasobra e boka di e SEÑOR di ehérsitonan a papia.”

E santunan ta ekstendé e invitashon pa hende tuma parti den e bendishonnan ei. Simbolisá pa un brùit, e berdadero santunan ta sigui bisa: “Bin!” E teksto ta kontinuá: “I laga esun ku tende, bisa: ‘Bin.’ I laga esun ku tin set, bin; laga esun ku kier, tuma e awa di bida pòrnada.” (Revelashon 22:17) Kiko e “awa di bida” ta enserá? Entre otro, un konosementu eksakto dje propósitonan di Dios. Hesus a bisa den orashon na Dios: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Huan 17:3) E konosementu aki ta disponibel mediante un studio regular di Beibel. Ki kontentu nos por ta ku pa medio di e Palabra di Dios nos por haña sa e berdadero identidat di e santunan i siña kon Yehova lo usa nan p’e benefisio eterno di humanidat!

[Plachi na página 4]

Pablo a skirbi kartanan inspirá n’e berdadero santunan

[Plachi na página 4, 5]

E fiel apòstelnan di Hesus a bira berdadero santu

[Plachi na página 6]

Nos por resa ku konfiansa na Dios mediante Hesukristu

[Plachi na página 7]

E santunan resusitá lo goberná tera ku kompashon