No Hasi Yehova Su Spiritu Santu Tristu

‘No hasi spiritu santu di Dios ferdrit; Dios a seya boso kuné.’​—EFE. 4:30, BPK.

 1. Kiko Yehova a hasi pa miónes di hende, i kiko ta nan deber?

YEHOVA a hasi algu masha spesial pa miónes di hende den e mundu turbulento akí. El a habri kaminda pa nan por hala serka dje mediante su Yu unigénito, Hesukristu. (Juan 6:44) Si bo a dediká bo mes na Dios i ta biba na armonia ku bo dedikashon, bo tambe por hala serka dje. I komo un hende batisá den nòmber di spiritu santu, bo tin e deber di aktua na armonia ku e spiritu ei.​—Mat. 28:19.

 2. Ki preguntanan nos lo konsiderá?

² Nos tur ku ta “sembra ku e spiritu na bista” ta bisti e personalidat nobo. (Gal. 6:8, NW; Efe. 4:​17-24) Apesar di esei, apòstel Pablo ta konsehá i spièrta nos pa no hasi spiritu santu di Dios tristu. (Efe. 4:​25-32) Laga nos analisá Pablo su konseho kuidadosamente. Dikon el a konsehá kristiannan pa no hasi spiritu santu di Dios tristu? Den ki manera un persona dediká na Yehova por hasi spiritu santu tristu? I kon nos por evitá esei?

Pakiko No Hasi Spiritu Santu Tristu?

 3. Kon lo bo splika Efesionan 4:30?

³ Na promé lugá, laga nos konsiderá loke Pablo a bisa na Efesionan 4:30 (BPK): ‘No hasi spiritu santu di Dios ferdrit; Dios a seya boso kuné komo su propiedat pa marka boso pa e dia di salbashon final.’ Pues, Pablo no tabata ke pa su rumannan den fe, kendenan e tabata stima mashá, pone nan relashon ku Dios na peliger. El a kòrda nan ku ta mediante Yehova su spiritu santu nan a ser ‘seyá pa e dia di salbashon final.’ Sí, Yehova su spiritu santu tabata i ainda ta un seyo, òf “garantia,” di loke ta spera su fiel sirbidónan ungí. (2 Kor. 1:22) E seyo ta indiká ku nan ta pertenesé na Dios i ku nan ta bini na remarke pa bida selestial. Finalmente, e kantidat di persona ku lo risibí e seyo akí ta 144.000.​—Rev. 7:​2-4.

 4. Dikon ta importante pa evitá di hasi Dios su spiritu santu tristu?

⁴ Si nos ta hasi Yehova su spiritu santu tristu, ku tempu, nos por pèrdè e spiritu ei; pues, nos lo no tin e guia di spiritu santu mas. Loke David a bisa despues ku el a peka ku Bètsabé ta konfirmá esaki. Despues ku el a repentí di su piká, el a roga Yehova: “No tira mi for di bo presensia, i no kita bo spiritu santu for di mi.” (Sal. 51:11) Den kaso di kristiannan ungí, ta solamente esnan ku keda “fiel te na morto” lo risibí e “korona” di bida inmortal den shelu. (Rev. 2:10; 1 Kor. 15:53) Kristiannan ku tin e speransa di biba pa semper riba tera tin ku ehersé fe den e sakrifisio di reskate di Kristu i mantené nan integridat na Dios pa nan por risibí e regalo di bida. I pa logra esei, nan tambe mester di yudansa di spiritu santu. (Juan 3:36; Rom. 5:8; 6:23) P’esei, ta nos tur mester tene kuidou pa nos no hasi Yehova su spiritu santu tristu.

Kon un Kristian por Hasi Spiritu Santu Tristu?

5, 6. Kon un kristian por hasi spiritu santu di Yehova tristu?

⁵ Komo kristiannan dediká, nos por evitá di hasi spiritu santu di Dios tristu basta nos sigui ‘kana segun e spiritu i biba segun e spiritu.’ E ora ei, nos lo no desplegá mal kualidatnan ni laga mal deseo di karni dominá nos. (Gal. 5:​16, 25, 26) Pero e asuntu por kambia. Si nos permití nos mes drif bai gradualmente, kisas sin ku nos a ripará, nos por kuminsá hasi loke Dios su Palabra inspirá pa spiritu santu ta kondená. Di e manera ei, nos lo hasi spiritu santu di Dios tristu.

⁶ Si kontinuamente nos ta aktua kontrali na e guia di spiritu santu, nos ta hasié tristu. Ku otro palabra, nos ta hasi Yehova—e Fuente di spiritu santu—tristu. Awor kon nos por evitá di hasi spiritu santu tristu? Un análisis di Efesionan 4:​25-32 lo mustra kon nos mester komportá nos mes pa evitá esei.

Kon pa Evitá di Hasi Spiritu Santu Tristu?

7, 8. Splika dikon nos mester papia bèrdat.

⁷ Nos mester papia bèrdat. Na Efesionan 4:25, Pablo a skirbi: “Poniendo mentira un banda, kada un di boso papia bèrdat ku su próhimo, pasobra nos ta miembro di otro.” Siendo ku nos ta “miembro di otro,” esta, uní den e mesun kurpa, nos nunka mester ta desonesto òf purba deliberadamente di engañá nos rumannan den fe, pasobra esei ta meskos ku papia mentira. Un hende ku tin e kustumber ei, ku tempu, lo pèrdè su amistat ku Dios.​—Lesa Salmo 5:6.

⁸ Palabra- i akshonnan engañoso por kousa desunion den kongregashon. P’esei, nos mester ta manera Daniel, e profeta fiel den kende nan no por a detektá nada korupto. (Dan. 6:4) I nos mester kòrda loke Pablo a bisa kristiannan ku tin e speransa selestial, esta, ku nan tur ta miembro di “e kurpa di Kristu” i ta pertenesé na otro. P’esei, el a konsehá nan pa keda uní komo Hesus su siguidónan ungí fiel i konfiabel. (Efe. 4:​11, 12) Si nos tin e speransa di biba pa semper den Paradeis riba tera, nos tambe mester ta konfiabel i papia bèrdat i asina kontribuí na e union ku tin den e hermandat mundial.

 9. Dikon ta masha importante pa sigui e konseho di Efesionan 4:​26 i 27?

⁹ Nos mester resistí Diabel i no dun’é oportunidat di hasi daño na nos spiritualidat. (Sant. 4:7) Spiritu santu ta yuda nos resistí Satanas. I un manera ku nos por resistí Diabel ta di evitá rabia deskontrolá. Pablo a skirbi: “Rabia, ma no hasi piká; no laga solo baha riba boso rabia, i no duna Diabel oportunidat.” (Efe. 4:​26, 27) Asta si nos tin bon motibu pa rabia, ta bon pa nos hasi orashon mesora den silensio. Esei por yuda nos mantené un “spiritu kalmu” i desplegá dominio propio en bes di aktua di tal manera ku nos ta hasi Dios su spiritu santu tristu. (Pro. 17:27) P’esei, laga nos no keda rabiá i duna Satanas chèns di influensiá nos pa hasi loke ta malu. (Sal. 37:​8, 9) Un otro manera pa resistí Diabel ta di resolvé desakuerdo mesora na armonia ku Hesus su konseho.​—Mat. 5:​23, 24; 18:​15-17.

10, 11. Dikon nos no mester hòrta òf aktua na un manera desonesto?

¹⁰ Nos no mester hòrta ni aktua na un manera desonesto. Relashoná ku hòrtamentu, Pablo a bisa: “Laga esun ku ta hòrta, no hòrta mas; ma mas bien, lag’é traha, hasiendo ku su mes mannan loke ta bon, pa e por tin algu pa kompartí ku esun ku ta den nesesidat.” (Efe. 4:28) Si un kristian dediká na Dios ta hòrta, en realidat, e ta ‘profaná e nòmber di Dios’ pasobra e ta trese reproche riba dje. (Pro. 30:​7-9) Pues, nada no ta hustifiká hòrtamentu, pobresa tampoko. Hende ku ta stima Yehova i nan próhimo ta komprondé esei bon kla.​—Mar. 12:​28-31.

¹¹ Pero, Pablo no a djis menshoná loke nos no mester hasi, el a bisa tambe loke nos tin ku hasi. Si nos ta kana pa medio di spiritu santu, nos lo traha duru pa perkurá pa nos famia i pa por tin “algu pa kompartí ku esun ku ta den nesesidat.” (1 Tim. 5:8) Hesus i su apòstelnan tabatin e kustumber di pone algu un banda pa yuda hende pober, pero e traidó Hudas Iskariot tabata hòrta plaka for di e kaha. (Juan 12:​4-6) Esei ta mustra bon kla ku e no tabata sigui e guia di spiritu santu. Nos sí ku ta sigui guia di Dios su spiritu santu ta “komportá nos mes onradamente den tur kos” meskos ku Pablo. (Heb. 13:18, NW) Di e manera ei, nos ta evitá di hasi Yehova su spiritu santu tristu.

Otro Maneranan pa Evitá di Hasi Spiritu Santu Tristu

12, 13. (a) Segun Efesionan 4:29, ki abla nos mester evitá? (b) Kon nos manera di papia mester ta?

¹² Nos mester wak bon kon nos ta papia. Pablo a deklará: “No laga ningun palabra dañino sali for di boso boka, sino solamente palabra ku ta bon pa edifikashon, konforme e nesesidat di e momento, pa esaki por duna grasia na esnan ku ta tende.” (Efe. 4:29) Un bes mas, e apòstel no ta djis bisa loke nos no mester hasi, e ta bisa tambe loke nos tin ku hasi. Dios su spiritu santu ta motivá nos pa papia loke ta ‘bon pa edifikashon pa esaki por duna grasia na esnan ku ta tende.’ Ademas, nos no mester laga ningun “palabra dañino” sali for di nos boka. E palabra griego tradusí komo “dañino” ta ser usá pa referí na fruta, piska òf karni putrí. Meskos ku nos tin asko di kuminda putrí, nos ta odia abla ku Yehova ta kondená.

¹³ Nos manera di papia mester ta respetuoso, bondadoso i “sasoná ku salu.” (Kol. 3:​8-10; 4:6) Na nos manera di papia, hende mester por mira ku nos ta diferente. P’esei, laga nos manera di papia ta ‘edifikante’ pa asina nos por yuda otronan. Laga nos tin e mesun aktitut ku e salmista, kende a kanta: “Laga e palabranan di mi boka i e meditashon di mi kurason ta aseptabel den bo bista, o SEÑOR, mi Baranka i mi Redentor.”​—Sal. 19:14.

14. Segun Efesionan 4:​30 i 31, kiko nos mester evitá?

¹⁴ Nos mester evitá amargura, rabia, kalumnia i tur maldat. Despues ku Pablo a spièrta kristiannan pa no hasi Dios su spiritu santu tristu, el a skirbi: “Laga tur amargura, furia, rabia, griteria i kalumnia wòrdu kitá for di boso, huntu ku tur malisia.” (Efe. 4:​30, 31) Komo hende imperfekto, nos tur mester hasi hopi esfuerso pa kontrolá nos pensamentu- i akshonnan. Si nos ta duna rienda liber na ‘amargura, furia i rabia,’ nos ta hasi Dios su spiritu santu tristu. Esei ta e kaso tambe ora nos ta karga renkor, keda kòrda tur kos malu ku hende hasi kontra nos i ta nenga di hasi pas ku e persona ku a ofendé nos. Si nos tin e kustumber di ignorá konseho bíbliko, nos lo por desaroyá kualidatnan ku por pone nos asta peka kontra spiritu santu, i e konsekuensianan lo ta desastroso.

15. Kiko nos mester hasi ora un hende trata nos malu?

¹⁵ Nos mester ta bondadoso, miserikòrdioso i pordonadó. Pablo a skirbi: “Sea kariñoso ku otro, miserikòrdioso, pordonando otro, meskos ku Dios den Kristu tambe a pordoná boso.” (Efe. 4:32) P’esei, si un hende a trata nos malu i hùrt nos profundamente, laga nos pordon’é meskos ku Dios ta pordoná nos. (Luk. 11:4) Imaginá ku un ruman kristian a bisa algu malu di bo. Den un intento pa drecha e asuntu, bo ta aserká e ruman. E ta bisa ku loke a pasa ta duel e i ta pidi bo pordon’é. I bo ta pordon’é. Pero esei so ta sufisiente? Nò. Levítiko 19:18 ta bisa: ‘No tuma vengansa, ni tene renkor kontra e yunan di bo pueblo, ma stima bo próhimo manera bo mes; ami ta Yehova.’

Sea Alerta

16. Duna un ehèmpel ku ta mustra ki ahuste kisas ta nesesario pa evitá di hasi spiritu santu di Yehova tristu.

¹⁶ Ora nos ta nos so, tambe nos por haña nos ku tentashon pa hasi algu ku no ta agradá Dios. Por ehèmpel, kisas un ruman hòmber ta skucha músika ku ta inaseptabel pa kristian. Ku tempu, su konsenshi ta kuminsá molesti’é, pasobra e ta ignorá konseho bíbliko ku e “esklabo fiel i prudente” ta perkurá mediante e publikashonnan. (Mat. 24:45) Kisas e ta hasi orashon tokante e asuntu i ta kòrda loke Pablo a bisa na Efesionan 4:30. I debí ku e no ke hasi Dios su spiritu santu tristu, e ta disidí firmemente di no skucha músika kuestionabel mas. Yehova lo bendishoná e aktitut ei. P’esei, laga nos tene kuidou konstantemente pa no hasi spiritu santu di Dios tristu.

17. Kiko por sosodé si nos no ta alerta i no ta hasi orashon?

¹⁷ Si nos no ta alerta i no ta hasi orashon, nos por sukumbí na tentashon i kuminsá praktiká kosnan robes òf impuru i asina hasi spiritu santu di Dios tristu. I spiritu santu ta e forsa ku nos Tata selestial ta usa pa kumpli ku su boluntat. P’esei, ora nos ta hasié tristu, en realidat, ta Yehova nos ta hasi tristu. Siguramente nos lo no ke hasi esei, no ta bèrdat? (Efe. 4:30) Den promé siglo, e eskribanan hudiu a pretendé ku Hesus tabata hasi milager ku poder di Satanas. (Lesa Marko 3:​22-30.) Pues, e enemigunan ei di Kristu a “blasfemá kontra spiritu santu” i asina a kometé un piká imperdonabel. No laga esei nunka pasa ku nos!

18. Kon nos por sa ku nos no a kometé un piká imperdonabel?

¹⁸ Siendo ku nos no ke hasi nada ku por hiba na piká imperdonabel, nos tin ku kòrda loke Pablo a konsehá kristiannan, esta, pa no hasi spiritu santu tristu. Pero kiko si nos a kometé un piká serio? Si nos a repentí i e ansianonan a yuda nos, nos por konkluí ku Dios a pordoná nos i ku nos no a peka kontra spiritu santu. I ku Dios su yudansa, nos por evitá di bolbe hasi spiritu santu tristu.

19, 20. (a) Kiko ta algun kos ku nos tin ku evitá? (b) Kiko nos mester ta desididu pa hasi?

¹⁹ Dios ta usa su spiritu santu pa promové amor, goso i union entre su pueblo. (Sal. 133:​1-3) P’esei, nos no mester hasi nada pa hasi su spiritu santu tristu. Por ehèmpel, nos no mester hasi redu ni papia malu di wardadónan ungí ku spiritu santu i asina pone otronan pèrdè rèspèt pa nan. (Echo. 20:28; Hudas 8) Al kontrario, nos tin ku promové union i rèspèt den kongregashon. P’esei mes, nos no mester forma klik, òf grupitonan, den e pueblo di Dios. Pablo a deklará: “Mi ta ekshortá boso, rumannan, pa medio di e nòmber di nos Señor Hesukristu, pa boso tur papia e mesun kos, i pa no tin divishon entre boso, ma pa boso ta perfektamente uní den e mesun mente i den e mesun opinion.”​—1 Kor. 1:10.

²⁰ Yehova tin e deseo i poder pa yuda nos pa no hasi su spiritu santu tristu. Di nos banda, nos mester sigui hasi orashon pidi Dios pa su spiritu santu i sea determiná pa no hasié tristu. Pues, laga nos sigui “sembra ku e spiritu [ei] na bista,” asina nos ta buska i sigui su guia zelosamente, awor i pa semper.

Kon Lo Bo Kontestá?

• Pakiko nos no mester hasi Dios su spiritu santu tristu?

• Kon un kristian dediká por hasi Yehova su spiritu santu tristu?

• Den ki maneranan nos por evitá di hasi spiritu santu tristu?

[Plachi na página 30]

Resolvé desakuerdo mesora

[Plachi na página 31]

Kua di e frutanan akí ta ilustrá bo manera di papia?