E Palabra di Yehova Ta Bibu

Puntonan Sobresaliente di e Buki di Esdras

E BUKI bíbliko di Esdras ta sigui kaminda Segundo Krónikanan ta terminá. Su eskritor, Esdras e saserdote, ta kuminsá e relato kaminda Rei Siro di Persia ta saka un dekreto ku ta permití un restu di e hudiunan eksiliá na Babilonia regresá nan pais. E narashon ta terminá kaminda Esdras ta tuma medidanan pa purifiká e hudiunan ku a kontaminá nan mes ku e hendenan di e pais. En total, e buki ta abarká un periodo di 70 aña, di aña 537 pa 467 promé ku nos era (P.E.K.).

Esdras tabatin bon kla su dilanti pa ki propósito e ta skirbi e buki. E kier a mustra kon Yehova a kumpli ku Su promesa di libra Su pueblo for di eksilio na Babilonia i restorá adorashon berdadero na Yerusalèm. Pues, Esdras ta enfoká solamente riba e susesonan ku tin keber ku e propósito aki. E buki di Esdras ta konta kon nan a rekonstruí e tèmpel i kon Yehova su adorashon a ser restablesé apesar di oposishon i e imperfekshon di Dios su pueblo. E relato ta di gran interes pa nos pasobra nos tambe ta bibando den un tempu di restorashon. Hopi hende aktualmente ta basha bai na ‘e seru di Yehova,’ i henter e tera ta serka di ser “yená ku konosementu di e gloria” di Yehova.—Isaias 2:2, 3; Habakuk 2:14.

NAN TA REKONSTRUÍ E TÈMPEL

(Esdras 1:1–6:22)

Rònt di 50.000 eksiliado hudiu ta reakshoná riba e dekreto di liberashon ku Siro a saka, i nan ta regresá Yerusalèm bou di e liderato di Gobernadó Zorobabel (òf, Sesbasar). E hudiunan aki ku a regresá ta traha un altar mesora na e sitio i ta kuminsá ofresé sakrifisio na Yehova.

E aña siguiente e israelitanan ta pone e fundeshi di e kas di Yehova. Enemigunan ta blo interferí ku e trabou di rekonstrukshon i ku tempu nan ta logra haña un dekreto real pa para e trabou. Profetanan Hageo i Zakarias ta enkurashá e pueblo di manera ku nan ta reanudá e konstrukshon di e tèmpel apesar di e prohibishon ku tin. Miedu di bai kontra di un dekreto perso kual ta inkambiabel—dekretá originalmente dor di Siro—ta tene nan atversarionan na un distansia. Ta un investigashon ofisial ta saka na kla e órden di Siro “tokante di e kas di Dios na Yerusalèm.” (Esdras 6:3) E trabou ta kana bon i nan ta kab’é.

Kontesta Riba Pregunta Bíbliko:

1:3-6—E israelitanan ku no a ofresé pa bai bèk nan pais tabata débil den fe? Algun di nan kisas no a regresá Yerusalèm debí ku nan tabata materialista òf nan no tabatin apresio pa adorashon berdadero, pero esaki no tabata asina den tur kaso. Na promé lugá, e biahe di 1.600 kilometer pa Yerusalèm a dura kuater pa sinku luna. Ademas, e hendenan lo mester tabatin hopi resistensia físiko pa establesé nan mes den un tera ku tabata desolá pa 70 aña i kuminsá hasi trabounan di rekonstrukshon einan. P’esei, sirkunstansianan desfaborabel, manera malesa, edat avansá i obligashonnan familiar, sin duda a stroba algun hudiu di regresá.

2:43—Ken e sirbidónan di tèmpel [òf, “netineonan,” NW] tabata? Esakinan tabata personanan di orígen no-israelita ku a fungi komo sirbidó òf katibu di tèmpel. Entre nan tabatin e desendientenan di e gabaonitanan di tempu di Josué i otro hende “ku David i e prensnan a duna pa e sirbishi di e levitanan.”—Esdras 8:20.

2:55—Ken e yu hòmbernan di e sirbidónan di Salomon tabata? Esakinan tabata personanan no-israelita na ken a ser duná privilegionan spesial den e sirbishi di Yehova. Kisas nan a fungi komo eskriba òf kopista na e tèmpel òf den un funshon atministrativo.

2:61-63—E Urim i Tumim a ser usá ora ku tabatin mester di un kontesta for di Yehova. Nan tabata disponibel pa e eksiliadonan ku a regresá? Personanan ku a bisa ku nan tabata di desendensia saserdotal pero ku no por a establesé nan genealogia, por a konfirmá esei dor di konsultá e Urim i Tumim. Esdras ta djis menshoná esaki komo un posibilidat. Den e Skritura no tin ningun kaminda skirbí ku nan a usa e Urim i Tumim e tempu ei ni despues. Segun tradishon hudiu, e Urim i Tumim supuestamente a disparsé ku e destrukshon di e tèmpel na aña 607 P.E.K.

3:12—Dikon “e ansianonan ku a mira e promé tèmpel” di Yehova a yora? E hòmbernan aki por a kòrda kon magnífiko e tèmpel ku Salomon a konstruí tabata. E fundeshi ku tabatin nan dilanti di e tèmpel nobo a “parse nada kompará ku e otro.” (Hageo 2:2, 3) Akaso nan esfuerso lo a trese e gloria di e tèmpel anterior bèk? Nan lo mester a sinti nan mes desanimá, i ta p’esei nan a yora.

3:8-10; 4:23, 24; 6:15, 16—Kuantu aña a tuma pa rekonstruí e tèmpel? Nan a pone e fundeshi di e tèmpel na aña 536 P.E.K., “den e di dos aña di nan yegada.” E trabou di konstrukshon a para den e dianan di Rei Artaherhes, na aña 522 P.E.K. E prohibishon a sigui te ku 520 P.E.K., e di dos aña di Rei Darío. E tèmpel a keda kompletá den e di seis aña di su reinado, esta, 515 P.E.K. (Wak e kuadro titulá “Reinan di Persia di Aña 537 pa 467 Promé ku Nos Era [P.E.K.].”) Pues, konstrukshon di e tèmpel a tuma rònt di 20 aña.

4:8–6:18—E sekshon aki di Esdras a ser skirbí na arameo. Dikon? E sekshon aki ta kontené prinsipalmente kopia di kartanan ku ofisialnan gubernamental a manda pa reinan i e reinan su kontesta. Esdras a kopia nan for di registronan públiko skirbí na arameo, e idioma komersial i diplomátiko di e tempu ei. Otro partinan di Beibel skirbí den e antiguo idioma semítiko aki ta Esdras 7:12-26; Jeremias 10:11 i Daniel 2:4b–7:28.

Lès pa Nos:

1:2. Loke Isaias a profetisá un 200 aña promé a kumpli. (Isaias 44:28) Profesianan den e Palabra di Yehova nunka ta faya.

1:3-6. Meskos ku algun di e israelitanan ku a keda den Babilonia, hopi Testigu di Yehova no por bai den sirbishi di tempu kompletu ni sirbi kaminda tin mas nesesidat. Sin embargo, nan ta apoyá i animá esnan ku por. Tambe nan ta duna donashonnan boluntario pa promové e trabou di prediká e Reino i di hasi disipel.

3:1-6. Den e di shete luna di aña 537 P.E.K. (luna di tisri, ku ta korespondé ku sèptèmber/òktober), e hudiunan fiel ku a regresá a ofresé nan promé sakrifisio. E babilonionan a drenta Yerusalèm den e di sinku luna (luna di ab, ku ta korespondé ku yüli/ougùstùs) di aña 607 P.E.K., i dos luna despues e stat a keda kompletamente desolá. (2 Reinan 25:8-17, 22-26) Manera a ser profetisá, Yerusalèm su desolashon di 70 aña a terminá presis na tempu. (Jeremias 25:11; 29:10) Loke sea ku e Palabra di Yehova profetisá, semper ta kumpli.

4:1-3. E restu fiel a rechasá un oferta ku lo a nifiká forma un aliansa religioso ku adoradónan di dios falsu. (Eksodo 20:5; 34:12) Yehova su adoradónan djawe tampoko no ta tuma parti den ningun movementu ekuméniko òf di union di fe.

5:1-7; 6:1-12. Yehova por maniobrá asuntunan pa nan resultá na fabor di su pueblo.

6:14, 22. Partisipando ku selo den e trabou di Yehova ta trese su aprobashon i bendishon.

6:21. Mirando e progreso di Yehova su trabou a motivá otro hende pa hasi e kambionan nesesario den nan bida. Esaki tabata e kaso ku e samaritanonan ku tabata biba e tempu ei den e pais di e hudiunan i tambe e eksiliadonan ku a regresá i kendenan a entregá na influensianan pagano. Pues anto, esaki no ta un animashon pa nos awe partisipá ku entusiasmo den e trabou ku Dios a asigná nos, inkluso e trabou di proklamá e Reino?

ESDRAS TA BIN YERUSALÈM

(Esdras 7:1–10:44)

Sinkuenta aña a pasa desde ku nan a inougurá e kas rekonstruí di Yehova. Ta aña 468 P.E.K. Esdras, huntu ku un restu di e pueblo di Dios i ku fondonan kontribuí, ta sali di Babilonia bai Yerusalèm. Kiko e ta haña einan?

E prensnan ta konta Esdras: “E pueblo di Israel i e saserdotenan i e levitanan no a separá nan mes for di e pueblonan di e teranan, pa loke ta trata nan abominashonnan.” Es mas, “e mannan di e prensnan i e gobernantenan tabata esnan di promé pa hasi e infieldat aki.” (Esdras 9:1, 2) Esdras ta keda di shòk. Nan ta enkurash’é p’e “tene kurashi i aktua.” (Esdras 10:4) Esdras ta tuma medidanan pa korigí e situashon, i e pueblo ta reakshoná faborablemente.

Kontesta Riba Pregunta Bíbliko:

7:1, 7, 11—Tur e versíkulonan aki ta referí na Artaherhes, kende a para e trabou di konstrukshon? Nò. Artaherhes ta un nòmber òf título ku nan a usa pa dos rei di Persia. Un di e reinan tabata sea Bardiya òf Gaumata, kende a ordená pa para e konstrukshon di e tèmpel na aña 522 P.E.K. E Artaherhes ku tabata na mando tempu ku Esdras a bin Yerusalèm ta Artaherhes Longimano.

7:28–8:20—Dikon hopi hudiu na Babilonia no tabata dispuesto pa bai Yerusalèm huntu ku Esdras? Maske mas ku 60 aña a pasa desde ku e promé grupo di hudiu a regresá nan pais, Yerusalèm tabatin masha tiki habitante. Regresá Yerusalèm a nifiká forma un bibá nobo bou di sirkunstansianan difísil i peligroso. E Yerusalèm di e tempu ei no tabatin prospektonan material atraktivo pa e hudiunan ku kisas tabata prosperá den Babilonia. Tampoko no mester lubidá e biahe peligroso. E israelitanan ku a regresá mester tabatin fe firme den Yehova, selo pa adorashon berdadero i kurashi pa muda bai Yerusalèm. Asta Esdras mes a fortalesé su mes a base di e man di Yehova ku tabata riba dje. Animá pa Esdras, 1.500 famia—ku a forma kisas un total di 6.000 hende—a reakshoná faborablemente. Despues ku Esdras a tuma mas inisiativa, 38 levita i 220 sirbidó di tèmpel a reakshoná.

9:1, 2—Kon serio tabata e menasa di matrimonio miksto ku e hendenan di e tera? E nashon restorá lo mester tabata e protektor di Yehova su adorashon te na binida di e Mesias. Matrimonio miksto ku otro habitantenan tabata un berdadero menasa pa adorashon berdadero. Debí ku algun israelita a forma aliansanan matrimonial ku e hendenan adoradó di dios falsu, henter e nashon ku tempu lo por a ser apsorbá den e nashonnan pagano. Adorashon puru lo por a disparsé for di riba tera. Serka ken e Mesias lo a bin e ora ei? Nada straño ku Esdras a keda babuká ora ku el a mira loke a sosodé!

10:3, 44—Dikon nan a manda e yunan bai huntu ku e esposanan? Si e yunan a keda atras, lo tabatin mas chèns ku e esposanan ku nan a manda bai lo a regresá pa motibu di e yunan. Ademas, yu chikitu por lo general tin mester di kuido di nan mama.

Lès pa Nos:

7:10. Esdras a pone un bon ehèmpel pa nos komo un studiante diligente i tambe un maestro efektivo di e Palabra di Dios. Pa medio di orashon el a prepará su kurason pa studia e Lei di Yehova. Segun ku Esdras a konsulta e Lei, el a presta sumo atenshon na loke Yehova tabata bisa. Esdras a apliká loke el a siña i a hasi esfuerso pa siña otro hende.

7:13. Yehova ke sirbidónan dispuesto.

7:27, 28; 8:21-23. Esdras a duna krédito na Yehova, el a roga Yehova sinseramente promé ku el a hasi un biahe largu i peligroso pa Yerusalèm, i e tabata dispuesto pa riska su siguridat personal pa kontribuí na e gloria di Dios. Pues anto, el a pone un ekselente ehèmpel pa nos.

9:2. Nos tin ku tuma na serio e konseho pa kasa “basta ta den Señor.”—1 Korintionan 7:39.

9:14, 15. Mal asosiashon por hiba na Yehova su desaprobashon.

10:2-12, 44. E hendenan ku a tuma esposa stranhero a repentí humildemente i a korigí nan kaminda robes. Nan aktitut i akshon tabata ehemplar.

Yehova Ta Kumpli ku Su Promesanan

Esta balioso e buki di Esdras ta pa nos! Presis na ora, Yehova a kumpli ku su promesa di libra su pueblo for di eksilio na Babilonia i restorá adorashon berdadero na Yerusalèm. Esei no ta fortalesé nos fe den Yehova i den su promesanan?

Pensa riba e ehèmpelnan ku e buki di Esdras ta duna nos. Esdras i e restu ku a regresá Yerusalèm pa yuda restorá adorashon puru a demostrá deboshon ehemplar na Dios. E buki aki ta hala atenshon tambe na e fe di hendenan stranhero ku tabata teme Dios, i e aktitut humilde di malechornan ku a repentí. De echo, e palabranan inspirá di Esdras ta duna prueba bon kla ku “e palabra di Dios ta bibu i aktivo.”—Hebreonan 4:12.

[Tabèl/Plachi na página 18]

REINAN DI PERSIA DI AÑA 537 PA 467 PROMÉ KU NOS ERA (P.E.K.)

Siro e Grandi (Esdras 1:1) a muri na 530 P.E.K.

Cambises, òf Asuero (Esdras 4:6) 530-22 P.E.K.

Artaherhes—Bardiya òf Gaumata (Esdras 4:7) 522 P.E.K. (Asesiná despues di a reina apénas shete luna)

Darío I (Esdras 4:24) 522-486 P.E.K.

Hérhes, òf Asueroa 486-75 P.E.K. (A reina komo ko-gobernante ku Darío I di 496-86 P.E.K.)

Artaherhes Longimano (Esdras 7:1) 475-24 P.E.K.

[Nota]

[Plachi]

Asuero

[Plachi na página 17]

Siro

[Plachi na página 17]

E Silinder di Siro ta menshoná e kustumber di manda prezunan bèk nan pais

[Rekonosementu]

Silinder: Potrèt saká pa kortesia di Museo Britániko

[Plachi na página 20]

Bo sa kiko a hasi Esdras un maestro efektivo?