“E Hues di Henter Mundu” Semper Ta Hasi Loke Ta Korekto

 1. Kon Abraham a demostrá konfiansa den Yehova su sentido di hustisia? (Wak e promé plachi.)

BEIBEL ta bisa: “E Hues di henter mundu lo no hasi hustisia?” (Gén. 18:25) Ku e pregunta ei, Abraham a demostrá konfiansa ku Yehova lo a hasi hustisia perfekto den e kaso di Sódoma i Gomora. Abraham tabata konvensí ku Yehova lo no hasi algu inhustu, esta, di “mata e hustu huntu ku e malbado.” Pa Abraham, hamas Yehova lo hasi algu asina. Mas o ménos 400 aña despues, Yehova a bisa di su mes: “E Baranka! Su obra ta perfekto, pasobra tur su kamindanan ta hustu; un Dios di fieldat i sin inhustisia, hustu i rekto e ta.”—Deu. 31:19; 32:4.

 2. Dikon nos por bisa ku Yehova ta inkapas pa kometé inhustisia?

² Dikon Abraham por tabatin konfiansa ku Yehova semper lo hasi loke ta korekto? Pasobra Yehova ta e ehèmpel perfekto di hustisia. Pues, ta lógiko ku Yehova su punto di bista tokante un asuntu semper ta hustu. Ademas, segun su Palabra skirbí, “e ta stima hustisia i huisio.”—Sal. 33:5.

 3. Menshoná un ehèmpel di inhustisia den e mundu djawe.

³ Den e mundu yen di inhustisia akí, hende di bon kurason ta haña konsuelo pasobra nan sa ku Yehova semper ta hustu. Awe, tin hende a bira víktima di inhustisia grave. Por ehèmpel, algun hende a ser sentensiá i enkarselá inhustamente. Ta danki na prueba di DNA ku a ser usá pa analisá sierto kaso ku algun di e hendenan ei por a sali liber despues di a keda enkarselá pa dékadanan pa krímen ku nan no a kometé. Tal enkarselashon inhustu por kousa frustrashon i asta rabia. Pero kristiannan por haña nan ku un otro tipo di inhustisia ku ta asta mas difísil pa soportá.

 4. Kon nos fe por ser poné na prueba?

⁴ Kristiannan por ferwagt di bira víktima di inhustisia pafó di e kongregashon. Pero, nos fe lo por ser poné na prueba si nos mira òf nos pasa loke por parse un inhustisia den e kongregashon. Kon lo bo reakshoná si bo ta kere ku bo a bira víktima di inhustisia den e kongregashon òf den bo trato ku un ruman? Lo bo laga esei pone bo trompeká?

 5. Dikon no mester ta un sorpresa si un ruman mira òf bira víktima di inhustisia den kongregashon?

⁵ Komo ku nos tur ta imperfekto i tin e tendensia di peka, nos ta realisá ku tin un posibilidat ku nos por bira víktima di inhustisia òf ku nos mes por ta e kousa di un inhustisia den kongregashon. (1 Huan 1:8) Aunke ku situashonnan asina ta sosodé rara bes, kristiannan fiel no ta keda sorprendí ni no ta trompeká ora un inhustisia sosodé. Ku bon motibu anto Yehova a duna nos konsehonan práktiko den su Palabra pa yuda nos mantené nos integridat, asta ora un ruman trata nos malu.—Sal. 55:12-14.

6, 7. Ki tipo di inhustisia un ruman hòmber a bira víktima di dje den e kongregashon, i ki kualidatnan a yud’é trata ku e asuntu?

⁶ Wak kiko a pasa ku un ruman ku yama Willi Diehl. Desde 1931, Ruman Diehl a sirbi fielmente na Bètel na Bern, Suisa. Na 1946, el a asistí na e di ocho klas di e Skol di Galaad na New York, Merka. Despues ku el a gradua, el a haña e asignashon pa hasi e trabou di sirkuito na Suisa. Den su historia di bida, Ruman Diehl a konta: “Na mei 1949, mi a informá e sukursal na Bern ku mi ta bai kasa.” Kiko e rumannan a kontestá? Ruman Diehl a sigui bisa: “E úniko privilegio ku nos por tabatin ta di sirbi komo pionero regular.” El a sigui splika: “Mi no tabatin mag di duna diskurso . . . Hopi ruman no tabata kumindá nos mas, i nan tabata trata nos komo si fuera ta hende ekspulsá nos tabata.”

⁷ Kon Ruman Diehl a trata ku e situashon akí? El a bisa: “Nos tabata sa ku kasamentu no ta algu kontra siñansanan bíbliko, pues nos a buska refugio serka Yehova mediante orashon i a konfia den dje.” Ku tempu, e punto di bista robes ku e rumannan tabatin tokante kasamentu, loke a kousa e inhustisia akí, a ser korigí i Ruman Diehl a haña su privilegionan bèk. Yehova a rekompensá su lealtat.a Ta bon pa nos puntra nos mes: ‘Lo mi demostrá e mesun punto di bista spiritual akí si mi bira víktima di tal tipo di inhustisia? Lo mi warda ku pasenshi riba Yehova òf lo mi ta inkliná pa tuma e asuntu den mi mes man?’—Pro. 11:2; lesa Mikéas 7:7.

 8. Dikon bo por yega na un konklushon robes i kere ku abo òf un otro ruman di e kongregashon a bira víktima di inhustisia?

⁸ Di otro banda, bo por yega na un konklushon robes i kere ku abo òf un otro ruman di e kongregashon a bira víktima di inhustisia. Esaki por sosodé pasobra nos ta imperfekto i no ta semper nos tin tur detaye di un asuntu. Pero, sea nos a komprondé e asuntu bon òf nò, nos mester hasi orashon, dependé kompletamente riba Yehova i keda leal. Esaki lo yuda nos pa no bira “razu kontra SEÑOR.”—Lesa Proverbionan 19:3.

 9. Kiko nos lo konsiderá den e artíkulo akí i esun siguiente?

⁹ Laga nos konsiderá tres kaso di inhustisia ku a sosodé entre e pueblo di Yehova den tempu di Beibel. Den e artíkulo akí, nos lo konsiderá Yosef, bisañetu di Abraham, i su eksperensia ku su ruman hòmbernan. Den e siguiente artíkulo, nos lo wak kon Yehova a trata ku Akab, rei di Israel, i tambe loke apòstel Pedro a hasi na Antiokia di Siria. Segun ku nos ta analisá e ehèmpelnan akí, buska lèsnan ku por yuda bo mantené un punto di bista spiritual i kuida bo relashon ku Yehova, spesialmente si bo ta kere ku bo a ser tratá na un manera inhustu.

10, 11. (a) Ki inhustisia Yosef a pasa den? (b) Ki oportunidat a presentá tempu Yosef tabata den prizòn?

¹⁰ Yosef, un fiel sirbidó di Yehova, a bira víktima di inhustisia no solamente serka hende deskonosí, sino tambe na man di su propio ruman hòmbernan, i esei lo mester a hasié mas doló ainda. Ora Yosef tabata un tiner ainda, su ruman hòmbernan a sekuestr’é i bend’é komo esklabo. Nan a hib’é Egipto kontra su boluntat. (Gén. 37:23-28; 42:21) Despues ku e tabatin algun tempu kaba na e pais estranhero ei, e egipsionan a akus’é falsamente di intento di violashon i a ser’é den prizòn sin trata su kaso. (Gén. 39:17-20) E tabata un esklabo i prezu pa mas o ménos 13 aña. Ki lès nos por siña for di e eksperensia di Yosef ku por yuda nos si nos bira víktima di inhustisia na man di un ruman?

¹¹ Yosef a haña oportunidat pa konta un otro prezu loke a pas’é. E prezu ei un tempu tabata hefe di kopero di e rei. Tempu ku Yosef i e kopero tabata den prizòn, e kopero tabatin un soño ku Yosef a interpretá. Yosef a splik’é ku lo el a haña su posishon komo kopero bèk den palasio di Fárao. Ora Yosef a dun’é e interpretashon inspirá pa Dios, el a probechá di e oportunidat pa splika su mes situashon. Nos por siña lèsnan importante for di loke Yosef a bisa, pero tambe for di loke e no a bisa.—Gén. 40:5-13.

12, 13. (a) Kon loke Yosef a bisa e kopero a mustra ku e no a djis aseptá e inhustisia ku el a sufri? (b) Kiko Yosef no a bisa e kopero?

¹² Lesa Génesis 40:14, 15. Tuma nota ku Yosef a bisa ku el a ser “sekuestrá.” E palabra akí den e idioma original ta nifiká literalmente ku el a ser “hòrtá.” Ta bisto ku e tabata víktima di inhustisia. Yosef a bisa tambe ku e no tabata kulpabel pa e krímen ku el a kai será p’e. A base di esei, el a pidi e kopero si e por a bisa Fárao esaki. Dikon? El a splika ku su meta tabata pa sali “for di e kas akí.”

¹³ E palabranan di Yosef tabata manera di un hende ku a gewon aseptá su situashon? Sigur ku nò! E tabata konsiente ku e tabata víktima di hopi akto di inhustisia. Yosef a splika e detayenan bon kla na e kopero, kende kisas por a yud’é. Sinembargo, tuma nota ku e Skritura no ta indiká ku Yosef a bisa otro hende ku ta su ruman hòmbernan a sekuestr’é; ni sikiera Fárao e no a bisa. De echo, ora Yosef su rumannan a bini Egipto i a rekonsiliá kuné, Fárao a risibí nan gustosamente i a invitá nan pa bin biba na Egipto i pa disfrutá di “e mihó di henter tera.”—Génesis 45:16-20.

14. Kiko lo evitá ku nos ta papia malu di nos rumannan asta si nos a bira víktima di inhustisia den e kongregashon?

¹⁴ Ora un ruman ta kere ku el a bira víktima di inhustisia, e mester tene kuidou pa e no bai hasi redu riba e asuntu. Klaru ku ta bon pa buska yudansa serka e ansianonan i informá nan si un ruman di e kongregashon ta kulpabel di un piká serio. (Lev. 5:1) Pero, den hopi kaso ku no ta trata di un piká serio, kisas ta bon pa resolvé e problema sin enbolbé otro hende òf e ansianonan. (Lesa Mateo 5:23, 24; 18:15.) Laga nos sea leal i resolvé e asuntu di akuerdo ku prinsipionan di Beibel. Den algun kaso, nos por bin realisá despues ku niun ora so nos no tabata víktima di un inhustisia. Nos lo keda masha kontentu ku nos no a lanta akusashon falsu kontra un ruman i hasi e situashon pió. Laga nos kòrda ku sea nos tin rason òf nò, si nos usa palabranan ku por kousa un ruman doló, esei nunka lo no mehorá e situashon. Nos lealtat na Yehova i na nos rumannan lo evitá ku nos ta kometé un fayo asina. Ora e salmista a papia di “esun ku ta kana den rektitut,” el a bisa: “E no ta kalumniá ku su lenga, ni ta hasi malu na su próhimo, ni ta lansa reproche kontra su amigu.”—Sal. 15:2, 3; Sant. 3:5.

15. Kon e relashon entre Yehova ku Yosef a resultá di ta un bendishon p’e?

¹⁵ Nos ta saka un lès masha importante for di e relashon entre Yosef ku Yehova. Durante e 13 añanan ku Yosef a pasa den prueba, el a demostrá ku el a mira e kosnan manera Yehova ta mira nan. (Gén. 45:5-8) Nunka e no a kulpa Yehova pa su situashon. Aunke e no a lubidá tur e inhustisianan ku el a pasa aden, e no a laga esaki amarg’é. Mas importante ainda, Yosef no a laga e imperfekshon i fayonan di otro hende aleh’é for di Yehova. Su lealtat a dun’é e oportunidat pa mira kon Yehova a korigí e inhustisia i bendishoná e ku su famia.

16. Dikon nos mester hala mas serka Yehova si nos bira víktima di inhustisia den kongregashon?

¹⁶ Di mes manera, nos mester balorá i protehá nos relashon ku Yehova. Nunka nos no mester laga e imperfekshonnan di otro ruman separá nos for di e Dios ku nos ta sirbi i stima. (Rom. 8:38, 39) Mas bien, si nos bira víktima di inhustisia na man di un ruman, laga nos hasi manera Yosef i hala mas serka Yehova i hasi esfuerso pa nos tin su punto di bista di e asuntu. Ora nos kaba di hasi tur loke nos por di akuerdo ku prinsipio bíbliko pa drecha e situashon, nos mester laga e asuntu den man di Yehova, ku e konfiansa ku lo e drecha e asuntu na su debido tempu i na su manera.

17. Kon nos por demostrá ku nos tin konfiansa den “e Hues di henter mundu”?

¹⁷ Tanten ku nos ta bibando den e sistema malbado akí, nos por ferwagt di bira víktima di inhustisia. Rara bes, abo òf un ruman ku bo konosé por mira òf bira víktima di loke por parse di ta un inhustisia den e kongregashon. No laga esaki pone bo trompeká. (Sal. 119:165) Mas bien, komo fiel sirbidó di Dios, nos mester pidié pa yuda nos keda leal na dje i sigui konfia den dje. Na mes momento, ku modestia nos ta rekonosé ku kasi sigur nos no tin tur detaye. Nos ta bon konsiente ku pa motibu di nos imperfekshon kisas nos por mira un fayo kaminda no tin. Manera nos a siña for di e ehèmpel di Yosef, nos ke evitá di papia malu di otro ruman ya ku esei lo hasi e situashon pió. Finalmente, en bes di tuma e asuntu den nos mes man, laga nos ta determiná pa ta leal na Yehova i warda ku pasenshi riba dje pa korigí e asuntu. Ora nos hasi asina, esaki sigur lo duna nos e aprobashon i bendishon di Yehova meskos ku den e kaso di Yosef. Sí, nos por tin sigur ku Yehova, “e Hues di henter mundu,” semper lo hasi loke ta bon “pasobra tur su kamindanan ta hustu.”—Gén. 18:25; Deu. 32:4.

18. Kiko nos lo analisá den e siguiente artíkulo?

¹⁸ Den e siguiente artíkulo, nos lo analisá dos kaso mas di inhustisia ku a sosodé entre e pueblo di Yehova den tempu di Beibel. E relatonan akí lo mustra kiko nos humildat i e echo ku nos ta dispuesto pa pordoná otro hende tin di haber ku Yehova su punto di bista di hustisia.