Skucha e Stèm di Yehova

1-2. (a) Kon Yehova a yega di komuniká ku hende? (b) Kiko nos lo analisá den e artíkulo akí?

YEHOVA gusta komuniká ku hende. Den pasado, el a usa profeta, angel i su Yu, Hesukristu, pa laga nos sa kiko e ta pensa. (Ámos 3:7; Gal. 3:19; Rev. 1:1) Awe, e ta papia ku nos mediante su Palabra. El a duna nos Beibel pa nos por komprondé loke e ta pensa i hasi.

² Ora Hesus tabata riba tera, Yehova a papia for di shelu na tres okashon. Laga nos analisá kiko Yehova a bisa, kiko nos por siña for di su palabranan, i kon nos por benefisiá di loke el a bisa.

 3. (a) Segun Marko 1:9-11, kiko Yehova a bisa Hesus ora el a batisá? (b) Kiko e palabranan di Yehova a konfirmá?

³ Lesa Marko 1:9-11. Esaki ta e promé biaha ku Yehova a papia for di shelu. El a bisa: “Abo ta mi Yu stimá; bo tin mi aprobashon.” Imaginá bo kon Hesus lo a sinti ora el a skucha su Tata bisa ku e ta stim’é i ku e ta konfi’é. Siguramente esei lo a konmov’é mashá! Yehova su palabranan a konfirmá tres kos importante tokante Hesus: (1) Hesus ta su Yu, (2) Yehova stima su Yu i (3) Hesus tin Yehova su aprobashon. Laga nos analisá kada un di e kosnan ei mas di aserka.

 4. Kon Yehova su relashon ku Hesus a kambia ora Hesus a batisá?

⁴ “Abo ta mi Yu stimá.” Ora Hesus tabata den shelu, komo angel, e tabata Yu di Dios. Sinembargo, na su boutismo el a ser ungí ku spiritu santu. Ku e palabranan na Marko 1:11 i e dramamentu di spiritu santu, Yehova a indiká ku su relashon ku su Yu stimá, esta Hesus, a kambia. Sí, na Hesus su boutismo, Dios a indiká ku awor Hesus a bira su Yu ungí i a haña e speransa pa bai shelu bèk pa bira e Rei i Sumo Saserdote ku Yehova a nombra pa reina den shelu. (Luk. 1:31-33; Heb. 1:8, 9; 2:17) Pues, na Hesus su boutismo, su Tata tabatin bon motibu pa bisa: “Abo ta mi Yu stimá.”—Luk. 3:22.

 5. Meskos ku Yehova, kiko nos mester hasi?

⁵ “Abo ta mi Yu stimá.” Meskos ku Yehova a ekspresá su amor i aprobashon pa Hesus, asina tambe nos mester buska oportunidat pa ekspresá nos amor i aprobashon pa otro hende. (Huan 5:20) Nos rumannan den kongregashon i nos miembronan di famia mester di amor i animashon. Nos ta floresé ora un hende ku nos ta stima ta mustra amor na nos i ta elogiá nos pa loke nos ta hasi. I ora nos elogiá otro hende, nos ta fortalesé nan fe i ta yuda nan keda leal na Yehova. Ta hopi importante pa un mayor animá su yunan. Dikon? Pasobra ora un mayor sinseramente elogiá su yunan i mustra nan ku e ta stima nan, esei lo yuda nan floresé.

 6. Dikon nos por tin konfiansa den Hesukristu?

⁶ “Bo tin mi aprobashon.” E palabranan ei ta mustra ku Yehova tabatin konfiansa ku Hesus lo a hasi Yehova su boluntat fielmente. Si Yehova tabatin e konfiansa ei den su Yu, nos tambe por konfia ku Hesus lo kumpli ku tur Yehova su promesanan. (2 Kor. 1:20) Si nos pensa kon Hesus a kumpli fielmente ku Yehova su boluntat, nos lo ta mas determiná pa siña for di dje i sigui su ehèmpel. Meskos ku Yehova tabatin konfiansa den Hesus, e tin konfiansa tambe ku su sirbidónan, komo grupo, lo sigui siña for di su Yu.—1 Ped. 2:21.

 7. Segun Mateo 17:1-5, ki ora Yehova a papia for di shelu pa di dos biaha, i kiko el a bisa?

⁷ Lesa Mateo 17:1-5. E di dos biaha ku Yehova a papia for di shelu tabata ora Hesus “su aparensia a kambia.” Hesus a invitá Pedro, Santiago i Huan pa bai huntu kuné riba un seru haltu. Miéntras nan tabata einan, nan a mira un vishon remarkabel. Hesus su kara tabata bria manera solo i su paña a bira briante manera lus. Dos persona, ku a representá Moises i Elías, a kuminsá papia ku Hesus tokante su morto i resurekshon. E tres apòstelnan “tabata mitar na soño,” pero ora nan a lanta kompletamente, nan a mira e vishon remarkabel ei. (Luk. 9:29-32) Despues, un nubia briante a tapa nan, i nan a tende un stèm for di e nubia—Dios su stèm! Yehova a ekspresá su amor i aprobashon pa su Yu meskos ku el a hasi na su boutismo. El a bisa: “Esaki ta mi Yu stimá, esun ku tin mi aprobashon.” Pero e biaha akí Yehova a agregá: “Skuch’é.”

 8. Kon e vishon a yuda Hesus i su disipelnan?

⁸ E vishon ei a duna un bista adelantá di e poder i gloria ku Hesus lo tin komo Rei di e Reino di Dios. Sin duda, e vishon ei a animá Hesus i a fortales’é pa e por a enfrentá e sufrimentu i morto kruel ku tabata sper’é. Ademas, e vishon ei a duna e disipelnan mas fe. Esei a prepará nan pa e pruebanan ku nan lo a enfrentá i e trabou duru ku nan lo mester a hasi. Un 30 aña despues, ainda apòstel Pedro a referí na e vishon ei, mustrando asina ku e vishon tabata bibu den su mente.—2 Ped. 1:16-18.

 9. Ki konseho práktiko Hesus a duna su disipelnan?

⁹ “Skuch’é.” Yehova a laga nos komprondé klaramente ku e ke pa nos skucha i obedesé e palabranan di su Yu. Tempu ku Hesus tabata riba tera, el a bisa hopi kos ku ta bale la pena pa nos skucha! Por ehèmpel, el a siña su disipelnan kon pa prediká e bon notisia, i bes tras bes el a rekordá nan pa keda vigilá. (Mat. 24:42; 28:19, 20) El a urgi nan pa hasi esfuerso vigoroso, i el a animá nan pa no entregá. (Luk. 13:24) Ademas, Hesus a enfatisá e nesesidat pa su disipelnan stima otro, keda uní i kumpli ku su mandamentunan. (Huan 15:10, 12, 13) E konsehonan ku Hesus a duna su disipelnan tabata hopi práktiko! E konsehonan ei ta mes importante awe ku tempu Hesus a duna nan.

10-11. Kon nos ta demostrá ku nos ta skucha Hesus?

¹⁰ Hesus a bisa: “Tur hende ku ta na banda di e bèrdat ta skucha mi stèm.” (Huan 18:37) Nos ta demostrá ku nos ta skucha su stèm ora nos ta “sigui soportá otro i pordoná otro libremente.” (Kol. 3:13; Luk. 17:3, 4) Un otro manera ku nos ta demostrá ku nos ta skucha su stèm ta di sigui prediká e bon notisia ku entusiasmo “den tempu faborabel i den tempu difísil.”—2 Tim. 4:2.

¹¹ Hesus a bisa: “Mi karnénan ta skucha mi stèm.” (Huan 10:27) Komo Hesus su karnénan nos ta demostrá ku nos ta skucha su stèm no solamente ora nos presta atenshon na loke e ta bisa, pero ora nos apliká esei tambe. Nos no ta laga “e inkietutnan di bida” distraí nos. (Luk. 21:34) Mas bien, loke ta importante pa nos ta pa obedesé Hesus su mandamentunan, asta ora ku ta difísil pa hasi esei. Hopi di nos rumannan ta perseverá apesar di pruebanan difísil, inkluso oposishon, pobresa ekstremo i desaster natural. Asina mes, nan ta keda fiel na Yehova, kueste loke kueste. Hesus ta sigurá nan: “Esun ku aseptá mi mandamentunan i kumpli ku nan ta esun ku stima mi. I esun ku stima mi, mi Tata lo stim’é.”—Huan 14:21.

12. Menshoná un otro manera ku nos por demostrá ku nos ta skucha Hesus.

¹² Un otro manera ku nos por demostrá ku nos ta skucha Hesus ta di kooperá ku e rumannan ku Hesus a nombrá pa dirigí nos. (Heb. 13:7, 17) Den e último añanan, e organisashon di Yehova a hasi hopi kambio. Nos a haña hèrmènt i método nobo pa usa den sirbishi i nos reunion di den siman a kambia. Ademas, nos manera di konstruí, renobá i mantené nos Salònnan di Reino tambe a kambia. E guia ku nos ta haña for di Yehova su organisashon ta hopi amoroso i ta pa nos mes benefisio. Nos ta sumamente gradisidu pa esei! Nos por tin sigur ku Yehova lo bendishoná nos esfuerso pa sigui e instrukshonnan di Yehova su organisashon.

13. Kon nos ta benefisiá si nos skucha Hesus?

¹³ Nos ta benefisiá hopi si nos skucha tur Hesus su siñansanan. Hesus a sigurá su disipelnan ku su siñansanan lo refreská nan. El a bisa: “Boso alma lo keda refreská. Pasobra mi yugo ta suave, i mi karga no ta pisá.” (Mat. 11:28-30) Dios su Palabra, ku ta inkluí e kuater Evangelionan (òf relatonan di Hesus su bida i sirbishi), ta refreská nos spiritualmente i ta hasi nos sabí. (Sal. 19:7; 23:3) Hesus a bisa: “Felis ta esnan ku ta tende e palabra di Dios i ta kumpli kuné!”—Luk. 11:28.

14-15. (a) Segun Huan 12:27 i 28, ki ora Yehova a papia pa di tres biaha for di shelu? (b) Dikon Yehova su palabranan a duna Hesus konfiansa?

¹⁴ Lesa Huan 12:27, 28. Den e Evangelio di Huan nos ta haña e di tres biaha ku Yehova a papia for di shelu. Algun dia promé ku Hesus su morto, e tabata na Herúsalèm pa selebrá su último Pasku Hudiu. El a bisa: “Mi alma ta intrankil.” Despues, Hesus a pidi Yehova den orashon: “Tata, glorifiká bo nòmber.” Na e momento ei, su tata a kontest’é: “Mi a glorifik’é, i lo mi bolbe glorifik’é.”

¹⁵ Hesus tabata konsiente di e responsabilidat grandi ku e tabatin pa keda fiel na Yehova. Esei a preokup’é. E tabata sa ku lo el a sufri, haña un halá di sota i despues muri na un manera hopi kruel. (Mat. 26:38) Loke tabata mas importante pa Hesus tabata pa glorifiká su Tata su nòmber. Nan a akusá Hesus di blasfemia i e tabata preokupá ku su morto lo a trese reproche riba Dios su nòmber. Sin duda Yehova su palabranan a duna Hesus konfiansa! Dikon? Pasobra nan a sigurá Hesus ku e nòmber di su Tata lo ser glorifiká. Esei a trankilisá Hesus i a fortales’é pa por a enfrentá e sufrimentu ku lo e mester a soportá! Kisas ta Hesus so a komprondé loke su Tata a bisa na e momento ei. Asina mes, Yehova a hasi sigur ku e palabranan ei ta registrá den Beibel pa nos tur.—Huan 12:29, 30.

16. Dikon tin biaha nos por preokupá ora hende trese reproche riba Yehova su nòmber?

¹⁶ Meskos ku Hesus, kisas nos tambe ta preokupá ora hende trese reproche riba Yehova su nòmber. Podisé nos tambe ta ser tratá na un manera inhustu. Òf kisas nos ta preokupá pa e mentiranan ku nos opositornan ta plama tokante nos. Nos por pensa ku e mentiranan ei lo trese reproche riba Yehova su nòmber i organisashon. Na e momentonan ei, Yehova su palabranan na Huan 12:27 i 28 por konsolá nos tambe. Nos no mester ta demasiado preokupá. Nos por tin sigur ku “e pas di Dios ku ta surpasá tur komprondementu lo protehá [nos] kurason i [nos] mente pa medio di Kristu Hesus.” (Flp. 4:6, 7) Semper Yehova lo glorifiká su nòmber. Mediante e Reino, Yehova lo trese alivio pa su fiel sirbidónan. Sí, lo e eliminá kualke daño ku Satanas i e mundu akí a kousa.—Sal. 94:22, 23; Isa. 65:17.

17. Segun Isaías 30:21, kon Yehova ta papia ku nos awe?

¹⁷ Ainda Yehova ta papia ku nos awe. (Lesa Isaías 30:21.) Ta bèrdat ku nos no ta skucha Yehova su stèm for di shelu. Pero, el a duna nos instrukshon mediante su Palabra skirbí, Beibel. Ademas, Yehova su spiritu santu ta motivá “e mayordomo fiel” pa sigui duna Su sirbidónan kuminda spiritual den forma imprimí, elektróniko, di oudio i di vidio. (Luk. 12:42) Esta un abundansia di kuminda spiritual!

18. Kon Yehova su Palabra por yuda nos?

¹⁸ Laga nos semper kòrda loke Yehova a bisa su Yu ora e tabata riba tera! Siguramente Yehova su palabranan den Beibel ta duna nos konfiansa ku Yehova tin tur kos bou di kontrol i ku lo e eliminá kualke daño ku Satanas i e mundu akí a kousa. Ademas, laga nos ta determiná pa skucha Yehova su stèm. Si nos hasi esei, nos lo perseverá sin importá e problemanan ku nos ta enfrentá awor i esnan ku nos lo enfrentá den futuro. Beibel ta bisa: “Boso tin mester di perseveransia, ya asina despues ku boso a hasi e boluntat di Dios, boso por risibí kumplimentu di e promesa.”​—Heb. 10:36.