Dios Ta Demostrá Su Amor na Nos

“Bondat inmeresí [lo] reina komo rei mediante hustisia ku ta hiba na bida eterno.”​—ROM. 5:21, NW.

1, 2. Ki regalo hende en general ta konsiderá balioso? Pero ki regalo ta di muchu mas balor?

‘E HERENSIA di mas importante ku e romanonan a laga pa mundu su futuro generashonnan tabata nan lei i e idea di ku hende mester biba di akuerdo ku lei.’ (Dr. David J. Williams di Universidat di Melbourne, Australia) Pero tin un herensia òf regalo di muchu mas balor ku esei. E regalo akí ta e medio ku Dios ta usa pa hende por haña su aprobashon i un posishon hustu den su bista i tambe e speransa di salbashon i bida eterno.

² Den un sentido, tabatin aspektonan legal mará na e manera ku Dios a hasi e regalo akí disponibel. Ma ora nos lesa Romanonan kapítulo 5, nos ta mira ku apòstel Pablo no a presentá e aspektonan akí den un forma steif, manera un tésis di lei basá riba detayenan kompliká di lei. Mas bien, el a kuminsá su análisis ku un deklarashon emoshonante. El a bisa: “Siendo hustifiká pa medio di fe, nos tin pas ku Dios dor di nos Señor Hesukristu.” I hende ku risibí e regalo di Dios, na nan turno, ta sinti nan konmoví pa stim’é. Pablo mes tabata un di nan, pasobra el a skirbi: “E amor di Dios a wòrdu dramá den nos kurason dor di spiritu santu.”​—Rom. 5:​1, 5.

 3. Ki pregunta ta bini mesora na bo mente?

³ Pero dikon e regalo generoso akí tabata nesesario? Kon Dios por a ofres’é na un manera hustu i benefisioso pa tur hende? I kiko kada hende tin ku hasi pa bini na remarke p’e? E artíkulo akí lo duna nos kontestanan satisfaktorio i yuda nos mira kon esakinan ta enfatisá e amor di Dios.

E Amor di Dios Versus Piká

4, 5. (a) Den ki manera importante Yehova a demostrá su amor? (b) Kiko nos mester sa kaba pa nos por komprondé Romanonan 5:12?

⁴ Komo muestra di Yehova su gran amor, el a manda su Yu unigénito pa yuda hende. Pablo a ekspresá esei asin’akí: “Dios ta demostrá su mes amor pa ku nos den esaki, ku tempu nos tabata pekadó ainda, Kristu a muri pa nos.” (Rom. 5:8) Tuma nota di e detaye importante akí: “Nos tabata pekadó ainda.” P’esei, loke nos mester sa ta kon bin nos a bira pekadó.

⁵ Pablo a splika e asuntu kuminsando ku e punto akí: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.” (Rom. 5:12) Nos por komprondé esaki pasobra Dios a laga registrá den su Palabra kon bida di hende a kuminsá. Na prinsipio, Yehova a krea dos ser humano, Adam ku Eva, nos antepasadonan. Nan tabata perfekto pasobra e Kreador ta perfekto. Dios a duna nan un solo prohibishon i a informá nan ku si nan a desobedesé e lei ei, nan lo a haña e kastigu di morto. (Gén. 2:17) Tòg nan a opta pa skohe mal kaminda i a bai kontra e mandamentu rasonabel di Dios, rechasand’e asina komo e Dunador di Lei i Señor Soberano.​—Deu. 32:​4, 5.

 6. (a) Ki kondishon a hiba desendiente di Adam na morto, i e Lei di Moisés a trese kambio den e situashon ei? (b) Kon nos por ilustrá e efekto di piká heredá?

⁶ Ta despues ku Adam a peka, el a bira tata i asina a pasa piká i su konsekuensianan pa tur su yunan. Ta bèrdat ku no ta e yunan di Adam a bai kontra lei di Dios, i p’esei Dios no a kulpa nan di e mesun piká; ademas, e tempu ei ainda no tabatin un kódigo di lei tampoko. (Gén. 2:17) Ma tòg e desendientenan di Adam a heredá piká. Pues, piká i morto a reina tur e tempu ei; ma ta ora Dios a duna e israelitanan un kódigo di lei, a keda demostrá bon kla ku nan tabata pekadó. (Lesa Romanonan 5:​13 i 14.) Nos por ilustrá e efekto di piká heredá ku sierto malesa òf defekto heredá, manera anemia mediteráneo òf hemofilia. Kisas bo a yega di lesa di Alexis, yu di e tsar ruso Nicholas II i Alexandra, kende a heredá hemofilia, ku ta un sangramentu króniko. Ta bèrdat ku asta den un famia asina, no ta tur yu ta haña e malesanan ei, maske algun por ta portadó sí. Ma esei no ta e kaso ku piká, pasobra e piká di Adam i su konsekuensianan sí ta pasa pa tur hende; tur yu ta nase kuné. E ta inevitabel, i su resultado ta semper fatal. Awor, nos por sali un dia for di e situashon difísil ei?

Loke Dios A Hasi Posibel pa Medio di Hesukristu

7, 8. Kon e rumbo ku dos hòmber perfekto a sigui a hiba na resultadonan diferente?

⁷ Yehova, den su gran amor, a habri kaminda pa hende por ser librá di piká heredá. Pablo a splika ku esaki a bira posibel pa medio di un otro hòmber, un hòmber perfekto ku a bini despues—den un sentido, un di dos Adam. (1 Kor. 15:45) Pero kada un di e dos hòmbernan perfekto akí a sigui un rumbo diferente, loke a hiba na resultadonan masha distinto. Kon asina?​—Lesa Romanonan 5:​15 i 16.

⁸ Pablo a bisa ku “e don di grasia no ta manera e transgreshon.” Adam tabata kulpabel di e transgreshon ei, i el a risibí e sentensia ku el a meresé, esta, morto. Ma no ta e so a muri. Pablo a agregá: ‘Dor di transgreshon di esun hende ei, hopi hende a muri.’ Sí, e hustisia di Yehova a eksigí pa, meskos ku Adam, tur su yunan, inkluyendo nos, haña e sentensia di morto. Sinembargo, ta un konsuelo pa sa ku e hòmber perfekto, Hesus, por hiba na un resultado nèt kontrali. Kiko e resultado ei ta? Nos ta haña e kontesta den loke Pablo a bisa, esta, ku “ún echo di hustisia a trese hustifikashon di bida pa tur [tipo di] hende.”​—Rom. 5:18.

 9. Bon mirá, kiko Dios ta hasi ora e ta deklará hende hustu, manera Romanonan 5:​16 i 18 ta trese padilanti?

⁹ Kiko ta e idea tras di e ekspreshon griego pa e palabra “hustifikashon,” esta, ku Dios ta deklará hende hustu? Un traduktor di Beibel a bisa di e konsepto akí: “E ta un metáfora ku tin konotashon hurídiko. E ta papia di e kambio ku ta tuma lugá den e manera ku Dios ta mira un persona i no nesesariamente di e kambio ku e persona ta hasi di paden . . . Den e metáfora, Dios ta e hues ku ta dikta sentensia na fabor di e akusado, kende a ser hibá, na moda di papia, dilanti korte divino, akusá di a kometé un inhustisia. Pero Dios ta deklar’é liber di kulpa.”

10. Ki akto di Hesus a perkurá e base pa hende ser deklará hustu?

¹⁰ A base di kiko “e Hues [hustu] di henter mundu” por deklará un persona inhustu liber di kulpa? (Gén. 18:25) Dios a prepará e tereno pa esei mandando su Yu unigénito na tera, i di e manera ei el a demostrá su gran amor pa humanidat. I Hesus, na su turno, a kumpli perfektamente ku e boluntat di su Tata apesar di e tentashonnan, bofon i maltrato ku el a enfrentá. El a keda íntegro na dje te na morto riba un staka di tormento. (Heb. 2:10) Ku e sakrifisio di su bida humano perfekto, el a ofresé un reskate ku por libra desendiente di Adam for di piká i morto.​—Mat. 20:28; Rom. 5:​6-8.

11. Ku kiko e reskate ta korespondé?

¹¹ Den un otro parti di e Skritura, Pablo a yama esaki “un reskate korespondiente.” (1 Tim. 2:6, NW) Kiko a korespondé ku kiko? Wèl, Adam a trese imperfekshon i morto pa míles di miónes di hende, ku ta su desendientenan. I ta bèrdat ku Hesus, komo un hòmber perfekto, por a prokreá míles di miónes di desendiente perfekto.a P’esei un tempu nos a komprondé ku e bida di Hesus plùs bida di tur su futuro desendientenan perfekto lo a representá e balor ekivalente di un reskate ku tabata nesesario pa kompensá loke Adam i su desendientenan imperfekto a desperdisiá. Ma Beibel no ta bisa ku posibel desendiente di Hesus a forma parti di e reskate. Romanonan 5:​15-19 ta splika mas bien ku ta e morto di ‘un solo hende’ a perkurá e liberashon. Sí, e bida perfekto di Hesus a korespondé ku e bida di Adam. E enfoke ta, i mester ta, riba Hesukristu so. Ta “ún echo di hustisia” di Hesus su parti, esta, su obedensia i su integridat te na morto, a habri kaminda pa tur sorto di hende risibí e regalo, òf don grátis, i bida. (2 Kor. 5:​14, 15; 1 Ped. 3:18) Kon Dios ta deklará hende liber di kulpa?

Dios Ta Deklará Hende Liber di Kulpa a Base di e Reskate

12, 13. Pakiko hende ku ta ser deklará hustu tin mester di e miserikòrdia i amor di Dios?

¹² Yehova Dios a aseptá e sakrifisio di reskate ku su Yu a ofresé. (Heb. 9:24; 10:​10, 12) No opstante, Hesus su disipelnan riba tera, inkluyendo su fiel apòstelnan, a keda imperfekto. Aunke nan a hasi esfuerso pa evitá di hasi malu, no ta semper nan a logra. Dikon? Pasobra nan a heredá piká. (Rom. 7:​18-20) Pero Dios por i á hasi algu tokante esei. El a aseptá e “reskate korespondiente” i tabata dispuesto pa apliká su benefisionan na fabor di su sirbidónan humano.

¹³ No ta asina sí ku Dios tabata debe e apòstelnan i otro hende un fabor pa motibu di algun bon obra ku nan a realisá i p’esei a rekompensá nan ku e benefisionan di e reskate. Nò, el a hasi esei mas bien pa motibu di su miserikòrdia i gran amor. El a opta pa apsolvé e apòstelnan i otro hende di e huisio kontra nan; pues den su bista, nan tabata liber di kulpa heredá. Pablo a splika esei asin’akí: “Pa medio di grasia [“bondat inmeresí,” NW] boso a wòrdu salbá dor di fe, i esei no di boso mes; e ta e don di Dios.”​—Efe. 2:8.

14, 15. Ki rekompensa Dios a pone dilanti di hende ku el a deklará hustu, pero kiko nan tabatin ku hasi ainda?

¹⁴ Pensa riba ki un regalo grandi esei ta: E Todopoderoso ta pordoná e piká ku un persona a heredá i tambe tur e malu ku el a hasi! Bo no por ni konta kuantu piká hende ta hasi promé ku nan bira kristian; ma a base di e reskate, Dios por pordoná tur e pikánan ei. Pablo a skirbi: “E don di grasia a bini dor di hopi transgreshon ku a resultá den hustifikashon.” (Rom. 5:16) E apòstelnan i otro hende ku a risibí e don, òf regalo, generoso akí (di ser deklará hustu) lo tabatin ku sigui adorá e Dios berdadero ku fe. Ku ki futuro rekompensa? “Esnan ku risibí e abundansia di Dios su bondat inmeresí i di e regalo di hustisia lo biba i reina komo rei mediante esun persona, esta, Hesukristu.” En bèrdat, e regalo di hustisia tin e efekto kontrali na e transgreshon di Adam. E regalo ta hiba na bida.​—Rom. 5:17, NW; lesa Lukas 22:​28-30.

¹⁵ Hende ku ta risibí e regalo ei, ku ta ser deklará hustu, ta bira yu spiritual di Dios. Komo ko-heredero ku Kristu, nan tin e speransa di haña resurekshon pa bai shelu komo yu spiritual pa “reina komo rei” huntu ku Hesukristu.​—Lesa Romanonan 8:​15-17 i 23.

Dios Ta Demostrá Su Amor na Mas Hende

16. Ki regalo hende ku tin speransa di biba pa semper riba tera por risibí for di awor?

¹⁶ No ta tur hende ku mustra fe i ku ta sirbi Dios komo kristian leal tin speransa di “reina komo rei” huntu ku Kristu den shelu. Hopi di nan tin e mesun speransa bíbliko ku e sirbidónan di Dios ku a biba promé ku Kristu tabatin. Nan ta spera di biba pa semper den un paradeis riba tera. Akaso nan tambe por risibí for di awor e regalo generoso di Dios i pues ser deklará hustu ku e speransa di biba riba tera? Basá riba loke Pablo a skirbi e kristiannan na Roma, e kontesta alentador ta sí!

17, 18. (a) En bista di e fe ku Abraham tabatin, kon Dios a mir’é? (b) Kiko a hasi posibel pa Yehova konsiderá Abraham un hòmber hustu?

¹⁷ Pablo a konsiderá un bon ehèmpel, esun di Abraham, un hòmber di fe ku a biba promé ku Yehova a duna Israel un kódigo di lei i hopi promé ku Kristu a habri kaminda pa bida selestial. (Heb. 10:​19, 20) Nos ta lesa: “E promesa na Abraham òf na su desendensia, ku e lo a bira heredero di mundu, no tabata dor di Lei, ma dor di e hustisia di fe.” (Rom. 4:13; Sant. 2:​23, 24) P’esei Dios a konsiderá fiel Abraham un hòmber hustu.​—Lesa Romanonan 4:​20-22.

¹⁸ Esei no ta nifiká sí ku Abraham no a kometé piká tempu ku el a sirbi Yehova. Nò, e no tabata hustu den e sentido ei. (Rom. 3:​10, 23) Sinembargo, Yehova, den su sabiduria infinito, a tuma na konsiderashon e fe eksepshonal ku Abraham tabatin i e obranan di fe ku el a realisá. Algu remarkabel tabata e fe ku Abraham tabatin den e ‘desendiente’ primintí ku lo mester a bini for di dje. E Desendiente ei a resultá di ta e Mesias, òf Kristu. (Gén. 15:6; 22:​15-18) P’esei, a base di “e redenshon ku ta den Kristu Hesus,” o sea, e reskate ku Kristu a paga, e Hues divino por pordoná e pikánan ku hende di pasado a kometé. Konsekuentemente, Abraham i otro hende di fe ku a biba promé ku Kristu ta den fila pa risibí resurekshon.​—Lesa Romanonan 3:​24 i 25; Sal. 32:​1, 2.

Haña un Posishon Hustu for di Awor

19. Dikon e echo ku Dios a konsiderá Abraham un hòmber hustu mester ta un animashon pa hopi hende awe?

¹⁹ E echo ku e Dios di amor a konsiderá Abraham un hòmber hustu mester ta un animashon pa kristiannan berdadero awe. Yehova no a deklar’é hustu den e mesun sentido ku e ta deklará e personanan ku e ta ungi ku spiritu santu hustu pa bira “ko-heredero ku Kristu.” E personanan ungí akí, ku ta un grupo limitá, ta “yamá pa ta santu,” i Dios a aseptá nan komo su “yunan.” (Rom. 1:7; 8:​14, 17, 33) Na kontraste, Abraham a bira ‘amigu di Yehova’—asta promé ku Kristu a ofresé e sakrifisio di reskate. (Sant. 2:23; Isa. 41:8) Awor, kiko di e kristiannan berdadero ku ta spera di biba den e benidero Paradeis riba tera?

20. Kiko Dios ta spera di hende ku awe e ta konsiderá hustu, meskos ku el a konsiderá Abraham?

²⁰ E personanan akí no a risibí “e regalo di hustisia” (NW) ku e speransa di biba den shelu “pa medio di e redenshon ku ta den Kristu Hesus.” (Rom. 3:24; 5:​15, 17) No opstante, nan ta ehersé un fe profundo den Dios i den e reskate ku el a perkurá, i nan ta manifestá nan fe pa medio di bon obra. Un di e obranan ei ta esun di ‘prediká e reino di Dios i siña hende enkuanto Señor Hesukristu.’ (Echo. 28:31) Pues, Yehova por konsiderá nan hustu den e mesun sentido ku el a konsiderá Abraham un hòmber hustu. E regalo ku hende asina ta risibí—amistat ku Dios—ta distinto for di e “regalo” ku e ungínan ta risibí. Ma, sin duda, e ta un regalo ku nan ta aseptá ku profundo gratitut.

21. Ki benefisionan hende por risibí pa motibu di Yehova su amor i hustisia?

²¹ Si bo tin e speransa di biba pa semper riba tera, bo mester realisá ku e oportunidat akí no ta dependé di promesanan kaprichoso di un gobernante humano. Mas bien, e ta basá riba e propósito sabí di e Soberano di Universo. Yehova a dal paso progresivo pa kumpli ku su propósito, i su pasonan ta na armonia ku su berdadero hustisia. I mas importante ainda, nan ta reflehá su gran amor. Pablo tabatin rason di bisa bèrdat: “Dios ta demostrá su mes amor pa ku nos den esaki, ku tempu nos tabata pekadó ainda, Kristu a muri pa nos.”​—Rom. 5:8.

[Nota]

Bo Ta Kòrda?

• Ki herensia e desendientenan di Adam a risibí, i ku ki resultado?

• Kon Yehova a perkurá un reskate korespondiente, i kiko a korespondé ku kiko?

• Ki speransa e regalo di ser deklará hustu a trese pa bo?

[Plachi na página 19]

E hòmber perfekto Adam a peka. E hòmber perfekto Hesus a ofresé “un reskate korespondiente”

[Plachi na página 21]

Pa medio di Hesus, nos por ser deklará hustu. Esei sí ta un bon notisia!