Bo Por Mehorá Bo Memoria

“Mi tin un mal memoria.” Bo a yega di bisa esei? Si ta asina, no perde speransa. Algun sugerencia útil i un poco esfuerso por resultá den mehoramentu sorprendente. No menospreciá bo celebro. Su capacidad ta asombroso.

CON e celebro ta ehecutá su hazañanan maraviyoso? Durante añanan reciente e celebro a ser scudriñá como nunca na ántes. Pero aunke nan comprendimentu di dje ta aumentando, nos sa masha poco ainda en cuanto con e celebro realmente ta cumpli cu loke e ta haci.

No ta comprendibel con nos ta siña i ta corda informacion, pero investigadornan ta purbando pa resolvé e misterio aki. Nan ta calculá cu tin entre 10 mil miyon te 100 mil miyon cel di nervio, of neuron, den e celebro cu ta enbolbí den e trabou di siña i corda. Pero, tin por lo ménos dies mil bes e cantidad di coneccionnan di neuron cu neuron. Un teoria ta cu uso di tal coneccion, of sinápsis, ta ser hací fuerte, i siñamentu ta sosodé.

Segun cu nos ta bira mas bieu, capacidad mental por mengua; nos reaccion por tarda. Celnan di celebro no ta renobá nan mes, i evidentemente adultonan ta perde algun cel di celebro continuamente. Pero, te n’e grado cu nos ta usa nos celebro, nos por conserbá nos capacidad mental pa un tempu mas largu.

Nos actitud mental ta afectá nos celebro. Un punto di bista optimista i alegre ta mehorá funcion dje celebro na cualkier edad. Algun presion por ta beneficioso, pero demasiado presion crónico por stroba eficacia dje celebro. Ehercicio físico por yuda aliviá presion mental.

Aunke tal informacion por animá nos, tog nos por lubidá asuntunan importante, apesar di nos edad. Nos por mehorá? Un área unda casi tur hende tin dificultad ta di corda nomber di hende cu nos ta topa cuné.

Cordando Nomber di Hende

Algun sugerencia senciyo por yudá bo mashá pa corda nomber mas mihó. Interes den e persona ta yuda. Nomber di un persona ta importante p’e. Hopi bes nos no por corda e nomber pasobra nos no a tende e nomber corectamente na principio. Pues, ora nos ta cera conocí, tende e nomber claramente. Pidi e persona ripití su nomber si ta necesario of asta pa spèl e. Usa e nomber vários bes den bo combersacion. Ora bo ta despidí, yama e persona na su nomber. Lo bo keda sorprendí con e par di sugerencianan aki lo yudá bo.

Un otro sugerencia cu por stimulá bo memoria pa corda nomber ta di asociá e nomber dje persona cu algu cu bo por imaginá den bo mente. Si bo por asociá accion cuné, esei por yudá bo mas.

Por ehempel, un persona tabatin dificultad pa corda e nomber di un homber cu el a yega di conocé, cua tabata Pedro. Ora el a mira e persona el a corda cu apostel Pedro tabata piscadó, pues el a asociá e nomber dje persona cu piscamentu. Esei semper a yuda su memoria; el a pensa riba piscamentu ora nan a topa i a corda e nomber, Pedro.

Hopi nomber no tin ningun nificacion pa bo, di manera cu bo tin cu usa un palabra substituto cu ta parce e nomber. No ta importá cu bo palabra substituto no ta corespondé exactamente cu e zonido dje nomber. Bo memoria por corda e nomber mihó mediante e asociacion. Ora bo ta forma bo mes palabranan i imágennan mental, e impresion ta hopi mas profundo.

Por ehempel, bo a yega di conocé un Sra. Corina Croes. Pa corda su nomber, bo ta asoci’é cu cortina di cas. Bo ta visualisá den bo mente cortina cologá den cas i bo ta corda su nomber.

Bo tin cu practicá esei diligentemente pa un tempu, pero e realmente ta práctico. Harry Lorayne a splica e método aki den su buki How to Develop a Super-Power Memory, i el a us’é na hopi ocasion público. El a bisa: “Hopi bes mi tabatin cu cera conocí cu shen te dos shen hende den diescincu minuut of ménos, sin lubidá ni sikiera un nomber!”

Con pa Siña Lista di Memoria

Con bo por mehorá bo capacidad di corda un lista di artículo cu no tin relacion cu otro? Un método senciyo ta ser yamá e sistema di coneccion. E ta funcioná asina aki: Bo ta forma un imágen den bo mente pa cada artículo riba e lista anto conectá e imágen p’e promé artículo cu imágen dje segundo, anto conectá e segundo artículo cu esun di tres, etcétera.

Por ehempel, bo tin cu cumpra cincu artículo den e supermercado: lechi, pan, pera di lus, siboyo, i ice cream. Cuminsá dor di conectá e lechi cu e pan. Imaginá bo bashando e lechi for di un pida pan. Aunke e imágen por ta basta ridículo, e por yuda graba e artículonan den bo memoria. Ademas, purba di hinca accion den e imágen mental cu ta enbolbé bo den e bashamentu dje lechi.

Despues di asociá e lechi cu e pan, sigui p’e siguiente artículo, e pera di lus. Bo por conectá e kipashi pan cu e pera di lus imaginando cu bo tin mester di lus pa warda e pan den cashi di cushina. Anto conectá e pera di lus cu e siboyo dor di imaginá bo ta casca e pera di lus i ta yora entretantu. Naturalmente, ta mihó si bo ta incluí bo mes den tal asociacion. Bo por forma un coneccion entre e último artículonan, siboyo i ice cream? Tal bes bo por imaginá cu bo ta come ice cream di siboyo!

Purba wak si bo por corda e lista completo. Anto test bo memoria cu un lista di bo mes. Traha e lista tantu largu cu bo kier. No lubidá, pa haci e coneccion di artículo mas fácil pa corda, bo por trah’é na moda pret of asta ridículo of desbalansá. Trata di pone accion den e ehercicio, i usa un artículo como substituto pa un otro.

Algun hende por keha cu e método aki ta tuma mas tempu cu simplemente siña e lista di memoria. Sin embargo, splicacion dje método aki ta exigí mas tempu cu su uso. Despues di algun práctica, bo por haci coneccionnan lihé, i bo memoria, i tambe bo rapides di siña, lo ser hopi mas mihó cu ora bo ta purba di siña sin un sistema. Ora 15 persona a ser pidí pa corda un lista di 15 artículo scogí zomar sin usa un sistema, e promedio di nan marca tabata 8,5. Ora e mésun grupo a usa e sistema di conectá artículonan cu nan a mira riba un otro lista, nan promedio tabata 14,3. Naturalmente, si bo ta corda pa hiba un lista skirbí ora bo ta bai haci cómpras, bo marca mester ta 15—shen porciento!

Cordando Loke Bo Ta Lesa

Den e época aki di abundancia di informacion, un sector unda e mayoria di nos tin mester di yudansa ta den eficacia di studiamentu. Studiamentu ta esencial na scol, den negoshi, pa mehoransa personal, i den preparacion pa discurso público. Ademas, un cristian tin cu apartá tempu pa studio bíblico personal.—Juan 17:3.

Kisas bo ta bisa: ‘Pero ta difícil pa mi corda loke mi a studia.’ Kico bo por haci? Siña saca e mayor probecho for dje tempu dedicá na studiamentu, por yudá bo corda loke bo ta lesa. Lo siguiente ta algun sugerencia.

Ora bo ta studia, organisacion personal ta importante. Pone buki, material pa skirbi, i papel den alcanse. Purba na studia den un lugá agradabel unda poco cos ta distraí bo i cu bon lus. Paga e radio i television.

Pone un ora fiho pa studia. Pa algun hende, por ta mas eficas pa nan studia tur dia pa un corto tempu en bes di un tempu largu a la bes. Ta bon pa parti bo tempu den seccionnan. En bes di studia sin stop pa dos ora, lo por ta mihó pa parti e tempu den seccionnan di 25 te 40 minuut cada un, cu un pausa breve entre cada periodo. Investigacion a mustra cu bo por corda mas asina.

Determiná cuantu informacion bo kier cubri durante bo periodo di studio. Esaki ta yuda concentracion. Promé cu bo ta cuminsá un buki, usa poco minuut pa tira un bista adelantá den dje. Wak e título. Examiná e tabla di contenido, locual ta un sumario dje buki. Anto lesa e prólogo of introduccion. Aki e doel of e punto di bista dje autor ta ser presentá.

Promé cu bo cuminsá lesa un capítulo, tira un bista dor di dje. Lesa subtítulonan, wak plachinan, cuadronan, resúmennan, i e promé i último paragraf. Tira un bista riba e promé frase di cada paragraf. Hopi bes frase asina ta contené e liña principal. Haña e idea general dje buki. Haci bo mes e preguntanan: ‘Kico tabata intencion dje autor? Kico mi por gana for di lesamentu dje buki? Cua ta e argumentonan principal?’

Concentracion ta importante. Bo mester bira completamente enbolbí. E clave ta pa haci bo tempu di studio mas activo posibel. Crea entusiasmo considerando aspectonan práctico dje informacion. Visualisá. Usa bo sintí imaginando e holor, sabor, i gevoel si esei ta apropiado p’e informacion cu bo ta lesa.

Una bes bo a capta e sentido dje informacion, bo ta cla pa haci nota. Skirbimentu eficiente di nota por acelerá bo comprendimentu i cordamentu dje informacion. Nota no tin cu ser frasenan completo sino mester ta palabra i frasenan clave pa yudá bo corda ideanan principal.

Comprendimentu dje informacion no kier men necesariamente cu bo por corda tur cos den e futuro. Realmente, dentro di 24 ora despues di a siña, bo por lubidá tantu como 80 porciento dje informacion, por lo ménos temporalmente. Esei por desanimá bo, pero bo por recobrá un parti of hopi dje 80 porciento den un repaso dje material. Despues di cada seccion di studio, haci un repaso di un par di minuut. Si ta posibel, repas’é atrobe un dia despues, anto un siman despues, anto un luna despues. Bo aplicacion di e puntonan aki por yudá bo saca e mayor probecho for di bo tempu precioso di studio i corda loke bo a lesa.

Pues, no menospreciá bo celebro. Bo capacidad pa corda cosnan por ser mehorá. Un científico a yama e celebro “e cos di mas complicá cu nos a descubrí te ainda den e universo.” E celebro ta un encomendacion p’e sabiduria asombroso i poder di su Creador, Jehova Dios.—Salmo 139:14.

[Diagram na página 15]

Pa corda listanan, usa e sistema di coneccion: Forma un imágen mental pa cada artículo. Anto asociá imágen dje promé artículo cu e segundo i sigui asina

[Plachi na página 15]

Lista di cos pa cumpra:

1. Lechi 1 i 2 conectá

2. Pan 2 i 3 conectá

3. Pera di lus 3 i 4 conectá

4. Siboyo 4 i 5 conectá

5. Ice cream