Dios Tin Interes den Hende Grandi

E MALTRATO di hende grandi ku ta reina awe na tur parti di mundu no mester sorprendé nos. Hopi tempu pasá, Beibel a profetisá ku durante “e último dianan” di e mundu malbado aki, hende lo “stima nan mes [i] lo no tin kariño.” (2 Timoteo 3:1-3, BPK) E palabra griego tradusí komo “kariño” por referí tambe na e amor ku ta eksistí normalmente den famia. I bèrdat manera Beibel ta bisa, awe e kariño ei ta masha skars.

Na kontraste ku personanan ku ta trata hende grandi malu, Yehova Dios sí ta duna hopi balor na hende di edat avansá i e tin interes den nan. Wak kon Beibel ta mustra nos esaki.

“Un Hues pa Biuda”

E interes ku Yehova Dios tin den hende grandi ta bisto den e Skritura Hebreo. Por ehèmpel, na Salmo 68:5, David ta yama Dios “un hues pa biuda,” i por lo general ta trata aki di hende grandi.a Den otro tradukshonnan di Beibel, e palabra “hues” ta ser tradusí komo “defensor” òf “protektor.” Tur kos ta mustra anto ku Yehova ta interesá den e biudanan. De echo, Beibel ta bisa ku si nan ser tratá malu, su “rabia lo sende.” (Eksodo 22:22-24) Tantu Dios komo su sirbidónan ta duna hopi balor na biuda i na tur hende grandi fiel. Proverbionan 16:31 [NW] ta ekspresá e punto di bista di Yehova Dios i di su pueblo den e siguiente deklarashon: “Kabei blanku ta un korona di bunitesa ora e ser hañá den e kaminda di hustisia.”

Nada straño anto ku rèspèt pa hende grandi tabata un parti fundamental di e Lei ku Yehova a duna Israel. Un di e mandatonan a bisa e israelitanan: “Lanta para pa esun ku tin kabei blanku, onra e ansiano i teme bo Dios; Ami ta SEÑOR.” (Levítiko 19:32) P’esei den Israel rèspèt pa hende grandi tabata estrechamente ligá ku e persona su relashon ku Yehova Dios. Esun ku a trata un hende grandi malu no por a bisa ku e stima Dios.

Kristiannan no ta kai bou di e Lei di Moisés. Pero nan ta kai sí bou di “e lei di Kristu,” i esei tin un efekto profundo riba nan kondukta i aktitut, lokual ta inkluí mustra amor pa nan mayornan i hende grandi, i tambe interes den nan. (Galationan 6:2; Efesionan 6:1-3; 1 Timoteo 5:1-3) I kristiannan ta mustra amor no djis pasobra esei ta un deber sino pasobra nan ta sinti nan motivá di kurason. Apòstel Pedro a insta: “Stima otro fervientemente di kurason.”—1 Pedro 1:22.

Disipel Santiago ta duna mas motivashon pa nos mustra interes den hende grandi. El a skirbi: “E religion puru i sin mancha den bista di nos Dios i Tata [ta]: bishitá huérfano i biuda den nan aflikshon, i konserbá bo mes liber di mancha di mundu.” (Santiago 1:27) Santiago ta pone nos pensa seriamente riba un punto. E ta hala nos atenshon riba kon importante e personanan stimá aki ta pa Yehova.

P’esei, no ta sufisiente pa simplemente apstené di trata hende grandi malu. Mas bien, nos tin ku mustra interes aktivo den nan dor di hasi kosnan ku ta benefisioso pa nan. (Mira e kuadro “Amor den Akshon,” na página 6-7.) Santiago a skirbi: “Fe sin obranan ta morto.”—Santiago 2:26.

Konsuelo “den Nan Aflikshon”

Tin un punto mas ku nos por siña for di e palabranan di Santiago. Ripará ku Santiago a bisa kristiannan pa perkurá pa biudanan “den nan aflikshon.” E palabra griego tradusí komo “aflikshon” ta nifiká básikamente angustia òf sufrimentu kousá pa e preshonnan di nos sirkunstansianan di bida. Sin duda, hopi hende grandi ta pasa e tipo di angustia ei. Algun ta lucha ku soledat. Otronan ta deprimí debí na e limitashonnan ku behes ta trese kuné. Asta esnan ku ta basta aktivo den nan sirbishi na Dios por sinti nan desanimá. Tuma por ehèmpel John,b un fiel proklamadó di e Reino di Dios pa mas ku kuater dékada, di kua e último tresnan el a pasa den e sirbishi spesial di tempu kompletu. Awor ku John tin su 80 i piku aña, e ta rekonosé ku e sa sinti su mes desanimá. E ta bisa: “Hopi biaha mi ta wak bèk i mi ta kòrda mi fayonan. Nan tabata hopi. Kada biaha mi ta bisa den mi mes ku mi por a hasi mihó.”

Personanan asina por haña konsuelo den e echo ku ounke Yehova ta perfekto, e no ta un perfekshonista. Maske e ta konsiente di nos fayonan, Beibel ta bisa di dje: “Si abo, SEÑOR, tuma inikidatnan na kuenta, o Señor, ken lo por a keda para?” (Salmo 130:3) Sí, Yehova ta wak mas aleu ku nos fayonan i ta mira loke tin den nos kurason. Kon nos por sa esaki?

Rei David, kende komo hende imperfekto a kometé hopi fayo, a ser inspirá pa Dios pa komponé e siguiente palabranan, registrá na Salmo 139:1-3: “O SEÑOR, bo a saminá mi i bo konosé mi. Bo sa ki ora mi ta sinta i ki ora mi ta lanta; bo ta komprondé mi pensamentunan djaleu. Bo ta skudriñá mi kanamentu i mi drumimentu, i tur mi kamindanan ta konosí pa bo.” Aki e palabra “skudriñá” ta nifiká literalmente “sefta,” kasi meskos ku un kunukero ta bienta bagas pa laga e grano keda atras. Bou di inspirashon divino, David ta garantisá nos ku Yehova sa kon pa sefta nos bon obranan i konserbá esakinan den su memoria.

Nos Tata selestial i miserikòrdioso ta kòrda i tambe apresiá nos bon obranan tanten ku nos keda fiel na dje. Sí, Beibel ta bisa ku pa Yehova lo ta un akto di inhustisia si e lubidá nos trabou i e amor ku nos a mustra pa su nòmber.—Hebreonan 6:10.

“E Promé Kosnan A Pasa”

Beibel ta mustra ku nunka tabata e propósito di Dios pa hende eksperimentá problemanan di behes. Ta despues ku nos promé mayornan, e promé hòmber i muhé, a rebeldiá kontra nan Kreadó, hende a kuminsá sinti e efektonan dañino di behes. (Génesis 3:17-19; Romanonan 5:12) Pero esaki lo no sigui asina pa tempu indefiní.

Manera nos a kaba di mira, hopi di e problemanan djawe—inkluso maltrato di hende grandi—ta duna prueba ku nos ta bibando den “e último dianan” di e sistema di kosnan aki. (2 Timoteo 3:1) E propósito di Dios ta pa eliminá e efektonan di piká, inkluso e konsekuensianan dañino di behes i morto. Beibel ta bisa: “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—Revelashon 21:4.

Den e mundu nobo di Dios, e dolónan i krekechénan di behes lo pasa pa olvido. Meskos ta konta pa maltrato di hende grandi. (Mikeas 4:4) Asta hende ku a muri i ku ta den e memoria di Dios lo ser resusitá pa nan tambe haña e oportunidat di biba pa semper den un paradeis riba tera. (Juan 5:28, 29) E tempu ei, mas ku nunka promé, lo bira bisto ku Yehova Dios tin interes no solamente den hende grandi sino tambe den tur hende ku ta obedes’é.

[Nota]

[Kuadro/Plachinan na página 6]

Amor den Akshon

Entre Testigunan di Yehova, ansianonan di kongregashon ta esnan ku ta tuma inisiativa pa mustra interes den e miembronan di edat avansá. Nan ta tuma e spièrtamentu di apòstel Pedro pa “pastoriá e tou di Dios meimei di [nan]” hopi na serio. (1 Pedro 5:2) Nan trabou di kuida e tou di Dios ta enserá perkurá pa hende grandi den maneranan práktiko. I kiko asina esaki ta enbolbé?

Pa nan por haña un bon idea kiko ta e nesesidatnan di un persona di edat, nan mester tin pasenshi kuné, si ta posibel bishit’é vários biaha i kòmbersá amigablemente kuné. Kisas e mester di yudansa ku hasimentu di kómpras i trabounan di limpiesa, ku transpòrt pa bai reunionnan kristian, ku lesamentu di Beibel i publikashonnan kristian i ku hopi otro kos mas. Kaminda ta posibel, mester hasi algun areglo práktiko i konfiabel, i implementá esakinan.c

Pero kiko mester hasi si un ruman hòmber òf muhé di edat di e kongregashon ta den pèrtá, kisas den un nesesidat finansiero? Na promé lugá, lo ta bon pa haña sa si tin yu òf otro famia ku por yuda. Esaki lo kuadra ku loke 1 Timoteo 5:4 ta trese dilanti: “Si un biuda tin yu òf nietu, laga nan siña promé di praktiká piedat pa ku nan mes famia, i di rekompensá nan mayornan, pasobra esaki ta aseptabel den bista di Dios.”

Kisas e hende grandi tin mester di yudansa pa investigá si e ta bini na remarke pa kualke areglo sosial di parti di gobièrnu. Tal bes un ruman di e kongregashon lo por duna un man den esaki. Si e tipo di asistensia aki no ta disponibel, e ansianonan lo por determiná si e ruman ta kualifiká pa haña yudansa di e kongregashon. Den algun kaso esaki tabata permití den e kongregashon di promé siglo pasobra apòstel Pablo a skirbi su kolaboradó Timoteo: “Laga un biuda wòrdu poní riba lista solamente si e tin mas ku sesenta aña, i tabata esposa di ún hòmber so, i si e tin testimonio di bon obra; i si el a kria yu, si el a mustra hospitalidat na stranhero, si el a laba pia di e santunan, si el a yuda esnan den aflikshon i si el a dediká su mes na tur sorto di bon obra.”—1 Timoteo 5:9, 10.

[Nota]

[Plachi na página 5]

Dorkas a mustra interes den biuda pober.—Echonan 9:36-39