Laga Nos Animá Otro “Muchu Mas Ainda”

 1. Dikon Pablo a konsehá e kristiannan hebreo den promé siglo pa animá otro “muchu mas ainda”?

DIKON nos mester hasi mas esfuerso pa animá otro? Apòstel Pablo a menshoná e motibu den su karta na e kristiannan hebreo ora el a bisa nan: “Laga nos presta atenshon na otro pa nos por stimulá otro pa mustra amor i hasi bon obra, i no keda sin bai e reunionnan, manera algun a tuma pa kustumber, sino mas bien animá otro, i muchu mas ainda ku boso ta mira e dia ta yega serka.” (Heb. 10:24, 25) Denter di sinku aña, e kristiannan hudiu ku tabata biba na Herúsalèm lo a mira e señal ku Hesus a duna nan i ku a indiká ku ‘e dia di Yehova’ a yega serka. E ora ei, nan lo a komprondé ku nan mester a hui for di e stat. (Echo. 2:19, 20; Luk. 21:20-22) E dia di Yehova ei a yega na aña 70 despues di Kristu ora ku e romanonan a ehekutá e huisio di Yehova riba Herúsalèm.

 2. Dikon nos tambe mester animá nos rumannan “muchu mas ainda”?

² Awe, nos tin tur motibu pa kere ku e dia “grandi i masha temibel” di Yehova ta serka. (Yoël 2:11) Profeta Sofonías a bisa: “E gran dia di SEÑOR ta serka; e ta serka i e ta bin masha lihé mes.” (Sof. 1:14) E spièrtamentu profétiko ei ta konta pa nos tambe. P’esei, Pablo ta bisa nos pa “presta atenshon na otro pa nos por stimulá otro pa mustra amor i hasi bon obra.” (Heb. 10:24) Nos mester mustra mas i mas interes den bienestar di nos rumannan. Di e manera ei, nos por animá nan ki ora ku esei ta nesesario.

 3. Kiko apòstel Pablo a bisa tokante di animashon? (Wak e promé plachi.)

³ Beibel ta bisa: “Ansha den kurason di hende ta hasié abatí, ma un bon palabra ta hasié kontentu.” (Pro. 12:25) Esei ta konta pa nos tur. Nos tur mester di un palabra di animashon de bes en kuando. Pablo a mustra ku asta rumannan ku tin responsabilidat di animá otronan tin mester di animashon. Den su karta na e kristiannan ku tabata biba na Roma, el a bisa: “Mi tin masha gana mes di mira boso pa mi por kompartí algun don spiritual ku boso pa hasi boso firme; òf, mas bien, pa por tin un interkambio di estímulo entre nos; pa nos kada un animá otro pa medio di nos fe, tantu di boso komo di mi.” (Rom. 1:11, 12) Sí, esaki ta mustra ku tin biaha asta Pablo tabatin mester di animashon.—Lesa Romanonan 15:30-32.

4, 5. Ken mester di animashon awe, i dikon?

⁴ Hopi ruman ta hasi sakrifisio pa sirbi Yehova den sirbishi di tempu kompleto. Entre nan, tin pionero, misionero, bètelita, superintendentenan di sirkuito ku nan kasá i rumannan ku ta traha na ofisina di tradukshon. Nan tur meresé elogio i animashon. Ademas, tin ruman ku pa vários motibu mester a stòp ku nan sirbishi di tempu kompleto; nan tambe ta apresiá mashá ora nan haña animashon.

⁵ Rumannan ku ta keda soltero pasobra nan ke obedesé Yehova i kasa solamente “den Señor” tambe meresé animashon. (1 Kor. 7:39) Di mes manera, esposanan ku ta traha duru ta sinti nan bon ora nan kasá ta bisa nan kuantu nan ta stima nan i ta balorá e esfuerso ku nan ta hasi. (Pro. 31:28, 31) I nos no mester lubidá e kristiannan ku ta keda fiel bou di persekushon òf durante nan malesa. (2 Tes. 1:3-5) Yehova i Hesus ta konsolá tur e rumannan fiel akí.—Lesa 2 Tesalonisensenan 2:16, 17.

 6. Kiko ta responsabilidat di e ansianonan ku Isaías 32:1 i 2 ta papia di dje?

⁶ Lesa Isaías 32:1, 2. Hesukristu ta usa e “prensnan,” esta, ansianonan ungí i di e otro karnénan, pa animá i guia rumannan ku ta tristu i desanimá den e tempu difísil akí. Ta asina mester ta, pasobra e ansianonan akí no “ta doño” di e fe di nan rumannan; mas bien, nan ta “traha huntu ku” nan rumannan pa yuda nan keda spiritualmente fuerte i ku goso.—2 Kor. 1:24.

7, 8. Ademas di animá nan rumannan ku palabra, den ki otro manera ansianonan por fortalesé nan rumannan?

⁷ Apòstel Pablo a pone un bon ehèmpel pa nos imitá. El a skirbi e kristiannan ku tabata ser persiguí na Tesalónika: “Komo ku nos tabatin tierno kariño pa boso, gustosamente nos a kompartí no solamente e bon notisia di Dios ku boso, sino tambe nos mes alma, pasobra nos ta stima boso masha hopi.”—1 Tes. 2:8.

⁸ Loke Pablo a skirbi e ansianonan na Efeso a mustra ku animashon ku palabra so no ta sufisiente. El a bisa nan: “Boso mester yuda esnan ku ta suak. I boso mester kòrda e palabranan di Señor Hesus, ora e mes a bisa: ‘Tin mas felisidat den duna ku den risibí.’” (Echo. 20:35) Pablo tabata dispuesto no solamente pa animá su rumannan, sino tambe pa ‘duna tur loke e tin i entregá su mes kompletamente pa’ nan. (2 Kor. 12:15) Asina tambe, ansianonan no mester animá i konsolá e rumannan solamente ku palabra, sino tambe ku echo. Di e manera ei, nan ta demostrá ku nan ta realmente interesá den nan rumannan.—1 Kor. 14:3.

 9. Kon ansianonan por duna konseho na un manera animante?

⁹ Tin biaha pa fortalesé un ruman, ansianonan tin ku dun’é konseho. Beibel ta mustra kon ansianonan por hasi esei na un manera animante. Hesus a pone un ekselente ehèmpel den esaki despues ku el a ser resusitá. E mester a duna algun konseho firme na algun kongregashon na Asia Menor. Pero tuma nota kon el a hasi esaki. Promé ku el a konsehá e kongregashonnan na Efeso, Pérgamo i Tiatira, el a duna nan elogio sinsero. (Rev. 2:1-5, 12, 13, 18, 19) El a bisa e kongregashon na Laodisea: “Mi ta reprendé i disipliná tur esnan ku mi tin kariño p’e. P’esei, sea yen di zelo i arepentí.” (Rev. 3:19) Ta bon pa ansianonan imitá e ehèmpel di Kristu ora di duna konseho.

10. Kon nos tur por edifiká otro?

¹⁰ No ta ansianonan so tin e responsabilidat di animá otronan. Pablo a urgi tur kristian pa papia ‘loke ta bon pa edifiká segun e nesesidat di e momento i kompartí loke ta probechoso’ ku otronan. (Efe. 4:29) Nos tur mester sa kiko ta “e nesesidat” di nos rumannan pa nos por yuda nan. Pablo a konsehá e kristiannan hebreo: “Fortalesé e mannan ku ta kologá i e rudianan ku ta débil, i sigui hasi e kamindanan ku boso ta kana ariba stret, pa e parti di kurpa ku ta lam no sali for di lugá, ma pa e por kura.” (Heb. 12:12, 13) Sí, nos tur, inkluso hóbennan, por edifiká otronan ku palabra di animashon.

11. Ki yudansa Marthe a haña ora e tabata deprimí?

¹¹ Marthe,a un ruman muhé ku tabata deprimí pa un tempu, a skirbi: “Un dia ku mi a hasi orashon na Yehova pa yudansa, mi a topa un ruman muhé di mas edat. El a mustra kariño i kompashon na mi, nèt loke mi tabatin mester na e momento ei. El a konta mi ku e tambe a eksperensiá loke mi tabata pasando aden, i esei a laga mi sinti ku mi no tabata mi so.” Podisé e ruman di edat no a realisá ki bon efekto su palabranan tabatin riba Marthe.

12, 13. Kon nos por sigui e konseho ku nos ta haña na Filipensenan 2:1-4?

¹² Pablo a duna e siguiente konseho na tur miembro di e kongregashon na Filipo: “Si den boso ta eksistí kosnan manera animashon den Kristu, konsuelo duná ku amor, mustramentu di interes den otro, tierno kariño i kompashon, hasi mi goso kompleto teniendo e mesun mentalidat i e mesun amor, siendo kompletamente uní, ku e mesun pensamentu. No hasi nada ku gana di pleita òf ku e deseo di ke ta na promé lugá, ma ku humildat, konsiderá ku otro hende ta superior na boso. No buska boso mes interes so, ma tambe interes di otro hende.”—Flp. 2:1-4.

¹³ Sí, nos tur mester hasi esfuerso pa animá nos rumannan. Nos por duna nan konsuelo ku amor, mustra interes den nan i mustra tierno kariño i kompashon na nan.

14. Kiko por ta un fuente di animashon?

¹⁴ Ta un animashon pa sa ku e hendenan ku nos a yuda den pasado ta sigui sirbi Yehova fielmente. Apòstel Huan tambe a sintié asina, i el a skirbi: “No tin nada ku ta hasi mi mas kontentu ku esaki: di tende ku mi yunan ta sigui kana den e bèrdat.” (3 Huan 4) Hopi pionero por konfirmá kon animante ta pa tende kon algun di e personanan ku nan a studia kuné den pasado ta sigui sirbi Yehova fielmente i kisas ta asta sirbi komo pionero. Ora un pionero ta desanimá, nos por kòrd’é riba e bon kosnan ku el a hasi pa yuda otro hende; esei sigur lo anim’é.

15. Kon nos por animá rumannan ku ta sirbi Yehova fielmente?

¹⁵ Hopi superintendente di sirkuito a bisa ku nan ku nan kasá ta sinti nan masha animá ora nan haña un nota breve di gradisimentu despues di a bishitá un kongregashon. Esei ta konta tambe pa ansiano, misionero, pionero i bètelita. Nan ta keda masha animá ora nos mustra apresio pa nan sirbishi fiel.

16. Kon ta un manera simpel ku nos por animá un hende?

¹⁶ No ta korekto pa pensa ku nos no por animá otro hende pasobra nos ta tímido. No ta difísil pa animá otro hende. Kisas bo tin ku djis smail ora di kumindá un persona. Si e persona no smail bèk, kisas esei ta nifiká ku tin un problema. I si bo djis skucha e persona ei, esei por konsol’é.—Sant. 1:19.

17. Kon un ruman hòmber a ser animá ora e tabata desanimá?

¹⁷ Henri, un ruman yòn, tabata masha desanimá ora algun famia yegá di dje, inkluso su tata ku tabata un ansiano respetá, a bandoná e bèrdat. Henri a haña animashon serka un superintendente di sirkuito, kende a invitá Henri pa bebe kòfi i a lag’é deshogá su mes. Henri a realisá ku e úniko manera ku e por a yuda su famia bolbe serka Yehova ta di perseverá fielmente. El a haña gran konsuelo ora el a lesa Salmo 46, Sofonías 3:17 i Marko 10:29 i 30.

18. (a) Kiko Rei Sálomon a bisa? (b) Kiko apòstel Pablo a sugerí?

¹⁸ E ehèmpelnan di Marthe i Henri ta mustra ku nos por animá un ruman ku mester di konsuelo. Rei Sálomon a skirbi: “Ki bon ta un palabra duná na ora!” El a agregá: “Wowo ku ta bria ta alegrá kurason; bon notisia ta hasi wesu salú.” (Pro. 15:23, 30) Ademas, un persona ku ta desanimá por haña animashon ora e lesa E Toren di Vigilansia òf artíkulonan riba nos website. Pablo a mustra ku nos por animá otro, kantando kantika di Reino huntu. El a skirbi: “Sigui siña otro i animá otro ku salmo, alabansa na Dios i kantika spiritual kantá ku grasia, kantando den boso kurason na Yehova.”—Kol. 3:16; Echo. 16:25.

19. Dikon den futuro lo ta muchu mas importante pa nos animá otro, i kiko nos tin ku sigui hasi?

¹⁹ Segun ku nos ta mira ku e dia di Yehova “ta yega serka,” ta bira mas i mas importante pa nos kada un animá otro. (Heb. 10:25) Laga nos ta determiná pa hasi manera Pablo a bisa e kristiannan den su tempu. El a bisa: “Sigui animá otro i fortalesé otro, manera de echo boso ta hasiendo kaba.”—1 Tes. 5:11.