Konsiderá Digno di Ser Guiá na Fuentenan di e Awa di Bida

“E Lamchi . . . lo ta nan wardadó, i lo guia nan hiba na fuentenan di e awa di bida.”—REV. 7:17.

 1. Kon e Palabra di Dios ta yama kristiannan ungí, i ki responsabilidat Hesus a duna nan?

E PALABRA di Dios ta yama kristiannan ungí, kendenan ta kuida e interesnan di Kristu riba tera, “e esklabo fiel i prudente.” Ora Kristu a inspekshoná e “esklabo” na 1918, el a haña e kristiannan ungí aki ta perkurá fielmente pa e ‘kuminda spiritual na su debido tempu.’ P’esei Hesus, e Doño, tabata kontentu pa enkargá nan despues ku “tur su propiedatnan.” (Lesa Mateo 24:45-47.) Di e manera aki, e kristiannan ungí, promé ku nan risibí un herensia selestial, ta sirbi otro adoradónan di Yehova aki riba tera.

 2. Deskribí loke e propiedatnan di Hesus ta enserá.

² Un doño tin outoridat riba su propiedat- òf pertenensianan, i e por usa nan manera e ke. E propiedatnan di Hesukristu, Yehova su Rei entronisá, ta enserá tur e interesnan di Reino riba tera. Esei ta inkluso “un multitut grandi” ku apòstel Juan a mira den un vishon. Juan a deskribí e multitut grandi ku e siguiente palabranan: “Ata un multitut grandi ku ningun hende no por a konta, di tur nashon i tur tribu i pueblo i lenga, pará dilanti di e trono i dilanti di e Lamchi, bistí na paña blanku i ku rama di palma den nan man.”—Rev. 7:9.

3, 4. Ki gran privilegio e multitut grandi tin?

³ E miembronan di e multitut grandi ei ta forma parti di e grupo ku Hesus a yama su “otro karnénan.” (Juan 10:16) Nan tin e speransa di biba pa semper den un paradeis riba tera. Nan tin konfiansa ku Hesus “lo guia nan hiba na fuentenan di e awa di bida” i ku “Dios lo seka tur lágrima for di nan wowo.” Debí na e speransa aki, nan “a laba nan pañanan i a hasi nan blanku den e sanger di e Lamchi.” (Rev. 7:14, 17) Debí ku nan ta ehersé fe den e sakrifisio di Hesus, den bista di Dios, nan ta bistí ku ‘pañanan blanku.’ Nan ta ser deklará hustu komo amigu di Dios, meskos ku Abraham.

⁴ Ademas di esei, siendo ku e multitut grandi di otro karnénan, ku ta oumentando, ta hustu den bista di Dios, nan por tin e speransa di sobrebibí e destrukshon di e sistema di kosnan aki na e tribulashon grandi. (Sant. 2:23-26) Nan por hala serka Yehova, i komo grupo, nan por tin e maravioso prospekto di sobrebibí Armagedón. (Sant. 4:8; Rev. 7:15) Nan no ta un grupo independiente, mas bien, nan ta dispuesto pa sirbi bou di e guia di e Rei selestial i su rumannan ungí riba tera.

 5. Kon e multitut grandi ta apoyá Kristu su rumannan ungí?

⁵ Kristiannan ungí a konfrontá i lo sigui konfrontá oposishon severo di parti di e mundu di Satanas. Sin embargo, nan por dependé riba e apoyo di nan kompañeronan di e multitut grandi. E kantidat di kristian ungí awe ta masha tiki, pero e multitut grandi ta sigui krese ku sientos di míles di persona tur aña. Rònt mundu tin mas o ménos 100.000 kongregashon kristian i e kristiannan ungí no por supervisá kada un personalmente. Pues, un manera ku nan ta risibí apoyo for di e otro karnénan ta ku hòmbernan kualifiká di e multitut grandi ta sirbi komo ansianonan di kongregashon. Nan ta yuda kuida e miónes di kristiannan ku aktualmente a ser konfiá na “e esklabo fiel i prudente.”

 6. Kon Beibel a profetisá di e apoyo ku kristiannan ungí ta risibí di nan kompañeronan di e otro karnénan?

⁶ Profeta Isaias a predisí ku kristiannan ungí lo a haña apoyo òf yudansa boluntario for di nan kompañeronan di e otro karnénan. El a skirbi: “Esaki ta loke Yehova a bisa: ‘E trahadónan sin pago di Egipto i e komersiantenan di Etiopia i e sabeonan, hòmbernan di estatura haltu, nan mes lo bini na bo, i di bo nan lo bira. Bo tras nan lo kana.’” (Isa. 45:14, NW) Awe, den un manera simbóliko, kristiannan ku tin e speransa di biba riba tera ta kana tras di e klase di esklabo ungí i su Kuerpo Gobernante, siguiendo nan liderato. Komo “trahadónan sin pago,” e otro karnénan boluntariamente i di henter nan kurason ta usa nan forsa i rekursonan pa apoyá e trabou mundial di prediká ku Kristu a asigná na su siguidónan ungí riba tera.—Echo. 1:8; Rev. 12:17.

 7. Pakiko e multitut grandi ta ser entrená?

⁷ Segun ku e miembronan di e multitut grandi ta apoyá nan rumannan ungí, nan ta risibí entrenamentu pa nan por sirbi komo e fundeshi di e sosiedat humano nobo ku lo eksistí despues di Armagedón. E fundeshi ei mester ta sólido i stabil, i su miembronan mester ta dispuesto i kapas pa kumpli ku instrukshon di e Doño. Kada kristian ta haña e oportunidat pa demostrá ku e por ta útil pa e Rei, Kristu Hesus. Dor di ehersé fe i manifestá lealtat awor, e ta mustra ku lo e reakshoná mesora ora e Rei dun’é instrukshon den e mundu nobo.

E Multitut Grandi Ta Demostrá Nan Fe

8, 9. Kon miembronan di e multitut grandi ta demostrá nan fe?

⁸ E otro karnénan—e kompañeronan di e kongregashon di kristiannan ungí—ta demostrá nan fe den vários manera. Promé, nan ta apoyá e ungínan den e proklamashon di e bon nobo di e Reino di Dios. (Mat. 24:14; 28:19, 20) Di dos, boluntariamente nan ta someté nan mes na instrukshon di e Kuerpo Gobernante.—Heb. 13:17; lesa Zakarias 8:23.

⁹ Di tres, e miembronan di e multitut grandi ta apoyá nan rumannan ungí dor di biba na armonia ku e prinsipionan hustu di Yehova. Nan ta hasi esfuerso pa kultivá “amor, goso, pas, pasenshi, kariño, bondat, fieldat, mansedumbre, dominio propio.” (Gal. 5:22, 23) Awendia no ta usual pa un persona manifestá e kualidatnan ei, loke ta popular ta “e obranan di karni.” Apesar di esei, miembronan di e multitut grandi ta determiná pa evitá “inmoralidat, impuresa, sensualidat, idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu, envidia, buracheria, parandiamentu, i kosnan asin’aki.”—Gal. 5:19-21.

10. Kiko e miembronan di e multitut grandi ta desididu pa hasi?

¹⁰ Siendo ku nos ta imperfekto, lo por ta un desafio pa nos produsí fruta di spiritu, evitá e obranan di karni i resistí e preshon ku e mundu di Satanas ta pone riba nos. Tòg, nos ta desididu pa no permití desanimashon kousá pa debilidat personal, kontratempu temporal òf limitashonnan físiko afektá nos fe ni mengua nos amor pa Yehova. Nos sa ku Yehova lo kumpli ku loke el a primintí, esta, skapa bida di e multitut grandi durante e tribulashon grandi.

11. Ki trikinan Satanas ta usa den su esfuerso pa debilitá fe di kristiannan?

¹¹ Apesar di esei, konstantemente nos ta vigilá pasobra nos sa ku nos berdadero enemigu ta e Diabel, i e no ta entregá fásilmente. (Lesa 1 Pedro 5:8.) E ta usa hende apóstata i otronan pa purba konvensé nos ku e siñansanan ku nos ta sigui ta falsu. Pero generalmente e triki ei ta frakasá. Di mes manera, ounke persekushon a yega di slow e trabou di prediká, hopi bes el a sirbi realmente pa fortalesé fe di esnan ku ta ser persiguí. P’esei, mas i mas Satanas ta usa un método ku, segun e, tin mas chèns di debilitá nos fe. E ta probechá di sintimentunan di desanimashon. Pablo a spièrta e kristiannan den promé siglo di e peliger aki ora el a bisa nan: “Konsiderá esun [Kristu] ku a soportá tal hostilidat di pekadónan [“kontra nan propio interes,” NW].” Dikon? “Pa boso no kansa i pèrdè ánimo.”—Heb. 12:3.

12. Kon konseho bíbliko ta fortalesé hende ku ta desanimá?

¹² Bo a yega di sinti gana di entregá? Bo ta sinti tin biaha ku bo a frakasá? Si ta asina, no permití Satanas usa e sintimentunan ei pa stroba bo di sirbi Yehova. Estudio profundo di Beibel, orashon ferviente, asistensia regular na reunion i asosiashon ku kompañeronan kristian lo fortalesé bo i evitá ku bo ta “pèrdè ánimo.” Yehova a primintí ku lo e yuda hende ku ta sirbié renobá nan forsa, i su promesa ta sigur. (Lesa Isaias 40:30 i 31.) Konsentrá riba aktividatnan kristian. Evitá distraishonnan ku ta kita hopi di bo tempu i enfoká riba yuda otro hende. E ora ei, lo bo tin e fortalesa pa perseverá apesar di desanimashon.—Gal. 6:1, 2.

Nan Ta Sali for di e Tribulashon i Drenta un Mundu Nobo

13. Ki tarea ta spera esnan ku sobrebibí Armagedón?

¹³ Despues di Armagedón, multitut di hende inhustu òf malbado ku lo ser resusitá mester ser instruí den e kamindanan di Yehova. (Echo. 24:15) Lo mester siña nan di e sakrifisio di reskate di Hesus; ademas, mester siña nan ehersé fe den e sakrifisio ei pa nan por risibí su benefisionan. Nan lo tin ku rechasá e ideanan di religion falsu ku nan tabata kere anteriormente i bandoná nan estilo di bida ku nan tabatin promé. Nan tin ku siña bisti e personalidat nobo ku ta distinguí kristiannan berdadero. (Efe. 4:22-24; Kol. 3:9, 10) Miembronan di e otro karnénan ku a sobrebibí Armagedón lo tin hopi trabou pa hasi. Lo ta ki un goso pa sirbi Yehova di e manera ei, liber di preshon i distraishon di e mundu malbado djawe!

14, 15. Deskribí ki interkambio lo tin entre e sobrebibientenan di e tribulashon grandi i e hustunan ku lo resusitá.

¹⁴ Sirbidónan fiel di Yehova, ku a muri promé ku Hesus a efektuá su ministerio riba tera, tambe lo tin hopi kos di siña e tempu ei. Nan lo haña sa ken ta e Mesias primintí ku nan a spera riba dje pero ku nan no a mira nunka. Den nan bida anterior nan a demostrá kaba ku nan ta dispuesto pa laga Yehova instruí nan. Imaginá bo, ki un goso i privilegio lo ta pa yuda nan! Por ehèmpel, lo tin ku splika Daniel kon e profesianan ku el a skirbi, pero ku e no a komprondé nan nifikashon, a kumpli.—Dan. 12:8, 9.

¹⁵ Ta klaru ku e personanan resusitá lo tin hopi kos di siña di nos; pero nos tambe lo tin hopi pregunta pa nan. Nan lo por duna nos detaye di susesonan ku Beibel ta menshoná brevemente. Imaginá bo kon emoshonante lo ta pa haña sa detayenan personal tokante Hesus serka su primu Juan Boutista! Sin duda, e informashon ku nos lo haña serka e testigunan fiel ei lo oumentá e apresio ku nos tin aktualmente pa e Palabra di Dios. Sirbidónan fiel di Yehova ku a muri—inkluso esnan di e multitut grandi ku muri durante e tempu di fin—lo risibí “un mihó resurekshon.” Nan a kuminsá sirbi Yehova den un mundu dominá pa Satanas. Lo ta ki un goso pa nan sigui nan sirbishi bou di sirkunstansianan muchu mas faborabel den e mundu nobo!—Heb. 11:35; 1 Juan 5:19.

16. Segun profesia, kon e Dia di Huisio lo ta?

¹⁶ Na un dado momento durante e Dia di Huisio, ròl- òf bukinan lo ser habrí. Huntu ku e Beibel, nan lo sirbi komo e base pa husga tur hende ku ta na bida pa wak si nan ta digno di risibí bida eterno. (Lesa Revelashon 20:12 i 13.) Na final di e Dia di Huisio, kada persona lo tin oportunidat amplio pa demostrá unda nan ta pará relashoná ku e kuestion di e soberania universal. Lo e apoyá e Reino i permití e Lamchi gui’é na “fuentenan di e awa di bida”? Òf lo e resistí i nenga di someté su mes na e Reino di Dios? (Rev. 7:17; Isa. 65:20) Na e tempu ei, tur hende riba tera lo tin un oportunidat pa tuma un desishon personal sin e influensia di piká heredá òf di un ambiente yen di maldat. Ningun hende lo no por kuestioná Yehova su derecho di ehekutá su huisio final. Ta e malbadonan so lo ser destruí pa semper.—Rev. 20:14, 15.

17, 18. Ku ki antisipashon gososo kristiannan ungí i e otro karnénan ta spera riba e Dia di Huisio?

¹⁷ Awe, kristiannan ungí ku a ser konsiderá digno di risibí un Reino ta spera ansiosamente pa nan goberná durante e Dia di Huisio. Esta un gran privilegio nan lo tin! E speransa ei ta motivá nan pa sigui e konseho ku Pedro a duna nan rumannan den e promé siglo: “Sea ainda mas diligente pa ta sigur ku ta el a yama i a skohe boso; pasobra tanten ku boso ta praktiká e kosnan aki, boso lo no trompeká nunka; pasobra di e manera aki e entrada den e reino eterno di nos Señor i Salbadó Hesukristu lo wòrdu proveé abundantemente na boso.”—2 Ped. 1:10, 11.

¹⁸ E otro karnénan ta alegrá huntu ku nan rumannan ungí. Nan ta desididu pa apoyá nan. Komo e amigunan di Dios awe, nan ta motivá pa hasi tur loke nan por den Dios su sirbishi. Durante e Dia di Huisio, ku goso nan lo duna nan apoyo di henter kurason na e areglonan di Dios segun ku Hesus ta guia nan na fuentenan di e awa di bida. E ora ei—por fin—nan lo ser konsiderá digno di ta Yehova su sirbidónan riba tera pa eternidat!—Rom. 8:20, 21; Rev. 21:1-7.

Bo Ta Kòrda?

• Kiko e propiedatnan di Hesus ta enserá?

• Kon e multitut grandi ta apoyá nan rumannan ungí?

• Ki privilegio e multitut grandi tin awor i ki prospekto nan tin pa futuro?

• Kiko abo ta pensa di e Dia di Huisio?

[Plachi na página ]

Miembronan di e multitut grandi a laba nan pañanan i a hasi nan blanku den e sanger di e Lamchi

[Plachi na página 31]

Kiko bo ke siña for di personanan fiel ku lo resusitá?