Yehova Ta Perkurá ku Ternura pa Su Sirbidónan di Edat Avansá

“Dios no ta inhustu pa lubidá boso trabou i e amor ku boso a mustra pa su nòmber.”​—HEB. 6:10.

1, 2. (a) Kiko un persona ku kabei blanku por pone bo kòrda riba dje? (b) Kiko Yehova ta pensa di kristiannan di edat avansá?

ORA bo mira rumannan di edat avansá ku kabei blanku den kongregashon, bo no ta kòrda riba un relato den e buki bíbliko di Daniel? Den un vishon ku Yehova Dios a duna Daniel, El a deskribí su mes ku kabei blanku. Daniel a skirbi: “Mi a sigui wak te ora trononan a wòrdu poní, i e Ansiano di Dianan a tuma su asiento. Su paña tabata blanku manera sneu, i e kabei riba su kabes manera lana puru.”​—Dan. 7:9.

² Hopi bes, lana puru ta blanku. P’esei anto, kabei blanku i e título “Ansiano di Dianan” ta hala atenshon na e echo ku Dios semper a eksistí i ku e tin gran sabiduria. I pa tur e dos karakterístikanan akí, e meresé nos rèspèt profundo. Pero, kiko Yehova, e Ansiano di Dianan, ta pensa di hende fiel di edat avansá? Dios su Palabra ta bisa: “Kabei blanku ta un korona di gloria [“bunitesa,” NW]; den e kaminda di hustisia e ta wòrdu hañá.” (Pro. 16:31) En bèrdat, si un kristian fiel su kabei bira blanku òf shinishi, e refleho di madures ei ta bunita den bista di Dios. Abo tambe ta pensa meskos ku Yehova di bo rumannan di edat?

Dikon Nan Ta Asina Presioso?

 3. Dikon nos kompañeronan di fe di edat avansá ta asina presioso pa nos?

³ E sirbidónan stimá ei di Dios ta konsistí di entre otro, miembro di e Kuerpo Gobernante di Testigunan di Yehova, rumannan maduro ku a traha òf ku ta traha komo superintendente biahero, pioneronan seloso i publikadónan di Reino maduro—rumannan ku ta sirbi fielmente den nos kongregashonnan. Podisé bo konosé algun ruman ku a prediká e bon nobo ku zelo pa dékadanan i kende nan bon ehèmpel a yuda motivá esnan mas yòn i kambia nan bida. Algun di nos kompañeronan di fe di edat avansá a kumpli ku vários responsabilidat di peso i a soportá persekushon pa kousa di e bon nobo. Yehova i “e esklabo fiel i prudente” tin masha apresio pa loke e rumannan akí a hasi den pasado i ta hasiendo awor den e obra di Reino.​—Mat. 24:45.

 4. Dikon nos mester respetá kristiannan di edat avansá i hasi orashon pa nan?

⁴ E rumannan fiel ei di edat avansá meresé e gratitut i rèspèt di otro sirbidónan di Yehova Dios. De echo, e Lei ku Yehova a duna hende mediante Moisés ta konektá konsiderashon i rèspèt pa hende di edat avansá ku temor pa Yehova. (Lev. 19:32) Nos mester hasi orashon regularmente pa e personanan fiel akí i gradisí Dios pa nan trabou di amor. Apòstel Pablo a hasi orashon pa su kolaboradónan stimá, hóben i bieu.​—Lesa 1 Tesalonisensenan 1:​2 i 3.

 5. Kon asosiashon ku Yehova su adoradónan di edat avansá por benefisiá nos?

⁵ Ademas, tur hende den kongregashon por benefisiá ora nan ta asosiá ku kristiannan di edat avansá. Mediante estudio, investigashon i eksperensia, Yehova su fiel adoradónan di edat avansá a akumulá un konosementu masha balioso. Nan a siña tene pasenshi i mustra empatia, i ora nan ta pasa loke nan mes a siña pa e siguiente generashon, nan ta sinti un gran goso i satisfakshon. (Sal. 71:18) Boso ku ta mas hóben, sea sabí i probechá di e fuente di konosementu akí, meskos ku lo bo saka awa for di un pos hundu.​—Pro. 20:5.

 6. Kon bo por mustra rumannan di edat avansá ku realmente bo ta apresiá nan?

⁶ Bo ta laga rumannan di edat avansá sa ku bo ta apresiá nan, meskos ku Yehova ta apresiá nan? Un manera ku bo por hasi esei ta dor di bisa nan kuantu bo ta stima nan pa nan fieldat i ku bo ta apresiá nan opinion mashá. Ademas, ora bo ta sigui nan konseho, bo ta demostrá ku bo rèspèt pa nan ta sinsero. Hopi kristian di edat avansá por kòrda e konseho sabí ku nan a risibí for di rumannan fiel di edat avansá i kon e echo ku nan a sigui esaki a benefisiá nan henter nan bida.a

Demostrá Ternura na Maneranan Práktiko

 7. Ken Yehova ta enkargá primeramente ku e responsabilidat di kuida hende di edat avansá?

⁷ Dios a enkargá primeramente e famianan di rumannan di edat avansá ku e responsabilidat di perkurá pa nan. (Lesa 1 Timoteo 5:​4 i 8.) Yehova ta keda kontentu ora famianan ta kumpli ku nan obligashon pa ku nan famia di edat avansá i asina demostrá ku nan ta interesá den hende di edat avansá, meskos ku é tambe ta. Dios ta sostené e famianan akí i ta bendishoná nan pa nan esfuersonan i pa tur nan sakrifisionan.b

 8. Dikon kongregashonnan mester mustra interes den kristiannan di edat avansá?

⁸ Di mes manera, Yehova ta keda kontentu ora kongregashonnan lokal ta yuda rumannan fiel di edat avansá ku tin mester di yudansa, pero ku no tin famia Testigu òf famia ku ta dispuesto pa perkurá pa nan. (1 Tim. 5:​3, 5, 9, 10) Asina kongregashonnan ta mustra ku nan tin ‘kompashon, ku nan ta stima manera ruman, i ta miserikòrdioso’ ku hende di edat avansá. (1 Ped. 3:8) Pablo a duna un bon ilustrashon di nan interes den e miembronan di edat avansá di e kongregashon ora el a bisa ku si un miembro di e kurpa ta sufri, “tur e miembronan ta sufri huntu kuné.” (1 Kor. 12:26) Dor di duna yudansa práktiko i kompasivo na hende di edat avansá, nos ta kumpli ku e prinsipio tras di Pablo su konseho: “Kada un karga peso di otro, i asina kumpli ku e lei di Kristu.”​—Gal. 6:2.

 9. Ki peso edat avansá por pone riba un persona?

⁹ Ki peso hende di edat avansá ta karga? Hopi di nan ta kansa lihé. Podisé nan ta sinti ku nan no tin forsa pa hasi ni e kosnan básiko manera bai dòkter, paga resibu, limpia kas i kushiná. Dor ku hopi bes apetit i set ta mengua ku edat, kisas nan ta pensa ku nan no tin nodi di kome ni bebe mes tantu ku nan lo mester ta hasiendo. Esei por ta e kaso tambe ku alimento spiritual. Wowo- i oreanan ku a bira bieu ta hasi lesamentu i skuchamentu na reunionnan kristian difísil, i kisas asta djis drecha pa bai reunion por ta un kansansio pa nan. Pues anto, kiko otro rumannan por hasi pa esnan di edat avansá?

Kon Abo Por Yuda?

10. Kiko ansianonan por hasi pa hasi sigur ku rumannan di edat avansá ta risibí yudansa práktiko?

¹⁰ Hopi kongregashon ta masha ehemplar den e manera ku nan ta perkurá pa esnan di edat avansá. Ruman hòmber- i muhénan amoroso ta yuda nan ku hasimentu di kompra, kushinamentu i limpiamentu di kas. Nan ta yuda esnan di edat avansá studia, prepará pa reunion i sali regularmente den sirbishi. Testigunan mas yòn ta kompañá nan i yuda nan ku transpòrt. Si esnan di edat avansá no por sali for di kas, nan ta skucha e reunionnan via telefòn òf por graba esakinan pa nan. Ki ora ku ta posibel, ansianonan ta hasi sigur ku tin areglo pa duna yudansa práktiko na e rumannan di edat avansá den e kongregashon.c

11. Relatá kon un famia a yuda un ruman hòmber di edat avansá.

¹¹ Kristiannan individual tambe por mustra hospitalidat i generosidat. Despues ku esposa di un ruman hòmber di edat avansá a muri, e no por a paga su hür di kas mas sin e penshon di e ruman muhé. Anteriormente, e ku su kasá a studia Beibel ku un famia—tata, mama i dos yu muhé tiner—ku tabatin un kas grandi. Nan a lag’é bin biba serka nan i a dun’é dos kamber. El a bira parti di e famia, a risibí nan amor di ruman i pa 15 aña largu nan a disfrutá di hopi momento dushi huntu. E yunan a benefisiá masha hopi ya ku nan a siña di e ruman hòmber su fe i eksperensia amplio, i é a benefisiá di nan asosiashon gososo. E ruman hòmber di edat akí a keda biba serka nan te dia el a muri na edat di 89 aña. Te awe e famia ta gradisí Dios pa e hopi bendishonnan ku nan a risibí debí na nan asosiashon ku e ruman. Nan no a ‘pèrdè nan rekompensa’ pasobra nan a yuda un kompañero disipel di Hesukristu.​—Mat. 10:42.d

12. Kiko bo por hasi pa mustra ternura na rumannan di edat avansá?

¹² Podisé bo no ta den un posishon pa yuda un ruman di edat avansá manera e famia akí a hasi, pero kisas bo por yuda rumannan di edat pa bai reunion i sali den sirbishi di vèlt. Bo por invitá nan tambe na bo kas i inkluí nan ora bo ta sali pa keiru. Bo por bishitá nan, spesialmente ora nan ta malu i na kama. Ademas, semper bo por i mester trata nan komo adultonan maduro. Tanten ku kristiannan di edat avansá ta mentalmente bon di salú, mester inkluí nan den tumamentu di tur desishon ku tin efekto riba nan. Asta esnan ku a pèrdè hopi di nan kapasidat mental por sinti si otronan ta trata nan ku onor i rèspèt.

Yehova Lo No Lubidá Bo Trabou

13. Dikon ta importante pa nos mustra konsiderashon pa sintimentu di kristiannan di edat avansá?

¹³ Ta masha importante pa nos mustra konsiderashon pa sintimentu di personanan di edat avansá. Hopi bes, hende di edat avansá ta sinti nan masha frustrá òf trisu pasobra nan no ta logra tur loke nan ke, manera tempu nan tabata mas yòn i salú. Por ehèmpel, un ruman muhé ku a sirbi Yehova aktivamente rònt di 50 aña i ku tabata un pionero regular a haña un malesa debilitante i tabatin hopi difikultat pa asistí na e reunionnan. Ora el a kompará loke e tabata hasi na ántes den sirbishi ku su limitashonnan aktual, el a kuminsá yora. El a baha su kabes i yorando, el a bisa: “Loke mi ta hasiendo awor no ta nada.”

14. Ki animashon Yehova su sirbidónan di edat avansá por saka for di salmonan?

¹⁴ Si bo ta un persona di edat avansá, bo sa tin e sintimentunan doloroso ei? Òf sa sosodé ku bo ta sinti ku Yehova kisas a bandoná bo? Podisé e salmista tabatin e mesun sintimentunan ei ora el a bira bieu, pasobra el a pidi Yehova: “No benta mi afó den tempu di behes; no bandoná mi ora mi forsa ta faya. . . . asta ora mi bira bieu, ku kabei blanku, o Dios, no bandoná mi.” (Sal. 71:​9, 18) Ta klaru ku Yehova sigur lo no a bandoná e kompositor di e salmo ei, i lo E no bandoná abo tampoko. Den un otro salmo, David a ekspresá su konfiansa den Dios su sosten. (Lesa Salmo 68:19.) Si bo ta un kristian fiel di edat avansá, bo por tin e konfiansa ku Yehova ta ku bo i ku lo e sigui sostené bo, dia aden dia afó.

15. Kiko por yuda rumannan di edat avansá mantené un punto di bista positivo?

¹⁵ Tur loke boso, Yehova su Testigunan di edat avansá, a hasi i ta hasiendo awor pa e gloria di Dios lo keda pa semper den su memoria. Beibel ta bisa: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.” (Heb. 6:10) P’esei, no krea un punto di bista negativo, i no pensa ku pasobra bo a bira bieu, bo no ta útil mas pa Yehova. Hasi esfuerso pa remplasá pensamentu pesimista ku ta deprimí bo ku pensamentu positivo. Sea kontentu ku bo bendishonnan i bo speransa pa futuro! Nos tin “un futuro i un speransa”—e mihónan—i nos Kreador a duna nos e garantia ku nan lo ser realisá. (Jer. 29:​11, 12; Echo. 17:31; 1 Tim. 6:19) Meditá riba bo speransa, hasi esfuerso pa bo mente i kurason keda yòn, i nunka pensa ku bo presensia den e kongregashon no ta bal nada!e

16. Dikon un ruman hòmber di edat a pensa ku e mester stòp di sirbi komo ansiano, pero kon e kuerpo di ansiano a anim’é?

¹⁶ Pensa riba e ehèmpel di Johan. E tin 80 aña di edat i ta perkurá henter dia pa su esposa fiel, Sannie, kende aktualmente ta inválido.f Algun ruman muhé ta keda bùrt pa bùrt serka Sannie pa Johan por bai reunion i den sirbishi. Sinembargo, resientemente Johan a sinti ku e no tabata por mas, i el a kuminsá pensa ku e mester stòp di sirbi komo ansiano di kongregashon. Ku awa na wowo, el a puntra: “Ki bal ku mi ta un ansiano? Mi no ta hasiendo nada útil mas den kongregashon.” Su kompañeronan ansiano a sigur’é ku su eksperensia i su disernimentu ta masha balioso pa nan. Nan a urgié pa e sigui sirbi komo ansiano ounke su aporte tabata limitá. Ku hopi ánimo, ainda Johan ta sirbi komo ansiano, i esei ta un bendishon pa e kongregashon.

Yehova Ta Realmente Interesá den Boso

17. Ki siguransa Beibel ta duna kristiannan di edat avansá?

¹⁷ E Skritura ta mustra bon kla ku hende di edat avansá por sigui ser fruktífero den nan sirbishi na Dios apesar di e problemanan ku behes ta trese kuné. E salmista a deklará: “[Esnan] plantá den e kas di SEÑOR . . . den nan behes nan lo [sigui] duna fruta; nan lo ta yen di vigor i bèrdè-bèrdè.” (Sal. 92:​13, 14) Apòstel Pablo, kende kisas tabata lucha ku un malesa, ‘no a pèrdè ánimo, maske su hende eksterior tabata degenerá.’​—Lesa 2 Korintionan 4:​16-18.

18. Dikon rumannan di edat avansá i esnan ku ta perkurá pa nan tin mester di yudansa di otro hende?

¹⁸ Awendia, tin hopi ehèmpel ku ta demostrá ku rumannan di edat avansá por sigui “duna fruta.” Sinembargo, e desafionan ku malesa i behes ta trese kuné por desanima asta esnan ku tin miembronan di famia leal ku ta perkurá pa nan. Esnan ku ta duna kuido tambe por kansa. E kongregashon tin e privilegio i responsabilidat di demostrá nan amor dor di yuda esnan di edat avansá i esnan ku ta perkurá pa nan. (Gal. 6:10) E yudansa ei ta mustra ku nos, de echo, no ta bisa e personanan ei bai i ‘tene nan kurpa kayente i yena nan barika,’ sin yuda nan na un manera práktiko.​—Sant. 2:15-17.

19. Dikon kristiannan fiel di edat avansá por mira futuro ku konfiansa?

¹⁹ Edat avansá kisas ta kambia e aktividatnan di un kristian un poko, pero tempu no ta mengua Yehova su amor pa su sirbidónan leal di edat avansá. Al kontrali, tur e kristiannan fiel akí ta presioso den su bista, i nunka lo e bandoná nan. (Sal. 37:28; Isa. 46:4) Yehova lo sostené i guia nan durante henter nan behes.​—Sal. 48:14.

[Nota]

Kon Lo Bo Kontestá?

• Dikon bo ta pensa ku kristiannan fiel di edat avansá ta presioso?

• Kon bo por mustra ternura pa rumannan spiritual di edat avansá?

• Kiko por yuda Yehova su sirbidónan di edat avansá mantené un punto di bista positivo?

[Plachinan na página 24]

Miembronan di e kongregashon tin masha apresio pa esnan di edat avansá