Bo Ta Resolvé Desakuerdo i Promové Pas?

YEHOVA DIOS ta urgi kristiannan pa balorá pas i pa laga pas ta un parti importante di nos bida. Komo resultado, kristiannan berdadero ta disfrutá di pas na abundansia. Esaki ta atraé hende ku ke biba na pas na e kongregashon kristian.

Por ehèmpel, un kurandero prominente na Madagascar a tuma nota di e union ku tin entre Testigunan di Yehova. Den su mes el a bisa: ‘Si un dia mi mester skohe un religion, esaki lo ta esun.’ Ku tempu, el a stòp ku su práktikanan spiritista, el a pasa lunanan largu ta drecha su matrimonio pa e kuadra ku loke Beibel ta bisa i a bira un sirbidó di Yehova, e Dios di pas.

Meskos ku e hòmber akí, tur aña míles di hende ta haña e pas ku asina tantu nan ta deseá den e kongregashon kristian. Pero Beibel ta mustra bon kla ku “yalursheit amargo i un spiritu di pleitu” den kongregashon por kibra amistat i kousa problema. (Sant. 3:14-16) Afortunadamente, Beibel ta duna nos tambe bon konseho kon pa prevení e tipo di problemanan ei i promové pas. Pa nos logra esaki, laga nos analisá algun situashon di bida real.

“Mi no tabata bai bon ku un ruman hòmber ku tabata traha ku mi. Un biaha, ora nos tabata grita otro, dos hende a kana drenta i mira kon nos tabata zundra otro.”—CHRIS.

“Un ruman muhé ku hopi biaha mi tabata prediká kuné diripiente a stòp di sali den sirbishi ku mi. Despues el a stòp di papia mes ku mi. Mi no tabatin niun idea dikon.”—JANET.

“Mi tabata den un kòmbersashon na telefòn ku dos hende mas. Un di nan a yama ayó, i m’a kere ku el a sera e telefòn. Despues mi a bisa algun kos ku no tabata dje nèchi ei di dje ku e otro hende, pero e promé persona a tende tur kos.”—MICHAEL.

“Dos pionero di nos kongregashon a kuminsá haña problema ku otro. Un a kuminsá zundra e otro. Nan zundramentu tabata desanimá e rumannan.”—GARY.

Kisas bo ta pensa ku e situashonnan akí ta parse insignifikante. Pero tòg, kada un di nan por a kousa daño emoshonal i spiritual na esnan enbolbí. Afortunadamente, tur e rumannan ei a sigui e guia di Beibel i a logra restorá pas. Ki prinsipionan di Beibel bo ta kere e rumannan a apliká?

“No pleita na kaminda.” (Gén. 45:24) Yosef a duna su ruman hòmbernan e konseho akí ora ku nan mester a bai bèk serka nan tata. Ki palabranan sabí eseinan tabata! Ora un hende no ta tene su emoshonnan bou di kontrol i ta rabia lihé, e por pone otro hende rabia. Chris a bin ripará ku su debilidatnan tabata orguyo i ku e no tabata dispuesto pa aseptá korekshon. Komo ku e kier a kambia, el a pidi e ruman ku el a kue pleitu kuné despensa i despues a traha duru pa kontrolá su mal karakter. Ora e ruman a mira e esfuerso ku Chris tabata hasi pa kambia, e tambe a kuminsá hasi kambio. Awor nan ta felis i ta sirbi Yehova huntu.

“Pa falta di konseho plannan ta frakasá.” (Pro. 15:22) Janet a yega na e konklushon ku e mester a hasi kaso di e prinsipio akí. Pues, el a disidí di papia ku e otro ruman muhé. Durante nan kòmbersashon, ku takto Janet a puntra e ruman dikon e ruman tabata rabiá kuné. Na promé instante, e kòmbersashon tabata un poko tenso, pero komo ku nan a papia na un manera kalmu tokante nan problema, e kòmbersashon a kue un bon direkshon. E ruman a bin realisá ku el a komprondé un asuntu robes i ku Janet ni sikiera tabata enbolbí den dje. El a pidi Janet pordon, i awor nan ta sirbi Yehova huntu atrobe komo un tim.

“Si bo trese bo ofrenda na altar, i einan bo kòrda ku bo ruman tin algu kontra bo, laga bo ofrenda einan, dilanti di altar, i bai. Hasi pas ku bo ruman promé.” (Mat. 5:23, 24) Kisas bo ta kòrda ku Hesus a duna e konseho akí den su Sermon Riba Seru. Michael a sintié hopi malu ora el a ripará ku e no tabata trata e ruman bon. Pero e tabata determiná pa hasi esfuerso pa sera pas kuné. Humildemente el a pidi e ruman ku el a hùrt pordon. Ku ki resultado? Michael a bisa: “Mi ruman a pordoná mi di bèrdat.” Nan a logra drecha nan amistat.

“Sigui soportá otro i pordoná otro libremente, asta si un di boso tin motibu pa keha un otro.” (Kol. 3:12-14) Den e kaso di e dos rumannan ku tabata traha pionero pa hopi tempu, un ansiano a yuda nan pensa riba preguntanan manera: ‘Nos dos tin derecho pa pone otro ruman sinti nan malu pa motibu di nos desakuerdo ku otro? Di bèrdat nos tin un motibu bálido pa no soportá otro i sigui sirbi Yehova na un manera pasífiko?’ Nan a aseptá e konseho di e ansiano i a aplik’é. Awor nan ta bai bon ku otro segun ku nan ta sigui prediká e bon notisia.

E prinsipio ku nos a kaba di lesa na Kolosensenan 3:12-14 por yuda nos si un hende hùrt nos. Hopi ruman a mira ku ora nan demostrá humildat, nan por djis pordoná i lubidá. Si ta parse ku nos mester hasi mas esfuerso pa sera pas ku un ruman, nos por apliká e prinsipio na Mateo 18:15? E konseho akí di Hesus ta referí na e paso ku nos mester dal ora un hende kometé un piká serio kontra nos. Pero, básikamente esaki ta loke nos mester hasi ora nos haña problema ku un ruman, asta ora no ta trata di un piká serio. Djis aserká e ruman i na un manera humilde i kariñoso purba di papia tokante e asuntu i resolvé e problema.

Ta klaru ku Beibel tin otro sugerensianan práktiko tambe. Pero hopi ta dependé di e manera ku bo ta demostrá e fruta di spiritu, esta, “amor, goso, pas, pasenshi, amabilidat, bondat, fe, suavedat, dominio propio.” (Gal. 5:22, 23) Meskos ku zeta ta laga un mashin traha suave, e kualidatnan kristian akí ta yuda suavisá e proseso di mantené pas.

Kada un di nos tin nos personalidat. Nos tur tin diferente kualidat, forma di pensa i di ekspresá nos mes. E diferensianan akí por forma amistatnan agradabel pero tambe nan por hiba na konflikto. Un ansiano ku hopi eksperensia ta bisa: “Un hende ku ta un poko tímido por tin difikultat pa ta den kompania di un persona un poko drùk. E diferensia ei kisas por parse algu chikitu, pero e por hiba na problemanan serio.” Bo ta kere ta imposibel pa hende di diferente personalidat bai bon ku otro? Wèl, pensa riba dos di e apòstelnan. Kon Pedro tabata? Kisas bo ta pensa ku e tabata un hende mondig i impulsivo. I kiko di Huan? Kisas nos ta pensa ku e tabata un hende yen di amor i ku semper e tabata midi su palabranan. Podisé nos tin base pa pensa ku e apòstelnan ei tabata asina. Ta parse ku nan tabata basta diferente, pero tòg nan a traha bon ku otro. (Echo. 8:14; Gal. 2:9) Di mes manera, ta posibel pa kristiannan ku tin personalidatnan hopi diferente traha bon ku otro awe.

Kisas den bo kongregashon tin un ruman ku ta iritá bo ku su manera di anda i di papia. Pero, bo ta realisá ku Kristu a muri p’e i bo mester mustra amor na dje. (Huan 13:34, 35; Rom. 5:6-8) Pues, en bes di evit’é òf pensa ku nunka boso por tin un amistat ku otro, puntra bo mes: ‘Mi ruman ta hasiendo algu ku ta bai kontra siñansa bíbliko? Ta pa malu e ta purba di hùrt mi? Òf ta simplemente diferente personalidat nos tin?’ Ademas, mas importante ainda: ‘Kon mi por benefisiá di su bon kualidatnan?’

E último pregunta ei ta hopi importante. Si e ruman ta gusta papia pero abo ta un hende ketu, pensa kon fásil e por kuminsá un kòmbersashon den sirbishi. Kisas boso por traha huntu den sirbishi i bo por siña for di dje. Si e ruman ta mas generoso ku bo, dikon no tuma nota di e felisidat ku bo ta haña den duna ora ku bo yuda un ruman di edat, un ku ta malu òf un ku ta den nesesidat? E punto ta ku aunke abo ku bo ruman tin personalidat diferente, boso por hala mas serka di otro si boso mantené un punto di bista positivo. Ora bo hasi esei, kisas boso lo no bira amigu será, pero e por yuda boso bira bon ku otro, haña pas mental i fomentá e pas den e kongregashon.

Evodia i Síntike kisas tabatin personalidat masha distinto. Sinembargo, apòstel Pablo a animá nan “pa nan ta di e mesun mente den union ku Señor.” (Flp. 4:2) Abo tambe lo hasi esfuerso pa promové pas?

Meskos ku mal yerba ta krese den un hardin, sintimentunan negativo pa otro ruman lo sigui krese si nos no hasi esfuerso pa ‘ranka’ nan. Ora un hende bira amargá, esei por asta afektá henter e kongregashon. Si nos ta stima Yehova i nos rumannan, nos lo hasi tur loke nos por pa e diferensianan di personalidat no stroba òf mengua e pas di e pueblo di Dios.

Ora nos resolvé desakuerdo ku e meta pa mantené pas, nos lo keda sorprendí ku e bon resultadonan. Laga nos wak e eksperensia di un ruman. E ta konta: “Mi tabata sinti ku un ruman muhé tabata trata mi manera ta mucha chikí mi ta. Esei a ègt kansa mi. Mi tabata sinti mi mas i mas molestiá, i mi a kuminsá trat’é na un manera seku. Mi a pensa: ‘E ruman no ta duna mi e rèspèt ku mi meresé, awèl ami tampoko no ta bai trat’é ku rèspèt.’”

Ma despues e ruman a kuminsá pensa tokante su mes akshonnan. E ta bisa: “Mi a kuminsá ripará mi mes fayonan, i mi tabata hopi desepshoná ku mi mes. Mi a realisá ku mi mester a kambia mi manera di pensa. Despues di a hasi orashon na Yehova tokante e asuntu, mi a kumpra un regalitu i a skirbi un karta pa pidié despensa pa mi mal aktitut. Nos a brasa otro i a bai di akuerdo pa pone e asuntu tra’i lomba. Nos no a haña problema mas ku otro.”

Hende mester di pas. Sinembargo, ora hende ta orguyoso òf ta sinti nan mes menasá, hopi di nan ta kuminsá komportá nan mes na un manera ku no ta pasífiko. Esei ta konta pa hopi hende den mundu, pero entre e pueblo di Yehova, mester reina pas i union. Dios a inspirá apòstel Pablo pa skirbi: “Ami . . . ta hasi un apelashon na boso pa kana na un manera digno di e yamada ku boso a risibí, ku tur humildat i suavedat, ku pasenshi, soportando otro den amor, hasiendo esfuerso sinsero pa mantené e union di spiritu den e vínkulo di pas.” (Efe. 4:1-3) E “union di spiritu den e vínkulo di pas” ta di gran balor. Laga nos fortales’é i ta determiná pa resolvé kualke desakuerdo ku surgi entre nos.