Kiko Bo Por Hasi pa Dios Skucha Bo Orashonnan?

“Kiko ku boso pidi e Tata den mi nòmber, lo e duna boso.”​—Huan 16:23.

Hesus su palabranan ta mustra nos ku Yehova no ke pa nos hasi orashon na dje pa medio di imágen, santu, angel òf nos defuntunan. E ke pa nos hasi orashon den nòmber di Hesukristu. Ora nos ta hasi esei, nos ta mustra ku nos ta komprondé ku Dios ta skucha nos orashonnan danki na e sakrifisio di Hesus. Hesus a bisa: “Ningun hende no ta yega serka e Tata si no ta pa medio di mi.”​—Huan 14:6.

“Deshogá boso kurason dilanti dje.”​—Salmo 62:8, NW.

Ora nos ta hasi orashon na Yehova, nos mester papia kuné manera nos lo papia ku un tata ku ta stima nos di bèrdat. En bes di lesa for di un buki òf ripití un orashon for di kabes, nos mester papia ku Dios ku rèspèt i di kurason.

“Kiko ku nos pidié ku ta di akuerdo ku su boluntat, e ta tende nos.”​—1 Huan 5:14.

Den Beibel, Yehova Dios ta bisa nos kiko lo e hasi pa nos i kiko e ke pa nos hasi p’e. Dios ke pa nos hasi orashon “di akuerdo ku su boluntat.” Pero pa nos siña konosé Dios bon, nos tin ku studia Beibel. Si nos hasi esei, nos orashonnan lo ser skuchá.

Hasi Orashon pa Bo Nesesidatnan Básiko. Nos por pidi Dios den orashon pa, por ehèmpel, kuminda, paña i un lugá pa biba. Nos por pidi tambe pa sabiduria pa tuma bon desishon i forsa pa soportá prueba. Nos por hasi orashon pa haña fe, pordon i yudansa di Dios.​—Lukas 11:3, 4, 13; Santiago 1:5, 17.

Hasi Orashon pa Otro Hende. Mayornan ku ta stima nan yunan ta keda kontentu ora nan yunan ta stima otro. Nos tur ta yunan di Yehova i e tambe ke pa nos stima i mustra interes den otro. Ta bon pa hasi orashon pa nos kasá, nos yunan, nos famia i amigunan. Disipel Santiago a skirbi: “Hasi orashon pa otro.”​—Santiago 5:16.

Ekspresá Gradisimentu. Beibel ta bisa tokante nos Kreador: “El a hasi bon, dunando boso áwaseru for di shelu i tempu di bon kosecha, i asina a laga boso haña kuminda na abundansia i a yena boso kurason ku alegria.” (Echonan 14:17) Ora nos pensa riba tur loke Dios a hasi pa nos, nos ta sinti nos motivá pa bis’é danki. Klaru, pa nos mustra ku nos ta gradisidu na Dios, nos mester obedes’é.​—Kolosensenan 3:15.

Tin biaha, nos ta sinti nos tristu pasobra nos no ta haña kontesta pa nos orashonnan mesora. Akaso esei ke men ku Dios no ta wòri ku nos? Klaru ku nò! Ban wak algun ehèmpel ku ta mustra ku ta importante pa sigui hasi orashon.

Steve, kende nos a menshoná anteriormente, a bisa: “Si mi no a sigui hasi orashon, lo mi a pensa ku nunka mas mi por ta felis.” Kiko a kambia? El a kuminsá studia Beibel i a siña dikon nos mester sigui hasi orashon. Steve a bisa: “Mi ta hasi orashon na Dios pa bis’é danki pa e amor i sosten ku mi a risibí for di mi bon amigunan. Awor sí mi ta sinti mi felis.”

Un otro ehèmpel. Jenny, tabata sinti ku e no ta meresé pa Dios skucha su orashonnan. El a bisa: “Ora mi tabata sinti ku mi no tabata bal nada, mi a supliká Dios pa yuda mi komprondé pakiko mi tabata sinti mi asina.” Kon esei a yud’é? Jenny ta sigui konta: “Ora mi papia ku Dios, esei ta yuda mi mira mi mes manera e ta mira mi. Asta ora mi ta sinti ku mi no ta bal nada, Dios sí no ta pensa asina. Orashon ta yuda mi pa no entregá i pa mi sigui lucha.” Kiko tabata e resultado? Jenny a bisa: “Orashon a yuda mi mira Yehova Dios komo un Persona real, manera un Tata i Amigu ku ta stima mi. Semper e t’ei pa yuda mi. Klaru, mi tin ku sigui hasi su boluntat sí.”

Laga nos trata tambe e eksperensia di Isabel. Ora Isabel a sali na estado, su dòkter a bis’é ku su yu lo a nase ku un limitashon físiko severo. E notisia ei a kibr’é. Algun hende a asta konseh’é pa hasi aborto. Isabel a konta: M’a sinti ku mi ta bai muri.” Kiko el a hasi? El a bisa: “Mi a hasi hopi orashon i a pidi Dios pa yuda mi.” Ku tempu, el a haña un yu hòmber, kende el a yama Gerard. Gerard tin limitashon físiko. Isabel a sinti ku Dios a kontestá su orashon? Klaru ku sí! Den ki manera? Isabel a bisa: “Awor mi yu Gerard tin 14 aña. E ta e bendishon di mas grandi ku mi tin. Nos ta mira kon nos yu ta disfrutá di bida apesar di su limitashon físiko. Mi a realisá ku mi yu ta e mihó kontesta pa mi orashonnan.”

E palabranan sinsero akí ta pone nos pensa riba loke e salmista a bisa di Yehova: “Bo a tende e deseo di e humildenan; abo lo fortifiká nan kurason, abo lo inkliná bo orea.” (Salmo 10:17) Esei ta bon motibu pa sigui hasi orashon, no ta asina?

Den Beibel, nos ta haña vários orashon di Hesus. E orashon di mas konosí ta esun ku el a siña su disipelnan. Kiko nos por siña for di e orashon ei?