Bo Ta Pensa Manera Yehova Ta Pensa?

1, 2. Segun ku nos ta krese spiritualmente, kiko nos ta siña hasi? Duna un ehèmpel.

UN MUCHA chikitu ta haña un regalo. Su mayornan ta bis’é: “Bisa danki.” E ta bisa danki, prinsipalmente pasobra su mayornan a bis’é pa e hasi esei. Segun ku e ta krese, e ta kuminsá komprondé pakiko su mayornan ta haña ku ta importante pa e ta gradisidu ora hende ta hasi algu bondadoso. Ku tempu, e ta kuminsá bisa danki di su mes. Dikon? Pasobra awor e ta pensa meskos ku su mayornan, i e ta gradisidu.

² Di mes manera, ora nos a haña e bèrdat, nos a siña kon importante ta pa obedesé Yehova su rekisitonan básiko. Pero, segun nos ta krese spiritualmente, nos ta siña mas di Yehova su manera di pensa, esta, loke e ta gusta, loke e no ta gusta i su punto di bista riba vários asuntu. Ora nos siña rasoná manera Yehova ta rasoná i laga su pensamentu influensiá loke nos ta hasi i e desishonnan ku nos ta tuma, nos ta demostrá ku nos ta pensa meskos ku Yehova.

 3. Dikon no ta semper fásil pa siña pensa meskos ku Yehova?

³ Segun ku nos ta siña pensa meskos ku Yehova, nos lo ta felis. Ma esei no ta semper fásil pa hasi pasobra nos ta imperfekto. Por ehèmpel, tin biaha ta difísil pa nos komprondé Yehova su punto di bista di moralidat, materialismo, e trabou di prediká, mal uso di sanger òf algu otro. Kiko nos por hasi den tal kaso? Kon nos por sigui progresá spiritualmente i hasi Yehova su pensamentu nos pensamentu? I ki efekto esaki lo tin riba nos desishonnan awor i den futuro?

 4. Kiko Pablo tabata ke men ora el a bisa “renobá boso mente”?

⁴ Lesa Romanonan 12:2. Akí apòstel Pablo a deskribí kiko nos tin ku hasi pa nos por siña pensa manera Yehova ta pensa. E artíkulo anterior a yuda nos mira ku si nos ke “stòp di laga e mundu akí forma [nos],” nos tin ku stòp di alimentá nos mes ku e punto di bista i aktitut di mundu. Pero Pablo a menshoná tambe ku nos tin ku ‘renobá nos mente.’ Esaki ta enserá studia e Palabra di Dios pa nos por komprondé su pensamentunan, meditá riba nan i hasi esfuerso pa haña Dios su punto di bista.

 5. Kiko studiamentu ta enserá?

⁵ Studiamentu ta mas ku djis lesa ariba ariba i marka e kontestanan di e preguntanan di estudio. Ora nos ta studia, nos tin ku puntra nos mes kiko e informashon ta siña nos tokante Yehova, su manera di pensa i e motibu pakiko e ta tuma sierto desishon. Nos tin ku purba di komprondé dikon Yehova ta pidi nos hasi un kos i ta kondená otro kos. Ademas, nos ta pensa riba e kambionan ku nos tin ku hasi den nos bida i den nos manera di pensa. Klaru, kisas no ta posibel pa meditá riba tur e puntonan akí kada bes ku nos ta studia. Pero, ta bon pa nos dediká tempu, kisas mitar di e tempu ku nos ta pone pa studia, na meditá riba loke nos ta lesa.—Sal. 119:97; 1 Tim. 4:15.

 6. Kiko ta pasa segun ku nos ta meditá riba e Palabra di Dios?

⁶ Segun ku nos ta meditá regularmente riba e Palabra di Dios, algu ekstraordinario ta tuma lugá. Nos ta ‘komprobá pa nos mes,’ sí, konvensé nos mes, ku Yehova su manera di pensa ta perfekto. Pues, nos ta komprondé i aseptá Yehova su punto di bista. Nos ta “renobá” nos mente i kambia nos manera di pensa. Tiki tiki, nos ta kuminsá pensa manera Yehova ta pensa.

7, 8. (a) Kiko ta Yehova su punto di bista di kos material? (Wak e promé plachinan.) (b) Si nos tin Yehova su punto di bista, kiko lo ta nos prioridat?

⁷ Nos manera di pensa ta influensiá no solamente loke nos ta sinti, ma tambe loke nos ta hasi. (Mar. 7:21-23; Sant. 2:17) Laga nos wak algun ehèmpel pa yuda nos komprondé e punto akí mihó. E promé ehèmpel ta den e Evangelionan. Loke nos ta mira den e relato tokante Hesus su nasementu ta mustra bon kla kiko Yehova ta pensa di kos material. Yehova mes a skohe e mayornan ku lo a lanta su Yu. El a skohe un pareha ku no tabatin hopi plaka. (Lev. 12:8; Luk. 2:24) Ora Hesus a nase, Maria a “pon’é den un pesebre, ya ku no tabatin lugá pa nan den e posada.” (Luk. 2:7) Si Yehova tabata ke, e por a perkurá un mihó lugá pa su Yu nase. Pero loke tabata importante p’E tabata pa su Yu lanta den un famia spiritual.

⁸ E relato di Beibel akí di Hesus su nasementu ta siña nos Yehova su punto di bista di kos material. Algun mayor ke pa nan yunan tin lo mihó materialmente, asta si esaki ta perhudiká nan yunan spiritualmente. Pero, ta bisto ku pa Yehova loke ta mas importante ta e kosnan spiritual. Abo ta di akuerdo ku Yehova su punto di bista? Kiko bo echonan ta mustra?—Lesa Hebreonan 13:5.

9, 10. Kon nos por demostrá ku nos punto di bista di trompeká un otro hende ta meskos ku di Yehova?

⁹ Un otro ehèmpel ta Dios su punto di bista di un persona ku ta trompeká un otro hende, esta, pone un otro hende peka òf stòp di sirbi Yehova. Hesus a bisa: “Ken ku pone un di e chikitunan akí ku ta kere den mi trompeká, lo tabata mihó p’e si nan a kologá un piedra di mulina na su garganta i bent’é den laman.” (Mar. 9:42) E palabranan ei ta mustra kon serio e asuntu akí ta pa Hesus! Ademas, komo ku Hesus ta imitá su Tata perfektamente, nos por tin sigur ku Yehova tambe ta sinti meskos ora un persona no tin kunes si loke e ta hasi ta pone un di Hesus su siguidónan trompeká.—Huan 14:9.

¹⁰ Kiko di nos? Nos tin e punto di bista di Yehova i Hesus? Kiko nos echonan ta mustra? Tuma por ehèmpel nos bistimentu i kuido di nos aparensia. Imaginá bo ku tin sierto stail ku nos ta gusta masha hopi mes pero ku kisas ta pone algun ruman sinti nan inkómodo òf asta ta pone nan pensa riba kos inmoral. Kiko nos lo hasi? Nos ta dispuesto pa pone nos preferensianan personal un banda i mustra amor pa nos rumannan?—1 Tim. 2:9, 10.

11, 12. Kon nos lo evitá di hasi loke ta malu si nos siña odia loke Yehova ta odia i kultivá dominio propio?

¹¹ E di tres ehèmpel: Yehova ta odia inhustisia i maldat. (Rom. 1:18) Aunke Yehova sa ku nos tin e tendensia di hasi loke ta malu debí na nos imperfekshon, e ke pa nos pensa manera e ta pensa i odia maldat. (Lesa Salmo 97:10.) Si nos meditá riba e motibu pakiko Yehova ta odia maldat, lo ta mas fásil pa nos haña Yehova su punto di bista di maldat. I esaki lo yuda nos ta mas determiná pa no hasi loke ta malu.

¹² Si nos tin Yehova su punto di bista di maldat, esaki lo yuda nos identifiká e práktikanan ku ta malu, asta ora nan no ta spesífikamente menshoná den Beibel. Por ehèmpel, un forma di kondukta inmoral ku ta bira kada bes mas komun ta lap dancing. Algun hende ta rasoná ku e práktika akí no ta meskos ku hasi sèks, p’esei, nan ta pensa ku e no ta malu.a Pero ta asina Yehova ta pensa tokante e práktikanan ei? No lubidá, Yehova ta odia tur tipo di maldat. Pues, laga nos kultivá dominio propio i odia loke Yehova ta odia, pa asina nos keda leu for di tur tipo di maldat.—Rom. 12:9.

13. Dikon ta bon pa pensa di antemano riba Yehova su punto di bista di algun situashon ku nos lo por enfrentá den futuro?

¹³ Ora nos ta studia, lo ta bon pa pensa riba Yehova su punto di bista di algun situashon ku nos lo por enfrentá den futuro. Di e manera ei, si nos haña nos den un situashon kaminda nos tin ku tuma desishon lihé, lo e no kue nos for di base. (Pro. 22:3) Laga nos trata algun ehèmpel di Beibel.

14. Kiko nos por siña for di e manera ku Yosef a reakshoná ora ku Potifar su kasá a purba di sedusié?

¹⁴ Ora Potifar su kasá a purba di sedusí Yosef, mesora el a rechas’é. Esei ta mustra ku Yosef ya a meditá riba Yehova su punto di bista di fieldat den matrimonio. (Lesa Génesis 39:8, 9.) Yosef a bisa Potifar su kasá: “Kon . . . mi por hasi e maldat grandi akí i peka kontra Dios?” Esei ta mustra ku Yosef tabatin Yehova su punto di bista. Awor, kiko di nos? Kiko lo bo hasi si un kolega di trabou kuminsá flirt ku bo? Òf kiko lo bo hasi si bo haña un mensahe òf potrèt ku kontenido seksual riba bo telefòn?b E ta hopi mas fásil pa nos mantené nos integridat si ya nos a meditá riba Yehova su punto di bista i disidí kiko nos lo hasi den un situashon asina.

15. Kon nos por imitá e tres hebreonan i keda fiel na Yehova?

¹⁵ Awor, laga nos analisá e ehèmpel di e tres hebreonan konosí komo Sadrak, Mesak i Abed-nego. Ora ku Rei Nabukodonosor a ordená nan pa adorá e imágen di oro ku el a traha, nan a kontestá na un manera kla i a nenga firmemente di adorá e imágen. Esaki ta mustra ku nan a pensa adelantá kiko nan lo mester a hasi pa keda fiel na Yehova. (Éks. 20:4, 5; Dan. 3:4-6, 12, 16-18) Suponé ku bo doño di trabou ta puntra bo pa hasi un donashon pa un selebrashon ku tin di haber ku religion falsu. Kiko lo bo hasi? En bes di warda pa un situashon asina presentá, lo ta bon pa nos pensa for di awor kiko ta Yehova su punto di bista riba e asuntunan akí. I e ora ei, si un situashon asina presentá, lo ta mas fásil pa nos bisa i hasi loke ta korekto, meskos ku den kaso di e tres hebreonan.

16. Splika kon un bon komprondementu di Yehova su punto di bista por yuda nos prepará pa un emergensia médiko.

¹⁶ Ademas, meditashon di antemano riba Yehova su punto di bista por yuda nos tambe pa keda fiel na Dios ora nos tin un emergensia médiko. Nos ta determiná pa nenga transfushon di sanger kompleto òf un di su kuater komponentenan prinsipal. Pero tin algun tratamentu ku ta enbolbé sanger den kua kada kristian mester tuma su mes desishon a base di e prinsipionan di Beibel. (Echo. 15:28, 29) Ki ora ta e mihó tempu pa tuma e tipo di desishonnan akí? Ora nos ta den hospital, kisas ku yen di doló, òf bou di preshon pa disidí lihé? Klaru ku nò! Nos tin ku hasi investigashon for di awor, yena un dokumento médiko legal ku ta splika bon kla kiko ta nos deseonan, i papia ku nos dòkter.c

17-19. Pakiko ta importante pa nos siña for di awor kon Yehova ta pensa? Duna ehèmpel.

¹⁷ Finalmente, pensa riba kon lihé Hesus a kontestá Pedro ora el a duna Hesus e siguiente konseho kiboká: “Sea bondadoso ku bo mes, Señor.” Sin duda, Hesus a meditá hopi riba kiko Yehova tabata ke pa e hasi i riba e profesianan tokante su bida i morto. E konosementu akí a hasi Hesus mas determiná pa keda fiel na Yehova i pa duna su bida komo sakrifisio pa nos tur.—Lesa Mateo 16:21-23.

¹⁸ Awe, Dios su boluntat ta pa nos tin un bon amistat kuné i pa nos partisipá mas tantu posibel den e trabou di prediká. (Mat. 6:33; 28:19, 20; Sant. 4:8) Pero, meskos ku den e kaso di Pedro i Hesus, hende ku bon intenshon por purba di desanimá nos pa hasi esei. Por ehèmpel, kiko si bo doño di trabou ta ofresé bo un promoshon ku un salario hopi mas haltu pero ku lo interferí ku bo aktividatnan spiritual? Òf, si ainda bo ta bai skol, imaginá ku bo ta haña oportunidat pa bai for di kas pa haña edukashon adishonal. Lo bo warda te na e momento ei pa hasi orashon, buska informashon, papia ku bo famia òf e ansianonan pa tuma un desishon? Lo ta mihó si bo investigá kiko ta Yehova su punto di bista for di awor i hasi su manera di pensa bo manera di pensa. Asina, ora e tipo di ofertanan akí presentá, lo bo no sinti ku nan ta un tentashon. Dikon? Pasobra bo tin bo metanan spiritual kaba i bo ta determiná pa sigui nan. E úniko kos ku lo bo tin ku hasi ta kumpli ku e desishonnan ku ya bo a tuma.

¹⁹ Probablemente, bo por pensa di mas situashon inesperá ku por presentá. Klaru, nos no por prepará pa kada situashon ku por presentá. Pero, si ora nos studia, nos tuma tempu pa meditá riba Yehova su pensamentu, lo ta mas fásil pa kòrda loke nos a studia i aplik’é den kualke situashon ku presentá. Pues, ora nos ta studia, laga nos tuma tempu pa meditá riba kon Yehova ta pensa, i asina hasi Yehova su manera di pensa nos manera di pensa. Ademas, meditá riba kon Yehova su punto di bista por yuda nos tuma bon desishon awor i den futuro.

20, 21. (a) Dikon nos lo disfrutá di nos libertat den e mundu nobo? (b) Kiko nos tin ku hasi pa nos por tin goso for di awor?

²⁰ Nos ta anhelá e mundu nobo. Mayoria di nos tin e speransa di biba pa semper den Paradeis riba tera. Bou di e Reino di Dios, humanidat lo ser librá di tur doló i sufrimentu di e sistema akí. Klaru, den e mundu nobo, ainda hende lo tin boluntat liber pa tuma desishon basá riba nan preferensia- i deseonan.

²¹ Pero esei no ta nifiká ku nos libertat ta sin límite. Den e mundu nobo, ora hende humilde tin ku disidí entre bon i malu, nan lo tuma desishon a base di Yehova su lei- i pensamentunan. Esaki lo trese goso i pas abundante. (Sal. 37:11) Mientrastantu, nos por tin goso for di awor kaba si nos siña pensa manera Yehova ta pensa.