Mi Ta Sinti Mi Safe Pasó Mi Ta Konfia den Yehova

M’a nase na 1948 den un pueblo chikitu na Nigeria. Durante e tempu ei, Tio Moustapha, mi tata su ruman di mas chikitu, i despues Wahabi, mi ruman mayó, a batisá komo Testigu di Yehova. Ora mi tabatin nuebe aña mi tata a muri. Mi tabata hopi kibrá. Wahabi a bisa mi ku mi por mira Tata atrobe den resurekshon. E speransa ei a pone ku m’a kuminsá studia. Na 1963 m’a batisá. Poko despues, mi tres otro ruman hòmbernan tambe a batisá.

Na 1965, m’a bai Lágos i a djòin mi ruman Wilson, ku ta mas grandi ku mi. M’a gusta e tempu ku m’a pasa ku e pioneronan regular den Kongregashon Igbobi. Nan goso i zelo a motivá mi, i na yanüari 1968 mi tambe a kuminsá traha pionero.

Albert Olugbebi, un ruman di Bètel, a tene un reunion spesial ku nos komo hóben. El a bisa nos ku na e parti nort di Nigeria tabatin mester di pionero spesial. Te ainda mi ta kòrda kon tur entusiasmá Ruman Olugbebi a bisa: “Boso ta yòn, i boso por usa boso tempu i energia pa Yehova. Tin hopi trabou pa boso hasi!” Mi kier a hasi meskos ku Isaías i bai unda ku Yehova tabata ke pa mi bai. Pues, m’a yena mi papel pa pionero spesial.—Isa. 6:8.

Na mei 1968, m’a bira pionero spesial i a wòrdu asigná na e stat di Kano, den nort di Nigeria. Esaki tabata durante Guera di Biafra, ku a dura di 1967 pa 1970. E guera a kousa hopi sufrimentu i morto den e region ei i despues el a move pa e parti ost di Nigeria. Un ruman ku bon intenshon a purba di konvensé mi pa no bai. Pero m’a bis’é: “Mi ta komprondé bo preokupashon. Pero, si Yehova a duna mi e asignashon akí, mi tin sigur ku lo e ta ku mi tambe.”

E situashon na Kano tabata hopi malu. E guera sivil a laga e stat akí na wèrki. Den sirbishi tin biaha nos tabata topa kadaver di hende ku a ser matá durante e guera. Un tempu, Kano tabatin vários kongregashon pero hopi di e rumannan a hui. Ménos ku 15 publikadó a keda, i nan tabata morto spantá i tur desanimá. Nan a bira hopi kontentu ora nan a komprondé ku nan a haña seis pionero spesial pa bin yuda nan. Nos a animá nan i a yuda nan kuminsá tene reunion, bai sirbishi i tambe pa manda nan rapòrt i pedido di literatura pa sukursal atrobe.

Nos tur seis pionero spesial a kuminsá siña hausa. Ora hende lokal tabata tende nos papia den nan idioma, nan tabata dispuesto pa skucha. Sinembargo, nos mester tabata masha kouteloso pasó miembronan di e religion mas grandi na Kano no a gusta niun tiki ku nos tabata prediká. Un biaha, un hòmber ku kuchú den man a kore tras di ami ku e ruman ku mi tabata traha kuné. Danki Dios nos por a kore mas duru kuné i e no por a yega nos. Apesar di e peligernan, Yehova a “duna [nos] siguridat,” i e kantidat di publikadó a krese. (Sal. 4:8) Awe, Kano tin mas ku 500 publikadó den 11 kongregashon.

Nos a keda na Kano pa un par di luna só. Na ougùstùs 1968, ami huntu ku dos otro pionero spesial a haña asignashon pa bai Niamey, kapital di Repúblika di Niger. No a tarda mashá ku nos mes a bin ripará ku Niger, ku ta na Wèst Afrika, ta un di e paisnan ku ta hasi mas kalor na mundu. Aparte di siña prediká den hopi kalor nos mester a siña franses, e idioma ofisial. Niun di eseinan no tabata fásil, pero nos a konfia den Yehova i a kuminsá prediká den e kapital Niamey huntu ku un par di publikadó ku tabata biba einan. Den korto tempu kasi tur hende ku por a lesa a haña e buki E berdad cu ta hiba na bida eterna. Nan mes tabata buska nos pa haña un buki!

No a tarda mashá ku nos a bin ripará ku outoridatnan no tabata gusta Testigunan di Yehova. Na yüli 1969, nos a tene e promé asamblea di sirkuito na e pais ei. Nos asistensia tabata mas o ménos 20 hende. Nos tabata ansioso pa e boutismo di dos publikadó. Pero, riba e promé dia, polis a bini i a para tur kos. Nan a bai warda ku tur e pioneronan spesial i e superintendente di sirkuito. Despues di interogá nos, nan a duna nos òrdu pa bin mèldu e siguiente dia. Nos a sinti ku e kos akí lo a bira un problema, p’esei nos a regla pa tene e diskurso di boutismo na kas di un hende i djei ketu ketu nos a bai riu i batisá e kandidatonan.

Un par di siman despues, ami ku sinku otro pionero spesial a haña òrdu di gobièrnu pa sali for di Niger. Nan a duna nos 48 ora pa hasi esei, anto riba nos mes gastu. Nos a obedesé, i a bai derechitu sukursal na Nigeria. Ei nos a haña asignashon nobo.

Mi asignashon tabata Orisunbare, un pueblo na Nigeria mes. Tabatin un grupo chikitu di publikadó, i mi tabata gusta prediká i bai estudio ku nan. Pero despues di seis luna, sukursal a pidi mi pa bai Niger bèk, pero mi so. Na promé instante, esei a kue mi un tiki for di base pero despues m’a bira ansioso pa topa e rumannan na Niger atrobe.

M’a regresá Niamey. E dia despues ku m’a yega, un komersiante di Nigeria a rekonosé ku mi ta un Testigu i a kuminsá hasi mi pregunta tokante Beibel. M’a kuminsá un estudio kuné, i despues ku el a stòp di bebe di mas i huma, el a batisá. Mi tabatin e plaser di prediká ku rumannan na vários parti di Niger i mira kon tikitiki hende tabata aseptá e bèrdat. E promé biaha ku m’a yega Niger tabatin 31 Testigu; ora m’a bai for di e pais tabatin 69.

Na desèmber 1977, m’a regresá Nigeria pa haña un entrenamentu di tres siman. Ora m’a kaba, Malcolm Vigo, koordinadó di Komité di Sukursal, a laga mi lesa un karta di e sukursal di Sierra Leone. E karta a bisa ku nan tabatin mester di un superintendente di sirkuito na Guinea. P’esei nan tabata buska un ruman hòmber pionero soltero di bon salú i ku por a papia ingles i franses. Ruman Vigo a laga mi komprondé ku e entrenamentu ku m’a haña tabata pa e asignashon ei. El a enfatisá ku e asignashon no ta fásil. El a bisa mi: “Pens’é bon promé ku bo tuma bo desishon.” Mesora m’a respond’é: “Mirando ku ta Yehova ta manda mi, lo mi bai.”

M’a kue avion bai Sierra Leone i a topa ku e rumannan na sukursal. Un miembro di Komité di Sukursal a bisa mi: “Nos no sa kon ta bai ku e trabou na Guinea.” Aunke e sukursal na Sierra Leone tabata supervisá e trabou di prediká na Guinea, nan no tabatin kontakto ku e rumannan na Guinea debí na tenshon polítiko. Vários biaha nan a purba di manda un ruman pa bishitá e rumannan na Guinea pero nan no a logra. P’esei nan a pidi mi pa bai Conakry, kapital di Guinea, pa purba di haña un pèrmit di residensia.

Ora m’a yega Conakry, m’a bai embahada di Nigeria i a topa e embahador. M’a bis’é ku mi ke prediká na Guinea. El a konsehá mi pa no keda pasó gobièrnu por arestá mi òf hasi algu pió ku mi. El a bisa mi: “Bai bèk Nigeria i prediká einan.” M’a kontest’é: “Mi no ta bai niun kaminda. Aki mi ta keda.” Pues el a skirbi un karta pa un minister den gobièrnu di Guinea anto e minister ei a yuda mi.

Poko despues, m’a regresá e sukursal na Sierra Leone i a bisa e rumannan ku e minister a duna mi pèrmit di residensia. E rumannan a grita di alegria pasó nan a mira kon Yehova a bendishoná e biahe.

Di 1978 pa 1989, mi tabata den e trabou di sirkuito na Guinea, Sierra Leone i komo superintendente di sirkuito supstituto na Liberia. Na kuminsamentu, kada bes mi tabata bira malu. Tin biaha esei tabata pasa den áreanan leu fo’i stat. Pero e rumannan tabata hasi nan esfuerso pa hiba mi hospital.

Un biaha m’a haña bichi i tambe malaria. Mi tabata malu pa muri. Despues ku mi kurpa a drecha, m’a haña sa ku e rumannan ya tabata papia tokante unda nan tabata bai dera mi. Apesar di tur e kosnan ku m’a pasa aden ku mi salú, mi no a pensa di stòp ku mi asignashon. Anto mi ta konvensí ku ta Dios so por duna nos e mihó protekshon, pasó asta si nos muri e por lanta nos for di morto.

Na 1988, m’a konosé Dorcas, un ruman pionero ku stima Yehova masha hopi i ku ta masha humilde. Nos a kasa, i huntu nos a sigui den e trabou di sirkuito. Dorcas a traha duru ku mi den nos asignashon i semper tabata dispuesto pa hasi sakrifisio pa Yehova. Si e distansia entre un kongregashon pa e otro tabata ménos ku 25 kilometer, nos tabata kana bai ku nos maleta. Si e distansia tabata mas, nos tabata kue kualke transpòrt disponibel pa biaha riba e kamindanan di lodo i tur na buraku.

Dorcas no ta un hende ku tin miedu. Por ehèmpel, tabatin biaha nos mester a krusa riunan pèstá ku krokodel. Durante un biahe di sinku dia nos mester a krusa un riu. Pero komo ku e brùgnan tabata kibrá, nos mester a usa kanoa. Ora Dorcas a para pa bai sali for di e kanoa e pober a kai den awa hundu yen di krokodel. Niun di nos dos no por landa. Danki na Yehova, un par di hóben a bula den awa i salb’é. Pa basta tempu, nos tabata haña nagmèri di e kos ei, pero nos a sigui den nos asignashon.

Na kuminsamentu di 1992, nos a haña nos tin ku disidí si nos ta sigui komo pionero spesial òf nò. Dikon? Pasobra nos a haña sa ku Dorcas tabata na estado. Nos a yama nos yu muhé Jahgift pasobra nos a rasoná ku ta “Yehova a duna nos un regalo!” Kuater aña despues, Eric a nase. Tantu Jahgift komo Eric ta berdadero regalonan di Yehova. Jahgift a traha pa un tempu na e ofisina di tradukshon na Conakry, i Eric ta sirbidó ministerial.

Aunke ku pa un tempu Dorcas mester a stòp di traha komo pionero spesial, el a sigui traha komo pionero regular, asta ora nos tabata lanta nos yunan. Ku Yehova su yudansa, ketu bai mi ta den sirbishi spesial di tempu kompleto. Despues ku nos yunan a bira grandi, Dorcas a kuminsá traha pionero spesial atrobe. Awor nos tur dos ta misionero na Conakry.

Tur kaminda ku Yehova ke a hiba mi, m’a bai. Hopi biaha ami ku mi kasá a sinti Yehova su protekshon i bendishon. Debí ku nos a pone nos konfiansa den Yehova i no den kos material, nos a spar nos mes di hopi problema i ansiedat. For di loke ami ku Dorcas a pasa aden, nos a siña ku Yehova ta “nos Salbadó” i Fuente di berdadero siguridat. (1 Kró. 16:35) Mi tin sigur ku bida di kada hende ku konfia den dje lo ta “bon wardá den su saku di bida.”—1 Sám. 25:29.