1921 Shen Aña Pasá

Pa nan por a kumpli ku nan trabou di prediká, Studiantenan di Beibel lo mester tabatin kurashi. Nan mester a prediká tantu e “bon nobo” na esnan afligí, komo “e dia di vengansa” na e malbadonan.

Ruman J. H. Hoskin, kende tabata biba na Canada, a prediká ku kurashi apesar di oposishon. Na kuminsamentu di 1921, el a topa un pastor metodista. Ruman Hoskin a sali bis’é: “Laga nos ban kòmbersá trankil tokante Beibel. Asta si nos no ta di akuerdo riba sierto punto, nos por laga e kòmbersashon keda te ei i keda bon ku otro.” Pero kos no a bai asina. Ruman Hoskin a bisa: “Apénas nos a papia un par di minüt, [e pastor] a dal e porta sera asina duru ku m’a kere ku e glas lo a kibra.”

E pastor a grit’é: “Bai papia ku un hende ku no ta kristian.” Ruman Hoskin no a bisa niun pia di palabra, pero segun ku e tabata bai el a pensa: ‘M’a kere ku ta esei mi tabata hasiendo!’

E siguiente dia ora ku e pastor tabata duna su predikashi, el a papia masha malu mes di Ruman Hoskin. Ruman Hoskin a konta: “El a bisa su siguidónan ku mi tabata e mentiroso di mas grandi ku tabatin anto ku ken ku mira mi tin ku tira mi mata.” Pero niun ratu so Ruman Hoskin no a laga e kos ei strob’é. El a sigui prediká i tabatin éksito. El a bisa: “Mi tabata gusta prediká den e teritorio ei. Asta tabatin algun hende ku tabata bisa mi: ‘Bo sa, mi sa ku ta hende di Dios bo ta!’ I nan tabata ofresé pa yuda mi ku kualke kos mi tabatin mester.”

Pa yuda hende komprondé Beibel mihó, Studiantenan di Beibel regularmente tabata pone preguntanan di Beibel huntu ku nan kontesta den E Époka di Oro.a Den e Estudio di Beibel pa Hóbennan tabatin preguntanan ku mayornan por a usa pa studia ku nan yunan. Mayornan mester a hasi e preguntanan akí na nan yunan i yuda nan haña e kontestanan den Beibel. Tabatin algun pregunta ku por a yuda nan komprondé algun kos básiko tokante Beibel manera: “Kuantu buki tin den Beibel?” Anto preguntanan manera “Ta tur kristian lo haña nan ku persekushon?” tabata prepará e hóbennan pa nan por a prediká ku kurashi.

Ademas, tabatin preguntanan di Beibel pa esnan ku ya kaba tabatin mas konosementu di Beibel. Nan por a haña e kontestanan den e promé buki di e seri di Estudio di e Skritura. Míles di lesadó di E Époka di Oro tabata benefisiá di e preguntanan ei. Pero, e edishon di 21 di desèmber di 1921 a anunsiá ku e preguntanan ei lo no sigui mas. Dikon?

E rumannan ku tabata dirigí e organisashon e tempu ei a realisá ku un hende ku kuminsá studia Beibel mester di un manera mas organisá pa por siña e kosnan básiko di e bèrdat. Pa logra esei, na novèmber di 1921 nan a bini ku e buki E Arpa di Dios. Esnan ku a tuma e buki ei tambe a sigui un kurso ku nan por a hasi riba nan mes. E kurso ei tabata yuda nan komprondé Dios su propósito pa duna hende bida eterno. Kon e kurso tabata bai?

Ora un hende tuma e buki, e tabata haña un karchi huntu kuné tambe. E karchi a indiká loke e mester a lesa pa e siman ei. E siman despues lo el a haña un otro karchi ku pregunta basá riba loke el a lesa kaba. Ora e kaba di kontestá e preguntanan ei, lo el a mira kiko e mester lesa pa e siguiente siman.

Pa 12 siman largu un kongregashon den bisindario lo a pòst pa e studiante e karchinan ku e tabatin mester. Mayoria di biaha, tabata e rumannan di edat òf ku tabatin difikultat pa traha di kas pa kas tabata hasi esei. Por ehèmpel, Anna K. Gardner di Millvale, Pennsylvania, na Merka a konta: “Mi ruman muhé Thayle no por a kana bon. Pero ora E Arpa di Dios a sali, esei a dun’é mas kos ku e por a hasi. E por a pòst e karchinan ku e preguntanan ku mester a bai tur siman.” Ora e studiante a kaba henter e kurso, un ruman tabata bai bishit’é pa yud’é siña mas tokante Beibel.

Pa fin di 1921, Ruman J. F. Rutherford a manda un karta pa tur e kongregashonnan. El a konta ku “e aña akí a prediká e bon notisia di e Reino mas tantu i tabatin mas éksito ku e añanan promé.” Djei el a bisa: “Tin hopi trabou ainda. P’esei, animá otro hende pa nan tambe djòin e trabou bendishoná akí.” Ta opvio ku Studiantenan di Beibel a sigui e konseho ei. Na 1922, mas ku tur e añanan anterior, nan a prediká ku kurashi tokante e Reino.