Kristiannan Neutral den e Último Dianan

“Nan no ta di mundu, meskos ku ami no ta di mundu.”—HUAN 17:16.

1, 2. Kiko Hesus a bisa di e relashon ku tin entre su siguidónan i e mundu aki, i ki preguntanan su palabranan ta lanta?

RIBA e último anochi di Hesus su bida komo hende perfekto, su disipelnan a tend’é hasi un orashon largu. Den e orashon ei el a bisa algu ku ta deskribí e bida di tur kristian berdadero. Papiando di su siguidónan, el a bisa: “Mi a duna nan bo palabra; i mundu a odia nan, pasobra nan no ta di mundu, meskos ku ami no ta di mundu. Mi no ta pidi bo pa saka nan for di mundu, ma pa bo warda nan di e malbado. Nan no ta di mundu, meskos ku ami no ta di mundu.”—Huan 17:14-16.

² Dos bes Hesus a bisa ku su siguidónan lo no ta parti di mundu. Ademas, e echo ku nan ta separá for di mundu lo hiba na tenshon; mundu lo odia nan. Pero kristiannan no tin nodi spanta; Yehova lo protehá nan. (Proverbionan 18:10; Mateo 24:9, 13) En bista di e palabranan di Hesus, nos por puntra nos mes: ‘Pakiko kristiannan berdadero no ta parti di mundu? Kiko kier men no ser parti di mundu? Si mundu ta odia kristiannan, kon nan ta mira mundu? Kon nan ta mira gobièrnunan di mundu en partikular?’ E kontestanan bíbliko riba e preguntanan aki ta importante pasobra nan tin di haber ku nos tur.

“Nos Ta di Dios”

 3. (a) Kiko ta separá nos for di mundu? (b) Ki evidensia tin ku mundu ta “bou di kòntròl di e malbado”?

³ Nos relashon íntimo ku Yehova ta un dje motibunan pakiko nos no ta parti di mundu. Apòstel Huan a skirbi: “Nos sa ku nos ta di Dios, i henter mundu ta bou di kòntròl di e malbado.” (1 Huan 5:19) E palabranan di Huan tokante mundu ta papia pa nan mes. E gueranan, krímen, krueldat, opreshon, desonestidat i inmoralidat ku ta reina den e mundu djawe ta duna evidensia ku mundu ta bou di influensia di Satanas, i no di Dios. (Huan 12:31; 2 Korintionan 4:4; Efesionan 6:12) Ora un persona bira un Testigu di Yehova, lo e no praktiká e kosnan malu ei mas, ni konsentí ku nan. Dor di esei e no ta parti di mundu.—Romanonan 12:2; 13:12-14; 1 Korintionan 6:9-11; 1 Huan 3:10-12.

 4. Den ki maneranan nos ta mustra ku nos ta pertenesé na Yehova?

⁴ Huan a bisa ku na kontraste ku mundu, kristiannan “ta di Dios.” Tur persona ku dediká nan mes na Yehova ta pertenesé na dje. Apòstel Pablo a bisa: “Si nos biba, ta pa Señor nos ta biba, òf si nos muri, ta pa Señor nos ta muri; p’esei, sea ku nos biba òf ku nos muri, ta di Señor nos ta.” (Romanonan 14:8; Salmo 116:15) Dor ku nos ta pertenesé na Yehova, nos ta dun’é deboshon eksklusivo. (Éksodo 20:4-6) P’esei, un kristian berdadero no ta ambishoná nada di e mundu aki. I ounke e ta respetá emblemanan nashonal, e no ta adorá nan, ni den akshon ni ku su aktitut. Sigur e no ta adorá streanan di deporte ni otro ídolonan djawe. Klaro ku e ta respetá e derecho ku otro hende tin di hasi loke nan kier, pero e ta adorá únikamente e Kreadó. (Mateo 4:10; Revelashon 19:10) Esaki tambe ta pone ku e no ta parti di mundu.

“Mi Reino No Ta di e Mundu Aki”

5, 6. Kon sumishon na e Reino di Dios ta separá nos for di mundu?

⁵ Kristiannan ta siguidónan di Kristu Hesus i siudadano di e Reino di Dios. Esei ta otro motibu pakiko nan no ta di mundu. Ora Hesus tabata den un huisio dilanti Ponsio Pilato, el a bisa: “Mi reino no ta di e mundu aki. Si mi reino tabata di e mundu aki, mi sirbidónan lo a bringa pa mi no wòrdu entregá na e hudiunan; ma t’asina ku mi reino no ta di e mundu aki.” (Huan 18:36) E Reino ta e medio ku lo santifiká e nòmber di Yehova, establesé su derecho di ta e soberano universal i kumpli ku su boluntat riba tera i tambe den shelu. (Mateo 6:9, 10) Atraves di su ministerio Hesus a prediká e bon nobo òf evangelio di Reino, i el a bisa ku su siguidónan lo proklam’é te na fin di mundu. (Mateo 4:23; 24:14) Na 1914 e palabranan profétiko di Revelashon 11:15 a ser realisá: “E reino di mundu a bira e reino di nos Señor, i di su Kristu; i E lo reina pa semper i semper.” Masha pronto, e Reino selestial ei lo ta e úniko poder na mando riba humanidat. (Daniel 2:44) Na dado momentu, asta e gobernantenan di e mundu aki lo haña nan obligá ta rekonosé su outoridat.—Salmo 2:6-12.

⁶ Ku tur esei na mente, awe kristiannan berdadero ta siudadano di e Reino di Dios, i nan ta sigui e konseho di Hesus di “buska promé e reino di Dios i su hustisia.” (Mateo 6:33) Esei no kier men ku nan no ta leal na e pais den kua nan ta biba, pero den sentido spiritual sí nan ta keda separá for di mundu. E tarea prinsipal di kristiannan awe, meskos ku den e promé siglo, ta pa ‘duna testimonio tokante e reino di Dios.’ (Echonan 28:23) Niun gobièrnu humano no tin derechi di stroba e trabou ei ku Dios a duna hende.

 7. Pakiko kristiannan berdadero ta neutral, i kon nan a demostrá esaki?

⁷ Testigunan di Yehova ta pertenesé na Yehova i ta siguidó di Hesus i siudadano di e Reino di Dios. Komo tal, nan a keda neutral den e konfliktonan nashonal i internashonal di siglo 20 i 21. Nan no a tuma parti pa niun grupo, nan no a lanta arma kontra ningun hende ni no ta boga pa niun kousa den e mundu aki. Den un demostrashon remarkabel di fe apesar di e oposishon aparentemente aplastante, nan a sigui e prinsipio ekspresá n’e gobernantenan nazi di Alemania na 1934: “Nos no ta interesá den asuntunan polítiko, pero nos ta kompletamente dediká n’e reino di Dios bou di Kristu komo su Rei. Nos lo no hasi malu ni kousa daño na niun hende. Lo ta un delisia pa nos biba na pas i hasi bon na tur hende ora nos haña oportunidat pa esei.”

Embahador- i Mensaheronan di Kristu

8, 9. Den ki sentido Testigunan di Yehova ta embahador i mensahero awe, i kon esaki ta afektá nan relashon ku e nashonnan?

⁸ Pablo a deskribí su mes i su kompañeronan kristian ungí komo “embahadornan pa Kristu, komo si fuera Dios tabata spièrta dor di nos.” (2 Korintionan 5:20; Efesionan 6:20) For di 1914, ta korekto pa yama kristiannan ungí ku spiritu embahadornan pa e Reino di Dios, di kua nan ta e “yunan.” (Mateo 13:38; Filipensenan 3:20; Revelashon 5:9, 10) Ademas, Yehova a saka for di e nashonnan “un multitut grandi” di “otro karnénan,” kristiannan ku tin un speransa aki riba tera, pa apoyá e yunan ungí den nan trabou komo embahador. (Revelashon 7:9; Huan 10:16) Nos por yama e “otro karnénan” aki “mensaheronan” di e Reino di Dios.

⁹ Un embahador ni su personal no ta mete den asuntunan di e pais kaminda nan ta sirbi. Meskos tambe, kristiannan ta keda neutral den e asuntunan polítiko di e nashonnan di mundu. Nan no ta tuma parti pa ningun grupo nashonal, rasial, sosial òf ekonómiko ni bai kontra nan. (Echonan 10:34, 35) Al kontrario, nan “ta hasi bon na tur hende.” (Galationan 6:10) E posishon neutral di Testigunan di Yehova ta pone ku niun hende no tin motibu válido pa rechasá nan mensahe ku e preteksto ku nan ta tuma parti pa e otro partido den divishon rasial, nashonal òf di tribu.

Identifiká pa Amor

10. Kon importante amor ta pa un kristian?

¹⁰ Ademas di lo anterior, kristiannan ta neutral den e asuntunan di mundu debí na nan relashon ku otro kristiannan. Hesus a bisa su siguidónan: “Na esaki tur hende lo sa ku boso ta mi disipel, si boso tin amor un pa otro.” (Huan 13:35) Ta masha importante pa un kristian tin amor fraternal. (1 Huan 3:14) Meskos ku un kristian tin un relashon estrecho ku Yehova i Hesus, asina tambe su relashon ku otro kristiannan ta masha estrecho. Su amor no ta limitá na esnan ku ta den e kongregashon lokal. E amor ei ta ekstendé na tur su “rumannan den henter mundu.”—1 Pedro 5:9.

11. Kon e amor ku Testigunan di Yehova tin pa otro a influensiá nan kondukta?

¹¹ Awe, Testigunan di Yehova ta demostrá nan amor fraternal dor di kumpli ku e palabranan di Isaías 2:4: “Nan lo bati nan spadanan traha plug ku nan, i nan lo bati nan lansanan traha skèr-pa-snui ku nan. Nashon lo no lanta spada kontra nashon, i nunka mas nan lo tren pa guera.” Siendo ku ta Yehova ta instruí kristiannan berdadero, nan ta na pas ku Dios i ku otro. (Isaías 54:13) Dor ku nan ta stima Dios i nan rumannan, lo ta impensabel di nan parti pa usa arma kontra nan rumannan kristian—òf kualkier otro hende—den otro pais. Nan pas i nan unidat ta un parti esensial di nan adorashon, un demostrashon ku nan en bèrdat tin e spiritu di Dios. (Salmo 133:1; Mikéas 2:12; Mateo 22:37-39; Kolosensenan 3:14) Nan ta “buska pas i siguié,” sabiendo ku “e wowonan di SEÑOR ta riba e hustunan.”—Salmo 34:14, 15.

Kon Kristiannan Ta Mira Mundu

12. Ki aktitut di Yehova pa ku hende di e mundu aki Testigunan di Yehova ta imitá, i kon nan ta hasié?

¹² Yehova a pronunsiá un huisio desfaborabel riba e mundu aki, pero ainda e no a husga tur hende individualmente den e mundu aki. Lo e hasi esei pa medio di Hesus na Su debido tempu. (Salmo 67:3, 4; Mateo 25:31-46; 2 Pedro 3:10) Miéntras tantu, e ta mustra un gran amor pa humanidat. Asta el a duna su Yu unigénito pa asina tur hende por haña e oportunidat di risibí bida eterno. (Huan 3:16) Ounke hende ta kritiká nos esfuersonan konstantemente, komo kristiannan nos ta imitá e amor di Dios dor di konta otronan tokante e manera ku Dios ta perkurá salbashon.

13. Kon nos mester mira outoridatnan?

¹³ Kon nos mester mira gobernantenan di e mundu aki? Pablo a kontestá e pregunta ei ora el a skirbi: “Laga tur hende someté nan mes na e outoridatnan ku ta goberná. Pasobra no tin outoridat ku no ta di Dios, i esnan ku ta eksistí, ta Dios a establesé nan [“den nan posishon relativo,” NW].” (Romanonan 13:1, 2) Hende ta okupá posishonnan di outoridat “relativo” (sea mas haltu òf mas abou ku di un otro hende, pero semper inferior ku esun di Yehova) pasobra e Todopoderoso ta permití nan esei. Un kristian ta someté su mes na outoridat di e mundu aki pasobra den e forma ei e ta mustra ku e ta obediente na Yehova. Pero kiko kristiannan mester hasi ora surgi un konflikto entre e rekisitonan di Dios i esnan di un gobièrnu humano?

E Lei di Dios i Esun di Sésar

14, 15. (a) Kon Daniel a logra evitá un konflikto riba e asuntu di obedensia? (b) Ki posishon e tres hebreonan a tuma ora no por a evitá un konflikto den e asuntu di obedensia?

¹⁴ Daniel i su tres kompañeronan a pone un ehèmpel ekselente di kon pa balansá sumishon na gobièrnunan humano ku sumishon na outoridat di Dios. Tempu ku e kuater hóbennan hebreo a haña nan mes den eksilio na Babilonia, nan a obedesé e leinan dje pais ei i a ser skohé masha lihé pa un entrenamentu spesial. Daniel a realisá ku probablemente e training lo a hib’é na konflikto ku e Lei di Yehova. P’esei el a papia e asuntu aki ku e mayordomo enkargá. Esaki a hasi areglonan spesial pa respetá e konsenshi di e kuater hebreonan. (Daniel 1:8-17) Testigunan di Yehova ta sigui e ehèmpel di Daniel ora nan ta splika outoridatnan nan posishon ku takto pa asina evitá problema innesesario.

¹⁵ Sin embargo, na un okashon mas despues, no por a evitá un konflikto riba e asuntu di sumishon aki. E rei di Babilonia a traha un imágen grandi den e vaye di Dura i a manda e funshonarionan haltu, inkluso e gobernantenan ku tabata kontrolá sierto distritonan, pa bini huntu pa inougur’é. Pa e tempu ei, e tres amigunan hebreo di Daniel a ser nombrá komo gobernante di distrito di Babilonia, pues e òrdu a konta pa nan tambe. Na dado momentu durante e seremonianan, tur presente mester a bùig dilanti e imágen. Pero e hebreonan tabata sa ku esaki lo a bai kontra e lei di Dios. (Deuteronomio 5:8-10) Pues ora ku tur otro hende a bùig, nan a keda para. Dor di desobedesé e òrdu di e rei, nan a kore riesgo di muri un morto horibel, i ta un milager so a skapa nan bida; pero nan a preferá di riska nan bida i no desobedesé Yehova.—Daniel 2:49–3:29.

16, 17. Kon e apòstelnan a respondé ora a manda nan stòp di prediká, i pakiko?

¹⁶ Den promé siglo, e lidernan hudiu di Yerúsalèm a manda yama e apòstelnan di Hesukristu i a ordená nan pa stòp di prediká den nòmber di Hesus. Kon nan a reakshoná? Hesus a duna nan e tarea di hasi disipel den tur nashon, ku a inkluí Hudea. Tambe el a bisa nan pa nan ser su testigunan den Yerúsalèm i tambe den e resto di mundu. (Mateo 28:19, 20; Echonan 1:8) E apòstelnan tabata sa ku e mandamentunan di Hesus a representá e boluntat di Dios pa nan. (Huan 5:30; 8:28) P’esei, el a bisa: “Nos mester obedesé Dios mas ku hende.”—Echonan 4:19, 20; 5:29.

¹⁷ E apòstelnan no tabata rebelde. (Proverbionan 24:21) Pero ora e gobernantenan humano a prohibí nan di hasi e boluntat di Dios, úniko kos ku nan por a bisa ta: ‘Nos mester obedesé Dios, i no hende.’ Hesus a bisa ku nos mester “duna Sésar loke ta di Sésar, i Dios loke ta di Dios.” (Marko 12:17) Si nos desobedesé un mandamentu di Dios riba òrdu di un hende, nos ta dunando e hende ei loke ta pertenesé na Dios. Mas bien, nos ta paga bèk tur loke nos debe na Sésar, pero nos ta rekonosé e outoridat supremo di Yehova. E ta e Soberano Universal, e Kreadó, e berdadero Fuente di outoridat.—Revelashon 4:11.

Nos Lo Para Firme

18, 19. Ki posishon ehemplar hopi di nos rumannan a tuma, i kon nos por sigui nan ehèmpel?

¹⁸ Aktualmente mayoria gobièrnu ta rekonosé e posishon neutral di Testigunan di Yehova, i nos ta masha gradisidu pa esei. Sin embargo, den algun pais, e Testigunan a enfrentá oposishon severo. Atraves di siglo 20 i te den nos tempu, algun di nos rumannan a hiba un lucha balente, den sentido spiritual, nan a lucha “e bon lucha di fe.”—1 Timoteo 6:12.

¹⁹ Kon nos por para mes firme ku nan? Na promé lugá, nos ta kòrda ku nos tin ku ferwagt oposishon. Nos no mester bira angustiá ni keda sorprendí ora nos haña nos kuné. Pablo a spièrta Timoteo: “Tur hende ku ta deseá di hiba un bida santu den Kristu Hesus lo wòrdu persiguí.” (2 Timoteo 3:12; 1 Pedro 4:12) Kon nos por pensa di skapa di oposishon den un mundu kaminda e influensia di Satanas ta reina? (Revelashon 12:17) Tanten ku nos ta fiel, semper lo tin algun ku ta ‘keda sorprendí i ta kalumniá nos.’—1 Pedro 4:4.

20. Riba ki bèrdatnan fortalesedor nos tin ku kòrda?

²⁰ Na di dos lugá, nos ta konvensí ku Yehova i su angelnan lo apoyá nos. Manera Eliseo di antigwedat a bisa: “Esnan ku ta ku nos ta mas ku esnan ku ta ku nan.” (2 Reinan 6:16; Salmo 34:7) Yehova lo tin su motibu pakiko e ta permití preshon di opositornan sigui pa un tempu. No opstante, semper lo e duna nos e forsa ku nos tin mester pa perseverá. (Isaías 41:9, 10) Algun a pèrdè nan bida, pero esei no ta spanta nos. Hesus a bisa: “No tene miedu di esnan ku ta mata e kurpa, ma ku no por mata e alma; ma mas bien tene miedu di Esun ku por destruí tantu alma komo kurpa den [“Gehena,” NW].” (Mateo 10:16-23, 28) Ta “stranheronan” nos ta den e mundu aki. Nos ta usa nos tempu aki pa “gara loke ta bida berdadero,” esta bida eterno den Dios su mundu nobo. (1 Pedro 2:11; 1 Timoteo 6:19) Niun hende no por stroba nos di haña e rekompensa ei basta nos keda fiel na Dios.

21. Kiko nos tin ku kòrda semper?

²¹ P’esei, laga nos kòrda e relashon presioso ku nos tin ku Yehova Dios, i semper sea gradisidu p’e bendishon di por ta un siguidó di Kristu i siudadano di e Reino. Laga nos stima nos rumannan di henter kurason, i laga nos semper deleitá den e amor ku nos ta risibí di nan. Riba tur kos, laga nos hasi kaso di e palabranan dje salmista: “Spera riba SEÑOR; sea fuerte i e lo fortalesé bo kurason, sí, spera riba SEÑOR.” (Salmo 27:14; Isaías 54:17) E ora ei, meskos ku hopi kristian ku a bai nos dilanti, nos lo para firme ku nos speransa sigur komo fiel kristiannan neutral ku no ta di e mundu aki.

Bo Por Splika?

• Kon nos relashon ku Yehova ta separá nos for di mundu?

• Komo siudadano di e Reino di Dios, kon nos ta mantené un posishon neutral den e mundu aki?

• Den ki maneranan amor pa nos rumannan ta mantené nos neutral, separá for di mundu?

[Plachi na página 15]

Kon nos sumishon n’e Reino di Dios ta influensiá nos relashon ku e mundu aki?

[Plachi na página 16]

Un hutu i un tutsi ta traha felismente ku otro

[Plachi na página 17]

Rumannan kristian hudiu i árabe

[Plachi na página 17]

Kristiannan serbio, bosnio i kroata ta disfrutá di otro su kompania

[Plachi na página 18]

Kiko ta e kos korekto pa hasi ora gobernantenan ta manda nos kibra e lei di Dios?