“No Laga Bo Man Sosegá”

1-2. Kiko e palabranan di Eklesiástes 11:6 tin di haber ku e trabou di prediká?

DEN algun pais, hende ta reakshoná bon riba e bon notisia. E mensahe ei ta nèt loke nan tin mester! Den otro pais, hende no tin masha interes den Dios òf Beibel. Kon hende den bo teritorio ta reakshoná? Sin importá kon nan reakshoná, Yehova ke pa nos sigui prediká te ora e bisa ku e trabou ta kla.

² Yehova ya a disidí ki ora e trabou di prediká lo terminá anto ki ora “e fin lo yega.” (Mat. 24:14, 36) Te na e momento ei, kon nos por obedesé e mandamentu: “No laga bo man sosegá”?b—Lesa Eklesiástes 11:6.c

 3. Kiko nos lo analisá den e artíkulo akí?

³ Den e artíkulo anterior, nos a wak kuater kos ku un hende mester hasi pa bira un bon “piskadó di hende.” (Mat. 4:19) Den e artíkulo akí, nos lo analisá tres sugerensia ku por yuda nos sigui prediká sin importá kiko nos haña nos kuné. Nos lo siña dikon ta importante pa nos (1) keda enfoká, (2) tene pasenshi i (3) mantené fe fuerte.

 4. Dikon nos mester keda enfoká riba e trabou ku Yehova a duna nos?

⁴ Hesus a bisa su disipelnan kon mundu lo ta i kiko lo pasa durante e último dianan. E tabata sa ku e kosnan ei por distraí su siguidónan di hasi e trabou di prediká. P’esei, el a bisa nan pa “keda vigilá.” (Mat. 24:42) Den tempu di Noe tabatin hopi distraishon ku a pone hende ignorá e spièrtamentu ku el a duna. E mesun distraishonnan ei tin awe tambe. (Mat. 24:37-39; 2 Ped. 2:5) P’esei, nos mester keda enfoká riba e trabou ku Yehova a duna nos.

 5. Segun Echonan 1:6-8, te kon leu e trabou di prediká lo yega?

⁵ Awendia, nos mester ta kompletamente enfoká riba e trabou di prediká e Reino. Hesus a profetisá ku e trabou ei lo bira mas grandi i lo sigui pa hopi tempu despues di su morto. (Huan 14:12) Despues ku Hesus a muri, algun di su disipelnan a bai bèk na nan trabou di piska. Despues ku el a resusitá, el a hasi un milager pa laga algun di su disipelnan piska un kantidat grandi di piská. El a usa e okashon ei pa laga nan komprondé bon kla ku e trabou di prediká i di hasi hende disipel ta mas importante ku kualke otro trabou. (Huan 21:15-17) Djis promé ku Hesus a bai shelu, el a bisa su disipelnan ku e trabou di prediká ku el a kuminsá kuné lo a bai mas ayá ku e fronteranan di Israel. (Lesa Echonan 1:6-8.) Hopi aña despues, Hesus a duna Apòstel Huan un vishon pa mustr’é kiko lo sosodé “den e dia di Señor.”d Un di e kosnan ku Huan a mira durante e vishon maravioso ei tabata un angel ku “tabata deklará bon notisia eterno . . . na tur nashon, tribu, idioma i pueblo.” (Rev. 1:10; 14:6) Esei ta mustra bon kla kiko Yehova ke pa nos hasi: partisipá den e trabou mundial di prediká e Reino te ora ku e trabou ei ta kla.

 6. Kiko por yuda nos keda enfoká riba e trabou di prediká?

⁶ Algu ku por yuda nos keda enfoká riba e trabou di prediká ta di pensa riba tur loke Yehova ta hasiendo pa yuda nos. Por ehèmpel, bo a ripará kuantu kuminda spiritual nos tin? Nos tin publikashon imprimí, publikashon digital, oudio, vidio i programa riba Internet. Anto, sin papia di nos website ofisial ku tin informashon disponibel na mas ku 1.000 idioma! (Mat. 24:45-47) Miéntras ku e mundu akí ta dividí pa polítika, religion i ekonomia, e mas di ocho mion sirbidó di Dios ta forma un famia realmente uní. Por ehèmpel, djabièrnè 19 di aprel 2019, Testigunan di Yehova rònt mundu a uni pa analisá e teksto di dia. E anochi ei, 20.919.041 hende a reuní pa selebrá Konmemorashon di e morto di Hesus. Ki un privilegio tabata pa mira e milager ei i ser parti di dje! Ora nos pensa riba esei, nos ta sinti nos mas motivá ainda pa keda enfoká riba e trabou di prediká e Reino.

 7. Kon e ehèmpel di Hesus por yuda nos keda enfoká?

⁷ Un otro manera ku nos por keda enfoká riba e trabou di prediká ta di sigui e ehèmpel di Hesus. E no a permití nada distraé for di duna testimonio di e bèrdat. (Huan 18:37) Ora Satanas a ofresé Hesus “tur e reinonan di mundu i nan gloria,” e no a kai den e trampa ei. Tampoko Hesus no a permití hende hasié rei. (Mat. 4:8, 9; Huan 6:15) E no a laga deseo di kore tras di kos material influensi’é; ni e no a laga oposishon feros di hende strob’é. (Luk. 9:58; Huan 8:59) Ora nos fe ser poné na prueba, nos tambe por keda enfoká si nos sigui e konseho di Apòstel Pablo. El a animá e kristiannan pa sigui Hesus su ehèmpel ya asina nan “no ta kansa i pèrdè ánimo.”—Heb. 12:3.

 8. Kiko pasenshi ta, i dikon nos tin mester di dje spesialmente awor?

⁸ Pasenshi ta e kapasidat di warda trankil te ora un situashon kambia. Tin biaha, nos ta pasa den un situashon difísil i nos ke pa e terminá pa kaba. Òf kisas nos tin un deseo ku nos ke pa bira realidat pa kaba. Profeta Habakuk a anhelá pa mira fin di e violensia ku tabata eksistí na Huda. (Hab. 1:2) E disipelnan di Hesus a spera ku e Reino “lo a aparesé mesora” pa libra nan for di gobernashon romano. (Luk. 19:11) Awe, nos ta anhelá pa e Reino di Dios kaba ku tur maldat i trese un mundu nobo yen di hustisia. (2 Ped. 3:13) Pero, nos mester tin pasenshi i warda riba e tempu ku Yehova a skohe pa hasi esei. Laga nos wak den ki manera Yehova ta siña nos pa tene pasenshi.

 9. Ki ehèmpel ta mustra ku Yehova ta tene pasenshi?

⁹ Yehova ta e ehèmpel perfekto di un persona ku ta tene pasenshi. Promé ku Diluvio, el a duna Noe sufisiente tempu pa traha e arka i pa e ta “un predikadó di hustisia.” (2 Ped. 2:5; 1 Ped. 3:20) Ora Abraham a hasi vários pregunta tras di otro tokante destrukshon di Sódoma i Gomora, Yehova a skuch’é ku pasenshi. (Gén. 18:20-33) Pa hopi siglo, e nashon di Israel tabata infiel na Yehova, pero asina mes el a tene hopi pasenshi ku nan. (Neh. 9:30, 31) I awe nos ta mira prueba di Yehova su pasenshi segun ku e ta permití sufisiente tempu pa e hendenan ku e ta hala “haña chèns di arepentí.” (2 Ped. 3:9; Huan 6:44; 1 Tim. 2:3, 4) Ora nos meditá riba e ehèmpel di Yehova, nos tin bon motibu pa sigui tene pasenshi segun ku nos ta sigui prediká i siña hende e bèrdat. Pero, ban wak awor kon Yehova ta usa un ilustrashon den Beibel pa siña nos tene pasenshi.

10. Kiko nos ta siña for di e ehèmpel di e kunukero na Santiago 5:7 i 8?

¹⁰ Lesa Santiago 5:7, 8. E ehèmpel di un kunukero ku ta warda pa su matanan krese, ta siña nos kon pa tene pasenshi. Ta bèrdat ku algun mata ta krese lihé. Pero, mayoria di mata, foral esnan ku ta duna fruta, ta tuma mas tempu pa bira grandi. Na Israel, e temporada di kresementu tabata dura mas o ménos seis luna. E kunukero tabata sembra simia despues di e promé áwaseru, ku tabata mas o ménos meimei di òktober. Anto, e tabata kosechá despues di e último áwaseru, ku tabata mas o ménos meimei di aprel. (Mar. 4:28) Laga nos ta sabí i imitá e pasenshi di e kunukero. Pero, esei no ta semper fásil.

11. Kon pasenshi lo yuda nos den nos sirbishi?

¹¹ Debí ku nos ta imperfekto, nos tin e tendensia di ke mira resultado di nos esfuersonan mesora. Pero si nos ke pa nos hardin produsí, nos mester dun’é atenshon konstante—nos mester koba, planta, ranka mal yerba i muha e matanan. E trabou di hasi hende disipel tambe mester di nos atenshon konstante. Ta tuma tempu pa yuda nos studiantenan di Beibel siña ku nan mester ta imparsial i amoroso. Nos pasenshi lo yuda nos evitá di bira desanimá ora hende no ke skucha nos. Asta ora algun hende reakshoná bon na nos mensahe, nos mester tene pasenshi. Nos no por pura un studiante di Beibel pa e progresá spiritualmente. Tabatin biaha ku asta Hesus su disipelnan a tuma tempu pa komprondé loke e tabata siña nan. (Huan 14:9) Kòrda, nos por planta i muha, pero ta Dios ta lag’é krese.—1 Kor. 3:6.

12. Kon nos por tene pasenshi ora nos ta kompartí e bèrdat ku miembro di nos famia ku no ta Testigu?

¹² No ta semper fásil pa nos tene pasenshi ora nos ke kompartí e bèrdat ku miembro di nos famia ku no ta Testigu. Algu ku por yuda nos ta e prinsipio na Eklesiástes 3:1 i 7: “Tin . . . un tempu pa keda ketu i un tempu pa papia.” Den algun kaso, nos por keda ketu i laga nos bon kondukta papia pa nos. Pero, nos mester ta semper kla pa papia tokante e bèrdat. (1 Ped. 3:1, 2) Ta importante pa nos tin zelo pa prediká i pa siña hende e bèrdat, pero nos mester tene pasenshi ku tur hende, inkluso miembro di nos famia.

13-14. Ki ehèmpel di pasenshi nos por imitá?

¹³ Nos por siña tene pasenshi for di ehèmpel di sirbidó fiel di tempu bíbliko i di nos tempu. Habakuk tabata ansioso pa mira fin di maldat, pero el a demostrá pasenshi ora el a bisa: “Lo mi keda para na mi pòst.” (Hab. 2:1, NW) Apòstel Pablo a atmití ku e tabata kier a “terminá” su sirbishi. Pero, ku pasenshi el a sigui prediká e bon notisia kabalmente.—Echo. 20:24.

¹⁴ Wak tambe e ehèmpel di un pareha kasá ku a gradua for di Galaad. Nan a haña asignashon na un pais ku tin masha tiki Testigu. I debí ku e religion prinsipal di e pais ei no tabata kristian, e pareha no a haña hopi hende interesá ku tabata kier a studia Beibel. Di otro banda, nan kompañeronan di klas ku tabata sirbi na otro pais, tabata konta nan di tur e estudionan progresivo ku nan tabatin. Pero, e pareha a sigui tene pasenshi. Apesar ku kresementu den nan teritorio tabata slo, nan no a stòp di prediká. Despues ku nan a prediká ocho aña den un teritorio ku no tabata parse di produsí, finalmente nan tabatin e goso di mira un di nan studiantenan di Beibel batisá. Kiko e ehèmpelnan ei di pasado i di awendia tin en komun? E sirbidónan fiel ei no a bira floho ni no a laga nan man sosegá, i Yehova a rekompensá nan pa nan pasenshi. Esei sin duda ta motivá nos pa “imitá esnan ku pa medio di fe i pasenshi ta risibí loke Dios a primintí.”—Heb. 6:10-12.

15. Dikon fe por motivá nos pa prediká?

¹⁵ Nos tin fe den e mensahe ku nos ta prediká, p’esei, nos ke konta mas tantu hende posibel tokante dje. Nos ta konfia e promesanan ku tin den Beibel. (Sal. 119:42; Isa. 40:8) Nos ta mira profesia di Beibel ta kumpliendo den nos tempu. Nos ta mira kon hende ta apliká e konsehonan di Beibel i mehorá nan bida. Tur esei ta duna nos mas konfiansa ainda ku tur hende mester skucha e bon notisia di e Reino.

16. Kon Salmo 46:1-3 ta mustra ku nos fe den Yehova i Hesus por motivá nos pa prediká?

¹⁶ Nos tin fe tambe den Yehova, Fuente di e mensahe ku nos ta prediká, i den Hesus, esun ku el a skohe pa ta Rei di e Reino. (Huan 14:1) Sin importá kiko ta nos situashon, Yehova semper lo ta nos refugio i nos fortalesa. (Lesa Salmo 46:1-3.) Ademas di esei, nos tin konfiansa ku Hesus ta dirigiendo e trabou di prediká for di shelu, usando e poder i outoridat ku Yehova a dun’é.—Mat. 28:18-20.

17. Dikon nos mester sigui prediká? Duna un ehèmpel.

¹⁷ Fe ta oumentá nos konfiansa ku Yehova lo bendishoná nos esfuersonan. I esei por sosodé na un manera ku nos no ta ferwagt. (Ekl. 11:6) Por ehèmpel, tur dia míles di hende ta pasa dilanti nos mesa i garoshi di literatura. Pero, e método di prediká ei ta funshoná? Sigur ku sí! Nos Ministerio di Reino di novèmber 2014 a konta di un hóben ku tabata studia na universidat i ku tabata kier a skirbi un tésis tokante Testigunan di Yehova. E no por a haña un Salòn di Reino, pero el a haña un mesa di literatura na kèmpus i tambe el a haña e informashon ku e tabatin mester pa su tésis. Ku tempu, el a batisá i awor e ta pionero regular. Tipo di eksperensia asina ta motivá nos pa sigui prediká. Nan ta mustra ku ainda tin hende ku mester haña i skucha e mensahe di Reino.

18. Dikon nos por tin sigur ku e trabou di prediká e Reino lo terminá na e momento ku Yehova ta deseá?

¹⁸ Nos por tin sigur ku e trabou di prediká e Reino lo terminá na e momento korekto. Pensa riba loke a pasa den tempu di Noe. Yehova a proba ku semper e ta hasi kos na e mihó momento. Mas o ménos 120 aña promé, Yehova a determiná na ki momento Diluvio lo a kuminsá. Hopi aña despues, Yehova a bisa Noe pa traha e arka. Noe a hasi e trabou ei pa un 40 òf 50 aña promé ku Diluvio. Aunke e hendenan no kier a skucha Noe, el a sigui prediká e mensahe di spièrtamentu te ora Yehova a bis’é ku tabata tempu pa hinka e animalnan den e arka. Anto na e momento korekto, Yehova “a sera e porta.”—Gén. 6:3; 7:1, 2, 16.

19. Kiko nos por spera si nos no laga nos man sosegá?

¹⁹ Un bes akí, Yehova lo bisa ku e trabou di prediká e Reino ta kla. E ora ei, lo e “sera e porta” di Satanas su mundu i lo trese un mundu nobo yen di hustisia. Te ora e momento ei yega, sea determiná pa imitá Noe, Habakuk i otro hende ku no a laga nan man sosegá. P’esei, laga nos keda enfoká, tene pasenshi i mantené fe fuerte den Yehova i den su promesanan.