“Por Fabor, Permití Nos Bini Kas Bèk”

Bo a yega di sirbi Yehova un tempu? Bo tin gana di sirbié atrobe pero ta duda ku e ta aseptá bo bèk? Si ta asina, no keda sin lesa e artíkulo akí. El a ser prepará spesialmente ku bo na mente.

UN SEÑORA a bisa: “Mi a resa pidi Yehova pa por fabor permití mi bini kas bèk i pordoná mi pa e doló ku mi a kous’é.” Maske e señora akí a lanta den e bèrdat, ku tempu, el a stòp di sirbi Yehova i a hiba un bida kontrario na e normanan di Dios. Bo ta sinti duele di dje? Kisas bo ta puntra bo mes: ‘Kiko Dios ta pensa di e personanan ku un tempu tabata sirbié? E ta kòrda riba nan? E ke pa nan “bini kas bèk”?’ Pa kontestá e preguntanan akí, laga nos analisá un pasashi for di e buki bíbliko di Yeremías. Sin duda e kontestanan lo alegrá bo kurason.​—Lesa Yeremías 31:​18-20.

Dikon Yehova a inspirá Yeremías pa ekspresá e palabranan ei? Wèl, na aña 740 promé ku nos era, dékadanan promé ku Yeremías a nase, Yehova a permití e reino di dies tribu di Israel kai den man di e asirionan.a Dikon Yehova no a prevení esaki? Wèl, e kier a disipliná su pueblo, pasobra nan tabata kometé piká serio i no tabata hasi kaso di e spièrtamentunan di e profetanan ku el a manda. (2 Reinan 17:​5-18) Awor, e echo ku e israelitanan a pasa den difikultat tempu ku nan tabata den eksilio, leu di nan pais i separá di Dios, a pone nan kambia nan aktitut? Yehova a lubidá riba nan? Òf el a permití e israelitanan regresá Israel i sirbié atrobe?

“Mi A Arepentí”

Ora e israelitanan tabata den koutiverio, nan a rekobrá nan sano huisio i a arepentí. Yehova sigur a mira nan arepentimentu sinsero. Wak kon el a deskribí nan aktitut i sintimentu.

Yehova a bisa: “Siguramente mi a tende Efraim su kehamentu.” (Versíkulo 18) Sí, Yehova a tende kon Efraim, esta, e israelitanan ku tabata den eksilio, tabata suspirá i lamentá pa motibu di e konsekuensianan di nan mal kondukta. Segun un komentarista di Beibel, e ekspreshon “su kehamentu” por nifiká tambe “sagudimentu.” Pues, ta komo si fuera e israelitanan tabata sagudí nan kabes manera un yu rebelde ku tabatin duele di loke el a hasi i ku tabata deseá di bai kas bèk unda e tabatin un mihó bida. (Lukas 15:​11-17) Kiko e israelitanan tabata bisa anto ora nan tabata den koutiverio?

“Bo a kastigá mi . . . manera un bisé ku nan no a hasi mansu.” (Versíkulo 18) E israelitanan a rekonosé ku e disiplina tabata na su lugá. Al fin i al kabo, nan tabata komportá nan mes manera bisé ku no a ser di train. Segun un obra di referensia, bo por komprondé e komparashon ei di e manera akí: E israelitanan tabata manera un bisé ku nunka lo a “sinti e pui di e bara di korekshon si e no a purba di sali for di bou di e yugo.”

P’esei, awor ku un kurason humilde, e israelitanan a sklama na Dios: “Trese mi bèk pa mi por wòrdu restorá, pasobra abo ta SEÑOR mi Dios.” (Versíkulo 18) Nan a hiba un bida alehá for di Dios, pero awor nan a roga Yehova pa yuda nan kultivá un bon relashon kuné atrobe. Un otro tradukshon di Beibel ta bisa: “Abo ta nos Dios​—por fabor, permití nos bini kas bèk.”​—Contemporary English Version.

“Mi a arepentí. . . . Mi a keda brongosá i tambe humiá.” (Versíkulo 19) E pueblo a sinti duele ku nan a peka. Nan a atmití nan eror. Nan tabatin bèrgwensa di loke nan a hasi, i nan tabata sinti nan masha desanimá; ta komo si fuera nan tabata bati nan pechu di tristesa.​—Lukas 15:​18, 19, 21.

Sí, e israelitanan a arepentí di kurason, a konfesá nan piká na Dios i a bira for di nan mal kaminda. Nan a demostrá ku nan tabatin duele di loke nan a hasi. Awor, Yehova a pordoná nan? El a permití nan bai kas bèk?

“Siguramente Lo Mi Tin Miserikòrdia di Dje”

Yehova tabatin un relashon masha spesial ku e israelitanan. El a bisa: “Mi ta un tata pa Israel, i Efraim ta mi primogénito.” (Yeremías 31:9) Awor un tata ku ta stima su yu lo nenga di tum’é bèk na kas siendo ku e yu a arepentí sinseramente? Wak kon Yehova a ekspresá su sintimentunan di Tata pa su pueblo.

El a bisa: “Ta Efraim ta mi yu hòmber stimá? E ta mi yu faborito? Maske mi papia hopi biaha kontra dje, tòg mi ta kòrda riba dje.” (Versíkulo 20) Bunita, no ta bèrdat? Meskos ku un tata firme i a la bes amoroso, Dios a hañ’é ta ‘papia kontra,’ òf skual, su yunan, bisando nan bes tras bes pa stòp ku nan mal echonan. Ma debí ku nan no kier a tende, el a permití nan bai den ­eksilio, na moda di papia, bai for di kas. Pero maske el a kastigá nan, e no a lubidá riba nan. Nunka lo e hasi esei. Un tata ku ta stima su yunan no ta lubidá riba nan. Pero kon Yehova a sinti ora el a mira ku di bèrdat su yunan a arepentí?

Yehova a bisa: “Mi kurason ta anhelá na dje; siguramente lo mi tin miserikòrdia di dje.” (Versíkulo 20) Yehova a sinti falta di su yunan. Nan arepentimentu sinsero a konmové su kurason i e tabatin masha gana pa nan bolbe serka dje. Sí, meskos ku e tata den e parábola di e yu pèrdí, Yehova “a haña duele” di su yunan i a anhelá pa nan bini kas bèk.​—Lukas 15:20.

“Yehova A Permití Mi Bini Kas Bèk!”

E palabranan na Yeremías 31:​18-20 ta yuda nos mira bon kla ku Yehova ta un Dios sumamente kompasivo i miserikòrdioso. E no ta lubidá esnan ku un tempu a sirbié. P’esei, si un persona ke bolbe sirbié, Dios ta ‘kla pa pordon’é.’ (Salmo 86:5) Hamas lo e rechasá hende ku arepentí di kurason i ku ke tin un bon relashon kuné atrobe. (Salmo 51:17) Al kontrario, lo e aseptá nan brasa habrí.​—Lukas 15:​22-24.

E señora ku nos a menshoná na komienso di e artíkulo akí a tuma inisiativa pa bolbe serka Yehova i a kuminsá asistí na e reunionnan di kongregashon. Na promé instante, e mester a lucha kontra sintimentunan negativo. E ta kòrda: “Mi a sinti mi masha malu mes.” Pero e ansianonan di kongregashon a anim’é i a yud’é bira spiritualmente fuerte atrobe. Ku un kurason yen di apresio, el a bisa: “Mi ta masha kontentu ku Yehova a permití mi bini kas bèk!”

Si bo tabata sirbi Yehova un tempu i tin deseo di kuminsá sirbié atrobe, nos ta animá bo pa bishitá e kongregashon di Testigunan di Yehova den bo área. Kòrda ku Yehova ta un Dios kompasivo i miserikòrdioso, i e ta kla pa aseptá un persona arepentí ku sklama na dje: ‘Por fabor, permití mi bini kas bèk.’

[Nota]