“Ki Dia Nos Lo Tin e Siguiente Asamblea?”

TA FIN di novèmber 1932 na Siudat di México. Apénas un siman promé nan a kaba di instalá e promé lusnan di tráfiko eléktriko den e stat drùk ei di mas ku un mion habitante. Pero awor e lusnan di tráfiko akí a bira notisia bieu. E reporteronan di e stat a enfoká riba e evenemento pa e siman ei. Nan tabata kla pará ku kámara na stashon di trein ta warda e yegada di un invitado spesial: Joseph F. Rutherford, presidente di e Sosiedat Watch Tower e tempu ei. Ademas, rumannan lokal tabata kla pará pa duna un kaluroso bon biní na Ruman Rutherford, kende a bini pa asistí na e kongreso nashonal di tres dia.

E Époka di Oro (awor Spièrta!) a bisa: “No tin duda, e kongreso akí lo bai den historia komo un evenemento di gran importansia pa adelanto di e bèrdat na e repúblika di México.” Pero kiko a hasi e kongreso akí asina remarkabel, aunke ta rònt di 150 hende so a asistí?

Promé ku e kongreso ei, tabatin masha poko hende ku a aseptá e mensahe di Reino na México. Aunke for di 1919 tabatin algun asamblea chikitu, e kantidat di kongregashon a baha den e añanan ku a sigui. Na 1929, ora e ofisina di sukursal na Siudat di México a habri, a parse ku kosnan lo a drecha. Pero a surgi algun problema. Ora e rumannan a haña instrukshon pa stòp di meskla asuntunan di negoshi ku e trabou di prediká, un kòlportùr [òf, pionero,] a rabia, bandoná e organisashon i kuminsá su mes grupo di estudio di Beibel. Na mes momento, mester a remplasá e superintendente di e sukursal pasobra e tabata enbolbí den kondukta inapropiá. Tabata bisto ku e Testigunan leal na México tabatin mester di un estímulo spiritual.

Durante e bishita di Ruman Rutherford, el a duna dos diskurso masha konmovedor na e kongreso i sinku diskurso masha potente na radio ku a animá e fiel rumannan ei. Pa promé biaha, emisoranan di radio na México tabatin bon notisia pa henter e pais. Despues di e kongreso, e superintendente nobo di e sukursal a organisá e trabou, i e rumannan zeloso a sali padilanti yen di ánimo i ku bendishon di Yehova.

E siguiente aña tabatin no ún ma dos kongreso den e pais, un na e stat portuario di Veracruz i e otro na Siudat di México. Anto e trabou duru di e rumannan a kuminsá duna bon resultado. Na 1931 tabatin 82 publikadó, ma despues di dies aña tabatin dies bes mas tantu publikadó. Na 1941, mas o ménos mil hende a bini Siudat di México pa asistí na e Asamblea Teokrátiko.

Na 1943, e Testigunan a bisti pankarta pa anunsiá e Asamblea Teokrátiko titulá “Nashon Liber,” ku lo a ser tené na 12 stat mehikano.a E rumannan a usa un método di prediká ku Testigunan a usa desde 1936: nan a usa dos pankarta ku tabata pegá na otro i kologá na skouder, un dilanti i un patras.

Relashoná ku e éksito di e marcha di pankarta den kayanan di Siudat di México, e revista La Nación a bisa: “Riba e promé dia di [asamblea], a pidi [e Testigunan] pa invitá mas hende. E siguiente dia, tabatin mas tantu hende ku e lugá por a akapará.” Iglesia Katóliko no a gusta e marchanan akí niun tiki, p’esei nan a lansa un kampaña kontra e Testigunan. Apesar di e oposishon ei, e rumannan a sigui marcha den kaya sin miedu. La Nación a bisa tambe: “Henter e pais a mira nan . . . tantu hòmber komo muhé a transformá den ‘sèntwich’ di anunsio.” Den e artíkulo por a mira potrèt di rumannan den e kayanan di Siudat di México. Bou di e potrèt tabatin e nota: “Invashon den kaya.”

E tempu ayá, mayoria di ruman mester a hasi hopi esfuerso pa bai e poko kongresonan ku tabatin na México. Hopi delegado tabata bini di pueblonan rural, ku tabata keda leu for di stashon di trein òf asta kaya. Un kongregashon a skirbi: “E úniko liña ku ta pasa serka di e lugá akí ta e liña di telegraf.” Pues, e delegadonan mester a bai ku mula òf kana pa dianan largu pa kue un trein ku por a hiba nan na e stat kaminda lo a tene e kongreso.

Mayoria di Testigu tabata pober, i kasi nan no por a paga pa e biahe pa bai kongreso. Ora nan a yega, hopi di nan tabata keda serka rumannan lokal ku, komo muestra di nan amor, a laga e rumannan akí keda den nan kas. Anto, otro rumannan a drumi gewon den Salònnan di Reino. Na un okashon, mas o ménos 90 delegado a keda na e sukursal, kaminda nan tabatin “20 kaha di buki komo kama den un rei.” E relato den e Anuario a komentá ku e huéspetnan gradisidu a haña e “kamanan akí mas suave i mas kayente ku flur di semènt.”

Sin duda, pa e Testigunan apresiativo dje tempu ei, e asambleanan kristian gososo ei a bal tur e sakrifisio ku nan a hasi. Awe, e rumannan ta mes gradisidu, i e kantidat di publikadó ta sigui oumentá i ta yega kasi un mion.b Na 1949, un informe di e sukursal di México a bisa tokante e rumannan: “E rumannan no a laga tempu difísil mengua nan spiritu Teokrátiko pasobra nan ta keda papia pa hopi tempu despues tokante e asamblea, i kada bes nan ta puntra: ‘Ki dia nos lo tin e siguiente asamblea?’” E palabranan ei ta konta awe tambe.—For di nos archivo na Sentroamérika.