“Ora Mi Ta Débil, e Ora ei Mi Ta Poderoso”

 1. Kiko Apòstel Pablo a rekonosé?

APÒSTEL Pablo a rekonosé ku tabatin biaha ku el a sintié débil. El a atmití ku su kurpa tabata “kaba na nada,” ku e mester a lucha pa hasi loke ta korekto i ku no ta semper Yehova a kontestá su orashonnan manera el a spera. (2 Kor. 4:16; 12:7-9; Rom. 7:21-23) El a rekonosé tambe ku den bista di su enemigunan e tabata débil.b Pero, e no a laga loke otro hende tabata pensa di dje ni su mes debilidatnan pon’é sinti ku e no ta sirbi pa nada.—2 Kor. 10:10-12, 17, 18.

 2. Di akuerdo ku 2 Korintionan 12:9 i 10, ki lès importante Pablo a siña?

² Pablo a siña un lès masha importante: Un hende por sinti ku e ta débil, ma en realidat e ta masha fuerte. (Lesa 2 Korintionan 12:9, 10.) Yehova a bisa Pablo: “Mi poder ta bira kompleto pa bo ora bo ta débil.” Yehova tabata ke men ku lo el a duna Pablo e forsa ku e tabatin mester. Promé, laga nos wak dikon nos no mester preokupá mashá ora nos enemigunan insultá nos.

 3. Dikon nos por tin plaser den insulto?

³ Niun hende no gusta pa otro hende insult’é. Pero, si nos preokupá demasiado ora nos enemigunan insultá nos, nos por desanimá. (Pro. 24:10) Kon anto nos mester mira nan insultonan? Meskos ku Pablo, nos por “tin plaser den . . . insulto.” (2 Kor. 12:10) Dikon? Pasobra insulto i oposishon ta mustra ku nos ta berdadero disipel di Hesus. (1 Ped. 4:14) Hesus a bisa ku su siguidónan lo ser persiguí. (Huan 15:18-20) Anto esei ta loke a pasa ku e kristiannan di promé siglo. Por ehèmpel, hende ku a ser influensiá pa kultura griego a mira e kristiannan komo débil i bobo. Anto pa e hudiunan nan tabata “hende gewon ku no tabatin muchu edukashon,” meskos ku e apòstelnan Pedro i Huan. (Echo. 4:13) Hopi hende a pensa ku e kristiannan tabata débil debí ku nan no tabata mete den polítika ni no a forma parti di un ehérsito, i hende den komunidat no a respetá nan.

 4. Kon e kristiannan di promé siglo a reakshoná riba e opinion negativo di nan enemigunan?

⁴ E kristiannan di promé siglo no a permití e opinion negativo di nan enemigunan stòp nan di sigui Kristu i di prediká. Por ehèmpel, pa e apòstelnan Pedro i Huan tabata un onor pa ser persiguí debí ku nan tabata siguidó di Hesus i tabata siña otro hende tokante dje. (Echo. 4:18-21; 5:27-29, 40-42) E kristiannan di promé siglo no tabatin motibu pa sinti bèrgwensa. Al fin i al kabo, e disipelnan humilde ei a hasi mas pa humanidat ku kualke un di nan enemigunan. Por ehèmpel, e bukinan di Beibel ku algun di nan a skirbi te ainda ta duna yudansa i speransa na miónes di hende. Anto e Reino ku nan a prediká tokante dje awor ta goberná den shelu i pronto lo goberná riba henter humanidat. (Mat. 24:14) Pero, e gobièrnu poderoso di antiguo Roma ku a persiguí e kristiannan ya no ta eksistí pa hopi aña. Ademas, e kristiannan leal ei awor ta rei den shelu siendo ku nan enemigunan ta morto; i si akaso nan resusitá mes, nan lo ser goberná pa e Reino ku e kristiannan ku nan a odia a prediká tokante dje.—Rev. 5:10.

 5. Di akuerdo ku Huan 15:19, dikon tin hende ta menospresiá nos?

⁵ Awendia tambe tin hende ku ta menospresiá nos, ta chèrcha nos debí ku nan ta pensa ku nos ta débil i bobo. Dikon? Pasobra nos no tin e mesun aktitut ku e hendenan rònt di nos. Mundu ta elogiá hende orguyoso, arogante i rebelde. Ma, nos ta hasi esfuerso pa nos ta humilde i obedesidu. Ademas, nos no ta mete den polítika ni ta drenta servisio militar di ningun pais. Komo ku nos no ta pas den e malchi di mundu, nan ta konsiderá ku nos no ta bal nada.—Lesa Huan 15:19; Rom. 12:2.

 6. Kiko Yehova ta logrando mediante nos?

⁶ Sin importá loke mundu ta pensa di nos, Yehova ta usando nos pa logra kos inkreibel. Por ehèmpel, e ta usa nos pa hasi e trabou di prediká di mas grandi den henter historia humano. Nos ta produsí e revistanan mas tradusí i distribuí den mundu i ta usa Beibel pa yuda miónes di hende mehorá nan bida. Yehova ta hasi tur esei posibel. E ta usa un grupo di hende ku ta parse di ta débil pa logra e obranan impreshonante ei. Pero kiko di kada un di nos? Yehova por yuda nos ta fuerte? Si ta asina, kiko nos mester hasi pa haña su yudansa? Laga nos analisá tres kos ku nos por siña for di e ehèmpel di Apòstel Pablo.

 7. Kiko ta un lès ku nos ta siña for di Pablo?

⁷ Un lès ku nos ta siña for di Pablo ta esaki: No konfia den bo mes forsa òf abilidat i kapasidat ora bo ta sirbi Yehova. For di punto di bista humano, Pablo tabatin motibu pa e ta orguyoso i pa konfia den su mes. El a lanta na Társis, e stat kapital di Silisia, un provinsia romano próspero ku tabatin un universidat famoso. Pablo a haña su bon edukashon serka Gamaliel, un di e lidernan hudiu di mas respetá di su tempu. (Echo. 5:34; 22:3) Anto Pablo tabatin sierto influensia den komunidat hudiu. El a bisa: “Mi a hasi mas progreso den hudaismo ku hopi hende di mi nashon ku tabata di mi edat.” (Gal. 1:13, 14; Echo. 26:4) Pero Pablo no a konfia den su mes.

 8. Di akuerdo ku Filipensenan 3:8, kiko Pablo a pensa di e kosnan ku el a laga atras, i dikon el a bisa ku e tabatin “plaser den debilidat”?

⁸ Pablo tabata kontentu pa laga atras tur e kosnan ku a lag’é parse di ta importante den bista di mundu. De echo, el a realisá ku e kosnan ku e tabatin ei en realidat tabata “kos di benta afó.” (Lesa Filipensenan 3:8.) Pablo a hañ’é ku hopi difikultat debí ku el a bira siguidó di Kristu. Su mes nashon a odi’é. (Echo. 23:12-14) Anto e romanonan, kende tabata su kosiudadanonan, a dun’é un halá di sota i tir’é den prizòn. (Echo. 16:19-24, 37) Ademas, e echo ku el a bira konsiente di su limitashonnan a hasié hopi doló. (Rom. 7:21-25) Pero nunka el a permití su enemigunan òf su debilidatnan stòp e di sigui Kristu. Mas bien, el a bisa: “Mi tin plaser den debilidat.” Dikon? Pasobra ora e tabata débil, el a mira kon e poder di Dios tabata yud’é.—2 Kor. 4:7; 12:10.

 9. Kon nos mester mira algu ku ta parse di ta un desbentaha?

⁹ Si nos ke pa Yehova duna nos su poder, nos no mester pensa ku bon salú, bon edukashon, kultura i rikesa ta determiná nos balor. E kosnan ei no ta loke ta hasi nos útil pa Yehova. De echo, no ta hopi di Yehova su sirbidónan ta ‘sabí for di punto di bista humano, ni poderoso ni di nasementu noble.’ Mas bien, Yehova a skohe pa usa “loke mundu ta konsiderá débil.” (1 Kor. 1:26, 27) Pues, no mira algu ku por parse di ta un desbentaha komo un opstákulo pa sirbi Dios, sino mir’é komo un oportunidat pa mira kon Yehova ta yuda bo ku su poder. Por ehèmpel, si un hende ta purba di pone bo duda den bo kreensianan i bo ta sinti bo intimidá, resa na Yehova pidié duna bo kurashi pa defendé bo fe. (Efe. 6:19, 20) Òf, si bo ta lucha ku kualke malesa króniko, pidi Yehova duna bo e forsa ku bo mester pa bo keda mas okupá posibel den su sirbishi. Kada bes ku bo mira ku Yehova ta yuda bo, bo fe ta krese i bo ta bira mas fuerte.

10. Dikon nos mester studia ehèmpel di sirbidó fiel di Yehova, manera esnan menshoná na Hebreonan 11:32-34?

¹⁰ Pablo tabatin kustumber di studia Skritura. El a siña hopi kos, inkluso hopi lès for di ehèmpel di sirbidó fiel di Yehova ku el a lesa tokante dje. Den Pablo su karta na e kristiannan hebreo, el a animá nan pa pensa riba e ehèmpelnan ei. (Lesa Hebreonan 11:32-34.) Laga nos wak un di nan, Rei David. E mester a trata ku oposishon di su enemigunan i di algun hende ku un tempu tabata su amigu. Segun ku nos ta analisá e ehèmpel di David, nos lo mira kon Pablo a haña forsa debí ku el a meditá riba David su bida, i kon nos por imitá Pablo.

11. Dikon David a parse di ta débil? (Wak e plachi riba portada.)

¹¹ Den bista di e guerero poderoso, Goliat, David a parse di ta asina débil ku “el a menospresi’é.” Kon ku bai bini, Goliat tabata mas grandi, mas mihó ekipá i mas mihó entrená pa guera. David a parse di ta débil pasobra e tabata un hóben, no un sòldá entrená. Pero en realidat e tabata fuerte. El a konfia den Yehova, i Yehova a dun’é e poder p’e derota Goliat.—1 Sam. 17:41-45, 50.

12. Ki otro difikultat David mester a trata kuné?

¹² David mester a trata ku un otro difikultat ku por a lag’é sintié débil. Fielmente David a sirbi Rei Saul, esun ku Yehova a apuntá komo rei di Israel. Na promé instante, Saul a respetá David. Pero, ku tempu orguyo a pone Saul bira yalurs riba David. Saul a trata David malu i a asta purba di mat’é.—1 Sam. 18:6-9, 29; 19:9-11.

13. Kiko David a hasi ora Rei Saul a trat’é na un manera inhustu?

¹³ Aunke Rei Saul a trata David na un manera inhustu, David a keda mustra rèspèt na e rei ku Yehova a apuntá. (1 Sam. 24:6) David no a kulpa Yehova tampoko pa e kosnan malu ku Saul a hasi. Al kontrario, David a konfia ku Yehova lo a dun’é e forsa ku e tabatin mester pa soportá e prueba difísil ei.—Sal. 18:1 i introdukshon.

14. Ki situashon similar na esun di David Apòstel Pablo mester a enfrentá?

¹⁴ Apòstel Pablo a enfrentá un situashon similar na esun di David. Pablo su enemigunan tabata muchu mas poderoso kuné. Hopi lider religioso i polítiko di su tempu a odi’é, i hopi biaha nan a sut’é i tir’é den prizòn. Ademas, meskos ku David, hende ku mester tabata su amigu a trat’é malu. Algun kristian den kongregashon asta a opon’é. (2 Kor. 12:11; Flp. 3:18) Pero, Pablo nunka a laga su enemigunan vens’é. El a sigui prediká apesar di oposishon. El a sigui stima su rumannan asta ora nan a desapunt’é. Anto mas importante ainda, el a keda fiel na Dios te na fin di su bida. (2 Tim. 4:8) E por a hasi tur esei, no pasobra el a konfia den su mes forsa, sino pasobra el a konfia den Yehova.

15. Kiko ta nos meta, i kon nos por logr’é?

¹⁵ Abo tin ku soportá insulto òf persekushon di kompañero di skol, kolega di trabou òf miembro di famia ku no ta Testigu? Un ruman den kongregashon a yega di trata bo malu? Si ta asina, kòrda riba e ehèmpelnan di David i Pablo. Bo por “sigui vense malu ku bon.” (Rom. 12:21) Klaru ku bo meta no ta pa dal hende ku piedra den nan frenta manera David a hasi, sino pa usa Palabra di Dios pa yega na mente i kurason di hende ku ke skucha. Anto, bo por logra esei si bo konfia den Beibel pa kontestá pregunta di hende, si bo ta respetuoso i amabel ku hende ku a trata bo malu i si bo hasi bon na tur hende, inkluso bo enemigunan.—Mat. 5:44; 1 Ped. 3:15-17.

16-17. Kiko Pablo no a lubidá nunka mas?

¹⁶ Promé ku Apòstel Pablo a bira disipel di Kristu, e tabata konosí komo Saulo; un yònkuman arogante i ònbeskòp kende a persiguí e siguidónan di Hesus. (Echo. 7:58; 1 Tim. 1:13) Pero Hesus mes a papia kuné for di shelu, a hasié siegu i a stòp e di terorisá e kongregashon kristian. Pa Pablo rekobrá su bista, e mester a buska yudansa di e mesun hendenan ku el a persiguí. E tabata humilde i a aseptá yudansa di un disipel ku yama Ananías, kende a restorá su bista.—Echo. 9:3-9, 17, 18.

¹⁷ Poko despues, Pablo a bira un miembro importante di e kongregashon kristian, pero nunka mas el a lubidá e lès ku Hesus a siñ’é ora el a papia kuné for di shelu. Pablo a keda humilde, i tabata dispuesto pa aseptá yudansa di su rumannan. El a rekonosé ku nan tabata “un yudansa i fortalesa” p’e.—Kol. 4:10, 11, nota.

18. Dikon kisas ta difísil pa nos aseptá yudansa di otro ruman?

¹⁸ Kiko nos por siña for di Pablo? Ora nos a kuminsá studia Beibel, kisas nos tabata ke pa otro hende yuda nos, pasobra nos a komprondé ku nos tabata mucha den sentido spiritual i nos tabatin hopi di siña. (1 Kor. 3:1, 2) Pero kiko di awor? Si nos tin hopi aña ta sirbi Yehova i nos a haña hopi eksperensia, kisas nos no ta asina dispuesto mas pa aseptá yudansa, spesialmente si ta yudansa di un ruman ku no tin mesun tantu aña den bèrdat ku nos. Pero, hopi biaha Yehova ta usa nos rumannan pa fortalesé nos. (Rom. 1:11, 12) Esei ta algu ku semper nos mester keda kòrda si nos ke pa Yehova duna nos su poder.

19. Kon bini Pablo por a hasi hopi kos impreshonante?

¹⁹ Unabes ku Pablo a bira kristian, el a hasi algun kos impreshonante. Kon bini? Pasobra el a komprondé ku e sekreto pa éksito no ta dependé di bon salú, edukashon, kultura i rikesa, sino riba humildat i konfiansa den Yehova. P’esei, laga nos tur imitá Pablo den (1) konfia den Yehova, (2) siña for di ehèmpel di Beibel i (3) aseptá yudansa di nos rumannan. E ora ei, ni maske kon débil nos ta sinti nos mes, Yehova lo hasi nos poderoso!