Testigonan di Jehova i e cuestion di sanger

 1. Cua echo tocante sanger hende ta comprende mihor?

¹ SANGER ta vital pa bida. Maske esaki tabata conocí for di temponan antiguo, investigacion moderno ta percurando pa hopi mas comprendimento di su funcionnan sostenedor di bida.

 2. Cua ta un metodo terapeutico acepta, pero ken no ta di acuerdo?

² E práctica di transfusiona sanger humano tin un posicion prominente den cuido médico moderno. Esnan den e campo médico i hopi otronan ta mira transfusion di sanger for di un persona pa otro como un método terapeutico aceptá.¹a Pero tin hende cu no ta acepta transfusion di sanger. Nan ta e Testigonan di Jehova.

 3, 4. Ki punto di bista bi̇́blico Testigo di Jehova tin tocante bida, i cua preguntanan esaki ta lanta?

³ Testigonan di Jehova ta aprecia i ta respeta bida profundamente. Esaki ta un dje motibonan pakico nan no ta huma, usa droga adictivo of busca pa haci aborto. Nan a siña for dje Bijbel pa mira bida como sagrado, algo pa ser protehá i preservá tanto pa nan mes como pa nan yiunan.

⁴ Pakico anto Testigonan di Jehova ta contra transfusion di sanger? Tin un base razonabel pe conviccion aki cu nan ta pega na dje asta ora nan ta enfrentá cu morto? I nan posicion riba e asunto aki ta completamente incompatibel cu conocimento i principio médico moderno?

 5. Kico ta e propósito dje publicacion aki, i con e asunto lo wordu tratá?

⁵ TE tópico aki mester ta di interes pa tur den e profesion médico, ya cu cualkier ora un dokter por hañé confrontá cu e cuestion di transfusion di sanger. E posibilidad ta grandi, ya cu tin mas di tres miyon Testigo di Jehova rond mundo. Probablemente algun di nan ta biba den bo comunidad. Lo siguiente a ser skirbí pa yuda dokternan comprende Testigonan di Jehova como pashent i pa considera con por tuma nan punto di bista na cuenta razonablemente. Promé nos lo examina e base religioso pa nan posicion. Despues, cuminsando na pagina 17, nos lo considera e éticanan enbolbí den e asunto i algun descubrimento reciente i observacionnan hací pa dokternan calificá cu por ta di balor práctico den resolve problemanan tocante uso di sanger.

 6. Pa ken e tópico aki ta di interes?

⁶ Asta personanan cu no ta metí den e campo médico ta ser invitá pa tira bista den e asunto importante aki. E posicion cu Testigonan di Jehova ta tuma relacioná cu sanger en realidad ta enbolbe derecho i principio cu por afecta nos cada un. I un conocimento di loke nan ta kere, i pakico, lo yuda un persona comprende e asunto aki mihor, cu hopi bia a preocupá dokternan, huristanan i studiantenan dje Bijbel. Kico anto ta e factornan clave den e asunto?

E base religioso

 7. Cua ta algun punto di bista encuanto uso di sanger, i riba ki base e Testigonan di Jehova ta tuma un posicion riba sanger?

⁷ Mayoria dokter ta mira uso di sanger esencialmente como un cuestion di huicio médico, mescos cu nan decisionnan diario tocante usamento di cierto remedi of proceduranan kirúrgiko. Otro hende por mira e posicion di Testigo di Jehova mas como un cuestion moral of legal. Nan por pensa den término dje derecho di bida, autoridad pa tuma decision tocante bo mes curpa of e obligacionnan civil di gobierno pa proteha bida di su ciudadanonan. Tur e aspectonan aki tin di haber cu e asunto. Pero e posicion tumá pe Testigonan di Jehova ta riba tur cos un posicion religioso; e ta un posicion basá riba loke e Bijbel ta bisa.

 8. Den bista dje posicion tumá pe Testigonan di Jehova, cua pregunta ta lanta lógicamente?

⁸ Hopi hende por cuestioná e balides di tal declaracion. Nan ta na altura cu varios iglesia ta apoya e uso di sanger, ta establece programanan di banco di sanger i ta anima donacion di sanger. P’sei, logicamente e pregunta ta lanta:

Kico e Bijbel ta bisa di hende tumando sanger den nan curpa?

 9, 10. Kico ta mustra cu e Bijbel tin hopi di bisa riba sanger, i cua mandamento tocante sanger Dios a duna trempan den historia di humanidad?

⁹ Asta hende cu personalmente no ta mira e Bijbel como e palabra inspirá di Dios mester reconoce cu e tin hopi di bisa tocante sanger. For dje promé buki dje Bijbel te ne último, “sanger” ta ser mencioná mas cu cuatercien bia. Algun versículo dje Bijbel ta specialmente pertinent riba e cuestion di sostene bida cu sanger. Laga nos examina nan brevemente:

¹⁰ E registro dje Bijbel ta mustra cu trempan den historia di humanidad e Creador i Dunador di Bida a expresá su mes riba e asunto di sanger. Djis despues dje diluvio mundial, ora Dios a duna hende e derecho di come carni di bestia, el a manda Noe i su famia: “Tur bestia moviente cu ta na bida por sirbi como alimento pa boso. Mescos cu den e caso di berdura, ami en berdad ta duna boso tur esei. Solamente e carni cu su alma​—su sanger​—boso no mag come.”​—Genesis 9:3, 4.

11. Kico ta mustra cu den matamento di bestia tin mas cos enbolbi̇́ cu solamente e asunto di dieta?

¹¹ Di promé, e Creador tabata dunando un mandamento di dieta na un tempo cu humanidad tabatin un cuminsamento nobo. (Compara Genesis 1:29) Sin embargo, Dios a mustra cu matando bestia pa cuminda, mas cu dieta tabata enbolbí. Esei tabata pasobra e sanger dje criatura a representá su bida of su alma. Pues, algun traduccion di Bijbel ta traduci Genesis 9:4 como: “Solamente boso no mag come carni cu su bida, esta, su sanger.​—Version Normal Revisa; Moffatt.

12, 13. Kico e Creador a relacioná cu uso di sanger, i con nos por sa cu no ta solamente sanger di bestia enbolbi̇́?

¹² P’sei, e mandamento divino aki no tabata simplemente un restriccion riba dieta, manera ora un dokter ta conseha un pashent pa evita salu of vet. E Creador a asociá sanger cu un principio moral sumamente importante. Dramando tur e sanger cu razonablemente por a ser dramá, Noe i su desendientenan lo a demostrá nan respet pa e echo cu bida tabata i a dependé dje Creador. Pero laga nos examina e asunto aki mas aleu.

¹³ E scrituranan citá ariba ta aplica na sanger di bestia. E mesun principio lo aplica na sanger humano? Sí, cu asta mas forsa. Pasobra Dios a sigui bisa Noe: “Ademas di esei, boso sanger di boso alma lo mi reclama. . . . Ken cu ta drama sanger di hende lo drama e sanger di dje, pasobra el a traha hende den e imagen di Dios.” (Genesis 9:5, 6) Awor, si sanger di bestia (representando bida di bestia) tabatin un nificacion sagrado pa Dios, claramente sanger humano tabatin un nificacion sagrado di asta mas balor. Personanan cumpliendo cu e direccion divino ei lo no drama sanger di hende, tampoco nan lo come sea sanger di bestia of di hende.

Sinembargo, e mandamento aki na Noe tabata solamente un restriccion limitá of temporal? E ta aplica na futuro generacionnan, incluyendo esun di nos?

14, 15. Kico tabata e caracter dje mandamento tocante sanger duná na Noe, i cua comentario relacioná cu esaki un Rabi a haci?

¹⁴ Hopi escolástico di Bijbel ta reconoce cu aki Dios a establece un ordu cu a aplica, no na Noe i su famia so, sino na tur humanidad for dje tempo ei padilanti​—en realidad tur esnan cu a biba desde e Diluvio ta dje famia di Noe. (Genesis 10:32) Por ehempel, e Teólogo i Reformista John Calvin, a admiti tocante e prohibicion di sanger cu “e ley aki a ser duná na mundo henter directamente despues dje diluvio.”² I Gerhard von Rad, profesor na Universidad di Heidelberg, a referí na Genesis 9:3, 4 como “un ordenansa pa tur humanidad,” pasobra tur humanidad a bini di Noe.³

¹⁵ Ya cu e ley tabata ligá cu Dios su declaracion cu a enfatisá un respet halto pa bida humano, nos por comprende e observacionnan di Rabi Benno Jacob:

“Pues e dos prohibicionnan ta pertenece na otro. Nan ta e rekisitonan di mas elemental di humanidad den e sentido literal dje palabra. . . . E permit di come carni, pero sin su sanger, i e prohibicion tocante dramamento di sanger humano ta indica e lugar di hende den e mundo di esnan bibiente . . . En resumen: e motibo dje prohibicion di sanger ta di un caracter moral. . . . Hudaismo a mira e pasashi aki despues como un establecimento di ética fundamental pa tur ser humano.” (Letter cursivo agregá.)⁴

Realmente, despues e hudionan a saca for dje promé parti di Genesis shete “ley básico” pa humanidad, i e mandamento aki na Noe i su tres yu homber tocante sanger tabata un di nan.⁵ Sí, apesar dje echo cu mayoria nacion no a siguié, esaki realmente tabata un ley pa tur humanidad.​—Echo 14:16; 17:30, 31.

16, 17. Cua ley duná na Israel ta mustra cu e prohibicion di Dios tocante sanger a aplica ainda, i cua tabata e único manera cu israelita por a usa sanger?

¹⁶ Despues, den su ley duná ne nacion di Israel, Jehova Dios a prohibí asesinato, confirmando cu e mandamento cu el a duna Noe tabata vigente ainda. (Exodo 20:13) Di acuerdo cu esei, tambe Dios a taha comemento di sanger, bisando:

“Encuanto cualkier hende dje cas di Israel of algun residente stranhero cu ta biba como stranhero den nan cu ta come cualkier sorto di sanger, siguramente lo mi fiha mi cara contra e alma cu ta come sanger, i lo mi berdaderamente corté for di den su pueblo.”​—Levítico 17:10.

¹⁷ E israelitanan tabata permití pa usa sanger di bestia den un solo manera. Esei tabata den ofrece como un sacrificio na Dios, reconociende como e Dunador di Bida na kende nan tur a debe nan bida. El a bisanan: “E alma di carni ta den e sanger, i mi mes a pone riba altar pa boso pa haci reconciliacion pa boso alma, pasobra e sanger ta loke ta haci reconciliacion pa medio di e alma [of bida] den dje.”​—Levítico 17:11.

18, 19. (a) Cua precaucion jagdó israelita mester a tuma ora nan a mata bestia pa cuminda, i pakico? (b) Dor di warda e mandamento aki, cua echo nan a reconocé?

¹⁸ Kiko dje sanger di bestia matá pa cuminda, no pa sacrificio? Dios a bisa su adoradornan cu un jagdó kende a capturá un bestia salbahe of un para “mester drama su sanger den tal caso i cubrié cu tera. Pasobra e alma di tur sorto di carni ta su sanger pa e alma den dje. P’sei mi a bisa ne yiunan di Israel: ‘Boso no mag come e sanger di ningun sorto di carni, pasobra e alma di tur sorto di carni ta den su sanger. Ken cu ta come lo ser cortá.’”​—Levítico 17:13, 14.

¹⁹ E dramamento aki dje sanger no tabata simplemente un rito religioso; e tabata realmente un extension dje ley divino duná na Noe. Ora un persona mata un bestia, e mester reconoce cu su bida ta bini di i ta pertenecé na Dios. Dor di no come e sanger, sino dramé riba altar of riba tera, e israelita en efecto tabata debolbiendo e bida dje criatura na Dios.

20. (a) Cua castigo ta mustra cu violacion di Dios su ley tocante sanger tabata un picá serio? (b) Cua textonan ta mustra cu comemento di carni cu sanger a resultá den culpabilidad?

²⁰ Pa un israelita mustra falta di respet pa bida, representá pe sanger, tabata considerá como un malecho hopi serio. E persona cu deliberadamente a falta cu e ley aki tocante sanger mester tabata “cortá afó,” ehecutá. (Levítico 7:26, 27; Numero 15:30, 31) Un persona hasta por a haña un midí di culpa si el a come carni conteniendo sanger di un bestia cu a muri di su mes of cu a ser matá dor di un bestia salbahe.​—Levítico 17:15, 16; compara Levítico 5:3; 11:39.

E ley di Dios por a ser violá den tempo di emergencia?

21. Cua ehempel bi̇́blico ta mustra cu e ley di Dios tocante sanger no por a ser violá den tempo di emergencia?

²¹ E Bijbel ta contesta cu no. No tabatin ningun dispensacion pa ora di percancia. Nos por mira esei for di loke a sosodé cu algun soldad di Israel den e dianan di rey Saul. Hambrá despues di un bataya largo, nan a mata carne i baca i “nan a cuminsa come hunto cu e sanger.” Nan tabatin hamber i no tabata comiendo sanger deliberadamente, pero den nan ansha pa come carni nan no a percurá pe bestianan sangra debidamente. E echo cu esaki a parce un caso di “emergencia” tabata un excuus pa nan proceder? Al contrario, nan rey nombrá pa Dios a reconocé cu nan accion tabata un “pecamento contra Jehova comiendo hunto cu e sanger.”​—1 Samuel 14:31-35.

E debido repugnancia pa sanger aki ta aplica na sanger humano tambe?

22. Pakico ta razonabel pa conclui cu e ley di Dios tocante sanger di bestia ta aplica na sanger humano tambe?

²² Sí. I esei ta completamente comprendibel dor cu e ley di Dios a prohibí comemento di “cualkier clase di sanger”, “sanger di tur clase di carni.” (Levítico 17:10, 14) Nos por mira con e nacion hudio a tuma na pecho e ley aki dor di considera un incidente cu a enbolbé algun dje hudionan cu a sigui i scucha Jesus. Na un ocacion el a papia den un sentido figurativo tocante “bebe su sanger,” pasobra e tabata sa cu, cu tempo su sanger mester a ser dramá den un morto di sacrificio i lo el a resultá den bida pa esnan cu, mediante fe, a aceptá su sacrificio. (Juan 6:53-58) Evidentemente sin realisa cu Jesus tabata papiando simbólicamente, algun di su disipelnan hudio a sinti nan ofendí cu su palabra i a bandoné. (Juan 6:60-66) Sí, e idea di tuma sanger humano tabata absolutamente repugnante pa tal adorador hudio di Dios.

Kico di cristiannan?

23. Ki efecto e morto sacrificial dje Mesias tabatin riba e restriccionnan di dieta dje ley di Moises?

²³ E ley mosaico a señalá ne binimento i morto sacrificial dje Mesias. P’sei, despues cu Jesus a muri, berdadero adoradornan no tabata obligá mas pa warda e ley mosaico. (Romano 10:4; 6:14; Colosense 2:13, 14) Restriccion di dieta dje ley, tal como esnan contra comemento di vet of carni di cierto bestia, no tabata aplicabel mas.​—Levítico 7:25; 11:2-8.

Pues anto, e prohibicion divino contra sanger ta aplica na cristiannan?

24. Ora cu e cuestion di circuncision pa cristian gentil a ser tratá, kico a ser dicidi̇́ tocante sanger?

²⁴ E asunto aki a presentá pa consideracion na 49 E.C., durante un conferencia di apostelnan i anciano di Jerusalem kendenan a sirbi como e cuerpo central di anciano pa tur cristian. E conferencia a ser tené pa trata un cuestion di circuncision. E concilio apostólico a dicidí cu esnan no hudio cu a aceptá cristianismo no tabata obligá pa circuncida nan mes. Durante e consideracion, Santiago, e mitar ruman di Jesus, a hala atencion dje concilio na otro cosnan esencial cu e tabata considerá importante pa inclui den nan decision, esta, “pa nan abstene nan di cosnan contaminá pa ídolo i di fornicacion i di loke ta sofocá i di sanger.” (Echo 15:19-21) El a referí ne scritura di Moises, cu ta revela cu asta promé cu e Ley a ser duná, Dios a desaprobá relacion sexual inmoral, idolatria i comemento di sanger, cua ta inclui tambe comemento di carni di bestia sofocá cu ta contene sanger.​—Genesis 9:3, 4; 19:1-25; 34:31; 35:2-4.

25. E decision dje concilio apostólico aki a bira parti di kico?

²⁵ E decision dje concilio a ser mandá via carta ne congregacionnan cristian. Awor e ta ser hañá den e Bijbel como parti dje scrituranan inspirá cu ta probechoso “pa siñamento, . . . pa rectifica cosnan.” (2 Timoteo 3:16, 17) E decision tabata:

26, 27. Kico e decision ei a declara expli̇́citamente, i con nos por sa cu e no tabata simplemente opinion dje apostelnan?

²⁶ “Spiritu santo i nos mes ta na fabor di no pone mas carga riba boso, fuera dje cosnan necesario aki, pa boso abstene boso di cosnan contaminá pa ídolo i di fornicacion i di loke ta sofocá i di sanger. Si boso warda boso cuidadosamente dje cosnan ei boso lo prospera.”​—Echo 15:28, 29.

²⁷ Sí, aunke e cristiannan no tabata bao dje ley di Moises, tabata “necesario” pa nan abstene di sanger. Esei tabata djis e opinion personal dje apostelnan? Di ningun manera. Manera nan a declará, e decision a ser tumá di acuerdo cu e spiritu santo di Dios.

28. Di acuerdo cu profesor Walther Zimmerli, ki distincion e decreto ei a haci?

²⁸ Tocante tal decreto cristian, Profesor Walther Zimmerli di Universidad di Göttingen na Alemania a comentá:

“Den e decision tocante cua Echonan 15 ta informa, e promé congregacion hudio-cristian a haci un distincion entre e Ley duná na Israel mediante Moises i e mandamento duná [mediante] Noe na tur e mundo.”​—Zürcher Bibelkommentare.⁶

29. Kico ta indica cu e mandamento pa abstene di sanger tabata un rekisito moral i no simplemente un rekisito di dieta?

²⁹ E mandamento pa ‘abstene boso di sanger’ no tabata un simpel restriccion di dieta, sino tabata un rekisito moral serio, manera por ser mirá den e echo cu pe cristiannan e tabata mes serio cu ‘abstene boso di idolatria i fornicacion.’

E cristiannan primitivo i sanger

30, 31. Kico ta mustra e caracter duradero dje prohibicion di sanger i cu e no tabata simplemente un rekisito temporal?

³⁰ E concilio di Jerusalem a manda e decision cla i definí aki ne congregacionnan cristian, cu resultado positivo. Nos ta lesa den Echonan capítulo 16 tocante Pablo i su compañenan: “Segun cu nan a bai biahando dor dje stadnan, nan a entrega na esnan ei pa nan observancia, decreto riba cua apostel i anciano a tuma decision cuanan tabata den Jerusalem. P’sei en berdad, e congregacionnan a sigui ser hací firme den fe i a aumentá na cantidad dia tras dia.”​—Echo 16:4, 5.

E decision registrá den Echonan 15:28, 29 tabata simplemente un rekisito temporal, no un obligacion cu a continuá riba e cristiannan?

³¹ Algun hende a pretendé cu e decreto apostólico no tabata un obligacion permanente pe cristiannan. Pero e buki di Echonan ta indica claramente e contrario. E ta mustra cu, mas o menos dies aña despues cu e concilio di Jerusalem a emití tal decreto, e cristiannan a sigui cumpli cu e “decision cu nan lo a warda nan mes di loke ta sacrifica na ídolo, tambe di sanger i di loke ta sofocá i di fornicacion.” (Echo 21:25) Esaki ta mustra cu nan tabata conciente cu e rekisito di abstene di sanger no tabata limitá na gentil conbertí na un cierto lugar, tampoco aplicabel pa solamente un periodo cortico di tempo.

32, 33. Kico Eusebio ta bisa encuanto reconocimento dje prohibicion tocante sanger den su dia?

³² Pero con e situacion tabata siglonan despues ora cristianismo a plama bai lugarnan leu? Laganos considera e evidencia procedente dje siglonan cu a transcurí despues dje publicacion dje decreto registrá na Echonan 15:28, 29.

³³ Eusebio, un eskritor dje di tres siglo kende ta ser considerá e “tata di historia di iglesia,” ta relata loke a sosode na Lyons (awor den Francia) na aña 177 E.C. Enemigonan religioso falsamente a acusá e cristiannan di a come mucha chiki. Durante e tortura i ehecucion di algun cristian, un mucha muher yama Biblias a respondé ne acusacion falso, bisando: “Con nos por come mucha chiki​—nos, kende no ta permití di come sanger di bestia.”⁷

34-36. Kico Tertuliano i Minucio Felix a bisa encuanto cristiannan cu no a come sanger den nan dia?

³⁴ Acusacionnan falso similar a move e teólogo latino primitivo Tertuliano (c. 160-230 C.E.) pa remarca cu aunke e romanonan generalmente a bebe sanger, e cristiannan siguramente no a hacié. E ta skirbi:

“Laga boso camindanan innatural ser brongosá dilanti e cristiannan. Nos ni sikiera tin sanger di bestia den nos cumindanan, pasobra esakinan ta consisti di alimento ordinario. . . . Den huicio dje cristiannan boso ta ofrece nan soseshi yená cu sanger. Naturalmente boso ta convenci cu net e cos cu cua boso ta purba di hacinan desvia for dje caminda correcto ta contra ley pa nan. Con por ta anto, cu ora boso ta sigur cu nan lo tembla dilanti sanger di un bestia, boso ta kere cu nan lo baha hambrá riba sanger humano?”⁸

³⁵ Tambe, refiriendo ne decreto di Echonan 15:28, 29, el a bisa: “Nos ta comprende cu e prohibicion riba ‘sanger’ ta muchu mas [un prohibicion] riba sanger humano.”⁹

³⁶ Minucio Felix, un abogado romano kende a biba te rond di 250 E.C., ta bisa mescos, skirbiendo: “Nos ta hala tras asina tanto di sanger humano, cu nos no ta usa ni sanger di bestia cu nos por come den nos cuminda.”¹⁰b

37, 38. Ki declaracion un obispo i un escolástico bi̇́blico católico a haci riba e cuestion di sanger?

³⁷ E evidencia histórico ta asina abundante i cla cu obispo John Kaye (1783-1853) por a declará categóricamente: “E cristiannan primitivo a cumpli concienzudamente cu e decreto pronunciá pe apostelnan na Jerusalem, den abstene nan mes dje cosnan sofocá i di sanger.”¹¹

Pero ta solamente ‘cristian primitivo’ i Testigo di Jehova di tempo moderno a adoptá tal punto di bista basá riba e Bijbel?

³⁸ Di ningun manera. Comentando riba Echo 15:29, e escolástico bíblico católico Guiseppe Ricciotti (1890-1964) ta referi ne incidente na Lyons (describí anteriormente) como evidensia cu ‘cristian di antigua no por a come sanger.’ Anto e ta agrega, “pero asta den e siguiente siglonan te na Edad Medio, nos ta encontra gritonan inesperá dje antiguo ‘repugnancia’ [pa sanger] aki, indudablemente debí ne decreto.”¹²

39. Kico e Concilio Quinisexto a declará tocante sanger, i kico Otto di Bamberg a bisa na esnan recien conberti̇́ tocante sanger?

³⁹ Por ehempel, e Concilio Quinisexto tené na 692 E.C. na Constantinopla a declará: “E scritura divino ta ordena nos pa abstene di sanger, dje cosnan sofocá, i di fornicacion. . . . P’sei, si cualkier hende risca na come sanger di un bestia den cualkier manera, si ta trata di un clero, lague ser destituí; si ta trata di un laico, lague ser cortá afó.”¹³ Di manera similar, Otto di Bamberg (c. 1060-1139 E.C.), un famoso prelado i evangelista, a splica na esnan conbertí den Pomerania “cu nan no mester come nada impuro, of cu a muri di su mes, of cu a ser sofocá, of sacrificá na ídolo, of sanger di bestia.”¹⁴

40. Kico Martin Luther a skirbi tocante Echo 15:​28, 29?

⁴⁰ Yegando mas serca nos tempo, Martin Luther tambe a reconocé e implicacionnan dje decreto di 49 E.C. Den su protesta contra práctica i kerimento católico, e tabata incliná na agrupa e concilio apostólico cu concilionan di iglesia despues, di cua nan decretonan no tabata parti dje Bijbel. Toch Luther a skirbi tocante Echo 15:28, 29:

“Awor bon, si nos ta desea di tin un iglesia cu ta bai di acuerdo cu e concilio aki (manera ta correcto, ya cu e ta e promé i principal concilio, i cu tabata celebrá pe apostelnan mes), nos tin cu siña i insisti cu desde awor en adelante, ningun prins, señor, ciudadano ni campesino come gans, conenchi, biná ni porco cushina den sanger. . . . I ciudadano i campesino mester abstene nan mes specialmente di soseshi corra i bloedworst.”¹⁵

41. Ki comentario un teólogo bautista a haci riba Genesis 9:​3, 4?

⁴¹ Den siglo diesnuebe, Andrew Fuller, considerá “kisas e teólogo bautista di mas eminente i influente,” a skirbi tocante e prohibicion riba sanger di Genesis 9:3, 4:

“Esaki, prohibí na Noe, ta parce di a ser prohibí na tur humanidad; tampoco e prohibicion aki mester ser mirá como perteneciendo ne ceremonianan dje dispensacion (ley) hudio. El a ser imponé no solamente promé cu tal dispensacion (ley) a existí, sino tambe el a ser poné na vigor riba cristian gentil pe decretonan dje apostelnan, Echonan XVHS-.25,. 20. . . . Sanger ta bida, i ta parce cu Dios ta reclamé como sagrado pe.”¹⁶

42. Ki contesta e clero William Jones a duna na esnan cu ignora e prohibicion bi̇́blico di sanger?

⁴² Un cristian por pretende cu loke algun ta yama “libertad cristian” mester por permitie pasa por halto dje prohibicion aki tocante sanger? Den su buki The History of the Christian Church, e clero William Jones (1762-1846) ta responde:

“Nada por ta mas explícito cu e prohibicion, Echo XV. 28, 29. Esnan cu ta reclama nan ‘libertad cristian’ tocante tal asunto por señala algun parti dje Palabra di Dios den cua e prohibicion en cuestion ta ser anulá? Si no tin, permiti nos puntra: ‘Mediante cua autoridad, cu excepcion di esun di dje mes, cualkier hende por revoca e ley di Dios?’”​—Pag. 106.

43. Ki determinacion Testigo di Jehova tin tocante sanger, basá riba cua echonan i textonan?

⁴³ E conclusion ta masha cla: Bao di guia dje spiritu santo e concilio apostólico a decretá cu e cristiannan cu ta desea e aprobacion di Dios mester ‘abstene nan di sanger,’ manera Dios a exigí esei desde e dianan di Noe. (Echo 15:28, 29; Genesis 9:3, 4) E cristiannan primitivo a aceptá i sigui tal punto di bista apoyá pe Scrituranan, asta ora cu esei a costa nan bida. I atraves dje siglonan, e rekisito aki a ser reconocé como ‘necesario’ pe cristiannan. Asina, e resolucion dje Testigonan di Jehova di abstene nan mes di sanger ta fundá riba e Palabra di Dios, e Bijbel, i e ta apoyá pa hopi precedente den e historia di cristianismo.

Sanger como medicina

44. Cua tres punto a ser establecé, i kiko ta e base bi̇́blico pa cada un?

⁴⁴ Te ne punto aki nos a establecé cu e Bijbel ta exigi lo siguiente: Hende no mester sostene su bida cu sanger di otro criatura. (Genesis 9:3, 4) Ora e bida di un bestia ser kitá, e sanger cu ta representa e bida aki mester ser ‘dramá,’ mester ser debolbé ne Dunador di Bida. (Levítico 17:13, 14) I manera e concilio apostólico a decretá, cristiannan mester ‘abstene nan di sanger,’ cua ta aplica tanto na sanger humano como na sanger di bestia.​—Echo 15:28, 29.

Sin embargo, e declaracionnan bíblico aki ta aplica ne aceptacion di transfusion di sanger como un procedura médico pa salba bida?

45, 46. Cua pregunta ta presenta awor, i ki técnica médico moderno principio di Bijbel por cubri?

⁴⁵ Tin hende ta pretende cu e Bijbel ta prohibi comemento di sanger como cuminda i cu esaki ta totalmente diferente cu acepta transfusion di sanger, un procedura médico cu tabata desconocí den tempo bíblico. E punto di bista aki ta balido?

⁴⁶ Nos no por nenga cu den tempo bíblico e ley di Dios tabatin aplicacion particular na comemento di sanger como cuminda. Den e tempo ei hende no tabata practica dunamento di sanger via ader. Pero aunke e Bijbel no a considerá directamente técnica médico moderno cu tin di haber cu sanger, de facto sí el a anticipá i abarca nan cu e principio.

47, 48. Ki distincion no ta ser haci̇́ na Echo 15:29, i pa cua motibonan?

⁴⁷ Nota, por ehempel, e mandamento pa cristiannan sigui ‘abstene nan di . . . sanger.’ (Echo 15:29) Den dje e no ta bisa nada cu por hustifica hacimento di distincion entre tuma sanger pa boca o ricibié via ader. I, realmente, en principio tin un diferencia fundamental den esaki?

⁴⁸ Dokternan sa cu un persona por ser alimentá via boca of via ader. Mescos, cierto remedi por ser duná via diferente canal. Por ehempel, tin antibiótica cu por ser tumá via boca den forma di tablet of por ser injectá den e musculonan dje persona of su sistema circulatorio (via ader). Kico si bo a yega di tuma cierto tablet di antibiótica i, dor cu bo tabatin un reaccion alérgico peligroso, dokter a advertí bo pa bo abstene bo dje droga aki den futuro? Lo ta razonabel pa considera cu e advertencia médico aki lo nifica cu bo no por tuma e droga den forma di tablet, pero cu lo bo por injecté sin rísico den e sistema sanguineo? Dificilmente! E punto principal no ta e canal di suministro, sino cu tabata necesario pa bo abstene bo por completo di tal antibiótica. Di manera similar, e decreto di cu cristiannan mester ‘abstene nan di sanger’ claramente ta abarca tumamento di sanger den e curpa, sea ta pa boca of directamente den e sistema sanguineo.

Cuanto importancia e cuestion aki tin pe Testigonan di Jehova?

49. Cua posicion firme Testigo di Jehova ta tuma, i di kico nan ta convenci̇́?

⁴⁹ Hende cu ta reconoce i depende dje Creador i Dunador di Bida mester keda determiná pa obedece su mandamentonan. Esaki te posicion firme cu Testigo di Jehova ta adopta. Nan ta plenamente convencí di cu ta correcto pa cumpli cu e ley di Dios cu ta manda pa abstene di sanger. Den esaki nan no ta siguiendo un capricho personal ni un punto di bista fanático sin fundeshi. Ta pa obedencia ne autoridad di mas halto dje universo, e Creador di bida, nan ta nenga di introduci sanger den nan curpa dor di comé of mediante transfusion.

50, 51. Kico ta enbolbi̇́ den e cuestion tocante sanger, i den cua palabra dje salmista nos te kere di curason?

⁵⁰ P’sei, e cuestion di sanger pe Testigonan di Jehova ta enbolbe e principionan di mas fundamental riba cua nan como cristian ta basa nan bida. Nan relacion cu nan Creador i Dios ta den e wega. Ademas, di curason nan ta kere e palabranan dje salmista: “Decision hudicial di Jehova ta berdad; nan a resultá henteramente husto. . . . Den wardamento di nan tin un recompensa grandi.”​—Salmo 19:9, 11.

⁵¹ Hende cu ta wak solamente e efecto riba término cortico di decisionnan por duda cu obedencia na ley di Dios tocante sanger ta ‘recompensador.’ Pero Testigo di Jehova ta sigur cu obedencia ne direccion cu ta bin di nan Creador ta pa nan bienestar duradero.

52, 53. Ki posicion cristian di promé a tuma i con esei a costa nan?

⁵² E cristiannan primitivo a sinti mescos. Historia ta mustra cu algun biaha nan obedencia na Jehova a ser poné na prueba te ne límite. Den e Imperio Romano nan a ser poné bao di presion pa practica idolatria of participa den inmoralidad. Nan nengamento pa cede ne presion por a resultá den tiramento di nan den e arena romano pa wordu habracá pa animalnan feros. Pero tal cristiannan a pega na nan fe; nan a obedecé Dios.

⁵³ Pensa kico esei a enbolbé. Pe cristiannan primitivo kendenan tabata mayor, e echo cu nan a nenga di viola e ley di Dios por a asta trece morto riba nan yiunan. Sin embargo, historia ta siña nos cu tal cristiannan no a bira lomba pa Dios pa temor of falta di fe, ni nan no a nenga e principionan pa cua nan a biba. Nan a kere e palabranan di Jesus: “Ami ta e resureccion i e bida. Ken cu ta eherce fe den mi, aunke e muri, lo e bolbe biba.” (Juan 11:25) P’sei, apesar dje costo inmediato, tal cristiannan a obedecé e decreto apostólico di abstene nan di cosnan sacrificá na ídolo, di fornicacion i di sanger. Esei a indica e balor halto cu fieldad na Dios tabatin pa nan.

54. Ki responsabilidad Testigonan di Jehova ta carga

⁵⁴ Awe, e fieldad aki tin e mesun balor pa Testigonan di Jehova tambe. Correctamente nan ta sinti e obligacion moral pa tuma decision tocante adoracion pa nan mes i pa nan yiunan. Pe motibo ei, Testigo di Jehova no ta spera pa ningun otro persona, sea ta un dokter of e administrador dje hospital of un hues tuma e decisionnan moral aki pa nan. Nan no ta desea pa otro persona purba carga nan responsabilidad dilanti Dios, pasobra en realidad ningun otro persona por haci esei. Esei ta un responsabilidad personal dje cristian pa cu su Dios i Dunador di Bida.

Rechaso ta un forma di suicidio?

55, 56. (a) Ki obhecion ta ser lantá na nengamento di transfusion di sanger? (b) Pakico Testigo di Jehova no por ser acusá di suicidio, segun e testimonio di otronan?

⁵⁵ Den un situacion di pérdida di gran cantidad di sanger debí na herida, enfermedad of complicacion kirúrgiko, hopi biaha transfusion di sanger a tuma lugar cu e intencion di conserva bida. P’sei, ora hende tende cu un persona ta rechasa un transfusion di sanger, nan por pensa cu e persona ei en realidad ta kitando su bida. Esei ta berdad?

Rechasando un transfucion di sanger ta “suicidio” of usamento di bo “derecho di muri?”

⁵⁶ Suicidio ta un intento pa kita bo mes bida. E ta un atentado pa logra auto-destruccion. Pero cualkier persona cu ta maske un tiki conocí cu creensia i práctica dje Testigonan di Jehova, por mira cu nan no ta atentando contra nan mes bida. Aunke nan ta rechasa transfusion di sanger, cu gusto nan ta acepta asistencia médico alternativo. Un artículo den The American Surgeon a comenta correctamente:

“Generalmente, rechasando atencion médico no ta ekivalente na ‘suicidio.’ Testigo di Jehova ta busca atencion médico, pero ta rechasa un solo faceta di atencion médico. Rechasando atencion médico of parti di tal atencion no ta un ‘delito’ cometí contra bo mes dor di un acto franco pa destrui, manera suicidio ta.” (Letter cursivo agregá.)¹⁷

Profesor Robert M. Byrn a mustra den e Fordham Law Review cu ‘rechaso di terapia pa salba bida i atentado pa suicidio, pa ley, ta mes diferente cu appel ta for di appelsina.’¹⁸ I papiando na un conferencia médico, Dr. David Pent di Arizona, Merca, a declará:

“E Testigonan di Jehova ta kere cu, si nan muri debí na nan nengamento di transfusion di sanger, nan ta muriendo pa nan creensianan mescos cu martir religioso di antigua a haci siglonan pasá. Si esei ta suicidio médico pasivo, anto tin varios dokter den auditorio awor aki mes cu ta humando sigaria, i esei probablemente ta encera un suicidio pasivo mescos.”¹⁹

57. Pakico nengamento di transfusion di sanger no ta un ehercicio di un hende su derecho di muri?

⁵⁷ Kico dje idea cu nengando transfusion di sanger Testigo di Jehova ta eherciendo un “derecho di muri?” Echo ta cu Testigonan di Jehova kier keda bibo. Ta p’sei nan ta busca asistencia médico. Pero nan no por i lo no violá nan conviccionan religioso profundamente ancrá i fundá riba e Bijbel.

58. Ki derecho cortenan a duna individuonan, i pakico esei ta lógico?

⁵⁸ Hopi biaha tribunalnan di husticia a sostené e principio di cu cada persona tin e derecho di integridad di curpa, nificando cu na final di cuenta un persona mes ta responsabel pa dicidi kico lo pasa cu su curpa. Esei no ta realmente loke bo ke si bo ta malo of hospitalisá? Siendo cu ta bo bida, bo salú i bo curpa, no ta abo mester tin e último palabra si un cierto cos lo ser hací cu bo of no?

59, 60. (a) Di kico e pashent ta e arbitro final? (b) Derecho i deber di un dokter ta limitá pa cua libertad di hende?

⁵⁹ Tin consecuencia lógico dje punto di bista inteligente i moral aki. Un foyeto cu e Asociacion Médico Mericano a producí ta splica: “E pashent mester ta e arbitro final en cuanto si lo e core rísico cu e tratamento of operacion recomendá pe dokter of risca biba sin dje. Esei ta e derecho natural dje individuo, reconocé pa ley.” “Un pashent tin e derecho di keda sin consenti cu un tratamento di salba bida. Di acuerdo cu esei, e por imponé tal término, condicion i limitacion segun su consentimento.”²⁰

⁶⁰ Esei ta berdad encuanto transfusion di sanger mescos cu e ta cu cualkier otro “tratamento di salba bida.” Dr. jur. H. Narr di Tübingen, Alemania, a declará: “E derecho i deber dje dokter pa cura ta limitá pe libertad básico di hende di determinacion propio tocante su mes curpa. . . . Mescos ta berdad pa otro intervencion médico, pues tambe pa nengamento di transfusion di sanger.”²¹

61. Kico ta e actitud di algun persona tocante conservacion di bida, pero cua pregunta esaki ta lanta?

⁶¹ Comprendiblemente, algun persona ta scandalisa ne idea di nengamento di sanger si esei por ta peligroso of asta fatal. Hopi ta kere cu bida ta e cos di mas importante, cu bida mester ta conservá a todo costo. Ta berdad cu conservacion di bida humano ta un dje interesnan di mas importante di sociedad. Pero esei ta nifica cu “conservacion di bida” mester bini promé cu cualkier i tur principio?

62. Di acuerdo cu N.L. Cantor, kico ta mustra cu e santidad di bida no ta e balor supremo, i con esaki por ta ilustrá?

⁶² Como contesta, e profesor asociá ne Scol di Derecho di Rutgers, a señalá:

“Dignidad humano ta aumenta dor di permiti e individuo determina pa su mes pa cua creensia ta bale la pena muri. Atraves dje siglonan, un multitud di causanan noble, religioso i seglar, a ser considerá como digno di sacrificio propio. Siguramente, mayoria gobierno i sociedad, incluyendo esun di nos, no ta considera santidad di bida como e cos di balor supremo.”²²

Señor Cantor a duna como ehempel e echo cu durante guera algun hende boluntariamente a enfrentá daño i morto bringando pa “libertad” of “democracia.” Nan compatriotanan a mira tal sacrificio pa motibo di principio como moralmente malo? Nan nacionnan a condeńa tal curso como innoble, ya cu algun di esnan cu a muri a laga atras biuda of huerfano den necesidad? Bo ta kere cu abogado i dokter mester a busca orden di corte pa preveni tal hende di haci sacrificio na fabor di nan ideal? No ta claro, anto, cu e Testigo di Jehova i cristian di promé no ta e úniconan pa acepta peliger pa motibo di principio? Echo ta cu hopi hende ta duna masha balor na tal lealtad na principio.

63. Ki posicion dje Testigonan ta exclui cualkier hende di purba forsa un tratamento riba nan cu ta viola nan principionan?

⁶³ Tambe, ta digno pa enfatisa atrobe cu, maske Testigo di Jehova no ta acepta transfusion di sanger, nan ta aprecia tratamento alternativo cu lo por mantene nan na bida. Pakico anto, cualkier hende mester insisti i asta forsa un cierto terapia cu ta viola completamente principio i creensia religioso profundo di un persona?

64. Ki declaracion a ser haci̇́ den un publicacion médico tocante dokternan cu ta purba forsa un cierto tratamento cu ta viola concenshi dje pashent?

⁶⁴ Sin embargo, el a sosodé. Algun dokter of administrador di hospital asta a bai corte pa haña autorisacion pa forsa sanger riba hende. Tocante esnan cu a sigui e curso aki, Dr. D. N. Goldstein a skirbi den The Wisconsin Medical Journal:

“Dokternan cu a adoptá e posicion aki a nenga sacrificio di tur martir cu a glorificá historia cu nan debocion supremo na principio asta ora esei a costa nan bida. Pasobra tal pashent cu ta scoge un morto sigur mas bien cu viola un creensia religioso ta di e mesun indole cu esnan cu a paga cu nan bida dor di nan fe den Dios of cu a bai riba brandstapel mas bien cu acepta bautismo [forsá]. . . . Ta nos deber pa salba bida pero nos por wel puntra si nos no tin un deber tambe pa proteha integridad i conserva e poco señalnan di autencidad personal cu ta sigui presenta den un sociedad cu ta mas i mas reglamentá. Ningun dokter mester busca asistencia legal pa salba un curpa dor di destrui un alma. Bida dje pashent ta di su mes.”²³

E papel di dokter

65, 66. Pakico un dokter por sinti su mes afligi̇́ ora di trata cu un Testigo kende ta rechasa un transfusion di sanger?

⁶⁵ Nos a mira cu, pa motibo di nan creensia religioso fuerte, Testigonan di Jehova ta evita tanto cuminda cu ta contene sanger i sanger administrá médicamente. Pero con otronan ta ser afecta pe posicion aki, tal manera dokternan cu ta trata pashentnan Testigo?

⁶⁶ Dokternan ta dedica pa salba of prolonga bida. Esei ta nan profesion. Consecuentemente, ora un dokter, educá pa mira transfusion di sanger como un práctica normal, ta trata un pashent kende ta seriamente malo of kende a perde hopi sanger, lo e por sinti su mes afligí si e pashent nenga sanger. Aunke e pashent su concenshi entrená bíblicamente lo no por permiti un transfusion di sanger, e dokter tambe tin un concenshi i ta sigui ética cu ta sumamente importante pe.

Un dokter mester sigui su mes entrenamento médico i conviccion si e sinti cu un transfusion di sanger, aunke rechasá pe pashent, ta necesario pa scapa su bida?

67, 68. Di acuerdo cu cua principio médico i legal un cirugano por keda sin sigui su mes conviccionnan si nan ta viola concenshi di un pashent?

⁶⁷ No cabe duda cu den tal caso ta existi un situacion delicado. Pero nos cada un por puntra: Si ami tabata den un situacion caminda tabatin conflicto entre mi concenshi como pashent i e sincero conviccion di un dokter cu ta trata mi, cua curso mi ta kere mester ser siguí? Considera e observacionnan cu Dr. William P. Williamson a haci ne Promé Congreso Nacional riba Etica Médico i Profesionalismo:

“Siguramente, e promé pensamento dje dokter mester ta e bienestar dje pashent. Siendo cu bida ta un don dje Creador ne individuo, e decision primario ta pertenece correctamente ne pashent, pasobra e pashent ta custodia tal don. . . . E dokter mester trata e pashent segun e rekisitonan di religion dje pashent, i no forsa su mes conviccionnan religioso riba e pashent.” (Letter cursivo agregá.)²⁴

⁶⁸ Tin un otro motibo, uno legal, pa cua e concenshi dje pashent no mester ta pasá por halto. Manera Profesor Byrn a skirbi den Fordham Law Review: “ . . . mi no kier men cu e dokter ta obligá dor dje opcion dje pashent di haci algo contrario ne concenshi dje dokter. . . . Mi kier men cu e pashent no ta obligá dor dje dokter su concenshi pa haci algo contrario cu e opcion dje pashent, i consecuentemente, e dokter por tin e derecho i opcion di no haci nada. E ley di consentimento informá lo keda sin nificacion si e opcion dje pashent tabatin cu cede ne huicio dje concenshi médico.” (Letter cursivo agregá.)²⁵

69, 70. Na lugar di bandona un caso, kico un dokter mester haci ora e ta enfrentá un situacion caminda e pashent ta nenga di acepta un transfusion di sanger?

⁶⁹ E posibilidad ta existi pe dokter den e situacion aki ‘no haci nada,’ esta, retira dje caso; pero esei ta e único alternativa? Den su artículo “Proceduranan Kirúrgiko di Emergencia den Testigonan di Jehova Adulto,” Dr. Robert D. O’Malley a comentá: “E pashent su nengamento di acepta transfusion di sanger no mester ser usá como un excuus pe profesion médico pa bandona un caso.”²⁶

⁷⁰ Kico un dokter por haci anto? Dr. J. K. Holcomb a declará den un editorial di un publicacion médico:

“Sin duda, nos, como dokter, ta sinti nos frustrá, asta rabiá, ora un pashent cabesura nenga di acepta loke nos lo considera e régimen di terapia preferí. Pero, nos mester sinti nos honestamente asina ora e pashent ta cita un creensia religioso como e base pa su nengamento di acepta un tratamento specífico? Si nos ta honesto cu nos mes, nos lo admiti cu nos ta contento dunando hopi pashent algo menos cu e terapia ideal den nos práctica diario. . . . Si nos por haci esei relacioná cu nos conviccionnan médico, nos lo no mester ta dispuesto tambe pa haci nos sumo posibel ora conviccion di un pashent, particularmente esnan religioso, impedi nos ofrecimento di loke nos lo considera e forma di terapia deseabel? Generalmente, pashentnan cu tin motibo religioso pa no acepta transfusion di sanger, etc. ta na altura di rísico médico enbolbí den nan decision, pero ta dispuesto pa acepta tal rísico i ta puntra solamente pa nos haci nos sumo posibel.”²⁷

71. Kico por ser bisá dje obligacionnan moral di tanto e pashent como e dokter encuanto tratamento ”extraordinario”?

⁷¹ Tin un otro consideracion pa loke ta trata e aspecto moral dje asunto. John J. Paris, profesor asistente di ética social, a señalá: “Tin un gran consenso den tanto e comunidad médico i moral cu un hende no tin obligacion moral pa somete su mes na un tratamento médico ‘extraordinario.’ I si e pashent no tin obligacion moral pa somete su mes na un tratamento ‘extraordinario’​—apesar cu e por ta comun den práctica regular​—anto ni e dokter tin obligacion pa suministré; ni e hues pa ordené.”²⁸ Pa Testigonan di Jehova, kendenan ta hiba nan bida di acuerdo cu e Bijbel, transfusion di sanger siguramente ta un tratamento ‘extraordinario.’ Realmente, e ta moralmente prohibí.

Cooperacion entre pashent i dokter

72. Ki posicion Testigonan ta tuma encuanto tratamento médico en general, pero cu ki excepcion?

⁷² Tur hende cu tin di haber cu e asunto aki por ta sigur cu Testigo di Jehova no ta fanático cu ta opone cuido médico. Corda cu Lucas, kende a skirbi e relato bíblico dje decreto contra sanger, tabata un dokter e mes. (Colosense 4:14) Pues, ora Testigo di Jehova ta malo of sufri un accidente, nan no ta spera riba un curacion milagroso di “fe sanador.” Mas bien, nan ta busca yudansa médico. Den esaki nan no ta purba dicta con dokter mester practica medicina ni sikiera bisa con nan problema particular mester wordu tratá. Loke sí nan ta pidi dokternan cu consistencia ta pa no usa sanger.

73. Cua echonan Testigonan ta aprecia relacioná cu na posicion encuanto sanger?

⁷³ E Testigonan tin un respet halto pa entrenamento i aptitud di personanan den e campo médico. Nan sinceramente ta aprecia dokternan cu ta usa nan habilidad pa trata un pashent, pero cu ta haci esei na armonia cu e pashent su creensianan conciensial. Testigonan ta reconoce cu curashi ta necesario pa un dokter opera sin cu e ta liber pa usa sanger. Tambe, un midí di curashi ta necesario pa un dokter bai contra punto di bista di su contemporaneonan médico i bai di acuerdo pa practica medicina bao di condicionnan cu otro por considera médicamente inferior.

74. Di ki echo Testigonan ta conciente, i kico nan ta dispuesto pa enfrenta?

⁷⁴ Naturalmente, Testigo di Jehova ta conciente cu algun procedura kirúrgiko lo por enbolbe asina tanto pérdida di sanger cu un dokter por haña honestamente cu tal operacion no por ta hací bao di condicion cu e Testigonan ta presenta. Sin embargo, mayoria operacion por ta hací sin sanger. Ta berdad cu dokter por kere cu dor di no usa sanger e operacion ta bira mas peligroso. Pero e Testigonan ta dispuesto pa enfrenta tal mayor rísico cu e yudansa di dokternan hábil cu curashi.

75. Cua conclusion por a saca den un caso extremo despues di un operacion exitoso sin sanger?

⁷⁵ Durante un discusion di foro ne Universidad di Pennsylvania, Dr. William T. Fitz a conta un caso interesante. Tabata tocante un pashent di trinta i cuater aña di edad cu a sangra profusamente debí na un tumor na su tripa grandi. E homber, un Testigo di Jehova, a bisa e dokternan cu “gustosamente lo e somete su mes na cualkier operacion con tal cu sanger no ser duná na dje.” E dokternan a bai di acuerdo pa opera, primintiendo cu nan lo no suministra sanger. Durante i despues dje operacion pérdida di sanger tabata asina grandi cu hemoglobina dje pashent, cu ta normalmente 14 pa 15 gram, a baha na 2,4 gram. Pero e no a muri. Mas bien, su condicion a stabilisá i anto su hemograma (nivel di hemoglobina) a subi. Comentando riba promesa dje dokternan di no suministra sanger, Dr. Francis Wood, presidente dje Departamento di Medicina a bisa: “Mi ta kere cu boso tabatin tur derecho di priminti. E homber lo a muri si boso no a operé. E tabatin algun posibilidad di bira bon como resultado dje operacion sin transfusion di sanger; pe motibo ei, mi ta kere cu boso tabata completamente hustificá di duné e chens bao di su mes condicionnan.”²⁹

Exonerando dokternan dje responsabilidad

76. Pakico dokternan no mester tene miedo cu Testigonan por demanda nan pa tratamento incompleto of ilegal pa motibo di nan posicion riba sanger?

⁷⁶ Dokternan ta den un posicion dificil ora nan ta trata cualkier caso serio, pasobra si nan keda sin usa tur procedura médico disponibel, nan por ser demandá pa tratamento incompleto of ilegal. Testigo di Jehova, sin embargo, ta dispuesto pa carga e responsabilidad di nan nengamento pa acepta transfusion di sanger. Nan lo firma documento legal cu ta exonera personal médico i hospital di cualkier preocupacion di demanda cu nan por haña, den caso cu nan ser culpá di a operá sin sanger.

77. Kico ta e esencia dje formulario cu e Asociacion Médico Mericano a recomendá pa pashentnan cu ta nenga transfusion di sanger firma?

⁷⁷ E Asociacion Médico Mericano a recomendá uso di un formulario entitulá “Nengamento pa Permiti Transfusion di Sanger” pa pashent cu lo no acepta sanger pa motibo di creensia religioso. E ta bisa: “Mi (Nos) no kier pa sanger of derivado di sanger ser suministrá na ‐‐‐‐‐‐‐‐‐‐ durante su hospitalisacion, ni maske tal tratamento por ser considerá necesario segun opinion dje dokter cu ta atende of su asistentnan pa conserva bida of promove recobramento. Mi (Nos) ta exonera e dokter cu ta atende, su asistentnan, hospital i su personal di cualkier responsabilidad pa resultado adverso debí na mi (nos) nengamento pa permiti uso di sanger i su derivadonan.”³⁰ E documento aki mester ser fechá i firmá pe pashent i e testigonan presente. Un famia cercano manera e casá of mayor (den caso di un mucha) por firma e formulario tambe.

78. Con e Testigonan ta demostra cu nan ta dispuesto pa acepta responsabilidad personal pa nan nengamento di transfusion di sanger?

⁷⁸ Otro muestra cu Testigo di Jehova ta dispuesto pa acepta nan responsabilidad personal tocante nan posicion riba sanger ta ser mirá den e echo cu mayoria ta cana cu un karchi firmá riba cua tin skirbí “No Acepto Transfusiones!” E documento aki ta reconoce cu e firmante ta realisa i acepta e implicacionnan di no tuma sanger. Pues, asta ora e ser hibá den estado inconciente cerca un dokter of hospital, e declaracion firmá aki ta haci cla su posicion firme.

Por considera un dokter of hospital responsabel si no duna sanger?

79. Kico ta e probabilidad cu un dokter por ser demandá dor di no a forsa un transfusion di sanger riba un pashent?

⁷⁹ Un artículo den e revista University of San Francisco Law Review a considerá e punto aki. El a splica cu e hues Warren Burger, kende a bira presidente dje corte supremo di Estados Unidos, a bisa cu un proceso pa tratamento médico eróneo “lo parce sin apoyo” den caso cu e persona a firma un documento di exoneracion. E artículo a continuá:

“E posibilidad di un acusacion criminal ta asta mas remoto ainda. Un comentarista cu a examiná e literatura a informá, ‘Mi no por a haña ningun autoridad pe declaracion di cu e dokter lo incuri den responsabilidad . . . criminal dor di no a forsa un transfusion riba un pashent indispuesto.’ E rísico parce mas e producto di un mente legal fértil cu un posibilidad real.”³¹

80. Kico ta e situacion na Inglatera ora un pashent muri pa motibo cu el a nenga un transfusion di sanger?

⁸⁰ Tocante e situacion na Inglatera, Emergencies in Medical Practice a bisa: “Si e posicion a ser hací cla ne pashent i e muri sin ricibi transfusion, ningun accion por ser tumá contra e dokter pasobra ningun pashent ta obliga pa conserva su bida mediante uso di medida special of extraordinario.”³²

81, 82. Ki obligacion moral un dokter tin, pero ki obligacion moral e no tin?

⁸¹ Un dokter cu ta considera pa somete un pashent na un operacion kirúrgiko naturalmente kier splica claramente kico ta e posibel rísiconan di nenga sanger. Pero una bes cu el a haci esaki, e dokter no mester sinti ningun obligacion moral pa hiba e asunto mas aleu. Siguramente lo no ta ético pa “agota su resistencia” of spanta un pashent kende a keda determiná di no acepta sanger.

⁸² SSiendo cu Testigo di Jehova boluntariamente ta acepta responsabilidad pa nan decision, dokternan ta legalmente i, de facto, moralmente exonerá di tur obligacion pa insisti riba sanger. I ta asina hopi dokter ético i sincero ta prefera e situacion. “Hende no por spierta demasiado urgente contra un debilitacion dje derecho humano pa auto-determinacion, incluyendo esun dje pashent,” segun e cirugano G. Haenisch di Hamburg, Alemania. “Un otorgamento di autoridad pa e dokter cuminsa un tratamento cu e ta kere ta correcto aunke esaki ta contra e boluntad dje pashent mester ser rechasá firmemente.”​—Deutsche Medizinische Wochenschrift.³³

83. Di kico un dokter por wordu acusá si el a forsa un transfusion di sanger riba un pashent Testigo?

⁸³ Den bista dje derecho humano aki, publicacionnan hurídico i médico den algun pais repetidamente a advertí cu dunamento di transfusion contra deseo di un pashent por expone un dokter (of personal di hospital) na acusacionnan di asalto i agresion of un demanda hustificá pa tratamento eróneo of ilegal.

Kico di dunamento di sanger sin bisa e pashent, kisas ora e ta inconciente?

84, 85. Cua curso di un dokter lo ta ”éticamente di masha mal gusto”, i pakico esaki ta asina?

⁸⁴ Hopi dokter sincero ta kere cu den algun situacion, manera den caso di cancer incurabel, ta bondadoso pa no duna e pashent informacion completo tocante su condicion. Aunke por tin varios opinion encuanto si ta apropiado of no pa duna tur detaye dje condicion di un pashent, e ta masha diferente dje echo cu un dokter deliberadamente ta duna un tratamento cu e sa cu e pashent a prohibí. Skirbiendo den New York State Journal of Medicine, Dr. Bernard Garner i su asociadonan a accentuá e punto aki. Nan a reconocé cu tabatin ocasion cu un dokter a laga un pashent Testigo bira inconciente anto duné sanger, pensando kisas ‘Loke e no sa lo no hacié daño.’ Pero nan a concluí enfáticamente: “Aunke e motibo por ta altruista, éticamente esaki lo ta di masha mal gusto.”³⁴

⁸⁵ Pakico esaki ta asina tabata hací cla pa Marcus L. Plante, profesor di ley, dje Scol di Derecho dje Universidad di Michigan. El a skirbi cu “e dokter tin un relacion fiduciaria [fundá riba confiansa] cu su pashent i mester ta un obligacion absoluto di hamas gaña e pashent ni cu palabra of manteniendo silencio pa loke ta e naturalesa i caracter dje tratamento médico cu e ta proponé pa emplea.”³⁵

86, 87. (a) Kico Medical Tribune di Alemania Occidental tabatin di bisa riba dunamento di un transfusion di sanger na un pashent siendo e tabata inconciente? (b) Ki declaracion di un corte a subrayá e posicion aki, hibando na cua conclusion?

⁸⁶ Ademas, den algun lugar, un dokter cu priminti pa no duna sanger i hacié toch clandestinamente ta cometiendo un acto ilegal. Por ehempel, den Medical Tribune di Alemania Occidental, a ser apuntá cu “nada ta cambia ora e pashent bira inconciente.” Esaki ta asina pasobra ‘una bes cu un rechaso pa acepta transfusion di sanger ser expresá claramente pa un pashent competente, e ta balido tambe den caso cu e bira inconciente.’³⁶ Subrayando e asunto cu mas énfasis, e corte supremo di Kansas a declará:

“ . . . Cada hende ta ser considerá como doño di su mes curpa, i si e ta bon na cabes, e por prohibi claramente e ehecucion di cirugia pa salba bida of otro tratamento médico. Un dokter por wel kere cu un operacion of forma di tratamento ta deseabel of necesario pero ley no ta permitié substitui su mes huicio pa esun dje pashent mediante ningun forma di artificio of engaño.” (Letter cursivo agrega.)³⁷

⁸⁷ Consecuentemente, engañando un Testigo di Jehova dor di duné sanger den scondí ta contra di ética profesional cu dokternan cu moral tin. Un dokter por ser demandá pe motibo ei.

Respetando responsabilidad dje mayornan

88, 89. (a) Ki aspecto dje tópico aki ta mas altamente cargá cu emocion?? (b) Con e Testigonan ta sinti tocante esaki, i pakico?

⁸⁸ Probablemente e aspecto dje asunto aki mas altamente cargá cu emocion ta enbolbe tratamento cu un yiu. Nos tur ta realisa cu mucha mester di cuido i proteccion. Particularmente mayornan temeroso di Dios ta compronde esaki. Nan ta stima nan yiunan profundamente i ta sinti intensamente e responsabilidad cu Dios a duna nan pa cuida nan i tuma decision pa nan bienestar duradero.​—Efesio 6:1-4.

⁸⁹ E sociedad tambe ta reconoce responsabilidad di mayor, reconociendo cu mayornan ta esnan principalmente autorisá pa provee i dicidi pa nan yiunan. Lógicamente, creensia religioso dje famia ta influencia esaki. Yu ta beneficia siguramente si religion di nan mayornan ta enfatisa e necesidad pa nan cuida nan. Esei ta e caso cu Testigo di Jehova, kendenan di ningun manera kier neglisha nan yiunan. Nan ta reconoce cu ta nan obligacion duná dor di Dios pa percura cuminda, paña, dak i cuido médico pa nan. Ademas, un aprecio genuino dje necesidad pa percura pa nan yiunan ta rekeri tambe pa inculca den nan moralidad i respet pa loke ta correcto. Manera a ser mencioná, e promé cristiannan tabata ehemplar den esaki; e mayornan a siña nan yiunan i personalmente a cumpli cu siñansa moral cu nan a expresá. Historia ta mustra nos con tin bia famianan henter tabata exponé na morto den arena romano debí cu mayornan no a violá nan creensia di concenshi.

90. (a) Kico a resultá dje falta di educacion di mayornan? (b) Na contraste, kico mayornan Testigo ta haci?

⁹⁰ Nos tur ta na altura cu e falta di siñansa i ehempel moral di mayor a contribuí ne echo cu hopi hoben awe no tin balornan básico; poco ta importa nan pone nan salú i bida na peliger, i tambe bida di otro, den un búskeda desenfrená di sensacion. No ta mucho mas mihor pa hobennan tin mayornan kendenan ta promove moralidad i respet pa principionan halto? Mayornan kendenan ta Testigo di Jehova ta mustra gran amor tanto pa nan yiunan como pa nan Dios dor di usa e Bijbel pa yuda nan yiunan bira personanan moral. Pues, ora tal mucha ta suficiente grandi pa sa loke e Bijbel ta bisa tocante sanger, nan mes ta apoya decision di nan mayornan pa ‘abstene di sanger.’​—Echo 15:29.

Un dokter mester sinti cu e mester duna sanger na un mucha apesar di deseo fuerte dje mayornan i kisas asta dje mucha mes pa no haci esei?

91, 92. Pakico un dokter no mester sinti cu e ta obligá na duna un mucha un transfusion di sanger apesar dje deseonan firme dje mayornan contra esaki?

⁹¹ Francamente, den bista dje derecho bon-reconocí di mayor di carga nan responsabilidad, e posicion moral, di principio i consistente pa un dokter ta di reconoce cu mayor amoroso cu ta preocupa pa nan yiunan tin e responsabilidad di tuma decision pa nan yiunan menor.

⁹² Tocante esaki, Dr. A. D. Kelly, secretario dje Asociacion Médico Canades, a skirbi cu “mayor di menornan i pariente cercano di pashent cu a cai den inconciencia ta posee e derecho di interpreta e boluntad dje pashent i cu nos mester acepta i respeta nan deseo. . . . Mi no ta admira e trámitenan di un corte dudoso cu ta reuni 2:00 di marduga pa kita un mucha for di custodia di su mayornan.”³⁸

93. Pakico ta fundamentalmente inconsistente pa forsa un transfusion di sanger riba yiu di mayornan Testigo?

⁹³ Algun persona di profesion médico i hurídico a reconocé cu un adulto competente tin e derecho pa rechasa un transfusion di sanger. Pero nan ta bisa cu si mayornan ta nenga permit pa nan yiu, anto un transfusion mester wordu forsá pa ordu di corte. Sin embargo, e posicion aki ta carece di consistencia i armonia fundamental, manera a ser señalá den e publicacion Forensic Science:

“Nos mester supone anto, cu e tribunalnan ta dispuesto na asigna ne yiunan un religion diferente cu esun dje mayornan, ora estadística ta mustra cu e gran mayoria di mucha ta ser criá i ta sigui den e mesun confesion religioso di nan mayornan? Esaki lo no ta un situacion tambe den cua e tribunal lo ta violando e mesun derechonan religioso dje muchanan cu e tribunal ta tratando di proteha pe adultonan bao dje Promé Enmienda [dje Constitucion] dor di no permiti pa un transfusion ser hací ora e adulto tin obhecion? E cortenan no ta asignando en esencia un religion na esnan menor di edad si nan ta nenga transfusion pa motibo religioso pe adultonan i ta permiti esei tuma lugar pe yiunan dje mesun adultonan?”³⁹

94. Mensiona un inconsistencia grave cu ta ser cometé den algun hospital.

⁹⁴ Hopi bia tin un inconsistencia grave den forsa un transfusion di sanger riba un mucha kende su mayornan a pidi pa otro terapia médico ser aplicá. Na algun hospital, dokternan den un camber por ta forsando transfusion riba un mucha. Toch, den un otro camber ei cerca, otro dokternan por ta cometiendo abortonan legal, cabando cu bida solamente algun luna mas jong cu e mucha riba kende sanger ta ser forsá ‘pa salba un bida.’ Esaki a pone hopi hende pensativo puntra nan mes si ‘conservacion di bida’ semper ta e cuestion berdadero tras di transfusionnan forsá.

95. Kico un docente escoces tabatin di bisa tocante forsamento di transfusion di sanger riba adulto i mucha?

⁹⁵ Considera loke ta implicá den tratamento médico autorisá pa e estado cu forsosamente ta kita e derecho di responsabilidad di mayor riba nan yiunan. Na Escocia, A. D. Farr, un docente universitario riba técnica di transfusion di sanger, a skirbi en relacion cu transfusion forsá riba adulto i mucha:

“Revocando un creensia religioso minoritario ta extende na revoca henter e principio di cu un adulto ta ser permití pa acepta of rechasa un forma particular di tratamento médico. . . . E estado ta bai apoderando gradualmente dje funcion di tuma decision pe individuo. Asina pais liber ta stop di ta liber i ta bira totalitario. Siguramente tabata dor di apodera dje muchanan aleman pa hinka nan den e movimento di Hubentud di Hitler cu finalmente a caba cu libertad i privacidad den Alemania nazista. Esaki no ta simplemente un speculacion imaginario. Libertad ta un posesion precioso i comparativamente raro, cu mester wordu vigilá celosamente den pais den cua e ta existi. Cualkier usurpacion di libertad individual ta uno di mas.”⁴⁰

96, 97. Con e principio di scogemento den tratamento médico ta bai contra di transfusion di sanger forsá?

⁹⁶ Ademas, asta ora un dokter sinceramente ta kere cu un mucha mester di un transfusion di sanger, esei kier men cu ningun otro terapia lo yuda? Of esei kier men cu en bes di esei e ta kere cu un transfusion ta ofrece mas probabilidad di éxito cu terapia alternativo? Relacioná cu esaki un concilio di hues na Estados Unidos a skirbi den “Guia ne Hues den Ordu Médico cu ta Afecta Menornan:

⁹⁷ “Si por scoge entre proceduranan​—sí, por ehempel, e dokter ta recomenda un procedura cu tin 80 porciento chens di éxito pero cu e mayornan ta desaproba, i e mayornan no tin obhecion pa un procedura cu tin solamente 40 porciento chens di éxito​—e dokter mester tuma e curso médicamente mas riscante pero pa cua e mayornan no tin obhecion.”⁴¹

98. Ki echo tocante e caracter di conocimento médico, mas aleu ta bai contra di transfusion di sanger forsá?

⁹⁸ Tambe e huesnan ei a bisa cu “conocimento médico no ta suficientemente avansa pa permiti un dokter predisi cu exactitud razonabel cu su pashent lo biba of muri of lo sufri daño físico permanente of deformacion.” No tin hopi berdad den esei? Autoridadnan médico no ta enfatisa cu a lo mihor cu nan por bisa ta loke probablemente por sosode? Di acuerdo cu esei, hopi dokter i cirugano respetá a cooperá cu Testigo di Jehova, proveendo tratamento médico excelente pa hoben i bieu respetando nan conviccionnan basá riba e Bijbel tocante sanger.

Tratando e “hende completo”

99. Ki influensia e principio di trata e hende completo tin riba transfusion di sanger forsá?

⁹⁹ Esnan den e campo médico ta comprendiendo cada bes mas mihor cu ta importante pa trata e pashent como un “hende completo.” Loke mester di tratamento no ta djis un schildklier of un higra, pero henter e persona, un hende humano cu sintimento i creensia cu de facto por influensia su reaccion ne tratamento. Den un editorial di Texas Medicine, Dr. Grant F. Begley a skirbi cu “ora mi ta trata un malesa cu ta afecta e curpa, mente i spiritu dje persona den mi cuido, ta loke e ta kere ta importante. Su creensianan, no di mi, ta esnan cu ta pone sinti miedo, duda i culpa. Si mi pashent no ta kere den transfusion di sanger, loke ami ta kere tocante esei no ta importa.”⁴²

100, 101. Kico por ser bisá di curamento dje curpa siendo cu e spiritu dje persona ta ser kibrá?

¹⁰⁰ Tratando e “hende completo” ta tanto humano como práctico den bista dje resultadonan trágico cu por bini dor di haci lo contrario. “E médico perceptivo,” manera Dr. Melvin A. Casberg a urgi den The Journal of the American Medical Association, “mester ta na altura di tal facetanan dje curpa separá pero relacioná cu otro, e curpa, mente i spiritu, i compronde cu sanamento dje curpa a costo di un mente of spiritu kibrá ta solamente un victoria parcial, of asta finalmente un derota.”⁴³

¹⁰¹ Un dokter pues ta siguiendo e curso di sabiduria i tratando e “hende completo” ora e ta mustra respet pe pashent su conviccionnan religioso encuanto uzo di sanger.

Nan posicion ta medicamente irrazonabel?

102-104. Kico ta apoya e echo cu e posicion di Testigonan tocante transfusion di sanger no ta irrazonabel?

¹⁰² Aunke e obhecion fundamental di Testigo di Jehova pa transfusion di sanger ta pa motibo religioso, hopi persona ta mira e posicion aki como uno médicamente irrazonabel. Pero e ta? Ya cu e posicion cu Testigo di Jehova a adoptá contra sanger ta relaciona cu un cuestion médico, ta probechoso pa examina brevemente e implicacionnan médico di rechasa sanger.

¹⁰³ Na solamente Estados Unidos, Hapon i Francia, rond di 15 miyon unidad (500 cc. cada un) di sanger ta ser transfusioná tur aña. Ta apropiado pa puntra: Tur e sanger aki ta ser duná pasobra e ta necesario pa salba bida?

¹⁰⁴ E conclusion na cua 800 dokter europeo congregá na Paris a yega tabata cu “sanger ta ser considerá cu demasiado frecuensia como un ‘tónico milagroso’ duná ne pashent sea e tin of no tin mester di dje.” E dokternan aki a desaproba particularmente transfusion di un solo unidad, di cua nan a bisa cu “di cada 100, 99 ta inutil.”⁴⁴ Un estudio na Estados Unidos a sugerí cu 72 porciento dje transfusionnan duná na algun lugar ta ‘innecesario of cuestionabel.’⁴⁵

105, 106. Pakico algun dokter ta faya na mira transfusion di sanger di un manera obhetivo, i pakico algun hues a recomenda tratamento alternativo?

¹⁰⁵ Dr. Rune Eliasson di Stockholm, Suecia, a opiná “cu hopi dokter, kisas engañá pe poder dje palabra riba e mente, a permití nan mes ser ciegá demasiado facil pe halo cu nan mes a pone rond di transfusion di sanger, di manera cu nan no por mira bentaha i desbentaha dje forma di tratamento aki den nan propio perspectiva.”⁴⁶

¹⁰⁶ Sea bo ta of no di acuerdo cu e motibonan religioso pakico Testigo di Jehova no ta acepta transfusion di sanger, “bentaha i desbentaha dje forma di tratamento aki” merece consideracion. Esaki ta specialmente asina ya cu algun hues, discutiendo tocante transfusion di sanger, a recomendá pa deseo di un pashent pa tratamento alternativo ser siguí si tin un rísico distinto asociá cu e tratamento normal.

Sanger​—complica i unico

107, 108. Cua echo tocante sanger tin un influensia fuerte riba e balor di transfusion di sanger?

¹⁰⁷ Mientras algun hende por ta lihé pa yama nengamento di sanger un “suicidio,” un acercamento imparsial dje asunto ta rekeri pa reconoce e echo cu tin insiguridad i asta peliger asociá cu transfusion di sanger.

¹⁰⁸ Dokternan sa cu sanger ta extremamente complica. Esaki ta ser manifestá asta den djis e asunto di tipo di sanger. Obranan di referencia ta declara cu tin rond di diessinco pa diesnuebe sistema di grupo di sanger conocí. Tocante solamente un di nan, e sistema di grupo di sanger Rh, un buki reciente tocante sanger a bisa cu “ne momento aki casi trescien diferente tipo di Rh por ser reconocé teoréticamente.”⁴⁷

109-111. Ki otro caracteri̇́stica di sanger tin influensia riba e factor di ri̇́sico den transfusion di sanger?

¹⁰⁹ Un otro aspecto dje complexidad i singularidad di sanger di cada persona ta e variedad di anticuerpo den dje. Na un reunion di científico na Zurich, Suisa, un grupo di criminólogo ingles a señalá cu tin asina tanto variacion di anticuerpo cu por bisa cu e sanger di cada persona ta specífico i único. Científiconan ta spera di por “reconstrui for di un mancha di sanger e imagen dje personalidad di cada persona cu ta laga un spor di sanger atras.”⁴⁸

¹¹⁰ E echo cu sanger ta un tegido extremamente complica cu ta diferenciá di persona pa persona ta hunga un papel importante den loke ta toca transfusion di sanger. Esaki ta un punto cu Dr. Herbert Silver, dje division di banco di sanger i inmunohematologia dje hospital di Hartford (Connecticut) a trece dilanti recientemente. El a skirbi cu, considerano solamente e factornan sanguineo pa cua testnan por ser hací, “tin menos di 1 chens den 100.000 pa duna un persona sanger cu ta exactamente manera esun di dje.”⁴⁹

¹¹¹ Consecuentemente, hopi hende, sea cu nan tin obhecion religioso pa transfusion di sanger of no, por nenga transfusion di sanger simplemente pasobra esei ta esencialmente transplante di un órgano cu a lo mihor ta solamente parcialmente compatibel cu nan mes sanger.

Transfusion di sanger—cuanto berdadero peliger?

112-114. Ki testimonio tin pa mustra cu transfusion di sanger ta enbolbe ri̇́sico?

¹¹² Doctors know that with any medical preparation there is a measure of risk, even with medicines as common as aspirin and penicillin. Accordingly, it might well be expected that treatment with a substance as complex as human blood involves some danger. But just how much danger? And what bearing might this have on a physician’s view of the stand taken by Jehovah’s Witnesses?

¹¹³ Un evaluacion franco dje echonan ta proba cu transfusion di sanger mester ser considerá honestamente como un procedura cu ta enbolbe peliger considerabel i cu ta asta potencialmente mortífero.⁵⁰

¹¹⁴ Dr. C. Ropartz, director dje departamento central di transfusion na Rouen, Francia, a comenta cu “un botter di sanger ta un bom.” Siendo cu e resultadonan peligroso lo no aparece sino te despues di algun tempo, el a agregá, “ademas, e por ta tambe un bom di tempo pe pashent.”⁵¹ Un publicacion dje gobierno di Estados Unidos tabatin un artículo riba peligernan di sanger i a bisa cu

“ . . . dunamento di sanger por ta compará cu manda un pistol cargá pa un persona cu no ta sospecha nada i cu no ta prepará pe. . . . Mescos cu un pistol cargá, tin un klep of boton di siguridad cu ta regla transfusion di sanger. Pero, cuanto persona no tin cu a muri di herida di bala di pistol pasobra nan a kere cu e boton tabata riba ‘sigur’?”⁵²

Dokternan bon informá por descarta e peligernan declará aki como exageracionnan?

115-117. Pakico dokternan bon informá no por descarta e peligernan di transfusion di sanger como algo exagera?

¹¹⁵ Dificilmente, pasobra hopi bia dokternan ta ser confrontá cu e realidad dje peligernan.“Ningun producto biológico,” Winfield S. Miller a skirbi den Medical Economics, “tin un potencial mas grandi cu sanger pa comete eror fatal den práctica médico. Mas cu un dokter a siña pa su tristesa cu cada botter di sanger den banco di sanger ta un botter potencial di nitroglicerina.”⁵³

¹¹⁶ E pashent i su famia kisas no ta realisa e peligernan te ora ta lat caba. Dr. J. Garrott Allen di Universidad di Stanford, un experto prominente riba e poblema di sanger, a calculá cu transfusion di sanger ta mata por lo menos 3.500 mericano tur aña i ta lesiona 50.000 mas.⁵⁴ Pero tin motibo fuerte pa kere cu esaki en realidad ta un balotacion abou. Por ehempel, e Southern Medical Journal recientemente a sugerí cu e cálculo di “entre 3.000 i 30.000 morto cu por ta atribuí na transfusion” ta probablemente un cálculo conservativo.⁵⁵ I tene na mente cu e cifranan aki ta solamente pa un pais, sin bisa nada ainda dje resto di mundo.

¹¹⁷ Na un reunion dje Colegio Mericano di Cirugano, Dr. Robert J. Baker a informá cu e ‘peliger di efecto adverso di sanger ta mucho mas grandi cu nan a kere anteriormente, cu un di cada 20 pashent desaroyando un reaccion.’ Cuanto hende ta realisa esaki? Mustrando pakico tal informe mester preocupa nos tur, Dr. Charles E. Huggins, director asociá di un banco di sanger grandi, a agregá: “E informe ta hinka miedo den hende pero e ta realístico pasobra e mesun problemanan ta enfrentando tur institucion [rond] mundo.”⁵⁶

118. Tin un probabilidad di alivio for di problema relacioná cu transfusion di sanger? Si no tin, pakico no?

¹¹⁸ Tin alivio na bista? Hopi hende, kisas asta algun den e profesion médico, por kere cu ciencia a bin ta logrando berdadero adelanto den vence e peligernan di transfusion di sanger. Pero manera a ser declará den un reciente edicion dje publicacion Surgery, “a presentá problema nobo relacioná cu transfusion masivo, problema cu casi of no tabata ser considerá te cu cinco aña pasá, pero cu ta domina casi tur problema cu a persiguí concenshi di esnan encarga cu banconan di sanger, e clíniconan i investigadornan durante e prome 40 añanan di wardamento clínico di sanger.”⁵⁷

Ki peliger tin?

119, 120. Cua varios clase di ri̇́sico tin asociá cu transfusion di sanger?

¹¹⁹ Sin elabora riba e echo cu ta existi peliger, nos por examina brevemente cua ta algun di nan. Aunke hopi dokter ta familiar cu e siguiente informacion, e por yuda otronan comprende cu, aunke e posicion cu Testigonan di Jehova a tuma ta pa motibo religioso, médicamente e tin mérito.

¹²⁰ E buki di texto Hematology ta contene e tabla aki:⁵⁸

Tipo di reaccion di transfusion di sanger

Febril

Anticuerpo di leucócito

Anticuerpo di plaketa

Pirógeno

Alérgico

Hemolítica

(transfusion incompatibel)

Transmision di enfermedad

Hepatitis dor di suero

Paludismo

Sífilis

Infeccion di citomegalovirus

Gran contaminacion di bacteria

Sobrecarga cardiaco

Intoxicacion dor di citrato

Intoxicacion dor di potasio

Sangramento abnormal

Transfusion incompatibel

Transfusion masivo

Isosensibilisacion

Hemosiderosis dor di transfusion

Miscelaneo

Tromboflebitis

Aeroembolismo

Inyeccion di material straño

121, 122. Cua ta algun dje reaccionnan immediato na transfusion di sanger cu ta peligroso?

¹²¹ E cantidad di tipo di reaccionnan aki ora di transfusion siguramente ta serio, pasobra nan por causa morto. Laga nos considera algun di nan.

¹²² Promé, e tabla ta presenta algun dje reaccionnan “immediato.” Un reaccion febril of causante di kentura generalmente por ser tratá cu éxito. Sin embargo, manera profesor di medicina James W. Linman ta informa, “reaccionnan febril severo ta tuma lugar i por ta suficiente intenso pa menasa bida di cierto pashent cu ta haña malesa agudo.”⁵⁸ Sanger cu no ta cuadra cu otro por causa un reaccion hemolítico, enbolbiendo destruccion rápido di cel di sanger corra, cua por resulta den fayo di nier, shok i morto. Reaccionnan hemolítico ta specialmente peligroso pa pashentnan bao di anestesia, pasobra por sosode cu e síntomanan ta ser notá ora ta demasiado lat caba.⁵⁹

123-125. Te na ki grado e peliger pa transmiti malesa ta asociá cu transfusion di sanger?

¹²³ “Transmision di malesa” tambe ta notá entre e posibel reaccionnan. Tin peliger substancial for dje ángulo aki?

¹²⁴ Hepatitis B (hepatitis dor di suero) ta un complicacion particularmente peligroso di transfusion di sanger. Ta posibel cu, sin cu esei ta ser sospechá, e sanger di un donor por contene e viro di hepatitis cu por daña salú dje persona cu ta ricibi e sanger of asta maté. Mas transfusion un persona haña, mas grandi e chens ta pe haña hepatitis di suero. Pero hopi sanger no ta necesario. Menos di un gota ta suficiente: bo por haña e malesa for di un cantidad mes chikito cu un miyonésimo di mililiter di sanger infectá.⁶⁰

¹²⁵ Cuanto probabel ta cu bo por haña hepatitis for di un transfusion di sanger? Te na un grado esei ta depende di unda bo ta biba, ya cu hepatitis cu ta manifesta su mes despues di un transfusion ta mas comun den pais caminda parti dje sanger ta bini di “donornan” pagá, hendenan cu ta bende nan sanger.

126, 127. Kico por ser bisá dje cantidad di caso di hepatitis dor di suero?

¹²⁶ Un calculacion cu hopi bia ta aparece den publicacionnan médico ta cu un porciento, of un persona di cada cien, ta haña hepatitis despues di un transfusion.⁶¹ Sin embargo, evidencia ta indica cu e biahanan cu esei ta sosode ta muchu mas halto. Esaki ta asina pasobra hepatitis B tin un periodo di incubacion te cu seis luna, di manera cu kisas e malesa lo no aparece sino hopi despues dje transfusion. Drs. John B. Alsever i Peter Van Schoonhoven a skirbi den Arizona Medicine:

“E cantidad di caso di malesa clínicamente evidente durante e último dies pa diessinco aña den centronan di sanger den comunidad grandi, tabata rond di 1% den estudionan retrospectivo raportá. Sin embargo, ora hende ta studia pashent cu a haña transfusion den laboratorio den un manera prospectivo cu intervalo di 2 pa 4 siman, nan ta haña te dies bia mas caso di infeccion.”⁶²

¹²⁷ Considera esaki desde un otro punto di bista. Hopi bia nan a bisa cu na Estados Unidos tur aña ta sosode 30.000 caso di hepatitis despues di transfusion di sanger, di cua 1.500 pa 3.000 ta resulta den morto.⁶³ Esei lo tabata suficiente serio caba. Sin embargo, e Centro (gubernamental) pa Control di Enfermedad a señalá cu un cifra conservativo pa e casonan di hepatitis B ta di 200.000 of mas anualmente.⁶⁴ I ken por sikiera calcula e cantidad total di caso di hepatitis relacioná cu transfusion pa tur Norte i Sur America, Europa, Africa i Asia?

128. Pakico e posibilidad pa un testigo haña hepatitis dor di suero ta mas cu un ri̇́sico hustificá?

¹²⁸ Naturalmente algun hende ta mira e posibilidad pa haña hepatitis for di un transfusion di sanger como un rísico cu por ta hustificá. Un dokter por razona: “Mi ta prefera di tin un pashent bibo cu hepatitis, cua mi por trata, cu morto dor di no acepta un transfusion.” Pero tal razonamento no ta un base bálido pa mira un pashent su obhecion di concenshi contra transfusion como ‘suicidio’ i pensa cu nan no ta digno pa tuma na cuenta.

Un pashent por ta razonablemente sigur cu lo e sobrebiba si e haña hepatitis dor di un transfusion?

129, 130. Kico ta mustra cu un pashent no por ser razonablemente sigurá cu lo e sobrebiba despues di un atake di hepatitis di suero?

¹²⁹ Un echo cu mester provoca nos pensamento serio ta cu autoridadnan ta admiti cu rond di 10 pa 12 porciento di esnan cu contrae hepatitis di suero dor di transfusion ta muri como consecuencia di dje.⁶⁵ Den caso di personanan riba cuarenta aña di edad, e tasa di mortalidad ta 20 porciento​—un di cada cinco.⁶⁶ Di pashent riba sesenta aña di edad, mitar ta muri di hepatitis.⁶⁷

¹³⁰ Ademas, no tin un manera sigur pa elimina e rísico halto di contrae hepatitis for di transfusion. The Journal of Legal Medicine a reconoce cu “ningun dje métodonan awor conocí pa preserva sanger ta posee calidadnan antiviral. Cualkier sistema cu lo destrui of asta swak e viro di hepatitis lo destrui tambe e sanger of fraccion di sanger.”⁶⁸

131, 132. Te na di grado técnica moderno a eliminá e ri̇́sico di haña hepatitis di suero for di un transfusion di sanger?

¹³¹ Kico di adelanto den técnica di análisis pa identifica i asina elimina sanger contaminá? Dr. M. Shapiro, dje Servicio Sudafricano di Transfusion di Sanger, recientemente a señalá cu “asta cu e testnan di mas sensitivo kisas solamente 1 di cada 8 of asta menos caso di hepatitis cu ta aparece despues di transfusion por ser evitá dor di solamente un examen di laboratorio dje donornan di sanger.”⁶⁹

¹³² P’sei, asta si hepatitis di suero tabata e único peliger di malesa cu por presenta despues di un transfusion, tin suficiente motibo médico pa un persona tin reserva encuanto aceptacion di sanger. Sin embargo, echo ta cu hepatitis ta solamente un dje rísiconan. Nota e otronan aki:

133. Ki dilema contaminacion sifili̇́tico di sanger ta presenta?

¹³³ “Sanger mester ser considerá un remedi peligroso, i mester ser usá cu e mesun cautela cu por ehempel morfina.”⁷⁰ Asina profesor H. Busch, un director di medicina di transfusion, a terminá un informe na un congreso di cirugano di Noord Alemania. Den dje el a mencioná un dilema encuanto transfusion di sanger. El a bisa cu pa su óptimo balor biológico, sanger duná mester wordu transfusioná dentro di binticuater ora; despues di esei e rísiconan metabólico ta aumenta debí na cambio den e sanger wardá. Di otro banda, sanger mester wordu wardá pa por lo menos setenta i dos ora, sino e por pasa sífilis. I asta análisis pa identifica sanger sifilítico no ta un garantia, pasobra nan no ta detecta sífilis den su promé etapanan. No tin necesidad mes pa describi aki e daño cu un persona por haña ora e ricibi sanger infectá cu sífilis, i tambe e dolor cu ta bini pe mes i su famia.

134, 135. Ki otro infeccion por ser transmiti̇́ dor di transfusion di sanger?

¹³⁴ E informe di Alemania tambe a enfatisá e peliger di transfusion di sanger cu ta plama infeccion citomegaloviral i malaria. Ta conocí cu e viro di citomégalo ta specialmente peligroso pa mucha. Cu bon motibo anto, dokternan aleman a ser spiertá dje “resultadonan masha serio, asta fatal” cu transfusion di sanger por tin. I e Asociacion Médico Mericano a señalá cu “cu e aumento den biahamento internacional i e regreso di hombernan militar for di zona contagiá, e cantidad di caso di malaria entre esnan cu a ricibí transfusion di sanger a aumentá.”⁷¹

¹³⁵ Den zonanan tropical tin varios otro enfermedad cu por wordu transmití pa transfusion di sanger, manera e enfermedad di Chagas (cua tin un proporcion di fatalidad di un pa cada dies caso), tripanosomiasis africano (enfermedad di soño africano), frambesia i filariasis.⁷²

136. Kico ta un otro peliger asociá cu transfusion di sanger, i con serio e ta?

¹³⁶ Un otro peliger cu no por ta pasá por halto ta un gran contaminacion di bacteria den sanger. Cierto tipo di bacteria por multiplica nan mes asta den sanger friu i ta presenta un menasa grave pa cualkier persona cu despues ta ricibi e sanger ei. Aunke e pashentnan cu ta experimenta e complicacion aki ta menos cu esnan cu ta experimenta hepatitis di suero por ehempel, e resultadonan pa esnan cu si ta hañé ta trágico. E mortalidad ta entre 50 pa 75 porciento.⁷³

137. Pa motibo dje peligernan asociá cu transfusion di sanger, kico algun hospital ta rekeri di pashent?

¹³⁷ Kico futuro ta encera encuanto peligernan asociá cu transfusion di sanger? Dr. John A. Collins, di Scol di Medicina dje Universidad di Washington, a bisa cu “e lista di enfermedad transmití lo varia i siguramente lo crece, i probablemente lo tin bastante inkietud segun cu mas viro relacioná cu tumor ta keda identificá den sanger.”⁷⁴ P’sei anto, awor hopi hospital ta exigí pa e pashent firma un exoneracion of un acuerdo cu lo e no tene e dokter of hospital responsabel pa e daño cu por resulta di un transfusion di sanger.⁷⁵

138. Kico ta e motibo principal pakico Testigonan no ta acepta transfusion di sanger?

¹³⁸ E consideracion breve aki di solamente algun dje rísiconan médico di sanger ta nifica cu Testigo di Jehova ta opone transfusion principalmente pa motibonan médico? No, esei no ta e caso. E motibo fundamental pa cua nan no ta acepta transfusion di sanger ta pa motibo di loke e Bijbel ta bisa. Nan obhecion ta uno fundamentalmente religioso, no médico. No obstante, e echo cu tin rísiconan serio den aceptacion di sanger, ta subraya e echo cu e posicion cu Testigo di Jehova ta acepta ta razonabel, asta desde un punto di bista médico.

Terapianan alternativo

139-141. Den cirugia cu no ta emergente, ki alternativa tin pa transfusion di sanger?

¹³⁹ Si e proceder cu Testigonan di Jehova ta adopta tabata uno fanático i no tabatin fundeshi i inevitablemente lo a nificá daño pa nan mes i kisas otronan, lo tabatin motibo pa expresa preocupacion. Relacioná cu esaki lo ta bon pa puntra:

E punto di bista religioso aki cu Testigonan di Jehova a adoptá ta asina incompatibel cu norma dje sociedad humano i cu conocimento médico cu e no por ser acomodá razonablemente?

¹⁴⁰ E contesta real ta cu nan obhecion pa sanger basá riba e Bijbel siguramente por ser acomodá den mayoria caso pa medio di uso di terapia alternativo.

¹⁴¹ Ta bon conocí cu den caso di cirugia bon prepará, e dokternan por ‘fortalece sanger dje pashent’ promé i despues, por ehempel cu aminoácido i solucion di heru duná via boca of angua⁷⁶c; esaki por minimisa cualkier necesidad di transfusion. Hipotermia profundo (bahamento di temperatura di curpa dje pashent) a resultá ventahoso den minimisa e pérdida di sanger durante operacion, asta riba mucha chikí.⁷⁸ Di manera similar, hibamento na hipotension (bahamento di presion di sanger) por reduci e sangramento for dje venanan chikito durante un intervencion kirúgico. I loke a resultá probablemente den mayor éxito, ta e atencion municioso cu ta ser duná den ceramento di asta e venanan cortá di mas chikito. Den American Journal of Obstetrics and Gynecology, un dokter kende a operá hopi Testigo di Jehova a bisa:

“No tin duda cu e situacion caminda bo ta operando sin e posibilidad di duna transfusion tin tendencia di mehora bo cirugia. Bo ta bira un tiki mas agresivo den klem cera cada vena di sanger cu ta sangra.”⁷⁹

Si un pashent a perde hopi sanger durante un operacion of debí na un accidente, e punto di bista cu no tin otro alternativa sino di duna sanger ta razonabel?

142, 143. Simplemente kico ta e necesidad primordial ora tin pérdida grandi di sanger?

¹⁴² Algun dato cu profesor James W. Linman a presentá den Hematology ta sirbi como un base excelente pa evalua e contesta:

“Sanger no ta un tónico ni un stimulante; lo e no promové curamento di herida ni suprimi un infeccion; i su capacidad di hiba oxígeno masha poco bia ta un factor limitante den operacion. Un transfusion ta sirbi solamente pa aumenta e volumen total di sanger, pa hisa e capacidad di hiba oxígeno dje sanger, i como un fuente di constituyente normal di plasma.” (Letter cursivo agrega.)⁸⁰

¹⁴³ Considera promé e asunto di ‘aumenta e volumen total di sanger.’ Hopi bia ora un persona perde gran cantidad di sanger, loke ta fundamentalmente necesario pa preveni shok i morto ta pa reemplasa e volumen di líkido cu a bai perdí. Na un congreso dje Asociacion Médico di Sur-Africa, un specialista di transfusion a splica cu un persona por perde te cu 1,5 liter di sanger i ainda sobra 60 porciento di su celnan cora,⁸¹ un cantidad adecuado pa alimenta su tegidonan. Pero e persona mester di mas líkido den su adernan pa mantene cel cora den circulacion.

144. Cua ta e li̇́kido di preferencia ora tin pérdida grandi di sanger?

¹⁴⁴ E publicacion británico Anaesthesia a informa cu solucionnan cu no ta contene sanger ta haci esaki mas efectivamente cu transfusion di sanger ta haci, pasobra nan no ta reduci e eficiencia cardiaco (batimento di curason), un complicacion no infrecuente cu sa compaña transfusion di sanger. E artículo a bisa cu tin bia ora cantidadnan aparentemente adecuado di sanger total no a producí e resultado deseá den un caso di trauma, hopi bia e uso di solucion cu no ta contene sanger a producí mehoransa dramático. P’sei e artículo a bisa:

“Sin embargo, asta ora tin un suministro adecuado di sanger total disponibel, ta dudoso cu esaki ta e líkido cu mester scoge pe tratamento inicial pe transfusion rápido na pashent hypovolumico grave [esnan cu a perde hopi sanger].”⁸²

145, 146. Te na ki grado un hende por soporta pérdida di sanger, i pakico solucionnan alternativo no ta substitutonan pa sanger?

¹⁴⁵ No ta lógico cu un persona normalmente por perde e ekivalente di un unidad (500 cc.) of mas di sanger sin resultado fatal? Hopi persona a duna un unidad di sanger i anto a sigui directamente cu nan actividadnan di dia. Estudionan clínico controlá a indicá cu un persona cu tin ‘un volumen grandi di sanger lo por tolera e pérdida di asta dos liter [2.000 cc.] di sanger total’ sin cu e ta rekeri nada mas cu reemplasa e líkido perdí cu solucion cu no ta contene sanger.⁸³

¹⁴⁶ Awor kico di ‘hisamento dje capacidad dje sanger di hiba oxígeno’? Dokternan sa cu solucionnan alternativo realmente no ta “substitutonan pa sanger.” Pakico no? Pasobra e hemoglobina dje celnan cora ta hiba oxígeno na tur parti dje curpa. Solucionnan no-sanguineo no ta contene esaki.

Den caso cu un pashent a perde gran cantidad di sanger, ta necesario pa administré sanger total of cel corra empaketá pa suministra oxígeno na tur su curpa?

147, 148. Kico echonan ta mustra encuanto un hematocrático of hemoglobina sigur pa operacion?

¹⁴⁷ Cu frecuencia e punto di bista aki sa bini dilanti, pero e ta cuadra cu realidad?

¹⁴⁸ Normalmente un hende tin 14 of 15 gram di hemoglobina den cada 100 cc. di sanger. Generalmente dokternan ta adopta e punto di bista cu ‘bao di condicionnan compleho un hemoglobina di 10,3 pa 10,5 gram ta ser considerá como e balor abao sigur pa un operacion rutinario.’⁸⁴ Pero en realidad, hopi di un persona su hemoglobina ta den reserva pa ser usá durante un hacimento di esfuerso vigoroso.; p’sei, frecuentemente un persona na cama ta sinti su mes comodo cu un cantidad mes tiki cu 5 of 6 gram.⁸⁵ M. Keith Sykes, profesor di Anestesia Clínico ne Universidad di Londres, recientemente a señalá: “Aunke mayoria dje centronan ta scoge un balor di 9 of 10 gram por ciento como e liña divisorio entre aceptacion i rechaso pa operacion electivo, mester enfatisa cu no tin evidencia contundente di cu e balornan riba e nivel aki ta ‘sigur’ ni cu e balornan bao dje nivel aki ta trece un rísico adicional pa operacion. P’sei, no ta parce razonabel scoge un cifra arbitrario como un nivel aceptabel di hemoglobina.”⁸⁶ Di mes manera, Dr. Jeffrey K. Raines, dje Hospital General di Massachusetts, a declará cu “nos por laga e hematocrático baha muchu mas di loke nos a kere. Nos a custumbrá kere cu un pashent mester tabatin un hemoglobina di 10, pero awor nos sa cu esaki realmente no ta asina.”⁸⁷ Dr. Ricardo Vela, di un departamento di anestesia na Madrid, Spaña, tabatin experencia relacioná cu pashent cu ta Testigo di Jehova. El a skirbi cu nivel hopi abao di hemoglobina cu anteriormente tabata ser considerá como prohibí “tabata sorprendentemente bon tolerá pe pashentnan.”⁸⁸

149, 150. Kico hende a siña encuanto mehoramento di capacidad di sanger di hiba oxi̇́geno immediatamente despues di un transfusion di sanger?

¹⁴⁹ Tin un otro aspecto dje asunto aki cu ni den e campo médico no ta ser realisá completamente.

Un transfusion lo hisa inmediatamente e capacidad dje sanger di hiba oxígeno?

¹⁵⁰ Hopi hende ta kere cu esei ta e caso, pero un editorial reciente den Anaesthesia a haci e declaracion importante aki: “Ta bale la pena corda tambe cu e hemoglobina dje celnan corra wardá, tratá cu citrato, no ta plenamente disponibel pa e transferencia di oxígeno ne tegidonan pa algun 24 ora despues dje transfusion . . . ; p’sei, transfusion rápido di sanger mester ser considerá principalmente como simplemente un medio pa expande e volumen dje sanger den e etapanan inicial.”⁸⁹ Investigadornan dje Universidad Estatal di Ohio a descubrí cu e motibo pa esaki ta cu cambionan kímiko ta tuma lugar den sanger wardá. Nan investigacion a demostrá cu sanger wardá pa mas di dies dia “no ta mehora e entrega di oxígeno inmediatamente despues dje transfusion, i asta por empeore.” I nan a descubrí cu e entrega di oxígeno ainda tabata bao di loke ta normal binticuater ora despues.⁹⁰

Cua ta algun dje líkidonan no-sanguineo cu por ta usá como alternativa pa transfusion di sanger? Nan ta ser usá efectivamente? Ki bentaha nan tin?

151. Kico ta algun dje li̇́kidonan usa como alternativa pa transfusion di sanger?

¹⁵¹ Probablemente e reemplaso di plasma mas extensamente disponibel i mas frecuentemente usá den emergencia ta simplemente solucion di salu (0.9%). E ta facil pa prepara, barata, stabil i kímikamente compatibel cu sanger humano.⁹¹ Lactato di Ringer (di Hartmann) ta otro solucion electrolítico of cristaloide cu a ser usá cu bon éxito den caso di kemadura masivo i den operacion unda e pashent a perde te 66 porciento dje volumen líkido di su sanger.⁹²

152. Cua otro reemplaso di plasma a ser usá cu bon éxito?

¹⁵² Un otro posibilidad ta pa reemplasa sanger perdí cu coloidenan manera dextran. Esei ta un solucion clínico di sucu cu a resultá balioso tanto den cirugia como den trata casonan di kemadura i shok.⁹³ Tin bia e ta ser combiná cu un solucion di salu pa probecha dje mihor calidadnan di tur dos. Haemaccel i un solucion hidroxietílico di zetmeel tambe a ser usá cu bon resultado den varios situacion di operacion como sustancia pa expande e volumen di plasma.⁹⁴d

153. Kico por ser bisá tocante uso dje varios li̇́kidonan reemplasante den e etapa acuto di crisis di volumen di sanger?

¹⁵³ Cada un dje líkidonan aki tin su propio calidadnan i méritonan. Pero tocante situacionnan di disaster, Anaesthesia a comentá:

“Cua likido exactamente ta ser scoge inicialmente den e etapa crítico ta relativamente di poco importancia, con tal cu e no ta positivamente perhudicial. Mas despues, una bes e volumen circulatorio a ser expandé, e rekisitonan specífico pa un caso particular mester ser tumá na consideracion.”⁹⁵

154, 155. Ki evidencia ta mustra cu sanger no ta e único reemplasante efectivo pa pérdida di sanger?

¹⁵⁴ Esaki ta nifica cu tal líkidonan ta solamente pa casonan di emergencia? Di ningun manera. Encuanto “tur sorto di operacion grandi,” cirugano dje Scol di Medicina dje Universidad di Kentucky a skirbi:

“Cien pashent a perde mas di 1.000 ml di sanger mientras nan tabata ser operá i a ricibí dos of tres bes e volumen ei dje solucion di Hartmann. E posibilidad di muri of haña malesa no a ser afectá pa e falta di sanger den e procedura di reemplaso. . . . Apesar dje tradicion persistente di cu sanger ta e único cos cu por reemplasa eficasmente e sanger cu a bai perdí, e práctica di usa solucionnan di salu como substitucion pa parti dje sanger of sanger henter a gana tereno den hopi centro.”⁹⁶

¹⁵⁵ Aunke Testigonan di Jehova no ta acepta sanger pa motibo religioso, nan no tin obhecion pe uso di substancianan no-sanguineo cu ta ser usá pa expande e volumen dje plasma. Desde e punto di bista di un dokter, anto, e productonan aki tin e bentaha di por ser usá cu pashentnan Testigo. Pero tin hopi otro bentaha.

156, 157. Menciona algun dje bentahanan cu reemplasantenan di plasma tin riba sanger.

¹⁵⁶ “Substitutonan no-biológico pa sanger,” profesor E. A. Moffitt di Canada a skirbi, “por ser producí na gran cantidad i wardá pa periodonan largo di tempo. . . . E rísiconan di transfusion di sanger ta e bentahanan dje substitutonan di plasma: prevencion di infeccion di bacteria of viro, reaccionnan riba transfusion i sensibilisacion di Rh.”⁹⁷

¹⁵⁷ Tin un otro beneficio notabel den usamento di substansia pa expande plasma. Ora sanger humano ser wardá, mester agrega chemicalionan pa evita cu e sanger ta koha. Despues ora e sanger aki ser duná na un pashent, e substancianan agregá por stroba e aptitud natural di kohamento dje sanger dje pashent; e resultado por ta pérdida continuo di sanger. Dr. Melvin Platt, cirugano cardiaco, a yama atencion ne echo cu e problema aki ta ser evitá ora “un substancia neutral” manera solucion di lactato di Ringer ser usá mas bien cu sanger wardá.⁹⁸

Operacion grandi sin sanger

158. Cua echonan interesante e experencia di Dr. Denton Cooley a revelá?

¹⁵⁸ E experencia cu hopi bia dokternan cu curashi, kendenan a bai di acuerdo pa opera Testigonan di Jehova sin sanger, sa tin, ta revelador. Esaki ta ser ilustrá pa reciente desaroyonan den operacion grandi di curason. Den pasado, normalmente nan tabata usa gran cantidad di sanger. Pero e conhunto di cirugano encabesá pa Dr. Denton Cooley ne Instituto Cardiaco di Texas a decidi di purba opera e Testigonan di Jehova. Pa motibo cu dokternan no por a pone e pomp di curason i pulmon traha cu sanger ni administra sanger durante of despues dje operacion, nan a usa solucionnan cu no ta contene sanger pa expande e plasma. Dr. Cooley ta informa: “Nos a keda asina impresioná cu e resultadonan riba e Testigonan di Jehova cu nos a cuminsa usa e mesun procedura riba tur nos pashentnan di curason. Nos tabatin sorprendente bon éxito i a usé den nos transplantenan [di curason] tambe.” El a agregá: “Nos tin un contract cu e Testigonan di Jehova pa no duna nan transfusion bao di ningun circumstancia. E pashent ta carga e rísico anto, pasobra nos ni sikiera ta tene sanger disponibel pa nan.”⁹⁹

159. Kico tabata e efectonan riba término largo di operacion di curason sin sanger riba Testigonan adulto i mucha?

¹⁵⁹ Kico tabata e resultadonan a largo plaso di ‘cirugia di curason sin sanger’ riba adulto i mucha? Dr. Jerome H. Kay di California a skirbi: “Nos a haci caba rond di 6.000 operacion grandi di curason ne Hospital Saint Vincent na Los Angeles. Siendo cu nos no a usa sanger riba mayoria di pashent, nos a haña e impresion cu ta bai mihor cu e pashentnan.”¹⁰⁰ Un estudio canades a suministrá detaye specífico, revelando cu ora líkidonan no-sanguineo manera dextran i solucion di Ringer a ser usá na lugar di sanger, “e cantidad di morto a baha di 11 te 3,8 porciento.”¹⁰¹ E tipo di cirugia aki a ser hací cu bon éxito tambe riba Testigo di Jehova i mucha na Noruega, Australia, Sur Africa, Francia Inglatera i Hapon.

160, 161. Kico tabata e resultadonan caminda Testigonan tabatin cu somete nan mes na operacion caminda sanger ta ser considerá normalmente como esencial?

¹⁶⁰ Sin embargo, cirugano cu experencia ta na altura cu nan ta usa un mayor cantidad di sanger pa pashentnan cu ta haci un operacion general, cu pa pashentnan cu ta haci operacionnan mas dramático, manera operacion grandi di curason. Kico a sosodé cu Testigonan di Jehova kendenan a rekerí operacionnan comun den cua generalmente gran cantidad di sanger ta ser usá?

¹⁶¹ Bao dje título “Cirugia Grandi riba Testigonan di Jehova” un grupo di dokter di New York a relata un cantidad di caso cu a enbolbé cirugia extenso, manera sacamento total di organonan canceroso, i a splica cu dor di usa técnica kirúrgiko preciso, tal procedura por ser hací sin sanger.¹⁰² Otro proceduranan hací exitosamente sin sanger ta inclui operacionnan radical na cabes i garganta, cirugia extenso na barica i hemipielostomias (amputacion di pia i heup).¹⁰³ Despues di a saca un gran aneurisma cerebral di un Testigo, Dr. J. Posnikoff a oponé e “opinion corriente dje mayoria dje neurociruganonan di cu transfusion di sanger ta absolutamente esencial” pa cirugia cerebral dje tipo aki. El a insta otro ciruganonan pa “no tuma pa custumber di nenga operacionnan grandi na esnan cu ta den necesidad desespera di dje pero cu pa motibonan moral no por acepta transfusion di sanger.”¹⁰⁴

162. Kico tabata e experencia di Dr. Philip Roen?

¹⁶² E conclusion na cua Dr. Philip R. Roen a yega den “Cirugia urológico extenso sin transfusion di sanger” tabata:

“E experencianan cu nos a haña cu e Testigonan di Jehova cu tabata rekerí proceduranan di operacion a demostrá na nos cu transfusion di sanger no ta necesariamente esencial ni ora nivel di hemoglobina ta abao​—mes abao cu 5 Gm. pa 100 ml. . . . E posicion di Testigo di Jehova di nenga di ricibi transfusion di sanger durante proceduranan extenso di operacion necesario, ta presenta ne urólogo un problema i desafio considerabel. Tal pashentnan no por ser i no mester ta bandoná pa motibo di nan creensianan religioso. Nos no a duda pa practica absolutamente ningun procedura kirúrgiko apesar dje prohibicion tocante reemplaso di sanger.”¹⁰⁵

Kico abo lo haci?

163, 164. Cua echonan ta mustra cu e posicion dje Testigonan tocante transfusion di sanger por ser acomodá médicamente?

¹⁶³ Considerando e posicion cu e Testigonan di Jehova a adoptá encuanto sanger, nos a duna atencion na cierto aspecto importante. Nos a examiná e base cu nan tin pa nan nengamento di sanger i a mira cu nan ta haci esei pa motibonan religioso basá riba e Bijbel. Tambe nos a repasá e ética enbolbí den e asunto mustrando cu cada persona tin e derecho di determiná loke lo sosode cu su curpa i pa dicidi tocante tratamento médico pa e mes i su yiunan. Analisando e papel dje dokter, nos a mira cu tratando un individuo na armonia cu e pashent su creensianan ta di acuerdo cu e principionan fundamental dje profesion médico. I considerando e aspectonan médico di transfusion di sanger, nos a demostrá cu e posicion cu Testigonan di Jehova a adoptá ta médicamente aceptabel. Casonan di historia ta proba cu den mayoria ocacion, dokternan habil i cu curashi por trata pashentnan Testigo exitosamente sin usa sanger.

¹⁶⁴ Aunke tur esaki por ta berdad, nos no mester mira e asunto como simplemente un consideracion teorético di un cuestion interesante. Nos cada un por haña nos den necesidad pa usa e informacion aki pa dicidi kico nos ta haci personalmente.

Kico dje dokter?

165, 166. (a) Den bista di tur loke a ser splica, kico un dokter mester comprende tocante Testigonan di Jehova? (b) Kico esaki de facto ta nifica pa su práctica?

¹⁶⁵ Den lus di tur loke nos a considerá, un dokter mester comprende cu Testigonan di Jehova no ta fanáticonan religioso di “suicidio” kendenan ta opone tur cuido médico. Mas bien, nan ta hendenan razonabel i moral kendenan ta ansioso pa keda na bida; nan stima bida i bon salú, motibo pa cua nan ta busca cuido médico cualificá. Pero un dokter mester comprende tambe cu Testigonan di Jehova a pensa seriamente tocante nan creensianan religioso i ta henteramente convencí cu nan ni nan famia no mester acepta sanger. P’sei, ora personal médico ta confronta cu e nengamento pa acepta sanger aki nan no mester miré como algun capricho emocional cu por ta pasá por halto. E ta un conviccion religioso importante cu mester ser respetá, honrá.

Kico esaki ta nifica den práctica?

¹⁶⁶ E ta nifica cu pa demostra respet pa principio cu atraves di tempo a ser tené na halto, no mester forsa sanger riba un Testigo di Jehova. Ta berdad cu pa un dokter acomoda nan conviccion religioso por ta necesario pe ahusta su terapia usual. Pero mirando asuntonan riba término largo, no ta mihor pa tratamento médico keda algo limitá pa conviccion religioso cu enbes di laga práctica médico coriente dicta contra creensia religioso fundamental of lagé pasa riba nan asina? Un consideracion balansá dje asunto ta proba cu esei te berdad. Cooperando cu un Testigo di Jehova un dokter por demostra cu e ta genuinamente comprometí pa tene derecho humano na halto i cu e ta respeta ehercisio liber di concenshi religioso. Ne mesun tempo lo e ta tratando e “hende completo,” usando e terapianan cu ta sirbi pa cura e pashent físicamente sin cu e ta ser perhudicá emocionalmente o spiritualmente. Esaki lo ta den e pashent su interes duradero i lo haci digno e éticanan básico cu e dokter ta dedicá na tene na halto.

Kico di Testigonan di Jehova of otronan cu ta interesá na aplica e Palabra di Dios den nan bida?

167, 168. Ki conseho ta ser duná ne Testigonan ora nan ta enfrenta cu e cuestion di transfusion di sanger?

¹⁶⁷ Nos repaso dje cuestion di sanger mester profundisa un persona su respet pa e prohibicionnan bíblico contra sostene bida cu sanger.

¹⁶⁸ Cada cristian ta determiná correctamente pa continua firmemente establecí den su fe. Tratando cu personal médico, e cristian mester desplega razonabilidad i un spiritu cooperativo, ne mesun tempo haciendo cla cu cualkier tratamento médico ofrecí mester ta di acuerdo cu su creensianan religioso, manera su nengamento pa acepta sanger. Si un operacion ta necesario, lo ta importante pa considera delanta cu e dokternan nos posicion cristian riba sanger, pa haña nan siguransa cu bao di ningun circumstancia sanger lo ser administrá promé, durante of despues dje operacion. I si un cierto dokter no ta sinti cu e por efectua un operacion sin recuri na sanger, dor di sa esei delantá, un cristian por busca servicio di un otro dokter.

169. Dor di nan posicion riba sanger, kico e Testigonan ta manifesta, di acuerdo cu cua ehempel dje cristiannan di promé?

¹⁶⁹ Forsando pa tene e ley di Dios riba sanger na halto, Testigonan di Jehova ta manifesta nan aprecio pe echo cu nan bida ta bini i ta depende riba e Creador i Dunador di Bida. El a bisa den e Bijbel cu un cristian su felicidad i continuacion di bida den futuro ta basa riba fe i obedencia. (1 Juan 2:3-6) Pe motibo ei e promé cristiannan tabata dispuesto na risca nan bida actual mas bien cu bai contrario cu nan creensianan religioso. Testigonan di Jehova djawe ta mes determiná pa mantene nan bon relacion cu Dios. Pues nan lo sigui obedece mandamento dje Bijbel di ‘abstene di sanger.’​—Echo 15:29.

REFERENCIANAN

 1. The Gift Relationship (1971), pa profesor Richard M. Titmuss, pag. 27.

 2. Calvin’s New Testament Commentaries; The Acts of the Apostles, Vol. II, pag. 50.

 3. Genesis​—A Commentary (1961), pa Gerhard von Rad, pag. 128.

 4. Genesis (1974), pa B. Jacob, editá pa E. I. i W. Jacob, pag. 64.

 5. The Torah: A Modern Commentary, Genesis (1974), pa W. Gunther Plaut, pag. 86.

 6. Zürcher Bibelkommentare 1. Mose 1-11 (1967), pag. 330.

 7. The History of the Christian Church (1837), pa William Jones, pag. 106.

 8. Tertullian, Apologetical Works, and Minucius Felix, Octavius, traducí pa Rudolph Arbesmann (1950), pag. 33.

 9. The Ante-Nicene Fathers, Vol. IV, pag. 85, 86.

10. The Ante-Nicene Fathers, Vol. IV, pag. 192.

11. The Ecclesiastical History of the Second and Third Centuries (1845), pa John Kaye, obispo di Lincoln, pag. 146.

12. The Acts of the Apostles (1958), pa Guiseppe Ricciotti, pag. 243.

13. Nicene and Post-Nicene Fathers of the Christian Church, pa Philip Schaff i Henry Wace, Vol. XIV, pag. 395.

14. Tertullian, Vol. I, traducí pa C. Dodgson (1842), pag. 109.

15. Luther’s Works, Vol. 41 (Church i Ministry III), editá pa Eric W. Gritsch, pag. 28.

16. The Complete Works of the Rev. Andrew Fuller (1836), pag. 751.

17. The American Surgeon, juli 1968, pag. 542.

18. Fordham Law Review, Vol. 44, 1975, pag. 23, 24.

19. American Journal of Obstetrics and Gynecology, 1 di juni, 1968, pag. 395.

20. Medicolegal Forms with Legal Analysis (1976), pag. 24, 38.

21. Medical Tribune (na aleman), 19 di maart, 1976, pag. 30.

22. Rutgers Law Review, Vol. XXVI, 1973, pag. 244.

23. The Wisconsin Medical Journal, augustus 1967, pag. 375.

24. The Journal of the American Medical Association, 5 di september, 1966, pag. 794, 795.

25. Fordham Law Review, Vol. 44, 1975, pag. 29.

26. The Journal of Abdominal Surgery, juni 1967, pag. 160.

27. The Cape County Journal, juni 1967, pag. 5.

28. University of San Francisco Law Review, Zomer 1975, pag. 28.

29. Surgery, Gynecology & Obstetrics, april 1959, pag. 503, 504.

30. Medicolegal Forms with Legal Analysis (1976), pag. 85.

31. University of San Francisco Law Review, Zomer 1975, pag. 27, 28.

32. Emergencies in Medical Practice (1971), editá pa C. Allan Birch, pag. 564.

33. Deutsche Medizinische Wochenschrift, 19 di december, 1975, pag. 2622.

34. New York State Journal of Medicine, mei 1976, pag. 766.

35. Fordham Law Review, Vol. 36, 1968, pag. 651.

36. Medical Tribune (na aleman), 19 di maart, 1976, pag. 30.

37. Natanson v. Kline et al., 186 Kan. 393, 350 P.2d 1093, 1104.

38. Canadian Medical Association Journal, 18 di februari, 1967, pag. 432.

39. Forensic Science, juli 1972, pag. 135.

40. God, Blood and Society (1972), pa A. D. Farr, pag. 115.

41. Crime and Delinquency, april 1968, pag. 116.

42. Texas Medicine, december 1970, pag. 25.

43. The Journal of the American Medical Association, 3 di juli, 1967, pag. 150.

44. Ouest-France, 10 di maart, 1975.

45. Drugs (1973), Vol. 6, pag. 130.

46. Obstetrik och gynekologi (1962), editá pa Carl Gemzell, pag. 206.

47. God, Blood and Society (1972), pa A. D. Farr, pag. 32.

48. Die Welt, 14 di october, 1975.

49. The Journal of the American Medical Association, 12 di april, 1976, pag. 1611.

50. Clinical Hematology (1974), pa profesor Maxwell M. Wintrobe, pag. 474.

51. Le Concours Médical, 1 di april, 1972, pag. 2598.

52. Oasis, februari 1976, pag. 23, 24.

53. Medical Economics, 11 di december, 1967, pag. 96.

54. The National Observer, 29 di januari, 1972, pag. 1.

55. Southern Medical Journal, april 1976, pag. 476.

56. Chicago Tribune, 10 di october, 1969, pag. 2.

57. Surgery, februari 1974, pag. 274, 275.

58. Hematology (1975), pa profesor James W. Linman, pag. 991.

59. Journal of Forensic Sciences, januari 1969, pag. 87.

60. The Gift Relationship (1971), pa profesor Richard M. Titmuss, pag. 142.

61. Journal of Hygiene, october 1974, pag. 173; Southern Medical Journal, april 1976, pag. 477.

62. Arizona Medicine, april 1974, pag. 263.

63. Annals of the New York Academy of Sciences, 20 di januari, 1975, pag. 191.

64. The American Journal of the Medical Sciences, september-october 1975, pag. 276, 281; Morbidity and Mortality Weekly Report, 7 di mei, 1976, pag. 3; Inspection News, november-december 1972, pag. 18.

65. Scandinavian Journal of Infectious Diseases, Vol. 6, 1974, pag. 286.

66. Hematology (1975), pa profesor James W. Linman, pag. 994.

67. The Gift Relationship (1971), pa profesor Richard M. Titmuss, pag. 147.

68. The Journal of Legal Medicine, juni 1976, pag. 19.

69. South African Medical Journal, 24 di januari, 1976, pag. 107.

70. Die Welt, 9 di december, 1974.

71. General Principles of Blood Transfusion (1973), pag. 15.

72. Tropical Diseases Bulletin, september 1972, pag. 828, 848.

73. Hematology (1975), pa profesor James W. Linman, pag. 995.

74. Surgery, februari 1974, pag. 275.

75. Medicolegal Forms with Legal Analysis (1976), pag. 83.

76. The Journal of Thoracic and Cardiovascular Surgery, juli 1974, pag. 3.

77. Mayo Clinic Proceedings, november 1976, pag. 725.

78. Medical World News, 4 di december, 1970, pag. 7.

79. American Journal of Obstetrics and Gynecology, 1 di juni, 1968, pag. 395.

80. Hematology (1975), pa profesor James W. Linman, pag. 985.

81. South African Medical Journal, 24 di januari, 1976, pag. 107.

82. Anaesthesia, juli 1968, pag. 395, 396.

83. Archives of Surgery, januari 1969, pag. 52.

84. Anaesthesia, juli 1968, pag. 413; Mayo Clinic Proceedings, november 1976, pag. 726.

85. Postgraduate Medicine, november 1959, pag. A44.

86. Canadian Anaesthetists’ Society Journal, januari 1975, pag. 8.

87. RN Magazine, mei 1975, pag. 38.

88. Bibliotheca Haematologica, “Intentional Hemodilution,” No. 41, 1975, pag. 270.

89. Anaesthesia, maart 1975, pag. 150.

90. Columbus, Ohio, The Dispatch, 31 di augustus, 1972, pag. 1B.

91. Anaesthesia, juli 1968, pag. 418, 419.

 92. Annals of the New York Academy of Sciences, 14 di augustus, 1968, pag. 905; The Journal of the American Medical Association, 29 di maart, 1971, pag. 2077.

 93. Blood Transfusion in Clinical Medicine (1972), pa profesor P. L. Mollison, pag. 150, 153.

 94. Surgical Clinics of North America, juni 1975, pag. 671.

 95. Anaesthesia, juli 1968, pag. 416.

 96. The Journal of the American Medical Association, 5 di februari, 1968, pag. 399, 401.

 97. Canadian Anaesthetists’ Society Journal, januari 1975, pag. 12.

 98. The Elks Magazine, augustus 1976, pag. 14.

 99. Union di San Diego, diadomingo, 27 di december, 1970, pag. A-10.

100. The Journal of the American Medical Association, 3 di december, 1973, pag. 1231.

101. Star di Toronto, 22 di november, 1975, pag. A8.

102. New York State Journal of Medicine, mei 1976, pag. 765, 766.

103. The Journal of the American Medical Association, 5 di februari, 1968, pag. 399.

104. California Medicine, februari 1967, pag. 124, 127.

105. New York State Journal of Medicine, 15 di october, 1972, pag. 2526, 2527.

[Nota]