“Keda Alerta pa Boso No Neglishá Orashon”

1, 2. (a) Dikon ta importante pa nos ‘keda alerta i no neglishá orashon’? (b) Kiko ta bon pa nos puntra nos mes tokante orashon?

PA HENDE ku ta traha warda, e periodo mas difísil pa keda lantá ta ora ku nan warda ta serka di kaba, promé ku di dia habri, ora ku ta hopi skur ainda. Ken ku a yega di keda lantá henter anochi lo ta di akuerdo ku esaki. Awe nos ta konfrontá un reto paresido na esei pasobra nos ta kasi na fin di e mundu di Satanas. Nos tempu ta meskos ku e periodo di mas skur di anochi, i kristiannan tin ku bringa pa keda lantá. (Rom. 13:12) Ta masha peligroso pa pega soño aworakí! Pues, ta importante pa nos desplegá “sano huisio” i ‘keda alerta pa nos no neglishá orashon.’—1 Ped. 4:7.

² Ya ku nos ta asina serka di e fin di e mundu di Satanas, ta bon pa nos puntra nos mes: ‘Kuantu atenshon mi ta duna na mi orashonnan? Mi ta usa tur forma, òf tipo, di orashon, i mi ta hasi orashon kontinuamente? Mi tin e kustumber di hasi orashon pa otro hende, òf normalmente mi ta resa solamente pa e kosnan ku ami mester òf ku ami ke? I kon importante orashon ta pa mi salbashon?’

 3. Menshoná algun forma di orashon.

³ Den Pablo su karta na e efesionan, el a menshoná “tur forma di orashon.” (Efe. 6:18) Ora nos ta hasi orashon na Yehova, hopi biaha nos ta pidié pa duna nos loke nos tin mester i pa yuda nos vense opstákulo. Beibel ta bisa ku e ta Esun “ku ta skucha orashon,” i komo ku e ta stima nos, e ta skucha ora nos ta pidié yudansa. (Sal. 65:2) Pero ora nos ta hasi orashon, nos no mester konsentrá riba petishon so. Tin otro forma di orashon tambe, entre otro, orashon di alabansa, di gradisimentu i di súplika.

 4. Dikon nos mester alabá Yehova hopi biaha den nos orashonnan?

⁴ Tin hopi motibu pakiko nos mester inkluí palabranan di alabansa ora nos ta hasi orashon na Yehova. Por ehèmpel, nos ta sinti nos motivá pa alab’é ora nos pensa riba “su echonan poderoso” i riba “su grandesa ekselente.” (Lesa Salmo 150:1-6.) E seis versíkulonan di Salmo 150 ta konsehá nos 13 biaha pa alabá Yehova! Figurá bo! Ku un amor i rèspèt profundo pa Yehova e eskritor di un otro salmo a kanta: “Shete biaha pa dia mi ta alabá bo, pa motibu di bo ordenansanan hustu.” (Sal. 119:164) Yehova definitivamente meresé alabansa. Pues, nos lo mester alab’é “shete biaha pa dia,” es desir, hopi biaha, den nos orashonnan.

 5. Den ki sentido orashon di gradisimentu ta un protekshon pa nos?

⁵ Un otro forma di orashon importante ta gradisimentu. Pablo a bisa e kristiannan di e stat di Filipo: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.” (Flp. 4:6) Ora nos ta ekspresá gratitut sinsero na Yehova den orashon, e ta sirbi komo un protekshon pa nos. Kon asina? Wèl, nos ta biba den e último dianan di e mundu di Satanas, i nos ta rondoná pa hende “malagradesí.” (2 Tim. 3:1, 2) Den mundu, ta bisto ku mayoria di hende ta malagradesí. Si nos no tene kuidou, nos por pega ku e aktitut ei. Pero si nos tin kustumber di yama Yehova danki den orashon, nos lo ta felis i satisfecho i nos lo no ‘kana murmurá i keha tokante nos suerte den bida.’ (Hudas 16) Ademas, ora kabesnan di kas ta hasi orashon ku nan famia i ta ekspresá palabranan di gradisimentu den nan orashon, nan ta animá nan kasá i nan yunan pa ta gradisidu.

6, 7. Kiko ta súplika, i tokante kiko nos por supliká Yehova?

⁶ Súplika ta orashon sinsero ekspresá ku fervor. Tokante kiko asina nos por supliká Yehova? Wèl, nos por rog’é pa yuda nos ora nos ta ser persiguí òf ora nos ta konfrontá un malesa ku ta pone nos bida na peliger. Na momentonan asina nos ta supliká, òf roga, Yehova pa yudansa. Pero ta ora nos ta ser persiguí òf ora nos ta malu so nos por supliká Yehova?

⁷ Pa kontestá e pregunta ei, laga nos konsiderá Hesus su orashon modelo i wak kiko el a bisa tokante Dios su nòmber, Su Reino i Su boluntat. (Lesa Mateo 6:9, 10.) E mundu akí ta den gara di maldat, i e gobièrnunan no por duna nan siudadanonan ni sikiera e kosnan básiko ku nan tin mester. Nos tin bon motibu anto pa pidi den orashon pa Dios su nòmber ser santifiká i pa su Reino eliminá e gobernashon di Satanas for di riba tera. Pero awor ta ora tambe pa supliká Yehova pa laga su boluntat sosodé riba tera meskos ku den shelu. Pues, laga nos keda alerta i hasi uso di tur forma di orashon.

8, 9. Dikon nos no mester bula kondená Pedro ku e otro apòstelnan pasobra nan a pega soño den Hòfi di Getsémani?

⁸ Aunke apòstel Pedro a animá kristiannan pa ‘keda alerta pa nan no neglishá orashon,’ e mes, na por lo ménos ún okashon, no a keda alerta. E tabata un di e disipelnan ku a pega soño miéntras ku Hesus tabata hasi orashon den Hòfi di Getsémani. Aunke Hesus a bisa nan pa “keda vigilá i hasi orashon kontinuamente,” tòg nan a pega soño.—Lesa Mateo 26:40-45.

⁹ Pero en bes di bula kondená Pedro ku e otro apòstelnan pasobra nan no a keda lantá, ta bon pa nos kòrda ku nan a hasi hopi kos e dia ei i tabata masha kansá. Nan a hasi e preparashonnan pa e Pasku Hudiu i a selebr’é e anochi ei. Despues di esei Hesus a instituí e Sena di Señor, loke a mustra su disipelnan kon nan mester a tene e Konmemorashon di su morto den futuro. (1 Kor. 11:23-25) Anto “despues di kanta kantika di alabansa, nan a sali bai Seru di Oleifi.” Pa yega einan, nan mester a kana un distansia dor di e kayanan smal di Herúsalèm. (Mat. 26:30, 36) Pa ora nan a yega e hòfi, kisas ya tabata despues di meianochi. Si nos tabata den Hòfi di Getsémani e anochi ei, kisas nos tambe lo a pega soño. En bes di Hesus kritiká su apòstelnan ku tabata morto kansá, el a rekonosé ku “e spiritu tin e boluntat, ma e karni ta débil.”

10, 11. (a) Ki lès Pedro a siña for di su eksperensia den Hòfi di Getsémani? (b) Kiko abo ta siña for di e eksperensia di Pedro?

¹⁰ Pedro a siña un lès doloroso pero importante e anochi ei ku el a pega soño den Hòfi di Getsémani. Mas promé, Hesus a bisa: “Awe nochi boso tur lo trompeká pa motibu di loke lo pasa ku mi.” Ma Pedro a kontest’é: “Maske tur e otronan trompeká pa motibu di loke lo pasa ku bo, ami sí lo no trompeká nunka!” Hesus a bisa e ora ei ku Pedro lo a nenga tres biaha ku e konos’é. Ma Pedro no a ker’é i a bisa: “Asta si mi tin ku muri huntu ku bo, lo mi no nenga ku mi konosé bo.” (Mat. 26:31-35) Pero a sosodé manera Hesus a bisa: Pedro a trompeká. Ora Pedro a realisá kiko el a hasi, el a sintié asina malu ku el a “yora amargamente.”—Luk. 22:60-62.

¹¹ Un kos ta sigur, Pedro a siña un lès for di e eksperensia akí i a vense e tendensia di konfia muchu den su mes. Aparentemente, orashon a yud’é ku esaki. Kon nos por sa? Wèl, pasobra Pedro ta esun ku a skirbi ku nos mester ‘keda alerta pa nos no neglishá orashon.’ Kiko di nos? Nos ta skucha e konseho inspirá akí? Nos ta “hasi orashon kontinuamente,” i asina demostrá ku nos ta dependé riba Yehova? (Sal. 78:7) Laga nos kòrda tambe riba e spièrtamentu di apòstel Pablo: “Esun ku ta kere ku e ta pará, tene kuidou pa e no kai.”—1 Kor. 10:12.

12. Dikon Nehemías ta un bon ehèmpel pa nos?

¹² Un otro ehèmpel ta Nehemías. E tabata kopero di Rei Artaherhes di Persia, un 450 aña promé ku Kristu. Nehemías ta un bon ehèmpel di un persona ku a hasi orashon ku fervor. Pa hopi dia, el a ‘yuna i hasi orashon dilanti di Dios’ tokante e situashon deplorabel di e hudiunan na Herúsalèm. (Neh. 1:4) Ora Artaherhes a puntr’é dikon su kara ta tristu, Nehemías a splik’é kon e situashon tabata na Herúsalèm. Anto e rei a puntr’é: “Kiko ta bo petishon?” Mesora Nehemías “a hasi orashon na e Dios di shelu.” (Neh. 2:2-4) Ku ki resultado? Yehova a kontestá su orashonnan di tal manera ku esaki a benefisiá Su pueblo. (Neh. 2:5, 6) E eksperensia akí lo mester a fortalesé Nehemías su fe!

13, 14. Kiko nos mester hasi pa nos por keda ku un fe fuerte i resistí e intentonan di Satanas pa desanimá nos?

¹³ Si nos ta hasi orashon kontinuamente, manera Nehemías a hasi, esei lo yuda nos keda ku un fe fuerte. Satanas no ta tene miserikòrdia, i hopi biaha e ta ataká nos ora nos ta débil. Por ehèmpel, si nos tin un malesa grave òf ta lucha ku depreshon, nos por kuminsá sinti ku Dios no ta keda masha kontentu ku e tiki tempu ku nos ta prediká tur luna. Algun di nos kisas ta lucha ku pensamentunan negativo ku ta angustiá nos, kisas debí na mal eksperensia ku nos tabatin den pasado. Satanas ke pa nos kere ku nos no ta bal nada. Hopi biaha su atakenan ta diseñá pa desanimá nos i asina debilitá nos fe. Pero si nos ‘keda alerta i no neglishá orashon,’ nos por tin un fe fuerte. Beibel ta bisa ku nos fe ta manera un eskudo grandi ku kua nos por “paga tur e flechanan sendí di e Malbado.”—Efe. 6:16.

¹⁴ Ademas, si nos ‘keda alerta i no neglishá orashon,’ pruebanan ku bini diripiente kontra nos fe lo no kue nos fo’i base i pone nos bira infiel na Yehova. Ora nos haña nos ku prueba i difikultat, nos mester kòrda riba e ehèmpel di Nehemías i hasi orashon mesora. Ta ku Yehova su yudansa so nos por resistí tentashon i para firme durante prueba.

15. Kiko nos mester puntra nos mes relashoná ku hasimentu di orashon pa otro hende?

¹⁵ Hesus a supliká Dios pa yuda Pedro pa e apòstel su fe no debilitá. (Luk. 22:32) Epafras, un kristian di promé siglo, a imitá Hesus den esaki i a hasi esfuerso pa hasi orashon na fabor di su rumannan na Kolósas. Pablo a bisa nan: “Semper e ta resa pa boso ku masha fervor pa boso para firme komo kreyente madurá ku ta obedesé boluntat di Dios den tur kos.” (Kol. 4:12, BPK) Ta bon pa nos puntra nos mes: ‘Mi ta hasi esfuerso pa resa pa mi rumannan rònt mundu? Kuantu biaha mi ta hasi orashon pa e rumannan ku ta biba den áreanan afektá pa desaster natural? Ki dia tabata último biaha ku mi a hasi un esfuerso pa resa pa esnan ku ta karga responsabilidat di peso den e organisashon di Yehova? Mi a hasi orashon resientemente pa un hende spesífiko den kongregashon ku ta pasando den difikultat?’

16. E orashonnan ku nos ta hasi na fabor di otro hende realmente ta hasi un diferensia? Splika dikon.

¹⁶ E orashonnan ku nos ta hasi na Yehova Dios pa nos rumannan di bèrdat por yuda nan. (Lesa 2 Korintionan 1:11.) Yehova no ta obligá di aktua djis pasobra un kantidat grandi di su sirbidónan ta pidi algu bes tras bes den orashon. Pero sí e ta tuma nota ku komo grupo nan ta realmente interesá den otro i ta preokupá pa otro, i lo e reakshoná riba nan orashonnan di akuerdo ku su boluntat. Pues, nos tin ku tuma na serio e privilegio i responsabilidat ku nos tin di hasi orashon na fabor di otro hende. Nos mester imitá Epafras, i hasi esfuerso pa resa pa nos rumannan kristian pasobra asina nos ta demostrá nos amor sinsero pa nan. Nos lo ta mas felis ora nos ta hasi esaki, ya ku “tin mas felisidat den duna ku den risibí.”—Echo. 20:35.

17, 18. Si nos ‘keda alerta pa nos no neglishá orashon,’ ku kiko esei ta yuda nos?

¹⁷ Djis promé ku Pablo a bisa ku “anochi ta hopi avansá; e dia a yega serka,” el a skirbi: “Boso sa den ki tempu nos ta biba. Ya ta ora pa boso lanta for di soño, pasobra nos salbashon ta mas serka ku tempu nos a bira kreyente.” (Rom. 13:11, 12) E mundu nobo ku Dios a primintí ta serka, i nos salbashon ta mas serka ku nos ta pensa. Aworakí no ta ora pa nos pega soño den sentido spiritual. I hamas nos mester laga e mundu akí kita tur nos tempu i stroba nos di ta nos so un ratu pa papia ku Yehova. Al kontrario, nos mester ‘keda alerta pa nos no neglishá orashon.’ Esei lo yuda nos pa ta hende di “kondukta santu” i di “obranan ku ta demostrá deboshon na Dios,” segun ku nos ta warda riba e dia di Yehova. (2 Ped. 3:11, 12) E manera ku nos ta hiba nos bida lo demostrá si nos ta kedando spiritualmente lantá i si di bèrdat nos ta kere ku e fin di e mundu malbado akí ta serka. P’esei nos mester “hasi orashon konstantemente.” (1 Tes. 5:17) Tambe nos mester imitá Hesus i buska un lugá kaminda nos por hasi orashon na Yehova den privá. Ora nos ta tuma nos tempu pa papia ku Yehova, nos lo hala mas serka dje. (Sant. 4:7, 8) I ki un gran bendishon esei lo ta!

¹⁸ Beibel ta bisa ku “tempu ku Kristu a biba riba tera, el a ofresé súplika i tambe petishon—ku sklamashon fuerte i lágrima—na Esun ku por a salb’é for di morto, i pa motibu di su temor di Dios el a ser skuchá.” (Heb. 5:7) Hesus a supliká Yehova i hasi petishon na dje, i el a keda fiel na Dios te na fin di su bida riba tera. Debí na esei, Yehova a lanta su Yu stimá for di morto i a rekompens’é ku bida inmortal den shelu. Nos tambe por keda fiel na nos Tata selestial sin importá kua tentashon i difikultat nos haña nos kuné den futuro. De echo, nos por haña e premio di bida eterno, basta nos ‘keda alerta i no neglishá orashon.’