Ebla​—Un Stat Antiguo Ta Surgi for di Olvido

Den zomer di 1962, Paolo Matthiae, un arkeólogo italiano hóben, a investigá e yanuranan den nortwèst di Siria sin sa kiko presis lo e haña. Segun ekspertonan, e interior di Siria tabatin masha tiki sitio di interes arkeológiko. Sin embargo, for di e ekskavashonnan ku a tuma lugá dos aña despues na Tell Mardikh, mas o ménos 60 kilometer zùit di Alepo, a haña loke hopi hende ta konsiderá ‘e deskubrimentu arkeológiko di mas importante di siglo 20.’

INSKRIPSHONNAN antiguo tabata konfirmá eksistensia di un stat ku yama Ebla. Sin embargo, ningun hende no tabata sa ta bou di kua di e tantísimo seritunan ku a kontené ruina (yamá ‘tell’), plamá tur rònt den Medio Oriente, lo bo por a haña e stat ei. Un teksto a konta di e viktoria di Sargon, rei di Akad, riba “Mari, Yarmuti i Ebla.” Den un otro inskripshon, Rei Gudea di Sumer a menshoná e palunan balioso ku el a haña for di “e serunan di Ibla [Ebla].” E nòmber Ebla a aparesé tambe na Karnak, Egipto, den un lista di statnan antiguo ku Fárao Tutmosis III a konkistá. Ta di komprondé anto dikon arkeólogonan tabata purba haña Ebla.

Sin embargo, mas trabou di kobamentu a duna fruta. Na 1968, nan a deskubrí parti di un estatua di un rei di Ebla yamá Ibbit-Lim. Riba e estatua tabatin inskribí un voto na idioma akadio ku a revelá ku e estatua a ser dediká na e diosa Ishtar, kende “a bria den Ebla.” Sí, deskubrimentunan arkeológiko a kuminsá revelá “un idioma nobo, un historia nobo i un kultura nobo.”

Na 1974/75 arkeólogonan a haña konfirmashon ku Tell Mardikh tabata korespondé ku e stat Ebla di antigwedat, ora ku nan a deskubrí tablanan skirbí na spijkerschrift ku bes tras bes a sita e nòmber antiguo ei. Kobamentu a revelá tambe ku e stat a eksistí por lo ménos dos biaha na e sitio ei. Despues di hunga un papel predominante pa un periodo, el a ser destruí. Nan a rekonstruí Ebla, pero el a bolbe ser destruí i a pasa pa olvido pa siglonan largu.

Un Stat, Hopi Historia

E statnan di mas antiguo tabata trahá riba yanuranan fértil, manera esnan entre Riu Tigris i Riu Eufrates, kaminda agrikultura intensivo tabata posibel. E promé statnan menshoná den Beibel tabata situá na Mesopotamia. (Génesis 10:10) Parse ku e nòmber Ebla ta nifiká “Baranka Blanku,” refiriendo na e klepnan riba kua e stat tabata trahá. Aparentemente nan a skohe e sitio ei pasobra e kapa di klep tabata un garantia ku tabatin un depósito natural di awa einan, lokual tabata importante den un region leu for di riunan grandi.

E poko áwaseru ku tabata kai den e área di Ebla a permití kultivashon ekstenso di solamente grano, mata di wendrùif i palu di oleifi. E área tabata apropiá tambe pa krio di bestia, foral karné. Ebla su lokalidat stratégiko—entre e Yanura di Mesopotamia i e Kosta Mediteráneo—a hasié un bon lugá pa e negoshi di palu pa konstrukshon, piedra semipresioso i metal. E stat a dominá un region habitá pa alrededor di 200.000 persona, di kua kasi dies porshento tabata biba den e kapital.

E restunan ku nan a deskubrí di un palasio grandi ta duna prueba di e splendor di e fase aki di e sivilisashon di Ebla. Pa haña akseso na e palasio mester a pasa dor di un porta di 12 pa 15 meter haltu. Den transkurso di tempu nan a ekstendé e palasio pa traha lugá pa e kresiente nesesidatnan di un gobièrnu ku tabata bira mas i mas poderoso. Funshonarionan tabata traha bou di un herarkia kompliká; e rei i su reina a haña yudansa di “señornan” i “gobernadónan.”

Arkeólogonan a haña mas ku 17.000 tabla di klei i fragmento. Originalmente, nan tabata probablemente mas ku 4.000 tabla hinté, kuidadosamente poné riba rèkinan di palu. E dokumentonan aki ta duna prueba ku e komersio di Ebla tabata hopi ekstenso. Por ehèmpel, e stat a hasi negoshi ku Egipto, lokual por a mira na e símbolonan real di dos fárao. E tablanan tabata skirbí prinsipalmente na spijkerschrift di idioma sumerio. Pero algun tabata na idioma di Ebla, un lenga semítiko masha bieu ku ekspertonan a logra desifrá a base di e dokumentonan aki. Spesialistanan den asuntunan oriental a keda sorprendí di deskubrí un idioma semítiko asina bieu. Ta interesante pa nota ku algun di e tablanan tabatin listanan bilingwe na sumerio-ebla. E buki Ebla—Alle origini della civiltà urbana (Ebla—Na Orígen di Sivilisashon Urbano) ta yama e listanan aki “e dikshonarionan di mas bieu konosí pa nos.”

Evidentemente Ebla tabata un poder militar, pasobra obra di arte ku nan a koba saka tabatin dibuho di guereronan di Ebla ta ehekutá nan enemigunan òf ta presentá kabesnan kitá. Sin embargo, e splendor di Ebla a terminá ora ku Asiria i Babilonia tabata subiendo na poder. No ta fásil pa saka afó kiko presis a sosodé, pero ta parse ku na promé instante Sargon I (no e Sargon menshoná na Isaias 20:1) i despues su nietu Naram-Sin a ataká Ebla. E evidensia ku arkeólogonan a koba saka ta mustra ku e enkuentronan ei tabata violento i e invashonnan tabata feros.

Sin embargo, manera nos a menshoná, despues di un tempu nan a rekonstruí e stat i el a asta haña mas importansia den e region. Nan a konstruí e stat nobo segun un plan masha presis ku a aksentuá su grandesa. Den e parti mas abou di e stat tabatin un área sagrado dediká na e diosa Ishtar, kende tabata un diosa di fertilidat pa e hendenan di Babilonia tambe. Kisas bo a tende di e famoso Porta di Ishtar ku nan a deskubrí den e ruinanan di Babilonia. Tin un edifisio hopi impreshonante na Ebla ku aparentemente nan tabata usa pa tene e leonnan ku a ser konsiderá sagrado pa e diosa Ishtar. Esaki ta trese nos na e tópiko di Ebla su religion.

Religion na Ebla

Meskos ku na otro partinan di antiguo Oriente, Ebla tabatin un panteon di dios. Algun di nan tabata Baal, Hadad (un nòmber ku ta aparesé komo parti di e nòmber di sierto reinan sirio) i Dagan. (1 Reinan 11:23; 15:18; 2 Reinan 17:16) E hendenan di Ebla tabata venerá nan tur. Nan tabata asta onra e diosnan di otro pueblo. Deskubrimentunan arkeológiko ta indiká ku nan tabata adorá tambe antepasadonan real konsiderá komo dios, foral den e di dos milenio promé ku nos era.

E hendenan di Ebla no tabata konfia nan diosnan siegamente. P’esei e stat nobo di Ebla tabata rondoná pa dos muraya paralelo impreshonante ku lo por a intimidá kualke enemigu. E muraya mas pafó tabatin un omtrek di kasi tres kilometer. Te awe bo por mira bon kla kon nan tabata kore.

Pero asta e Ebla rekonstruí a yega na su fin. Posiblemente e heteonan rònt di aña 1600 promé ku nos era a kaba finalmente ku loke un tempu tabata un gran potensia. Segun un poema antiguo, Ebla a ser “destrosá manera un vas di serámika.” Poko despues el a kuminsá disparsé for di historia. Un dokumento skirbí pa e sòldánan di e krusadanan ku a marcha rumbo pa Yerusalèm na aña 1098 ta menshoná e sitio kaminda Ebla tabata situá un tempu, i ta referí na dje komo un base militar aislá den e pais ku yama Mardikh. Hende a lubidá kasi kompletamente riba Ebla, i ta despues di hopi siglo a bolbe deskubrié.

[Kuadro na página 14]

EBLA I BEIBEL

Un artíkulo publiká na 1976 den e revista Biblical Archeologist a lanta kuriosidat di analistanan di Beibel. E persona ku a desifrá e tablanan di klei di Ebla a menshoná e posibilidat ku e tablanan tabata kontené, entre otro, nòmber di hende i di lugá menshoná siglonan despues den Beibel. Bayendo kisas mas leu di loke e artíkulo en realidat a bisa, algun analista a kuminsá skirbi ku Ebla a produsí prueba arkeológiko ku e relato di Génesis ta konfiabel.a Segun e hesuita Mitchell Dahood, e “tablanan di klei [di Ebla] ta yuda aklará e pasashinan skur di Beibel.” Por ehèmpel, e tabata di opinion ku nan lo por a yuda saka afó ‘for di kuantu tempu pasá Israel a kuminsá usa e nòmber di Dios.’

Awor ekspertonan ta analisando e tekstonan aki ku mas eksaktitut. Debí ku tantu e idioma hebreo komo esun di Ebla ta idiomanan semítiko, ta eksistí e posibilidat ku algun nòmber di stat òf di persona por ta similar òf idéntiko na esnan den Beibel. Sin embargo, esaki no ta proba ku nan ta referí na e mesun sitionan òf personanan. Tempu lo mustra te kon leu e deskubrimentunan na Ebla lo influensiá investigashonnan bíbliko. Pa loke ta e nòmber divino, eskritor di e artíkulo den Biblical Archeologist a nenga ku el a yega di bisa ku “Yahweh” a ser menshoná den e tekstonan di Ebla. Pa algun eksperto, e símbolo di spijkerschrift ku nan ta interpretá komo ja ta indiká djis un di e tantísimo diosnan di e panteon di Ebla, miéntras ku vários otro spesialista ta interpret’é komo simplemente un signo gramatikal. Sea kual sea e kaso, e no ta referí na e úniko Dios berdadero, Yehova.—Deuteronomio 4:35; Isaias 45:5.

[Nota]

[Mapa/​Plachi na página 12]

(Pa e teksto den su formato kompleto, wak e publikashon)

LAMAN GRANDI

KÁNAAN

SIRIA

Alepo

Ebla (Tell Mardikh)

Riu Eufrates

[Rekonosementu]

Arkeólogo: Missione Archeologica Italiana a Ebla - Università degli Studi di Roma ‘La Sapienza’

[Plachi na página 12, 13]

Un kadena di oro ku ta data for di alrededor di aña 1750 P.E.K.

[Plachi na página 13]

Restunan di un palasio grandi

[Plachi na página 13]

Dibuho di un artista di e tablanan di klei wardá den e kuarto di archivo

[Plachi na página 13]

Tabla skirbí na spijkerschrift

[Plachi na página 13]

Klòp real di Egipto, 1750-1700 P.E.K.

[Plachi na página 13]

Guerero di Ebla ku kabesnan di enemigu

[Plachi na página 14]

Un piedra konmemorativo dediká na e diosa Ishtar

[Rekonosementu]

Arkeólogo: Missione Archeologica Italiana a Ebla - Università degli Studi di Roma ‘La Sapienza’

[Rekonosementu pa Potrèt na página 13]

Tur plachi (ku eksepshon di e restunan di e palasio): Missione Archeologica Italiana a Ebla - Università degli Studi di Roma ‘La Sapienza’