“Purba i Mira” Ku Yehova Ta Bon

1-2. Segun Salmo 34:8, kiko nos tin ku hasi pa haña sa ku Yehova ta bon?

IMAGINÁ ku un hende a duna bo algu di kome ku nunka bo a yega di purba. Bo por haña sa sierto kos di e kuminda si bo djis wak e, hol’é, buska su resèpt òf puntra otro hende tokante e kuminda. Pero, e úniko manera pa sa sigur si bo gust’é òf nò ta si bo mes purb’é.

² Nos por mira ku Yehova ta bon ora nos lesa Beibel, nos publikashonnan i tambe skucha otro rumannan konta kon Yehova a bendishoná nan. Pero, pa nos haña sa kon bon Yehova ta, nos mes mester “purba” esei. (Lesa Salmo 34:8.) Ban wak kon asina. Imaginá ku bo ke kuminsá traha den sirbishi di tempu kompleto. Pero, pa bo por logra esei bo tin ku simplifiká bo bida. Kisas vários biaha bo a lesa Hesus su promesa ku si nos pone e Reino na promé lugá, Yehova lo duna nos tur kos ku nos tin mester. Pero, nunka bo mes no a maak esei mee. (Mat. 6:33) Ma, ku fe den Hesus su promesa bo ta bai p’e. Bo ta baha bo gastunan, baha bo oranan di trabou i enfoká riba bo sirbishi. Hasiendo esei bo ta ripará ku Yehova ta perkurá pa bo nesesidatnan. Asina ei bo ta “purba” pa bo mes ku Yehova ta bon.

 3. Segun Salmo 16:1 i 2, ken lo risibí kos bon for di Yehova?

³ Yehova “ta bon pa tur” hende, asta esnan ku no konos’é. (Sal. 145:9; Mat. 5:45) Pero, e ta duna hopi kos bon foral na hende ku ta sirbié i ta stim’é di henter nan alma. (Lesa Salmo 16:1, 2.) Laga nos ban wak algun di e kosnan bon ku Yehova a duna nos.

 4. Ki kos bon Yehova ta duna hende ku kuminsá hala serka dje?

⁴ Kada bes ku nos apliká loke nos ta siña tokante Yehova, nos ta mira kon nos bida ta mehorá. Por ehèmpel, ora ku nos a kuminsá siña tokante dje, nos a kuminsá stim’é. Anto e, na su turno, a yuda nos stòp di pensa i hasi kosnan ku e no ta gusta. (Kol. 1:21) Ora nos a dediká nos mes na Yehova i a batisá, el a duna nos mas kos bon, manera un konsenshi limpi i un amistat será kuné.—1 Ped. 3:21.

 5. Den bo sirbishi, kon bo a mira ku Yehova ta bon?

⁵ Den nos sirbishi tambe nos ta mira ku Yehova ta duna nos kosnan bon. Bo ta un hende tímido? Mayoria di Testigu di Yehova ta tímido. Kisas promé ku bo a bira Testigu di Yehova bo a pensa: “Nunka di mi bida lo mi bai yama ‘bon dia’ na kas di hende, te pa papia ku nan tokante Beibel.” Pero, wak bo awor! Esei ta algu ku bo ta hasi regularmente. Anto Yehova asta a yuda bo stima e trabou ei. Vários biaha bo a sinti kon Yehova a yuda bo den sirbishi. Por ehèmpel, ora un persona a zundra bo, Yehova a yuda bo keda trankil. El a yuda bo kòrda nèt e teksto ku bo tabatin mester pa un persona interesá. Anto ora bo a haña un hende ku no tabata kier a skucha, Yehova a duna bo e forsa pa bo sigui prediká.—Yer. 20:7-9.

 6. Kon e manera ku Yehova ta entrená nos pa sirbishi ta laga nos mira ku e ta bon?

⁶ Un otro manera ku nos ta mira ku Yehova ta bon, ta na e echo ku e ta entrená nos pa sirbishi. (Huan 6:45) Na nos reunion di den siman, nos ta wak vidionan di presentashon ku ta yuda nos sa kon pa kòmbersá ku hende. Anto nos por usa e ideanan ei den sirbishi. Kisas na komienso nos ta sinti nos un tiki nèrvioso pa purba algu nobo. Pero unabes ku nos hasi esei, nos ta mira ku nos tin bon resultado. Ademas, na nos reunionnan i kongreso nos ta haña animashon pa purba diferente manera nobo di prediká. Kisas esei ta nifiká ku atrobe nos lo sinti nos nèrvioso. Pero ora nos hasié, Yehova Dios siguramente lo bendishoná nos. Laga nos ban wak algun di e kosnan bon ku Yehova ta duna nos ora nos hasi esfuerso pa purba diferente manera nobo pa sirbié, sin importá nos sirkunstansia. Anto despues nos lo wak kon nos por hasi mas pa Yehova.

 7. Ki bendishon nos lo haña si nos hasi esfuerso pa hasi mas pa Yehova?

⁷ Nos amistat ku Yehova ta bira mas fuerte. Wak e kaso di Samuel.b E ta un ansiano, i huntu ku su kasá nan ta prediká na Colombia. Nan tabata traha pionero den nan kongregashon, pero nan tabata kier a hasi mas pa Yehova yudando kaminda tin mas nesesidat di publikadó. Pero, pa logra esei tabatin algun kambio ku nan mester a hasi. Samuel a bisa: “Nos a hasi loke Mateo 6:33 ta bisa, i nos a stòp di kumpra kos ku nos no tabatin mester. Pero, e kos di mas duru tabata di bai laga nos kas. E tabata trahá nèt pa nos, i nos no tabatin debe riba dje.” Ora nan a bai e kongregashon nobo, nan por a biba ku ménos sèn. Samuel a bisa: “Nos a mira kon Yehova tabata guia nos i kontestá nos orashonnan. Nos a sinti ku e ta kontentu ku nos i ta stima nos na un manera ku nunka promé nos a eksperensiá.” Abo lo por hasi mas pa Yehova? Si esei ta e kaso, bo por tin sigur ku esei lo hasi bo amistat ku Yehova mas fuerte i ku lo e duna bo loke bo mester.—Sal. 18:25.

 8. Kiko bo ta siña for di Ivan ku Viktoria?

⁸ Nos tin goso den loke nos ta hasi pa Yehova. Ivan ku Viktoria, un pareha kasá, ta traha pionero na Kirgizstan. Nan a tene nan bida simpel pa asina nan por a yuda den kualke asignashon, inkluso esnan di konstrukshon. Ivan a bisa: “Den tur proyekto nos tabata duna tur di nos. Na fin di dia nos tabata kansá, pero nos tabata sinti nos trankil i satisfecho pasobra nos tabata sa ku nos a usa tur nos energia trahando duru pa Yehova. Ademas nos a sera hopi amistat, i nos tabatin bunita rekuerdo. Tur e kosnan ei a hasi nos masha kontentu.”—Mar. 10:29, 30.

 9. Kiko un ruman muhé ku tin sirkunstansia difísil a hasi pa traha mas den sirbishi, i ku ki resultado?

⁹ Asta ora ku nos sirkunstansia ta difísil nos por tin goso hasiendo hopi pa Yehova. Por ehèmpel, Mirreh ta un biuda ku ta biba na Wèst Afrika. Ora el a baha ku penshon komo dòkter, el a kuminsá traha pionero. Debí na su artrítis, e no por traha hopi di kas pa kas. Pero, e por prediká mas tantu na lugánan públiko. E tin hopi rebishita i estudio, algun di nan e ta yama na telefòn. Kiko a pone ku Mirreh tabata ke hasi mas pa Yehova? El a bisa: “Mi stima Yehova i Hesukristu masha tantu mes. Anto tur ora mi ta pidi Yehova yuda mi pa mi hasi mas tantu p’e den sirbishi.”—Mat. 22:36, 37.

10. Segun 1 Pedro 5:10, kiko esnan ku ta purba di hasi mas pa Yehova lo haña?

¹⁰ Nos ta haña mas entrenamentu for di Yehova. Kenny, un pionero ku ta biba na Mauritius, a eksperensiá esei. Ora el a haña e bèrdat, el a legumai universidat, batisá i drenta sirbishi di tempu kompleto. El a bisa: “Mi ta purba di hasi loke Isaías a bisa: ‘At’ami aki! Manda ami!’” (Isa. 6:8) Kenny a yuda ku diferente proyekto di konstrukshon i a yuda tradusí algun di nos publikashonnan na su idioma. El a bisa: “M’a haña entrenamentu ku a yuda mi kumpli ku mi asignashon.” Pero, el a siña mas ku djis kon pa hasi e trabounan. El a sigui bisa: “M’a siña rekonosé mi limitashonnan i ki kualidatnan mi mester pa mi bira un mihó sirbidó di Yehova.” (Lesa 1 Pedro 5:10.) Kisas abo tambe por hasi sierto kambio den bo bida pa Yehova duna bo mas entrenamentu.

11. Kiko algun ruman muhé na Surkorea a hasi pa nan por a prediká, anto ku ki resultado? (Wak e plachi riba portada.)

¹¹ Asta rumannan ku tin hopi aña den e bèrdat ta haña entrenamentu i ta purba manera nobo di prediká i ta benefisiá di dje. Durante e pandemia di COVID-19, algun ansiano na Surkorea a skirbi: “Algun ruman ku un tempu tabata pensa ku nan no por a bai den sirbishi debí na nan salú, awor ta prediká pa medio di videoconference. Tres ruman muhé di ochenta i piku aña a siña traha ku kòmpiuter i awor nan ta prediká kasi tur dia.” (Sal. 92:14, 15) Pero, kiko di abo? Lo bo ke hasi mas pa Yehova i purba i mira mas ainda ku Yehova ta bon? Laga nos wak algun kos ku bo por hasi pa logra e meta ei.

12. Kiko Yehova ta primintí esnan ku konfia riba dje?

¹² Siña konfia riba Yehova. El a primintí ku lo e bendishoná nos sin fin si nos konfia den dje i hasi nos bèst p’e. (Mal. 3:10) Un ruman na Colombia ku yama Fabiola a mira kon Yehova a hasi esei p’e. E tabatin masha gana di bira pionero despues ku el a batisá, pero e mester a traha pa yuda su kasá. Pues ora e por a baha ku penshon, el a hasi hopi orashon pa Yehova yud’é. El a bisa: “Normalmente ta tarda masha hopi mes promé ku bo por kuminsá haña bo penshon, pero di mi a keda kla den djis un luna. Esei sí tabata un milager!” Dos luna despues el a bira un pionero. Awor e tin sentent’i piku aña i tin mas di 20 aña komo pionero. Durante e tempu ei, el a yuda ocho hende yega na boutismo. El a bisa: “Aunke tin biaha mi ta sinti mi débil, Yehova ta keda yuda mi tur dia pa mi sigui traha pionero.”

13-14. Kua ehèmpelnan por yuda nos konfia den Yehova i hasi mas p’e?

¹³ Siña for di esnan ku a konfia riba Yehova. Beibel tin yen di relato di hende ku a hasi nan bèst pa sirbi Yehova. Mayoria di biaha, nan mester a dal e promé stap i demostrá ku nan tabata konfia den Yehova promé ku el a bendishoná nan. Por ehèmpel, Yehova a bendishoná Abraham solamente despues ku el a bandoná su kas, “aunke e no tabata sa unda e tabata bai.” (Heb. 11:8) I ta solamente despues ku Yakòb a lucha ku e angel, el a haña su bendishon spesial. (Gén. 32:24-30) Anto na ki momento e nashon di Israel por a krusa Riu Hordan i drenta Tera Primintí? Esei tabata despues ku e saserdotenan a hinka nan pia den e riu.—Hos. 3:14-16.

¹⁴ Tin hopi ruman den nos tempu ku tambe a konfia riba Yehova i a buska manera pa hasi mas p’e. Por ehèmpel, Payton i su kasá Diana tabata gusta lesa tokante e rumannan ku a hasi mas pa Yehova, manera esnan den e seri “Nan A Ofresé Nan Mes di Buena Gana.”c Payton a bisa: “Ora nos tabata lesa nan eksperensianan, nos a sinti komo si fuera nos tabata wak un hende ta disfrutá di un dushi kuminda. Mas nos a wak nan, mas gana nos a haña pa nos mes ‘purba i mira ku Yehova ta bon.’” Ku tempu Payton i Diana a muda kaminda tin mester di mas publikadó. Abo a lesa e seri ei? Bo a haña chèns di wak e vidionan Predicación en lugares apartados: Australia i Predicación en lugares apartados: Irlanda ku tin riba jw.org? Tur eseinan por yuda bo mira kon bo por hasi mas pa Yehova.

15. Dikon nos mester skohe bon amigunan?

¹⁵ Skohe bon amigunan. Tin mas chèns ku nos lo purba un kuminda nobo si nos pasa tempu ku esnan ku tambe gusta e kuminda ei. Di mes manera, si nos pasa tempu ku rumannan ku ta pone Yehova na promé lugá den nan bida, chèns lo ta mas grandi ku nos tambe lo buska manera pa hasi mas pa Dios. Esei ta nèt loke a pasa ku Kent i Veronica. Kent a bisa: “Nos amigu- i famianan semper tabata animá nos pa purba diferente manera pa hasi mas pa Yehova. Nos a ripará ku ora nos pasa tempu ku rumannan ku ta pone e Reino na promé lugá, nos ta haña mas gana pa purba algu nobo.” Awor, Kent i Veronica ta pionero spesial na Servia.

16. Segun e ilustrashon na Lukas 12:16-21, dikon nos mester ta dispuesto pa hasi sakrifisio?

¹⁶ Hasi sakrifisio pa Yehova. Pa nos agradá Yehova no ke men ku nos tin ku stòp di hasi tur kos ku nos gusta hasi. (Ekl. 5:19, 20) Pero, si nos no ke hasi mas pa Yehova djis pasobra nos no ke sakrifiká algun kos ku nos gusta hasi, eigenlijk, nos ta hasiendo meskos ku e hòmber di Hesus su ilustrashon. E hòmber ei a traha masha duru mes pa e tin tur kos den bida pero el a ignorá Dios. (Lesa Lukas 12:16-21.) Christian, ku ta biba na Fransia, a bisa: “Mi tabata duna Yehova i mi famia loke a sobrá di mi tempu.” E ku su esposa a disidí di traha pionero. Pero pa nan por a logra esei, nan mester a kita for di trabou. Pa kubri nan gastunan, nan a kuminsá ku un negoshi chikitu di limpiesa i a siña keda kontentu ku loke nan tin. Tur e sakrifisionan ei tabata bale la pena? Christian a bisa: “Awor nos tin mas goso den sirbishi, i nos ta keda masha kontentu ora nos mira nos studiantenan di Beibel i rebishitanan ta siña tokante Yehova.”

17. Kiko por stroba nos di purba un manera nobo di prediká?

¹⁷ Sea dispuesto pa purba maneranan nobo di prediká. (Echo. 17:16, 17; 20:20, 21) Shirley, un pionero na Merka, mester a kambia su manera di prediká durante e pandemia di COVID-19. Na promé instante, e tabatin miedu di prediká via di telefòn. Pero durante e bishita di e superintendente di sirkuito, el a haña training. Djei padilanti, el a kuminsá prediká via telefòn mas tantu. El a bisa: “Promé mi tabatin hopi miedu, pero awor mi ta ègt disfrutá di dje. Awor nos ta kòmbersá ku mas tantu hende ku ora nos tabata prediká di kas pa kas!”

18. Ki nos por hasi si nos haña nos ku problema ku por stroba nos di hasi mas pa Yehova?

¹⁸ Traha bo plan i dal e stap. Ora nos haña nos ku problema, nos ta hasi orashon i hasi nos bèst pa pensa kiko pa hasi. (Pro. 3:21) Sonia, ku ta biba na Europa, ta un pionero regular den un grupo chikitu ku ta papia romaní. El a bisa: “Mi gusta pone mi plan riba papel anto pone e papel un kaminda ku mi por mir’é. Mi tin un pintura di un krusada riba mi mesa. Kada bes ku mi tin ku tuma un desishon, mi ta wak e pintura i ta puntra mi mes: ‘Mi desishon ta bai hiba mi mas serka òf mas leu di mi meta?’” Sonia ta purba di keda ku un punto di bista positivo tokante su problemanan. El a bisa: “Loke sea pasa den mi bida mi ta puntra mi mes: ‘Oké, esaki ta un muraya ku lo stroba mi di yega mi meta, òf un brùg ku lo yuda mi yega einan? Ta keda na mi kon mi ta reakshoná.”

19. Kiko nos tur ke ta determiná pa hasi?

¹⁹ Tin hopi manera ku Yehova ta bendishoná nos. I nos por mustra nos apresio hasiendo tur loke nos por pa alab’é. (Heb. 13:15) Un manera ku nos por hasi esei ta di buska maneranan nobo pa hasi mas pa Yehova i asina ei nos ta habriendo porta pa haña asta mas kos bon. P’esei, tur dia buska maneranan pa ‘purba i mira ku Yehova ta bon.’ Asina ei nos lo ta manera Hesus, kende a bisa: “Mi kuminda ta pa hasi e boluntat di esun ku a manda mi i kaba e trabou ku el a duna mi pa hasi.”—Huan 4:34.