Adorá Yehova So

 1. Dikon Yehova meresé pa nos adorá e so?

YEHOVA ta nos Kreador i Dunador di Bida. P’esei, e meresé pa nos adorá e so. (Rev. 4:11) Pero, tin un peliger. Aunke nos ta stima i ta respetá Yehova, tin kos ku por bira asina importante den nos bida ku nan ta stroba nos di adorá Yehova so. Pero, kon algu asina por pasa? Promé, laga nos wak kiko ta nifiká adorá Yehova so.

 2. Segun Éksodo 34:14, kiko nos mester hasi?

² Yehova “ta un Dios yalurs,” esta, e ta eksigí deboshon eksklusivo. Pues, e ta ferwagt ku nos ta adorá e so. Den Beibel, deboshon na Dios ta konektá ku amor profundo pa Dios. Si nos ta adorá Yehova so, nos lo no laga nada ni niun hende tuma su lugá den nos kurason.—Lesa Éksodo 34:14.

 3. Dikon nos tin bon motibu pa stima Yehova?

³ Nos tin bon motibu pa stima Yehova. Nos amor pa Yehova ta basá riba tur loke nos a siña tokante dje. Nos konosé Yehova i ta atmirá su bunita kualidatnan. Nos sa loke e ta gusta i loke e ta odia, i nos ta pensa meskos kuné. Nos ta komprondé ku Yehova ke pa nos sirbié felismente i pa semper. P’esei, nos ta biba na armonia ku su normanan. Nos ta sinti nos privilegiá ku e ta permití nos tin un amistat será kuné. (Sal. 25:14) Kada detaye ku nos ta siña tokante nos Kreador ta hala nos mas serka di dje.—Sant. 4:8.

 4. (a) Kiko Diabel ta usa pa stroba nos di stima Yehova so? (b) Kiko nos lo analisá den e artíkulo akí?

⁴ Diabel tin mundu bou di su kontrol. E ta usa mundu pa manipulá nos deseonan natural i nos debilidatnan. (Efe. 2:1-3; 1 Huan 5:19) Su meta ta pa parti nos kurason na dos. Si nos kurason ta dividí, nos lo no stima Yehova so. Den e artíkulo akí, nos lo analisá dos manera ku Diabel ta hasi esei. Promé, e ta purba di motivá nos pa stima plaka. Di dos, e ta purba di pone nos skohe mal entretenimentu.

 5. Dikon nos mester tene kuidou pa nos no kuminsá stima plaka?

⁵ Ta normal ku nos ke tin sufisiente kuminda, paña i un lugá agradabel pa biba. Pero, nos mester tene kuidou pa nos no kuminsá stima plaka. Hopi hende ku ta forma parti di e mundu di Satanas ta “stima plaka” i e kosnan ku plaka por kumpra. (2 Tim. 3:2) Hesus tabata sa ku su sirbidónan por a kuminsá stima plaka. P’esei, el a bisa: “Ningun hende no por ta esklabo di dos doño, pasobra sea lo e odia esun i stima e otro òf lo e pega na esun i despresiá e otro. Boso no por ta esklabo di Dios i di Rikesa.” (Mat. 6:24) Un hende ku ta adorá Yehova i ku na mes momento ta gasta hopi tempu i energia purbando di bira riku, den un sentido, ta purbando di sirbi dos doño. Pues, lo e no ta adorando Yehova so.

 6. Kiko nos ta siña for di Hesus su palabranan na e kongregashon di Laodisea?

⁶ E kristiannan den e kongregashon di Laodisea tabata broma: “Mi ta riku, mi a akumulá rikesa i mi no tin mester di nada nada.” Pero, den bista di Yehova i Hesus, nan tabata “infelis, den kondishon deplorabel, pober, siegu i sunú.” Hesus a konsehá nan, no pasobra nan tabata riku, sino pasobra nan a stima plaka. E amor ei tabata daña nan amistat ku Yehova. (Rev. 3:14-17) Awor, kiko nos mester hasi si nos a ripará ku nos a kuminsá stima plaka? Nos mester korigí nos pensamentu mesora. (1 Tim. 6:7, 8) Si nos no hasi esei, nos kurason lo bira dividí i Yehova lo no aseptá nos adorashon. Yehova ta “un Dios yalurs,” esta, e ke pa nos adorá e so. (Deu. 4:24) Pero, kon plaka por bira demasiado importante den nos bida?

7-9. Kiko bo ta siña for di e eksperensia di un ansiano ku yama David?

⁷ Wak e ehèmpel di David, un ansiano ku ta biba na Merka. El a bisa ku e tabata un trahadó responsabel. E kompania ku e tabata traha p’e a subié di puesto i a subi su salario. El a asta haña rekonosementu komo un di e mihó profeshonalnan di e pais. David a bisa: “E tempu ei, mi a pensa ku tur esei tabata bendishon di Yehova.” Pero, esei tabata bèrdat?

⁸ Tiki tiki David a kuminsá mira ku su trabou tabata daña su amistat ku Yehova. El a bisa: “Ora mi tabata na reunion i asta den sirbishi, mi tabata pensa tur ora riba problema di trabou. Mi tabata gana hopi plaka, pero kada bes mi tabata haña mas strès i mi matrimonio tabata sufri.”

⁹ David a realisá ku e mester a reevaluá su prioridatnan. El a bisa: “Mi a pone pia abou pa drecha mi situashon.” E kier a kambia su skèdjel di trabou i a proponé esei na su doño di trabou. Kiko tabata e resultado? David a pèrdè su trabou! Kiko el a hasi? El a bisa: “E siguiente dia mes mi a apliká pa pionero ousiliar riba base regular.” Ku tempu, David a bira pionero regular, i despues su kasá a djòin e. Pa nan sostené nan mes, nan a kuminsá hasi trabou di limpiesa. Esei ta un trabou ku hopi hende ta despresiá, pero esei no ta loke ta mas importante pa nan. Aunke nan entrada a baha ku 90 porshento kompará ku loke nan tabata gana promé, tur luna nan tin nèt loke nan mester pa kubri nan gastunan. Nan ke pone Yehova promé ku tur kos, i nan ta eksperensiá ku e ta perkurá pa su sirbidónan ku ta pone e Reino na promé lugá.—Mat. 6:31-33.

10. Kon nos por protehá nos kurason?

¹⁰ Sin importá si nos tin hopi òf tiki plaka, nos mester protehá nos kurason. Kon nos por hasi esei? No kuminsá stima rikesa. I no permití bo trabou bira mas importante ku bo sirbishi na Yehova. Kon bo por sa si esei ta pasando ku bo? Hasi bo mes e siguiente preguntanan: ‘Mi ta pensa hopi riba mi trabou ora mi ta na reunion òf den sirbishi? Mi ta preokupá demasiado pa spar plaka pa futuro? Mi ta laga plaka òf kos material kousa problema den mi matrimonio? Lo mi ta dispuesto pa traha un trabou ku otro hende ta despresiá pa asina mi por dediká mas tempu sirbiendo Yehova?’ (1 Tim. 6:9-12) Ora nos pensa riba e preguntanan ei, kòrda ku Yehova ta stima nos masha hopi. E ta hasi e siguiente promesa na hende ku ta adorá e so: “Hamas lo mi bandoná bo, i hamas lo mi laga bo desampará.” P’esei, apòstel Pablo a skirbi: “Laga boso manera di biba ta liber di amor pa plaka.”—Heb. 13:5, 6.

11. Kiko entretenimentu por hasi ku hende?

¹¹ Yehova ke pa nos disfrutá di bida, i entretenimentu por yuda nos ku esei. Beibel ta bisa ku “no tin nada mihó pa un hende ku kome i bebe i bisa su mes ku su trabou ta bon.” (Ekl. 2:24) Pero, mayoria di entretenimentu ku mundu ta ofresé no ta bon pa nos. Nan ta baha e normanan moral di hende i ta motivá nan pa tolerá òf asta gusta kos ku Beibel ta kondená.

12. Segun 1 Korintionan 10:21 i 22, dikon nos mester paga bon tinu ki entretenimentu nos ta skohe?

¹² Nos ke adorá Yehova so. P’esei, nos no por ta kome na “e mesa di Yehova” i na “e mesa di demoño.” (Lesa 1 Korintionan 10:21, 22.) Kome ku un persona generalmente ta un indikashon di amistat. Si nos skohe entretenimentu ku ta promové violensia, spiritismo, inmoralidat òf otro deseo i komportashon karnal, bon mirá, nos ta sintá na mesa ku e enemigunan di Dios i ta kome loke nan a prepará. Komo resultado, nos ta hasi nos mes daño i nos ta daña nos amistat ku Yehova.

13-14. (a) Den ki sentido nos por kompará entretenimentu ku kuminda? (b) Segun Santiago 1:14 i 15, dikon nos mester paga bon tinu ki entretenimentu nos ta skohe?

¹³ Den ki sentido nos por kompará entretenimentu ku kuminda? Ora nos ta kome, nos por skohe kiko nos ta hinka den nos boka. Pero, despues ku nos guli e kuminda, e partinan nutritivo di dje outomátikamente ta bira parti di nos kurpa. Bon kuminda lo hasi nos mas salú; kuminda insaludabel lo hasi nos malu. Kisas no ta mesora nos ta mira e efektonan, pero ku tempu nan lo bira bisto.

¹⁴ Meskos ta pasa ora nos skohe nos entretenimentu. Nos por skohe kiko nos ta hinka den nos mente. Pero, loke ta sosodé despues den nos mente i kurason ta un proseso outomátiko; nos no tin kontrol riba esei. Bon entretenimentu lo refreská nos; entretenimentu insaludabel lo hasi nos daño. (Lesa Santiago 1:14, 15.) Kisas no ta mesora nos ta mira e efektonan di entretenimentu insaludabel, pero ku tempu nan lo bira bisto. P’esei, Beibel ta spièrta nos: “No gaña boso mes: Dios no ta laga hende hasi bofon di dje. Pues, kiko ku un hende sembra, esei lo e kosechá tambe; pasobra esun ku ta sembra ku bista riba su kurpa pekaminoso lo kosechá pèrdishon for di su kurpa pekaminoso.” (Gal. 6:7, 8) Ta masha importante pa nos keda leu for di tur entretenimentu ku ta promové e kosnan ku Yehova ta odia!—Sal. 97:10.

15. Ki regalo Yehova a duna nos?

¹⁵ Hopi sirbidó di Yehova ta gusta wak JW Broadcasting^®, nos kanal di televishon via Internet. Un ruman ku yama Marilyn a bisa: “E kanal ei a yuda mi bira mas positivo, i mi por wak tur kos pasobra nan ta bon pa mi. Ora mi ta sinti mi so òf desanimá, mi ta wak un diskurso òf un programa di Adorashon di Mainta i esei ta animá mi. Mi ta sinti mi mas serka di Yehova i su organisashon. JW Broadcasting a kambia mi bida kompletamente.” Aparte di e programanan mensual, JW Broadcasting tin vários vidio, oudio i kantika animante ku bo por wak i skucha ki ora ku bo ke. Abo ta hasi uso di Yehova su regalo?

16-17. Dikon nos mester paga bon tinu na e kantidat di tempu ku nos ta dediká na entretenimentu, i kon nos por hasi esei?

¹⁶ Nos mester paga bon tinu no solamente na e tipo di entretenimentu ku nos ta skohe, pero tambe na e kantidat di tempu ku nos ta dediká na dje. Si nos no hasi esei, nos por pasa mas tempu ta entretené nos mes ku sirbi Yehova. Hopi ruman ta haña ku ta difísil pa kontrolá e kantidat di tempu ku nan ta dediká na entretenimentu. Abigail, un ruman di 18 aña, a bisa: “Wakmentu di televishon ta yuda mi relahá despues di un dia drùk. Pero, si mi no paga bon tinu, mi por pasa hopi ora ta wak televishon.” Un hóben ku yama Samuel a bisa: “Tin biaha mi ta wak hopi vidio kòrtiku riba Internet. Mi ta kuminsá ku unu, i promé ku mi realisá, tres òf kuater ora a pasa.”

¹⁷ Kiko bo por hasi pa kontrolá e kantidat di tempu ku bo ta dediká na entretenimentu? E promé kos ta di haña sa kuantu tempu realmente bo ta dediká na dje. Pa un siman largu, skirbi riba un kalènder kuantu ora bo ta pasa ta wak televishon, wak kos riba Internet, hunga wega riba telefòn òf tablet i bai fiesta. Si bo ripará ku bo ta dediká demasiado tempu na e kosnan ei, purba di traha un skèdjel. Plania pa hasi e kosnan di mas importante promé i skohe un kantidat di tempu pa entretenimentu. Despues, pidi Yehova yuda bo pega na bo skèdjel. Di e manera ei, lo bo tin mas tempu i energia pa estudio personal, adorashon komo famia, reunion di kongregashon i sirbishi. Ademas, lo bo disfrutá mas di e tempu ku bo ta dediká na entretenimentu pasobra bo a pone Yehova promé.

18-19. Kon nos por demostrá ku nos ta adorá Yehova so?

¹⁸ Despues ku apòstel Pedro a skirbi tokante e fin di Satanas su mundu i tokante e mundu nobo ku ta na kaminda, el a bisa: “Mi rumannan stimá, komo ku boso ta spera riba e kosnan akí, hasi tur boso esfuerso pa Dios haña boso finalmente sin mancha, sin defekto i na pas.” (2 Ped. 3:14) Esei ta nifiká ku nos mester hasi nos esfuerso pa keda limpi den sentido spiritual i moral. Asina nos ta demostrá ku nos ta adorá Yehova so.

¹⁹ Satanas i su mundu lo sigui purba di hasi tur loke nan por pa konvensé nos pa kambia nos prioridatnan. (Luk. 4:13) Pero, aunke nos ta haña nos ku difikultat, nos lo no laga nada ni niun hende tuma Yehova su lugá den nos kurason. Nos ta determiná pa sigui adorá Yehova so!