Bañamentu Ritual di Hudiu Tabata Predesesor di Boutismo?

JUAN BOUTISTA a prediká “boutismo di repentimentu.” Hesus tambe a manda su siguidónan hasi hende disipel i batisá nan.—Marko 1:4; Mateo 28:19.

Beibel ta indiká ku den kaso di boutismo kristian un hende mester bai kompletamente bou di awa. Segun e buki Jesus and His World (Hesus i Su Mundu): “Ritonan similar por ser opservá den hopi religion, di pasado i presente, den diferente pais i kultura.” E buki ta afirmá ku “e orígen di boutismo kristian . . . ta ser hañá den hudaismo.” Kiko di bèrdat tin den e afirmashon ei?

Tankinan di Awa pa Ritual di Hudiu

Arkeólogonan ku tabata koba serka di e Seru di e Tèmpel di Yerusalèm a deskubrí kasi 100 tanki òf pisina pa hasi baño ritual, ku ta data di siglo un promé ku nos era i di siglo un di nos era. Un inskripshon den un snoa di siglo 2 òf 3 di nos era ta bisa ku e tankinan di awa ei tabata disponibel pa “bishitantenan ku tin mester di nan.” Arkeólogonan a haña mas tanki di awa den e sekshon di Yerusalèm kaminda famianan riku i saserdotal tabata biba; kasi tur kas tabatin su propio lugá privá pa hasi baño ritual.

E bañonan tabata tankinan rektangular kobá den baranka òf den tera i furá ku blòki òf piedra. Tambe nan tabata di pleister pa evitá lekage. Mayoria di nan tabata midi rònt di dos meter hanchu i tres meter largu. Via kanal ku nan a koba nan tabata yena e tankinan ku awa di yobe. E awa tabata por lo ménos 1,20 meter hundu ya asina ora un hende bùk, e por a bai kompletamente bou di awa. Tin biaha tabatin un muraya no muchu haltu meimei di e trapi ku a baha bai na e awa. Arkeólogonan ta kere ku nan a usa un banda di e trapi pa drenta e baño di purifikashon, ora ku e persona ku a bai baña tabata impuru, i e otro banda tabata pa sali, pa evitá kualke kontaminashon.

E tankinan di awa a ser usá en konekshon ku puresa ritual di e hudiunan. Kiko esaki a enserá?

E Lei i Tradishon Tokante Bañamentu

E Lei di Moisés a pone énfasis riba e echo ku e pueblo di Dios mester ta limpi, tantu den sentido spiritual komo físiko. Tabatin vários akto ku por a hasi e israelitanan impuru den sentido seremonial, i pa purifiká nan mes di eseinan nan mester a baña nan kurpa i laba nan paña.—Levítiko 11:28; 14:1-9; 15:1-31; Deuteronomio 23:10, 11.

Yehova Dios ta kompletamente puru i santu. P’esei a ser rekerí di e saserdote- i levitanan pa laba nan man i nan pia promé ku nan aserká Yehova su altar. Tabatin pena di morto si nan keda sin kumpli ku esei.—Eksodo 30:17-21.

Ekspertonan ta kere ku pa siglo un di nos era, e institushon religioso hudiu a ekstendé e rekisitonan di purifikashon saserdotal pa hende no-levita. Tantu e sekta di esenenan komo e fariseonan tabatin hopi ritual di labamentu di kurpa. Un fuente ta informá relashoná ku e tempu di Hesus: “Puresa ritual a ser rekerí di un hudiu promé ku e drenta e Seru di e Tèmpel, promé ku e hasi un sakrifisio, promé ku e risibí e benefisio di un ofrenda saserdotal i pa otro propósitonan similar.” Tekstonan di e Talmut ta deklará ku e personanan ku a baña nan kurpa mester a bai kompletamente bou di awa.

Hesus a krítika e fariseonan pa nan insistensia riba purifikashon ritual. Evidentemente nan a praktiká “vários labamentu,” inkluso “labamentu di kopa i kanika i wea di bròns.” Hesus a bisa ku e fariseonan a kibra e mandamentunan di Dios pa imponé nan propio tradishonnan. (Hebreonan 9:10; Marko 7:1-9; Levítiko 11:32, 33; Lukas 11:38-42) Ningun parti di e Lei di Moisés no a rekerí pa hende hinka kurpa kompletamente bou di awa.

Akaso boutismo kristian a originá di e bañamentu ritual ku e hudiunan tabata praktiká? Nò!

Bañamentu Ritual i Boutismo Kristian

E hudiunan tabata efektuá ritonan di purifikashon riba nan mes kurpa. Sin embargo, e boutismo ku Juan a efektuá no tabata un tipo di bañamentu ritual ku e hudiunan tabata konosé. E echo ku Juan a bira konosí komo Juan Boutista ta indiká ku e boutismo ku el a efektuá tabata diferente. E lidernan religioso hudiu asta a manda un delegashon serka dje pa puntra: “Pakiko . . . bo ta batisá?”—Juan 1:25.

E purifikashon ku e Lei di Moisés a rekerí mester a ser ripití kada biaha ku un adoradó a bira impuru. Esaki no tabata e kaso ku e boutismo ku Juan a efektuá ni ku esun ku e kristiannan despues tabata praktiká. E boutismo di Juan a indiká repentimentu i rechaso di e estilo di bida anterior. Boutismo kristian a simbolisá e echo ku un persona a dediká su mes na Dios. E kristian a hasi esei un biaha so, no bes tras bes.

E bañamentu ku tabata tuma lugá den kas di e saserdotenan hudiu i den e bañonan públiko pegá ku e Seru di e Tèmpel simplemente tabatin un similaridat superfisial ku boutismo kristian. E nifikashon di kada un di e baimentunan bou di awa aki tabata kompletamente diferente. The Anchor Bible Dictionary ta komentá: “Tin un konsenso entre ekspertonan ku Juan [Boutista] no a tuma over ni adaptá ningun boutismo en partikular for di su ambiente,” esta, for di hudaismo. Por bisa meskos di e boutismo ku a ser praktiká den e kongregashon kristian.

Boutismo kristian ta representá “un apelashon na Dios pa un bon konsenshi.” (1 Pedro 3:21) E ta simbolisá ku un persona a dediká su mes kompletamente na Yehova pa sirbié komo un disipel di Su Yu. Un símbolo apropiá di tal dedikashon ta ku e persona ta bai kompletamente bou di awa. Ora e persona bai bou di awa esei ta representá ku el a muri pa ku su estilo di bida anterior. Ora lant’é bèk for di bou di awa esei ta simbolisá ku el a ser resusitá pa hasi Dios su boluntat.

Yehova Dios ta duna un bon konsenshi na esnan ku hasi un dedikashon asina i despues ser batisá. P’esei, apòstel inspirá Pedro por a bisa su kompañeronan di fe: “Boutismo awor ta salba boso.” Esei ta algu ku ningun kantidat di bañamentu ritual hudiu hamas por a alkansá.