Oumento bou di e Vários Gruponan Étniko di Uganda

UGANDA, situá entre dos ekstenshon di e Gran Vaye di Rift di Ost Afrika i na ámbos banda di evenar, ta un pais sumamente bunita. E ta riku na naturalesa i su flora i founa ta interesante. Debí ku e ta ubiká riba e gran altiplano (hoogland) di Afrika, e tin un klima fresku i un paisahe fasinante di serunan ku ta ekstendé pa sientos di kilometer.

Masha poko pais tin partinan ku ta varia for di sumamente friu te kayente den un área chikitu, manera tin na Uganda. E ta ekstendé for di e puntanan di seru kubrí ku sneu di e Serunan di Luna, e Serunan di Ruwenzori, den wèst, pa e áreanan semi-seku den ost. Den su vayenan bo por topa olefante, búfalo i leon, i den e serunan i selvanan denso ta biba gorila, chimpansé i mas ku 1.000 sorto di para. Gran parti di e kontinente afrikano ta lucha ku sekura i hamber, pero Uganda ta bendishoná ku riu i lago, manera Viktoria, e di dos lago di awa dushi mas grandi na mundu. Den parti nort, Lago Viktoria ta desemboká den Riu Nilo. Nada straño ku Winston Churchill a referí na e tera aki komo “e pèrla di Afrika”!

“E Pèrla” Ta Bria Awe

Sin embargo, e atrakshon prinsipal di Uganda ta su pueblo amigabel, hospitalario i hopi variá. Por deskribí e pais predominantemente “kristian” aki komo un meskla di vários grupo étniko i kultura, ku te n’e dia djawe tin nan propio tradishon- i formanan di bisti.

Últimamente, mas i mas ugandes ta respondiendo na e bon nobo di Beibel relashoná ku e tempu ora pas permanente lo reina rònt mundu. (Salmo 37:11; Revelashon 21:4) Ta un reto pa hiba e mensahe aki na tur hende, den un pais ku ta kasi mes grandi ku Gran Bretaña.

For di un kuminsamentu chikitu ora e promé boutismo di un residente lokal komo Testigu di Yehova dediká a tuma lugá den Lago Viktoria na 1955, e “chikitu” en bèrdat a bira mil na 1992. Desde e tempu ei padilanti tabatin un oumento kontinuo. Esaki ta na armonia ku e palabranan alentador di Dios: “Na su debido tempu, ami, SEÑOR, lo pura hasi esaki.”—Isaias 60:22.

Nan Ta Vense Bareranan di Idioma

Ingles ta e idioma ofisial i hopi hende ta papi’é, foral den edukashon, pero e no ta e idioma nativo di mayoria ugandes. Pues, den nan afan pa alkansá hende ku e bon nobo, Testigunan di Yehova ta tuma otro idiomanan prinsipal tambe na konsiderashon. Esaki tabata nesesario pasobra mas ku 80 porshento di e 25 mion hendenan di e pais ta biba den áreanan di kunuku òf statnan chikitu, kaminda hende ta dependé prinsipalmente di nan idioma materno pa komuniká ku otro. Pues ta un reto pa alkansá e gruponan di idioma aki i pa satisfasé e nesesidatnan spiritual di e hendenan.

No opstante, Testigunan di Yehova ta hasiendo un gran esfuerso pa satisfasé e nesesidatnan aki dor di prediká na hende den nan mes idioma i dor di produsí literatura bíbliko den vários idioma. Na e sukursal den e kapital, Kampala, timnan di tradukshon ta prepará literatura pa kuater grupo di idioma, ku ta acholi, luganda, lhukonzo i runyankore. Ademas, asambleanan kristian tené den vários idioma den henter e pais tabatin asistensianan ekselente, mas ku dòbel e kantidat di Testigu di Yehova. Esaki ta indiká bon kla ku e esfuersonan pa alkansá vários grupo di idioma ta kontribuyendo na un oumento spiritual rápido. Pero esaki no ta tur kos.

Pioneronan Ta Enkabesá e Obra

Kongregashonnan ta apoyá di buena gana e kampañanan anual di mas o ménos tres luna, durante kua nan ta bai prediká den teritorionan aislá. (Echonan 16:9) Un kantidat kresiente di pionero, òf predikadó di tempu kompletu, yòn i entusiasmá ta enkabesá e obra aki. Nan ta bai áreanan leu kaminda, den algun kaso, e mensahe di e bon nobo no a yega ainda.

Dos Testigu a ser asigná komo pionero spesial pa un periodo di tres luna na Bushenyi, un pueblo chikitu parti wèst di Uganda. Huntu ku e úniko Testigu den e área ei, nan a prediká i organisá reunionnan kristian. Denter di un luna, e dos pioneronan tabata kondusí estudio regular di Beibel ku 40 persona, di kua 17 a kuminsá asistí na e reunionnan di Testigunan di Yehova. E pioneronan ta konta: “Algun persona ku nos a ofresé e foyeto Kico Dios Ta Rekerí di Nos?a a bini nos kas algun dia despues ku vários papel kaminda nan a skirbi e kontestanan riba e preguntanan ku tin den e foyeto. Nan kier a sa si nan kontestanan tabata korekto.” Awe, den e stat ei tin un kongregashon ku su propio Salòn di Reino.

Dos pionero a biaha bai un teritorio den parti wèst di Uganda kaminda nunka promé e mensahe di e bon nobo no a yega di ser prediká. Nan a skirbi: “E hendenan tin un berdadero set pa e bèrdat di Beibel. Durante e tres lunanan ku nos tabata akinan, nos por a kuminsá i kondusí 86 estudio di Beibel.” Djis despues a establesé ofisialmente un grupo di Testigu den e área ei.

Otro Trahadónan Entusiasmá den e Teritorio

Entre e pioneronan yen di entusiasmo tin algun ku a sirbi pa hopi aña. Por ehèmpel, promé ku Patrick a bira un Testigu di Yehova, e tabata toka klarinèt den e banda di forsanan aéreo dje gobernante di Uganda, Idi Amin. Na 1983, seis luna despues ku Patrick a batisá, el a djòin e filanan di predikadónan di tempu kompletu. Awe e ta un superintendente biahero ku ta bishitá i animá e kongregashonnan.

Margaret a batisá na 1962. Apesar ku e tin kasi 80 aña di edat i ta lucha ku un problema di hep ku ta strob’é di move manera e ke, e ta dediká rònt di 70 ora pa luna na kompartí e speransa basá riba Beibel ku su bisiñanan. E ta pone e literatura na bista riba un banki pafó di su kas i ta kuminsá kòmbersá ku ken ku pasa eibanda i ku tin gana di skucha e bon nobo tokante un mundu nobo pasífiko.

Simon, un kunukero di ost Uganda, tabata buskando e bèrdat pa 16 aña largu ora ku na 1995 el a haña algun literatura publiká dor di Testigunan di Yehova. Loke el a lesa a dun’é e deseo pa sa mas tokante e Reino di Dios i e propósito maravioso di Yehova pa tera. Na Kamuli kaminda Simon tabata biba no tabatin Testigu, pues el a biaha bai Kampala, 140 kilometer leu, pa buska nan. Awe tin un kongregashon den su pueblo.

“Nos T’ei pa Keda”

Meskos ku den otro áreanan di Afrika, hopi hende ta ferwagt pa un grupo religioso tin un lugá di adorashon adekuá. Pa algun kongregashon di Testigu di Yehova, esaki a presentá un problema aparentemente sin solushon pasobra nan no tabatin e medionan finansiero pa konstruí un Salòn di Reino adekuá. No tin palabra pa deskribí e gratitut ku e rumannan a sinti ora ku na kabamentu di 1999 a kuminsá rònt mundu ku un programa aselerá pa konstruí Salòn di Reino. Durante e siguiente sinku añanan, a traha 40 Salòn di Reino na Uganda. Awe, kasi tur kongregashon tin nan propio Salòn di Reino modesto pero representabel. E mensahe ku e aktividat di konstrukshon ei ta transmití na komunidatnan lokal ta: “Nos t’ei pa keda.” Esaki sin duda a kontribuí na oumento.

Un kongregashon chikitu den nort di Uganda tabata tene su reunionnan bou di algun palu di mango ku tabata duna bon sombra. Ora a logra haña un tereno, kosnan a kana rápidamente. E rumannan di e tim di konstrukshon, ku yudansa di e Testigunan lokal, a kuminsá konstruí un Salòn di Reino. Un eks-polítiko prominente den e área a keda impreshoná ku e trabou. El a ofresé e rumannan su garashi pa nan us’é pa tene nan reunionnan te ora e Salòn di Reino tabata kla. El a aseptá un estudio di Beibel tambe ku un di e trahadónan boluntario di konstrukshon. Awor e ta un publikadó batisá yen di entusiasmo, kontentu di por rindi adorashon na Yehova den e bunita Salòn di Reino ei!

Na un proyekto di konstrukshon di Salòn di Reino den e parti zùitost dje pais, e amabilidat, e amor i spiritu di koperashon ku un mazòn lokal a opservá den e rumannan a konmov’é asina tantu ku el a ofresé pa yuda boluntariamente ku e trabou. Den e fase final di e proyekto, el a asta traha henter anochi pa e rumannan por a kaba ku e Salòn di Reino pa e programa di dedikashon e siguiente mainta. El a bisa: “Boso ta e úniko hendenan ku di bèrdat ta stima otro, no ku palabra so.”

Apesar di Problema, Tin Potensial pa Oumento

Awor ku e rumannan ta predikando den mas teritorio na Uganda, tin un kresementu formal den e kantidat di Testigu einan, i hopi hende interesá ta asosiando ku e kongregashonnan. Sin embargo, e gran kantidat di refugiado ku a basha drenta Uganda ta motibu di preokupashon. Guera sivil den paisnan bisiña a afektá e pueblo di Yehova tambe. E Testigunan den kamponan di refugiado a manifestá un konfiansa grandi den Yehova. Un eks alto ofisial di un pais bisiña ku tambe a yega di persiguí e Testigunan tempu ku tabatin un prohibishon den e pais ei, ta kòrda ku ántes e tabata bon pará. Despues ku el a studia Beibel den un di e kamponan di refugiado i a bira Testigu di Yehova, el a komentá: “Prosperidat material i un posishon haltu den e mundu aki no tin muchu balor. Ounke mi ta pober i malu aworakí, mi bida ta muchu mas mihó ku nunka. Mi konosé Yehova, i mi ta masha gradisidu pa e privilegio di por aserk’é den orashon. Ademas di tin un speransa firme pa futuro, mi sa pakiko nos tin ku soportá problema awe. Pues mi tin un pas interior ku nunka ántes mi tabatin.”

Tin un dicho ku ta bisa ku si bo hinka un pida palu den e tera fértil di Uganda anochi, pa mainta lo e tin rais. E kresementu spiritual ku ta tumando lugá den e pais ei ta indiká ku e tereno spiritual tambe ta masha fértil. Nos ta gradisí Yehova Dios ku el a permití tempu pa mas hende ainda di e poblashon hopi variá di Uganda siña tokante su Reino. Hesus a kompará esaki ku un “pèrla di gran balor” ku mas i mas hende na Uganda a kuminsá komprondé.—Mateo 13:45, 46.

[Nota]

[Mapanan na página 8]

(Pa e teksto den su formato kompleto, wak e publikashon)

SUDAN

UGANDA

Riu Nilo

Kamuli

Tororo

Kampala

Bushenyi

Lago Viktoria

KENIA

TANZANIA

RUANDA

[Plachi na página 9]

Tres di e hopi predikadónan pionero yen di entusiasmo

[Plachi na página 10]

Patrick

[Plachi na página 10]

Margaret

[Plachi na página 10]

Simon

[Plachi na página 10]

Kongreso di distrito na Tororo

[Rekonosementu pa Potrèt na página 8]

Fondo: © Uganda Tourist Board