Dignidat Humano—Un Derecho Ku Hopi Bes Ta Ser Trapá

“Kada detaye di e bida di kampamentu a nifiká un tret mas abou riba e trapi ku a baha den humiashon i indignidat.”​—MAGDALENA KUSSEROW REUTER, SOBREBIBIENTE DI KAMPO DI KONSENTRASHON NAZI.

PA HORIBEL ku e krueldatnan di e kamponan di konsentrashon nazi durante Segundo Guera Mundial tabata, no tabata e promé ni e último biaha ku hende a ser tratá na un manera indigno. Sea nos analisá pasado òf presente, e konklushon ta opvio: Pa basta tempu kaba, hopi ta esnan ku a ‘baha e trapi ku ta kaba den humiashon i indignidat.’

Sin embargo, no ta e krueldatnan ku a mancha historia humano so ta trapa dignidat humano. Hopi biaha esei ta tuma lugá den formanan mas sutil. Pensa riba e mucha ku ta ser tentá pa motibu di su aparensia. Òf e imigrante ku ta bira opheto di mofa pa motibu di sierto kustumbernan “straño.” Òf e hende ku ta ser deskriminá pa motibu di su koló òf nashonalidat. Kisas esnan ku ta hasi e kosnan ei ta mira nan komo wega, pero e doló i humiashon ku hende menospresiá ta sinti no ta kos di hari.—Proverbionan 26:18, 19.

Kiko Ta Dignidat Humano?

Un dikshonario ta definí dignidat komo ‘e kualidat òf kondishon di ta digno, onrá òf apresiá.’ P’esei, dignidat humano tin di haber ku e manera ku nos ta mira nos mes i tambe e manera ku otro hende ta trata nos. Ounke tin vários faktor ku por influensiá loke nos ta pensa di nos mes, e manera ku otro hende ta mira nos òf trata nos tin hopi di haber ku e balor ku nos ta duna nos mes den e bida di tur dia.

Tur sosiedat tin hende pober, indefenso i vulnerabel. Pero e echo ku un persona ta den e sirkunstansianan ei no nesesariamente ta hasié ménos digno. Ta e aktitut i reakshon di otro hende por pon’é sinti su mes indigno. Lamentablemente, ta hende ku ta den situashonnan desafortuná por lo general ta esnan ku nan derecho riba dignidat humano ta ser trapá òf neglishá. Kuantu biaha nos no ta tende ekspreshonnan manera “no ta sirbi pa nada,” “despresiabel” i “indigno” den kasonan di maltrato di hende di edat, hende pober òf hende mentalmente òf físikamente desabilitá!

Pakiko hende ta humiá otro? E derecho básiko ku hende tin pa sinti nan digno lo bira realidat un dia? E siguiente artíkulo lo duna kontesta satisfaktorio for di Beibel, e Palabra di Dios.