En Buska di Spiritualidat

DEN Hesus su famoso Sermon Riba Seru, el a bisa: “Felis ta esnan ku ta konsiente di nan nesesidat spiritual.” (Mateo 5:3, NW) Muy probablemente bo ta di akuerdo ku e deklarashon ei. Rònt mundu hende ta rekonosé ku nan tin mester di spiritualidat den nan bida i nan ta asumí ku ora nan hañ’é, nan lo ta felis. Pero kiko e palabra “spiritualidat” ta nifiká?

Un dikshonario ta definí spiritualidat komo “ser konsiente di balornan religioso òf pega fielmente na nan” i “e kualidat òf kondishon di ta spiritual.” Pues, e ekspreshonnan “spiritualidat,” “ser un persona spiritual” i “inklinashon spiritual,” tur ta sinónimo di otro. Pa klarifiká e ekspreshon aki mas aleu, pensa riba e komparashon aki: Bo ta bisa di un hende ku ta interesá den músika ku e tin un inklinashon musikal. Di igual manera, un hende ku ta duna hopi balor na interesnan spiritual òf religioso tin loke nos por yama un inklinashon spiritual.

Pero kon bo por alkansá berdadero spiritualidat? Ounke kasi tur religion ta pretendé di sa kiko ta hiba na spiritualidat, kada un ta rekomendá un forma diferente pa logra esei. Por ehèmpel, un kristian evangéliko ta bisa ku e ta haña salbashon na un reunion di rebibamentu religioso. Un katóliko ta buska komunion ku Dios durante un santu sakrifisio di misa. Un budista ta purba haña iluminashon pa medio di meditashon. Un hindú ta trata di libra su mes for di e siklo di renasementu dor di hiba un bida di apnegashon. Akaso nan tur, òf kualke un di nan, ta riba e kaminda ku ta hiba na berdadero spiritualidat?

Pa hopi hende, e kontesta riba e pregunta ei ta nò. Nan ta bisa ku spiritualidat ta nifiká “kere sin pertenesé,” esta, kere den un dios sin pertenesé na un iglesia. Otronan ta haña ku spiritualidat no nesesariamente ke men ku un hende mester a pasa den un eksperensia religioso, sino ta referí na e deseo pa ta na pas ku su mes i pa haña un propósito den bida. Segun nan, esun ku kier ta un hende spiritual no tin mester di religion mes. Mas bien, tur loke e tin ku hasi ta buska den su mes, den su sintimentunan di mas profundo. Un eskritor a bisa: “Berdadero spiritualidat ta algu ku bo ta haña den e profundo di bo ser. Ta bo manera di stima, aseptá i trata ku e mundu i e hendenan rònt di bo. No ta algu ku bo por haña den un misa òf dor di kere den sierto doktrina.”

Ta bisto anto ku tin gran diferensia di opinion enkuanto kiko ta spiritualidat. Míles di buki ta pretendé di mustra e kaminda ku ta hiba na un bida spiritual, pero hopi biaha lektornan ta keda ku un bashí i tur konfundí. Ma tin un buki ku sí ta kontené guia konfiabel den asuntunan spiritual. Esei ta e buki ku ta duna evidensia ku e ta inspirá pa Dios. (2 Timoteo 3:16) Laga nos wak kiko e buki ei, Beibel, ta bisa tokante e nifikashon di spiritualidat i ki balor esaki tin.

[Rekonosementu pa Potrèt na página 2]

KAFT: Fondo: © Mark Hamblin/age fotostock