E Búskeda pa Guia Práktiko

SI BO ta buskando konseho, bo por haña masha hopi. E negoshi ku ta produsí literatura i otro medionan pa siña bo kon pa yuda bo mes, ta un industria ku ta kresiendo masha lihé den e mundu akí. Na lugánan manera Gran Bretaña, Latinoamérika, Hapon i Merka, bukinan ku ta splika kon pa yuda bo mes ta esnan mas bendí. Vidio-, seminario- i programanan di televishon ku ta mustra kon bo por yuda bo mes tambe ta birando masha popular. Loke ta hasi nan atraktivo pa hende ta ku nan ta duna bo e idea ku bo mes por trata ku bo problemanan sin ku bo tin ku konsultá un sikólogo, un konsehero di matrimonio òf un guia religioso. Ki tópikonan e bukinan òf programanan akí ta trata?

E tópikonan mas popular ta kon pa haña satisfakshon personal, kon pa buska i haña un kasá i kon pa kria yu. Otro tópikonan komun ta kon pa trata ku depreshon, tristesa i e konsekuensianan di divorsio. Ademas, hopi hende ke haña konseho pa stòp di huma, kome i bebe di mas. E konsehonan ku hende ta duna ta práktiko? Tin biaha sí, pero no ta tur biaha. P’esei, ta sabí pa konsiderá e spièrtamentu di Beibel: “E hende simpel ta kere tur kos, ma e hòmber prudente ta wak bon unda e ta bai.”—Proverbionan 14:15.

Bukinan pa yuda bo mes, ta hopi diferente for di buki di instrukshon ku ta siña bo entre otro, idioma, kon pa saka potrèt òf kon pa tene buki. E bukinan di instrukshon akí por ta útil i tambe un alternativa pa kursonan spesialisá ku ta kostoso. Bukinan pa yuda bo mes—sea riba tereno di negoshi, matrimonio, kriamentu di yu òf salú mental—ta distinto. Generalmente, nan ta rekomendá un estilo di bida òf ta promové sierto filosofia-, òf maneranan di pensa. P’esei, ta sabí pa puntra: ‘Ken ta duna e konseho akí? Unda el a haña su informashon?’

Podisé no ta semper ekspertonan ta basa nan opinion riba evidensia ku nan a optené kuidadosamente. Siendo ku nan sa ku nan por gana hopi plaka dor di bisa hende loke nan ke tende, algun kisas ta duna konseho ku ta generá mas ganashi. Den ún pais so, e negoshi ku ta produsí medionan pa siña bo kon pa yuda bo mes ta generá mas ku ocho mil mion dòler pa aña!

Bukinan pa Yuda Bo Mes Ta Práktiko?

Ora bo konsultá bukinan pa yuda bo mes, bo ta spera di haña konseho práktiko. Pero tin biaha, loke bo ta haña ta superfisial òf puru teoria. Generalmente, e bukinan ei ta bisa bo: ‘Si bo djis pensa positivo, bo por solushoná bo problema sigur. Lo bo haña tur loke bo ke, sea ta plaka, salú òf un relashon satisfaktorio, basta bo keda pensa positivo.’ E konseho ei ta práktiko? Lo e yuda bo pa enfrentá realidat- i desepshonnan di bida?

Tuma por ehèmpel, bukinan ku ta trata relashon entre hende en general i entre parehanan kasá; nan ta algun di esnan mas popular. Nan ta yuda hende edifiká un bida di famia felis i stabil? No ta tur biaha. Segun un komentarista, e outor di bukinan pa yuda bo mes ku ta duna konseho tokante amor i ku tabata un éksito rotundo na Latinoamérika “ta bisa lektornan kon pa kultivá bon relashon i desaroyá outo-estima.” E outor a bisa ku un hende ku ta keda den un relashon ku no ta funshoná ta gaña su mes. Básikamente, e ke bisa ku ta importante pa hasi loke ta pone bo sinti bon en bes di atmití ku bo tin problema i trata di resolvé nan.

Ta sierto ku bukinan pa yuda bo mes ta kontené algun bon konseho. Pero, nan por duna konseho perhudisial tambe. Un eksperto kisas ta duna bon konseho riba un tópiko miéntras ku su konseho riba un otro tópiko por hasi e situashon bira pió. Lo ta imposibel pa skohe e konseho korekto for di e gran kantidat di informashon ku e bukinan akí ta ofresé i ku hopi bes ta kontradiktorio. Ken su konseho bo por konfia? Puntra bo mes: ‘E konseho akí ta basá riba investigashon kuidadoso? Òf e ta djis e opinion personal di e outor? Te na ki grado e búskeda di rikesa òf prominensia a influensiá e integridat di e outor?’

Un buki di konseho ku a resultá benefisioso atraves di siglonan ta Beibel. E ta duna konseho práktiko riba hopi tópiko ku e bukinan pa yuda bo mes ta trata i muchu mas. El a motivá miónes di hende pa sigui su konseho: “Boso wòrdu renobá den e spiritu di boso mente . . . i bisti e hende nobo [òf “personalidat nobo,” NW].” (Efesionan 4:​23, 24) Beibel ta yuda nos komprondé bon kla kiko ta e kousa di nos problemanan i ta siña nos kon pa enfrentá nan. Mas importante ainda, e ta duna nos motibu fuerte i práktiko pa hasi loke ta bon. E siguiente artíkulo lo splika nos kon Beibel ta hasi esei.