Kon Nos Por Yuda Aliviá e Nesesidatnan di Otro Hende?

DISTURBIONAN violento a lanta den un pais den desaroyo despues di e resultado kontroversial di un elekshon. François, un ansiano di e pais ei a konta: “Míles di Testigu di Yehova a haña nan ta hui bai laga nan kas. Kuminda i remedi a bira skars, i loke a sobra tabata masha karu mes. Bankonan a sera, i bankomátikonan a keda blo bashí òf a stòp di funshoná.”

Rápidamente, rumannan di sukursal a kuminsá entregá fondo i artíkulonan di promé nesesidat na e Testigunan ku a haña nan ta bandoná nan kas i ku awor tabata biba temporalmente den Salònnan di Reino rònt e pais. Partidonan rival tabata blòkia e kareteranan, pero por lo general nan tabata laga vehíkulonan di sukursal pasa, ya ku tur partido tabata sa ku Testigunan di Yehova ta tene nan mes estriktamente neutral.

François a sigui konta: “Un biaha, riba kaminda pa un Salòn di Reino, algun frankotiradó a kuminsá basha bala riba nos vèn. Ma ningun no a alkansá nos. Ora nos a mira un sòldá ta kore bin den nos direkshon ku su arma den man, nos a hinka e vèn den rivùrs, bira e vèn i kore limpi bai sukursal bèk. Nos a gradisí Yehova mashá ku nos a keda na bida. Su siguiente dia, e 130 rumannan ku tabata na e Salòn di Reino ei a logra yega sano i salvo na un lugá mas safe. Algun ruman a bini sukursal, i einan nos a atendé nan nesesidat spiritual i material te ora ku e krísis a pasa.”

François a agregá: “Despues, sukursal a haña hopi karta di rumannan for di tur skina di e pais ku a ekspresá nan gratitut profundo. E echo ku nan a eksperensiá kon nan rumannan di otro parti a bini na nan yudansa a oumentá nan konfiansa den Yehova.”

Ora desaster natural i otro kalamidatnan kousá pa hende tuma lugá, nos no ta bisa nos rumannan den nesesidat ‘tene boso kurpa kayente i bon alimentá.’ (Sant. 2:15, 16) Mas bien, nos ta purba di perkurá pa nan nesesidatnan físiko. Asina tambe a sosodé den promé siglo. Despues ku e kristiannan a haña e spièrtamentu ku un hamber lo a bini, “e disipelnan a disidí di manda yudansa pa e rumannan ku tabata biba na Hudea—kada un a kontribuí segun su forsa.”—Echo. 11:28-30.

Komo sirbidó di Yehova, nos ta kla pa duna yudansa material na personanan den nesesidat. Pero hende tin un nesesidat spiritual tambe. (Mat. 5:3) Pa hasi nan konsiente ku nan tin e nesesidat ei i mester dal paso pa satisfas’é, Hesus a enkargá su siguidónan pa hasi disipel. (Mat. 28:19, 20) Nos kada un ta dediká gran parti di nos tempu, energia i rekurso pa kumpli ku e enkargo ei. Komo organisashon, nos ta usa parti di e fondonan ku nos ta risibí komo donashon pa duna yudansa material, pero prinsipalmente nos ta usa nan pa promové interesnan di Reino i plama e bon notisia. Di e manera ei nos ta demostrá nos amor pa Dios i pa nos próhimo.—Mat. 22:37-39.

E personanan ku ta sostené e obra mundial di Testigunan di Yehova por tin sigur ku nan donashon ta ser usá bon i na un manera efektivo. Abo ta den posishon pa yuda aliviá bo rumannan ku ta den nesesidat? Bo ke sostené e trabou di hasi disipel? Wèl den tal kaso, “no laga di hasi bon na esnan ku meresé esaki, si ta den bo poder pa hasié.”—Pro. 3:27.

MANERANAN KU ALGUN HENDE TA KONTRIBUÍ NA E OBRA MUNDIAL

Meskos ku den tempu di apòstel Pablo, awe tambe hopi hende ta “pone algu un banda,” òf hinka den nan presupuesto un montante, pa nan pone den e kahanan di kontribushon di kongregashon marká “Obra Mundial.” (1 Kor. 16:2) Tur luna, kongregashonnan ta manda e kontribushonnan akí pa e sukursal di Testigunan di Yehova ku ta supervisá e obra den nan pais. Tambe bo por manda bo donashon direktamente na e entidat legal ku Testigunan di Yehova ta usa den bo pais. Si bo ke sa e nòmber eksakto di e entidat ei, bo por tuma kontakto ku e sukursal ku ta atendé e pais kaminda bo ta biba. Bo ta haña e adrès di e sukursal na www.jw.org. Lo siguiente ta e tipo di donashonnan ku bo por manda direktamente:

DONASHON INKONDISHONAL
- Donashon di plaka, prenda òf otro kos di balor.
- Mester inkluí un karta breve ku ta bisa ku e plaka òf e artíkulonan ta un donashon inkondishonal.
DONASHON KONDISHONAL
- Por hasi donashon di plaka bou di e kondishon ku e donante por haña e plaka bèk si e mester di dje.
- Mester inkluí un karta ku ta bisa ku e donashon ta kondishonal.
DONASHON PLANIÁ

Fuera di regalo inkondishonal di plaka i di propiedat personal di balor, tin vários alternativa pa kontribuí na e obra mundial di Reino. Abou ta sigui un lista. Si bo ta deseá di hasi uso di un di nan, sea asina bon di konsultá ku e sukursal ku ta atendé bo pais pa hasi sigur kua di e posibilidatnan tin einan. Komo ku rekisitonan legal i leinan fiskal (di belasting) ta varia di pais pa pais, ta importante pa bo buska konseho hurídiko i fiskal promé ku bo skohe e método ku mas ta kumbiní bo.

Seguro: Por nombra un entidat legal di Testigunan di Yehova komo e benefisiario di un seguro di bida òf di un areglo di penshon.

Kuenta di Banko: Por pone kuenta bankario, sertifikado di depósito òf kuenta di penshon personal den forma di un ‘trust fund,’ òf stipulá ku ta paga e montante ku tin den nan, konforme rekisitonan bankario lokal, na un entidat legal di Testigunan di Yehova ora e doño fayesé.

Akshon i Bono: Por hasi donashon di akshon i bono na un entidat legal di Testigunan di Yehova. Esei por ta un regalo inkondishonal òf un akuerdo ku ta indiká ku ta traspasá nan pa e entidat ei ora e doño fayesé.

Propiedat Inmóbil: Por hasi donashon di propiedat inmóbil ku por ser bendé na un entidat legal di Testigunan di Yehova, i eventualmente por stipulá ku e donante por keda biba aden tanten ku e ta na bida.

Donashon di Renta òf Penshon Vitalisio (Lijfrente): Aki ta trata di un akuerdo kaminda ta hasi donashon di plaka òf papelnan di balor na un entidat legal di Testigunan di Yehova i, a kambio, e donante (òf un persona ku e donante designá) ta risibí un pago anual pa restu di su bida (vitalisio). Den algun pais, e areglo akí tin benefisio fiskal pa e donante.

Tèstamènt i Trust Fund: Via un tèstamènt legal òf un areglo di trust fund por laga propiedat òf plaka pa un entidat legal di Testigunan di Yehova. E areglo akí por duna sierto benefisio fiskal pa e donante.

Pa hasi uso di e último posibilidatnan akí, e donante normalmente mester plania esei. Pa yuda personanan ku ke sostené e obra mundial di Testigunan di Yehova, sukursal a prepará algun informashon. Despues ku bo repasá e informashon akí, lo ta sabí pa bo buska konseho hurídiko i fiskal. Hopi hende ku a plania kuidadosamente pa hasi e tipo di donashonnan akí a logra apoyá nos aktividatnan religioso i humanitario ku ta tuma lugá rònt mundu, i a la bes nan a haña máksimo benefisio fiskal. Pa mas informashon, bo por tuma kontakto ku e sukursal di Testigunan di Yehova ku ta supervisá e obra den bo pais.