Lo Bo Sigui Kana “Segun e Spiritu”?

“Kana segun e spiritu, i boso lo no kumpli ku deseo di e karni.”—GALATIONAN 5:16.

 1. Kon nos por eliminá e preokupashon di a peka kontra e spiritu?

TIN un manera pa eliminá e preokupashon di a peka kontra Yehova su spiritu santu. Esei ta dor di hasi loke apòstel Pablo a bisa: “Kana segun e spiritu, i boso lo no kumpli ku deseo di e karni.” (Galationan 5:16) Si nos laga e spiritu di Dios guia nos, e ora ei mal deseonan karnal lo no vense nos.—Romanonan 8:2-10.

2, 3. Kon nos lo ser influensiá si nos sigui kana segun e spiritu?

² Segun ku nos ta sigui “kana segun e spiritu,” Dios su forsa aktivo lo motivá nos pa obedesé Yehova. Nos lo imitá Dios su kualidatnan den nos ministerio, den kongregashon, na kas i otro kaminda. E influensia di e spiritu lo ta bisto den nos trato ku nos kasá, nos yunan, nos rumannan i otro hende.

³ Ora nos ta “biba den spiritu segun e boluntat di Dios” esei ta yuda nos pa stòp di peka. (1 Pedro 4:1-6) Un kos ta sigur, si nos ta bou di influensia di e spiritu, nos lo no kometé un piká imperdonabel. Pero ki otro benefisionan nos lo haña si nos sigui kana segun e spiritu?

Keda Serka di Dios i Kristu

4, 5. Den ki manera kana segun e spiritu ta influensiá e manera ku nos ta mira Hesus?

⁴ Komo ku nos ta kana segun spiritu santu, nos por mantené un relashon íntimo ku Dios i ku su Yu. Ora Pablo a skirbi tokante donnan spiritual, el a bisa e rumannan na Korinto: “Mi ta hasi konosí na boso [eks-adoradónan di ídolo] ku ningun hende ku ta papia pa medio di e spiritu di Dios no ta bisa: ‘Hesus ta maldishoná’; i ni un hende no por bisa: ‘Hesus ta Señor,’ si no ta pa medio di spiritu santu.” (1 Korintionan 12:1-3) Kualke inklinashon ku ta motivá hende pa maldishoná Hesus mester a originá ku Satanas e Diabel. Pero, komo kristiannan ku ta kana segun spiritu santu, nos ta konvensí ku Yehova a lanta Hesus for di morto i a pon’é mas haltu ku tur otro kreashon. (Filipensenan 2:5-11) Nos tin fe den e sakrifisio di reskate di Kristu i ta aseptá Hesus komo e Señor ku Dios a nombra riba nos.

⁵ Algun hende ku tabata pretendé di ta kristian den promé siglo a nenga ku Hesus a bin den karni. (2 Juan 7-11) Komo ku algun a aseptá e punto di bista falsu ei, nan a rechasá e berdadero siñansanan tokante Hesus, e Mesias. (Marko 1:9-11; Juan 1:1, 14) Kana segun spiritu santu ta yuda nos evitá di bai tras di tal tipo di apostasia. Nos por sigui disfrutá di Yehova su bondat inmeresí i sigui “kana den e bèrdat,” solamente si nos keda alerta pa ku siñansanan korekto i pa ku Dios su punto di bista ku tin den Beibel. (3 Juan 3, 4) P’esei laga nos ta determiná pa rechasá tur apostasia di manera ku nos por mantené un relashon fuerte ku nos Tata selestial.

 6. Kua ta e kualidatnan ku e spiritu di Dios ta produsí den esnan ku ta kana segun e spiritu?

⁶ Entre tal “obranan di karni” manera inmoralidat i sensualidat, Pablo a menshoná apostasia ku a hiba hende bèk na idolatria i tambe doktrina falsu (sekta). Pero el a splika: “Esnan ku ta pertenesé na Kristu Hesus a [klaba na staka] e karni ku su pashonnan i deseonan. Si nos ta biba segun e spiritu, laga nos kana tambe segun e spiritu.” (Galationan 5:19-21, 24, 25) Ki kualidatnan e forsa aktivo di Dios ta produsí den hende ku ta biba i kana segun e spiritu? Pablo a skirbi: “Fruta di e spiritu ta amor, goso, pas, pasenshi, kariño,a bondat, fieldat, mansedumbre, dominio propio.” (Galationan 5:22, 23) Laga nos konsiderá e aspektonan aki di e fruta di spiritu.

“Stima Otro”

 7. Kiko ta amor, i kua ta algun di su karakterístikanan?

⁷ Amor—un aspekto di e fruta di spiritu—hopi bes ta enserá afekto òf kariño profundo i interes inegoista pa otro hende, kompañá pa lasonan estrecho ku nan. E Skritura ta bisa ku “Dios ta amor” pasobra e ta e ehèmpel supremo di e kualidat ei. E gran amor ku Dios i su Yu tin pa humanidat ta bisto den e sakrifisio di reskate di Hesukristu. (1 Juan 4:8; Juan 3:16; 15:13; Romanonan 5:8) Hende ta identifiká nos komo siguidó di Hesus na e amor ku nos tin pa otro. (Juan 13:34, 35) De echo, nos tin e mandamentu pa “stima otro.” (1 Juan 3:23) Anto Pablo a bisa ku amor tin pasenshi i ta kariñoso. E no ta yalurs ni ta gaba ni komportá su mes indesente ni buska su propio interes. Amor no ta wòrdu provoká ni ta warda renkor. E ta alegrá den e bèrdat, no den inhustisia. Amor ta tapa, kere, spera i soportá tur kos. Es mas, e no ta faya nunka.—1 Korintionan 13:4-8.

 8. Pakiko nos tin ku demostrá amor pa otro adoradó di Yehova?

⁸ Si nos permití e spiritu di Dios produsí amor den nos, e kualidat ei lo eksistí den nos relashon ku Dios i ku próhimo. (Mateo 22:37-39) Apòstel Juan a skirbi: “Esun ku no ta stima ta permanesé den morto. Ken ku odia su ruman ta un matadó; i boso sa ku ningun matadó no tin bida eterno ta permanesé den dje.” (1 Juan 3:14, 15) Un matadó por a haña siguridat den un stat di refugio di Israel solamente si e no a odia e persona ku el a mata. (Deuteronomio 19:4, 11-13) Si ta spiritu santu ta guia nos, nos lo demostrá amor pa Dios, pa rumannan den fe i pa otro hende.

‘E Goso di Yehova Ta Boso Fortalesa’

9, 10. Kiko ta goso, i kua ta algun motibu pa nos ta gososo?

⁹ Goso ta un estado di gran felisidat. Yehova ta “e Dios felis.” (1 Timoteo 1:11, NW; Salmo 104:31) Pa e Yu ta un delisia pa hasi e boluntat di su Tata. (Salmo 40:8; Hebreonan 10:7-9) Anto ‘e goso di Yehova ta nos fortalesa.’—Nehemias 8:10.

¹⁰ E goso ku Dios ta duna nos ta laga nos sinti un satisfakshon profundo ora nos ta hasi su boluntat, asta na momento ku nos ta pasa den tempu difísil, den tristesa òf persekushon. Esta felis “e konosementu di Dios” ta hasi nos! (Proverbionan 2:1-5) Nos relashon gososo ku Dios ta basá riba konosementu eksakto i fe den dje i den e sakrifisio di reskate di Hesus. (1 Juan 2:1, 2) Un otro fuente di goso ta e echo ku nos ta forma parti di e úniko berdadero hermandat internashonal. (Sofonias 3:9; Hageo 2:7) Nos speransa di Reino i e gran privilegio di por deklará e bon nobo ta duna nos goso. (Mateo 6:9, 10; 24:14) E speransa di bida eterno tambe. (Juan 17:3) Siendo ku nos tin asina un speransa maravioso, nos mester ta “berdaderamente yen di goso.”—Deuteronomio 16:15.

Sea Hende di Pas i Tene Pasenshi

11, 12. (a) Kon lo bo splika kiko pas ta? (b) Ki efekto e pas di Dios tin riba nos?

¹¹ Pas—un otro aspekto di e fruta di spiritu—ta un estado di trankilidat i sin disturbio. Nos Tata selestial ta e Dios di pas, i nos ta haña e garantia: “SEÑOR lo bendishoná su pueblo ku pas.” (Salmo 29:11; 1 Korintionan 14:33) Hesus a bisa su disipelnan: “Pas mi ta laga pa boso; mi pas mi ta duna boso.” (Juan 14:27) Kon esei lo a yuda su siguidónan?

¹² E pas ku Hesus a duna su disipelnan a trankilisá nan mente i kurason i a kalma nan miedu. Foral despues ku nan a risibí e spiritu santu primintí, nan a haña pas. (Juan 14:26) Bou di influensia di spiritu santu i komo kontesta riba nos orashonnan awe, nos ta disfrutá di e “pas di Dios,” un pas inkomparabel ku ta trankilisá nos mente i kurason. (Filipensenan 4:6, 7) Es mas, Yehova su spiritu ta yuda nos pa ta kalmu i na pas ku nos rumannan den fe i ku otro hende.—Romanonan 12:18; 1 Tesalonisensenan 5:13.

13, 14. Kiko ke men tene pasenshi, i pakiko nos mester desplegá esei?

¹³ Pasenshi ta ligá ku ser un hende di pas, pasobra ora nos tin pasenshi nos ta soportá provokashon òf un malecho ku e speransa ku e situashon lo drecha. Dios tin gran pasenshi. (Romanonan 9:22-24) Hesus tambe a demostrá e kualidat aki i nos por benefisiá di esei, pasobra Pablo a skirbi: “Pa e motibu aki mi a haña miserikòrdia, pa asina den mi, komo esun di promé, Hesukristu por a demostrá su pasenshi perfekto, komo un ehèmpel pa esnan ku lo a kere den dje pa bida eterno.”—1 Timoteo 1:16.

¹⁴ E kualidat di pasenshi ta yuda nos soportá ora hende ta bisa òf hasi kosnan deskonsiderá òf ku no ta bondadoso. Pablo a urgi e kristiannan: “Tene pasenshi ku tur hende.” (1 Tesalonisensenan 5:14) Ya ku nos tur ta imperfekto i ta kometé eror, nos siguramente ke pa hende tene pasenshi ku nos ora nos faya den nos trato ku nan. P’esei laga nos hasi esfuerso pa tene ‘pasenshi ku goso.’—Kolosensenan 1:9-12.

Demostrá Kariño i Bondat

15. Splika kiko ta kariño, i menshoná algun ehèmpel di esei.

¹⁵ Nos ta demostrá kariño ora nos ta mustra interes den otro hende ku palabranan amabel i aktonan servisial. Yehova ta kariñoso, i su Yu tambe. (Romanonan 2:4; 2 Korintionan 10:1) Ta ser ferwagt di sirbidónan di Dios i di Kristu ku nan ta kariñoso. (Kolosensenan 3:12) Asta algun hende ku no tabatin un relashon personal ku Dios a yega di demostrá konsiderashon i “kariño eksepshonal.” (Echonan 27:3; 28:2) Pues, nos sigur por demostrá kariño si nos ta sigui “kana segun e spiritu.”

16. Menshoná algun sirkunstansia ku mester motivá nos pa mustra kariño.

¹⁶ Nos por mustra kariño asta ora nos tin motibu pa ta rabiá debí na palabranan ofensivo òf aktonan deskonsiderá di un persona. Pablo a bisa: “Rabia, ma no hasi piká; no laga solo baha riba boso rabia, i no duna Diabel oportunidat. I sea kariñoso ku otro, miserikòrdioso, pordonando otro, meskos ku Dios den Kristu tambe a pordoná boso.” (Efesionan 4:26, 27, 32) Ta bon pa nos mustra kariño foral na rumannan ku ta pasando den prueba. Klaru ku un ansiano kristian lo no ta mustrando kariño si e keda sin duna konseho bíbliko djis p’e no ofendé un persona ku klaramente ta kore e peliger di bandoná e kaminda di “bondat i hustisia i bèrdat.”—Efesionan 5:9.

17, 18. Kon nos por splika loke bondat ta, i ki papel e kualidat aki mester hunga den nos bida?

¹⁷ Bondat ta birtut, ekselensia moral òf e kualidat di ta bon. Dios ta bon den e sentido apsoluto. (Salmo 25:8; 31:19) Hesus tin birtut i e kualidat di ekselensia moral. Tòg e no a aseptá e título “Bon” ora un hòmber a yam’é “Bon Maestro.” (Marko 10:17, 18) Evidentemente esaki tabata pasobra el a rekonosé Dios komo e ehèmpel supremo di bondat.

¹⁸ Piká heredá ta stroba nos di hasi bon. (Romanonan 5:12) Sin embargo, nos por desplegá e kualidat aki si nos pidi Dios den orashon pa siña nos bondat. Pablo a bisa e rumannan na Roma: “Ami mes tambe ta konvensí ku boso mes ta yen di bondat, yená ku tur konosementu.” (Romanonan 15:14) Un superintendente kristian mester “ta stima loke ta bon.” (Tito 1:7, 8) Si ta e spiritu di Dios ta dirigí nos, nos lo ta konosí pa bondat, i debí na nos bon obranan Yehova lo kòrda riba nos pa bon.—Nehemias 5:19; 13:31.

“Fe Sinsero”

19. Splika kiko ta fe, na armonia ku Hebreonan 11:1.

¹⁹ Fe tambe ta parti di e fruta di spiritu, i e ta “e ekspektativa sigur di kosnan sperá, e demostrashon evidente di realidatnan ounke nan no ta ser kontemplá.” (Hebreonan 11:1, NW) Si nos tin fe, nos tin sigur ku tur loke Yehova a primintí, nos por konsiderá komo kumplí kaba. E demostrashon evidente di e realidatnan ku hende no ta mira ta asina fuerte ku fe ta igual ku e evidensia ei. Por ehèmpel, e eksistensia di kosnan kreá ta konvensé nos ku tin un Kreadó. Ta e tipo di fe ei nos lo desplegá si nos sigui kana segun e spiritu.

20. Kiko ta “e piká ku ta mara nos asina fásil,” i kon nos por evit’é i tambe e obranan di karni?

²⁰ Falta di fe ta “e piká ku ta mara nos asina fásil.” (Hebreonan 12:1) Nos tin ku dependé riba e spiritu di Dios pa nos por evitá e obranan di karni, materialismo i doktrinanan falsu ku por destruí fe. (Kolosensenan 2:8; 1 Timoteo 6:9, 10; 2 Timoteo 4:3-5) Dios su spiritu ta produsí den e sirbidónan di Yehova di aktualidat un fe similar na e fe di testigunan prekristian i di otro personanan menshoná den Beibel. (Hebreonan 11:2-40) Anto por sosodé ku nos “fe sinsero” ta reforsá e fe di otro rumannan.—1 Timoteo 1:5; Hebreonan 13:7.

Demostrá Mansedumbre i Dominio Propio

21, 22. Kiko ta mansedumbre, i pakiko nos mester despleg’é?

²¹ Mansedumbre ta referí na ser saksenu, amabel, suave di karakter i di komportashon. Un di e karakterístikanan di Dios ta un genio suave. Nos sa esaki pasobra Hesus, kende tabata un hòmber mansu, a reflehá e personalidat di Yehova perfektamente. (Mateo 11:28-30; Juan 1:18; 5:19) Kiko anto ta ser rekerí di nos komo sirbidó di Dios?

²² Komo kristian, Dios ta ferwagt ku nos ta “suave, mustrando tur konsiderashon pa tur hende.” (Tito 3:2) Nos ta desplegá suavedat den nos ministerio. E rumannan ku tin e debido kualidatnan spiritual ta haña e konseho pa reahustá òf restorá un kristian ku a kometé eror “den un spiritu di mansedumbre.” (Galationan 6:1) Nos tur por kontribuí na pas i union kristian dor di demostrá “humildat i suavedat.” (Efesionan 4:1-3) Nos por demostrá suavedat si konsistentemente nos ta kana segun e spiritu i ta ehersé dominio propio.

23, 24. Kiko ta dominio propio, i kon e ta yuda nos?

²³ Dominio propio ta duna nos e kapasidat pa frena nos mes di mal pensamentu, abla i akshon. Yehova ‘a dominá su mes’ ora di atendé ku e sòldánan di Babilonia ku a desolá Yerusalèm. (Isaias 42:14) Su Yu ‘a laga un ehèmpel pa nos’ dor di ehersé dominio propio ora e tabata sufri. Anto apòstel Pedro a konsehá rumannan kristian pa ‘añadí na nan konosementu, dominio propio.’—1 Pedro 2:21-23; 2 Pedro 1:5-8.

²⁴ Ta ser ferwagt di ansianonan kristian ku nan ta disipliná, ehersiendo dominio propio. (Tito 1:7, 8) Bon mirá, tur hende ku ta laga spiritu santu guia nan por ehersé dominio propio i asina nan por evitá inmoralidat, abla vulgar òf kualke otro kos ku lo por resultá den Yehova su desaprobashon. Si nos ta permití e spiritu di Dios produsí dominio propio den nos, otro hende lo ripará esaki na nos abla i kondukta.

Sigui Kana Segun e Spiritu

25, 26. Kon kana segun e spiritu lo influensiá nos relashonnan aktual i nos speransa pa futuro?

²⁵ Si nos ta kana segun e spiritu, nos lo ta proklamadónan ferviente di e Reino. (Echonan 18:24-26) Nos lo ta hende agradabel pa anda kuné, i foral personanan deboto na Dios lo disfrutá di nos kompania. Komo personanan ku spiritu santu ta guia, nos lo ta tambe un fuente di animashon pa otro adoradó di Yehova. (Filipensenan 2:1-4) Esei no ta loke tur kristian ke ta?

²⁶ Den e mundu aki bou di kontròl di Satanas, no ta fásil pa kana segun e spiritu. (1 Juan 5:19) Sin embargo, miónes di hende ta hasiendo esei awe. Si nos ta konfia den Yehova ku henter nos kurason, nos lo disfrutá di bida awor i nos lo por sigui kana pa semper den e kamindanan hustu i amoroso di Esun ku ta e fuente di spiritu santu.—Salmo 128:1; Proverbionan 3:5, 6.

[Nota]

Kiko Ta Bo Kontesta?

• Kon “kana segun e spiritu” ta influensiá nos relashon ku Dios i su Yu?

• E fruta di spiritu santu ta konsistí di kua kualidatnan?

• Kua ta algun manera pa demostrá e fruta di Dios su spiritu?

• Kon kana segun e spiritu ta influensiá nos bida aktual i nos speransa pa futuro?

[Plachi na página 14]

E spiritu santu di Yehova ta promové amor pa nos rumannan den fe

[Plachi na página 15]

Mustra kariño pa medio di palabranan amabel i aktonan servisial