Bo Integridat Ta Hasi Yehova Su Kurason Kontentu

“Sea sabí, mi yu, i hasi mi kurason kontentu, pa mi por kontestá esun ku reprochá mi.”​—PRO. 27:11.

1, 2. (a) Ki akusashon di Satanas e buki di Jòb ta deskribí? (b) Kiko ta indiká ku Satanas a sigui reprochá Yehova despues di e tempu di Jòb?

YEHOVA a permití Satanas pone e integridat di Su sirbidó leal, Jòb, na prueba. Esei a pone ku Jòb a pèrdè su krio di bestia, su yunan i a haña problema ku salú. Pero ora Satanas a kuestioná Jòb su integridat, no ta Jòb so e tabatin na mente. Satanas a pretendé: “Kueru pa kueru! Sí, tur loke un hende tin e lo duna pa su bida.” E desafio akí a lanta un kuestion ku a enbolbé no solamente Jòb, sino tur hende. I e kuestion akí a sigui despues di Jòb su morto.​—Jòb 2:4.

² Rònt di 600 aña despues di Jòb su pruebanan, Yehova a inspirá Salomon pa skirbi: “Sea sabí, mi yu, i hasi mi kurason kontentu, pa mi por kontestá esun ku reprochá mi.” (Pro. 27:11) Ta klaru ku na e tempu ei ainda Satanas tabata desafiá Yehova. Ademas, apòstel Juan a risibí un vishon den kua el a mira Satanas ta akusá Dios su sirbidónan. E vishon akí a kuminsá kumpli despues ku Satanas a ser saká for di shelu poko tempu despues di e establesimentu di e Reino di Dios na aña 1914. Sí, asta awor ku nos ta asina leu den e último dianan di e sistema malbado akí, Satanas ta sigui kuestioná e integridat di Dios su sirbidónan.​—Rev. 12:10.

 3. Ki lèsnan balioso nos por siña for di e buki di Jòb?

³ Laga nos konsiderá tres lès importante ku nos por siña for di e buki di Jòb. Di promé, e pruebanan di Jòb ta laga nos mira ken ta e berdadero enemigu di hende i e fuente di oposishon kontra Dios su pueblo. E enemigu ei ta Satanas e Diabel. Di dos, sin importá ki prueba nos haña nos kuné, si nos tin un relashon íntimo ku Dios, esaki lo yuda nos mantené nos integridat. Di tres, ora nos haña nos ku un òf otro prueba, Dios ta yuda nos perseverá meskos ku el a yuda Jòb. Awe, Yehova ta yuda nos mediante su Palabra, su organisashon i su spiritu santu.

Semper Kòrda Ken Ta e Berdadero Enemigu

 4. Ken ta responsabel pa mundu su situashon aktual?

⁴ Hopi hende no ta kere ku Satanas ta eksistí. Pues, ounke nan kisas ta alarmá debí na e situashon mundial, nan no ta komprondé ku ta Satanas e Diabel ta e berdadero kousa. Ta sierto ku hende mes ta responsabel pa mayoria di nan sufrimentu. Nos promé mayornan, Adam ku Eva, a skohe independensia for di nan Kreador. I desde e tempu ei, e generashonnan ku a sigui a aktua na un manera masha bobo. Sinembargo, ta Diabel tabata esun ku a gaña Eva i a pon’é rebeldiá kontra Dios. E ta esun ku a krea un sistema mundial, entre humanidat imperfekto i muribundo, ku e ta dominá. Debí ku Satanas ta “e dios di e mundu akí,” sosiedat humano ta desplegá e karakterístikanan básiko ku e ta desplegá. E karakterístikanan ei ta orguyo, envidia, golosidat, engaño i rebeldia. Ademas, hende ta gusta pleita. (2 Kor. 4:4; 1 Tim. 2:14; 3:6; lesa Santiago 3:​14 i 15.) Esakinan ta hiba na, por ehèmpel, konfliktonan polítiko i religioso, odio, korupshon i desórden, lokual ta kontribuí hopi na humanidat su sufrimentu.

 5. Kiko nos mester hasi ku e konosementu balioso ku nos tin?

⁵ Komo sirbidónan di Yehova nos tin un konosementu masha balioso! Sí, nos sa ken ta esun responsabel pa e situashon mundial ku ta deteriorando. Esei no ta impulsá nos pa partisipá den sirbishi di vèlt pa bisa hende ken ta e kousa prinsipal di nos problemanan? Nos no ta kontentu ku nos ta na banda di Yehova, e Dios berdadero, i ku nos por splika otro hende kon lo e kaba ku Satanas i hende su sufrimentu?

6, 7. (a) Ken ta responsabel pa e persekushon di adoradónan berdadero? (b) Kon nos por imitá e ehèmpel di Eliú?

⁶ Satanas no ta solamente responsabel pa mayoria di sufrimentu na mundu, e ta responsabel tambe pa e oposishon ku e pueblo di Dios ta konfrontá. E ta determiná pa pone nos na prueba. Hesukristu a bisa apòstel Pedro: “Simon, Simon, mira, Satanas a pidi pèrmit pa sefta boso manera trigu.” (Luk. 22:31) Di mes manera, nos kada un ku ta sigui Hesus su pasonan lo haña nos ku prueba den un manera òf otro. Pedro a kompará Diabel ku “un leon ku ta gruña, buskando ken e por devorá.” I Pablo a bisa: “Tur hende ku ta deseá di hiba un bida santu den Kristu Hesus lo wòrdu persiguí.”​—1 Ped. 5:8; 2 Tim. 3:12.

⁷ Ora un ruman den fe hañ’é ku un tragedia, nos no mester pensa ku Yehova ta responsabel pa esaki. Manera nos a konsiderá kaba, ta Satanas ta nos berdadero enemigu. P’esei, nos no ta hasi manera e konsoladónan falsu i alehá nos mes di e ruman ku a wòrdu afektá. Mas bien, nos ta aktua manera Eliú, kende a papia ku Jòb manera un berdadero amigu. Nos ta apoyá nos ruman den su lucha kontra nos enemigu, Satanas. (Pro. 3:27; 1 Tes. 5:25) Nos meta ta pa yuda nos ruman mantené su integridat kueste loke kueste pa asina e hasi Yehova su kurason kontentu.

 8. Dikon Satanas no por a stòp Jòb di onra Yehova?

⁸ E promé kos ku Satanas a pone Jòb pèrdè tabata su krio di bestia. E bestianan ei tabatin hopi balor, i kisas nan tabata su fuente di entrada. Pero Jòb tabata usa nan den su adorashon tambe. Despues ku Jòb a santifiká su yunan, “e tabata lanta mainta trempan i ofresé ofrendanan kimá pa kada un di nan, pasobra Jòb tabata bisa: ‘Por ta ku mi yu hòmbernan a peka i a maldishoná Dios den nan kurason.’ Asina Jòb tabata hasi kontinuamente.” (Jòb 1:​4, 5) Pues, regularmente Jòb tabata hasi sakrifisio di bestia na Yehova. Unabes e pruebanan a kuminsá, esei no tabata posibel mas. Jòb no tabatin “rikesa” òf kos balioso mas ku e por a onra Yehova kuné. (Pro. 3:9) Pero e por a onra Yehova ku su lepnan, i el a hasi esei tambe!

Kultivá un Relashon Íntimo ku Yehova

 9. Kiko ta e kos di mas balioso ku nos tin?

⁹ Sea ku nos ta riku òf pober, hóben òf bieu, bon di salú òf nò, nos por kultivá un relashon íntimo ku Yehova. Sin importá ki prueba nos ta konfrontá, si nos tin un bon relashon ku Dios, esaki lo yuda nos mantené nos integridat i hasi Yehova su kurason kontentu. Asta algun hende ku tabatin poko konosementu di e bèrdat a tuma un posishon firme, i ku kurashi nan a mantené nan integridat.

10, 11. (a) Kon un ruman muhé a reakshoná ora ku su integridat a ser poní na prueba? (b) Ki kontesta konvinsente el a duna Satanas?

¹⁰ Konsiderá e ehèmpel di Ruman Valentina Garnovskaya. E ta un di e hopi Testigunan na Rusia, kendenan, meskos ku Jòb, a mantené nan integridat apesar di pruebanan severo. Na 1945, ora e tabatin mas o ménos 20 aña di edat, un ruman hòmber a dun’é testimonio. E ruman a bolbe dos bes mas pa papia di Beibel. Pero despues esei, e no a mira e ruman nunka mas. Apesar di esei, Valentina a kuminsá prediká na su bisiñanan. Esei a pone ku nan a arest’é i sentensi’é na ocho aña den un kampamentu di trabou fòrsá. Na 1953 el a haña su libertat i mesora el a kuminsá prediká atrobe. Nan a bolbe arest’é i enkarsel’é—e biaha akí pa dies aña. Despues di a pasa vários aña den diferente kampamentu, el a muda pa un kampamentu kaminda tabatin algun ruman muhé, kendenan tabatin un ehemplar di e Beibel. Un dia, ún di nan a mustra Valentina e Beibel. Esei tabata un momento masha emoshonante. Imaginá bo! E úniko Beibel ku Valentina a yega di mira promé ku esun ei tabata e Beibel di e ruman ku a dun’é testimonio na 1945!

¹¹ Na 1967, Valentina a haña su libertat i por fin e por a simbolisá su dedikashon na Yehova mediante boutismo bou di awa. Ku masha zelo el a usa su libertat pa partisipá den e ministerio te na 1969. E aña ei, nan a arest’é atrobe i a sentensi’é na tres aña di prizòn. Apesar di esei, Valentina a sigui prediká. Promé ku el a muri na 2001, el a yuda 44 hende haña e bèrdat. Na tur, el a pasa 21 aña den prizòn i kampamentu. E tabata dispuesto pa sakrifiká tur kos, inkluso su libertat, pa e por a mantené su integridat. Na final di su bida, Valentina a bisa: “Nunka mi tabatin mi propio lugá di biba. Tur mi pertenensianan tabata den un solo maleta. Pero sirbiendo Yehova, mi tabata felis i kontentu.” Satanas a pretendé ku hende lo no keda leal na Dios ora nan haña nan ku prueba. Pero Valentina a duna Satanas un kontesta konvinsente! (Jòb 1:​9-11) Nos por ta sigur ku Valentina a hasi Yehova su kurason kontentu i ku Yehova ta spera ansiosamente pa resusitá é i otronan ku a keda fiel te na morto pa nan por biba atrobe.​—Jòb 14:15.

12. Ki papel amor ta hunga den nos relashon ku Yehova?

¹² Nos amistat ku Yehova ta basá riba nos amor p’e. Nos ta atmirá Dios su kualidatnan i ta hasi tur loke nos por pa biba na armonia ku su propósito. Kontrali na loke Diabel ta pretendé, nos ta demostrá ku nos ta stima Yehova di henter nos kurason i ku nos ta sirbié inkondishonalmente. E amor sinsero akí ta duna nos e forsa pa mantené nos integridat apesar di prueba. Di su parti, Yehova “ta preservá alma di su santunan [“esnan leal na dje,” NW].”​—Pro. 2:8; Sal. 97:10.

13. Kon Yehova ta konsiderá loke nos ta hasi p’e?

¹³ Amor ta motivá nos pa onra e nòmber di Yehova ounke nos ta sinti ku nos no por hasi mashá. Yehova ta wak nos motivashon i e no ta husga nos si nos no por hasi tur loke nos tin gana di hasi. No ta loke nos ta hasi so ta konta, sino e motibu tambe pakiko nos ta hasié. Ounke Jòb tabata masha tristu i a soportá hopi kos, el a papia di su amor pa e kaminda di Yehova ku esnan ku tabata akus’é. (Lesa Jòb 10:12 i 28:28.) Den e último kapítulo di e buki di Jòb, Dios a bisa ku e tabata rabiá ku Elifaz, Bildad i Sofar pasobra nan no a papia bèrdat. I na mes momento, Yehova a indiká ku Jòb tabatin su aprobashon. El a hasi esei dor di referí kuater bes na Jòb komo “mi sirbidó” i a instruyé pa intersedé na fabor di e konsoladónan falsu. (Jòb 42:​7-9) Laga nos tambe aktua di tal manera ku nos por tin Yehova su aprobashon.

Yehova Ta Sostené Su Fiel Sirbidónan

14. Kon Yehova a yuda Jòb korigí su manera di pensa?

¹⁴ Jòb a mantené su integridat ounke e tabata imperfekto. Tabatin biaha ku e no a mira kosnan n’e manera korekto debí ku e tabata bou di preshon fuerte. Por ehèmpel, el a bisa Yehova: “Mi ta sklama na bo pa yudansa, ma bo no ta kontestá mi . . . Ku e poder di bo man bo ta persiguí mi.” Ademas, Jòb a duna demasiado importansia na su mes i a trata di hustifiká su mes. El a bisa: “Mi no ta malbado” i “no tin violensia den mi mannan, i mi orashon ta puru.” (Jòb 10:7; 16:17; 30:​20, 21) No opstante, bondadosamente Yehova a hasi Jòb un seri di pregunta ku a pone Jòb stòp di pensa riba su mes. Ademas, e preguntanan ei a yuda Jòb mira mas kla ku Dios ta e Ser Supremo i kon insignifikante hende ta. Jòb a aseptá e guia i a korigí su manera di pensa.​—Lesa Jòb 40:8 i 42:2 i 6.

15, 16. Den ki maneranan Yehova ta perkurá yudansa pa su sirbidónan awe?

¹⁵ Awe tambe Yehova ta duna su sirbidónan guia bondadoso i firme. Es mas, nos ta disfrutá di benefisionan ku ta di vital importansia. Por ehèmpel, Hesukristu a perkurá e sakrifisio di reskate i asina a pone e base pa pordon di piká. A base di e sakrifisio ei, nos por tin un relashon íntimo ku Dios ounke ku nos ta imperfekto. (Sant. 4:8; 1 Juan 2:1) Ora nos ta konfrontá prueba, nos por resa pidi Dios sosten i fortalesa mediante su spiritu santu. Nos tin tambe e Beibel kompletu, i si nos les’é i meditá riba su kontenido, nos ta prepará nos mes pa pruebanan di fe. Estudio di Beibel ta yuda nos komprondé e kuestion relashoná ku Yehova su soberania universal i esun relashoná ku nos integridat.

¹⁶ Ademas, nos ta benefisiá mashá pasobra nos ta forma parti di e hermandat mundial ku Yehova ta duna alimento spiritual mediante “e esklabo fiel i prudente.” (Mat. 24:​45-47) Tin aproksimadamente 100.000 kongregashon di Testigunan di Yehova. Nan tur ta tene reunionnan ku ta instruí i fortalesé nos pa nos por enfrentá posibel pruebanan di fe. E eksperensia di Sheila, un tiner Testigu ku ta biba na Alemania, ku nos lo konsiderá den e siguiente paragraf, ta ilustrá esaki.

17. Duna un ehèmpel ku ta mustra ku ta sabí pa sigui e guia di Yehova su organisashon awe.

¹⁷ Un dia ku Sheila tabata na skol, su klas a keda temporalmente sin supervishon. Su kompañeronan di klas a disidí di bai eksperimentá ku e wega di Ouiya. Mesora Sheila a sali for di klas. I ora el a tende loke a pasa despues, el a keda kontentu ku el a sali. Algun di e studiantenan a sinti e presensia di demoño ora nan tabata hunga e wega di Ouiya i nan a kore bai morto spantá. Pero kiko a yuda Sheila tuma e desishon pa sali mesora for di e klas? Sheila a splika: “Djis un poko tempu promé ku e insidente akí, nos a trata e peligernan di e wega di Ouiya durante un reunion na Salòn di Reino. Pues, mi tabata sa kiko pa hasi. Mi kier a hasi Yehova kontentu manera Beibel ta bisa na Proverbionan 27:11.” Ta bon ku Sheila a bai reunion i a skucha ku atenshon!

18. Kiko abo personalmente ta determiná pa hasi?

¹⁸ Laga nos kada un ta determiná pa sigui e guia ku nos ta risibí di Dios su organisashon. Nos ta haña e guia i sosten ku nos tin mester si regularmente nos ta asistí na e reunionnan, lesa Beibel, studia publikashonnan basá riba Beibel, hasi orashon i asosiá ku kristiannan maduro. Yehova ke pa nos mantené nos integridat, i e tin konfiansa ku nos lo sigui hasi esei. Nos tin e gran privilegio di onra Yehova su nòmber, mantené nos integridat i hasi Yehova su kurason kontentu!

Bo Ta Kòrda?

• Pa ki situashon i pruebanan Satanas ta responsabel?

• Kiko ta e kos di mas balioso ku nos tin?

• Kiko ta e base di nos amistat ku Yehova?

• Kua ta algun manera ku Yehova ta sostené nos awe?

[Plachi na página 16]

Bo ta sinti bo motivá pa kompartí e konosementu balioso ku bo tin?

[Plachi na página 17]

Nos por yuda nos rumannan den fe mantené nan integridat

[Plachi na página 18]

Valentina tabata dispuesto pa sakrifiká tur kos p’e mantené su integridat