Capítulo 5
E “Testament Nobo” ta historia of leyenda?
“Nos por bisa awe cu e Testament Nobo ta e buki mihor investigá den e mundo di literatura.” Asina Hans Küng a bisa den su buki (inglés) “Tocante di ser cristian.” I e tin razón. Durante e último 300 aña, e Scritura Griego Cristian tabata mas cu investigá. Ningun otro literatura tabata tanto inspeccioná i analizá en detaye.
1, 2. (Inclui introduccion.) (a) E Scritura Griego Cristian a ser duná cua trato durante e último 300 aña? (b) Algun investigador a yega na cua conclusion straño?
E CONCLUSION na locual algun investigador a yega tabata raro mes. Ayá den siglo 19, Ludwig Noack di Alemania a conclui cu e disípel stimá Juan a skirbi Evangelio di Juan na aña 60 EC—pero, segun Noack, Juan tabata Hudas! E francés Joseph Ernest Renan a sugeri cu e resureccion di Lázaro probablemente tabata un engaño cu Lázaro mes a prepara pa mustra cu Jesús por haci milagro, mientras cu e teólogo alemán Gustav Volkmar a insisti cu e Jesús di história nunca por a presenta como Mesías.1
2 En cambio, Bruno Bauer a decidi cu Jesús nunca a existi! “El a bisa cu e berdadero forza creativo den cristianismo di promé tabata Filón, Séneca i hende gnóstico. Pa caba el a bisa cu e Jesús di história nunca a existi . . . cu e principio dje religion cristian tabata cerca e fin di siglo dos i a bini di hudaísmo den locual stoicismo (un filosofía griego) a bira dominante.”2
3. Hopi hende tin cua opinion tocante e Bijbel ainda?
3 Awendia poco hende tin idea asina extremo. Pero si bo ta leza buki di escolástico djawe, bo por descubri cu hopi di nan ainda ta kere cu e Scritura Griego Cristian ta contene leyenda, fantasía, i exageracion. Esei ta cierto?
Na ki tempo e tabata skirbí?
4. (a) Pakico ta importante pa bo sa na ki tempo buki dje Scritura Griego Cristian a wordu skirbí? (b) Menciona algun opinion tocante e tempo di skirbimento dje Scritura Griego Cristian.
4 Tempo ta necesario pe desaroyo di leyenda i fantasía. Pues e pregunta ta importante: Na ki tempo e Scritura Griego Cristian tabata skirbí? Historiador Michael Grant ta bisa cu e skirbimento histórico dje Scritura Griego Cristian a cuminza “trinta of cuarenta aña despues di morto di Jesús.”4 Segun arqueólogo bíblico William Foxwell Albright, C. C. Torrey a yega ne conclusion di cu “tur Evangelio tabata skirbí promé cu aña 70 A.D. i cu no tin nada den nan cu no por a ser skirbí dentro di binti aña despues dje crucifixion.” E opinion di Albright mes tabata cu nan skirbimento tabata completá “no mas tardi cu rond di aña 80 A.D.” Otronan ta haci calculacion un poco diferente, pero casi tur ta di acuerdo cu e “Testament Nobo” tabata completo promé cu e fin dje promé siglo.
5, 6. Kico nos mester conclui for dje echo cu e Scritura Griego Cristian no tabata skirbí mucho tempo despues di suceso cu nan ta menciona?
5 Kico esei kier men? Albright a conclui: “Tur loke nos por bisa ta cu un periodo di entre 20 i 50 aña ta mucho poco pa permiti algun corrupcion notable dje contenido esensial i sikiera di frase específico dje palabra di Jesús.”5 Profesor Gary Habermas ta agrega: “Evangelio ta basta cerca e periodo di tempo di locual nan ta informa, mientras cu historia di antigua hopi bez ta duna detaye di suceso cu a tuma lugar na siglonan di antes. Sin embargo, historiador moderno ta logra comprende loke a pasa asta den tal periodo di tempo di antigua.”6
6 Es decir, e parti histórico dje Scritura Griego Cristian ta merece por lo menos tanto crédito como historia seglar. Siguramente, durante e poco aña entre suceso di cristianismo di promé i e skirbimento di loke a pasa, no tabatin tempo pa fábula i leyenda desaroyá i ser aceptá na tur parti.
Testimonio di testigo ocular
7, 8. (a) Ken tabata na bida ainda ora e Scritura Griego Cristian tabata skirbí i plamá? (b) Kico nos mester conclui di acuerdo cu e comentario di profesor F. F. Bruce?
7 Esei ta specialmente cierto den bista dje echo cu hopi relato ta menciona testimonio di testigo ocular. E skirbidor dje Evangelio di Juan a bisa: “Esei ta e disípel [cu Jesús a stima] cu ta duna testimonio dje cosnan ei i cu a skirbi esei.” (Juan 21:24) E skirbidor dje buki di Lucas a bisa cu: “Esnan, cu desde principio a bira testigo ocular i sirbidor dje mensahe, a entregé na nos.” (Lucas 1:2) Apóstol Pablo mencionando esnan cu a presenciá e resureccion di Jesús, a bisa: “E mayoría di [locual] ta permanece te ne tempo actual, pero algun a bai drumi den morto.”—1 Corintio 15:6.
8 En cuanto esei, profesor F. F. Bruce cu comprendimento penetrante a bisa lo sigiente: “Di ningun manera tabata tanto fácil, manera ta parce cu algun skirbidor ta kere, pa inventa palabra i echo pa Jesús den e tempo di promé, ora tanto di su disípelnan tabata na bida cu por a corda loke a sosode i no a sosode. . . . E disípelnan no por a risca presenta cuenta inexacto (ni haci cambio dje echonan), cu mesora lo a ser denunciá pa esnan cu lo a hacié cu mucho gusto. En cambio, un punto fuerte den e predicacion apostólico original tabata cu nan a reconoce cu confianza cu oyentes tabata sa loke a pasa; nan no solamente a bisa, ‘Nos ta testigo dje cosnan aki,’ sino també, ‘Manera boso també sa’ (Echo 2:22).”7
Manuscrito ta digno di confianza?
9, 10. Den loke tin cu ber cu e Scritura Griego Cristian, nos por keda sigur di kico?
9 Ta posibel cu testimonio di testigo ocular tabata skirbí cu exactitud pero tabata corrumpí despues? Es decir, fábula i leyenda tabata introducí despues cu e skirbimento original tabata completo? Nos a mira caba cu manuscrito dje Scritura Griego Cristian ta den mihor estado cu cualkier otro literatura di antigua. Kurt i Barbara Aland, escolástico di manuscrito griego di Bijbel, tin un lista di casi 5.000 manuscrito cu a existi desde antigua te ne dia djawe, algun tanto bieu como siglo 2 EC.8 E testimonio general dje gran cantidad di evidencia ta cu manuscrito ta esencialmente exacto. Además, tin hopi traduccion di antigua—esun mas bieu teniendo e fecha di rond di aña 180 EC—cu ta yuda duna prueba di exactitud di manuscrito.9
10 P’sei, di tur manera, nos por keda sigur cu leyenda i fábula no a penetra den e Scritura Griego Cristian despues cu skirbidor original a completa nan obra. Manuscrito cu nos tin ta esencialmente mescos cu manuscrito cu skirbidor original a skirbi, i su exactitud ta confirmá pe echo cu hende cristian contemporáneo a acepté. Pues, anto, nos por comproba exactitud dje Bijbel door di comparé cu otro historia di antigua? Te na un grado, sí.
Evidencia documentario
11. Cuanto apoyo evidencia documentario externo ta duna relato histórico den e Scritura Griego Cristian?
11 Realmente, evidencia documentario fuera di e Bijbel di suceso durante e bida di Jesús i di su apóstolnan ta basta limitá. Esei ta solamente di spera, siendo cu den e promé siglo, hende cristian tabata un grupo relativamente chikito cu no a métenan den política. Pero evidencia cu sí ta bini di historia seglar ta di acuerdo cu loke nos ta leza den e Bijbel.
12. Kico Josefo ta bísanos tocante Juan bautista?
12 Por ehempel, despues cu Herodes Antipas a topa cu un derota militar tremendo, historiador hudío Josefo, skirbiendo na aña 93 EC, a bisa: “Pa algun hudío e destruccion dje ehército di Herodes por a parce vinganza divino, i siguramente un vinganza husto, pa su tratamento di Juan, yamá e bautista. Pasobra Herodes a laga maté, aunque e tabata un bon hende i a conseha hudío pa biba drechi, pa practica husticia cu nan próhimo i piedad cu Dios.”10 Asina Josefo a confirma e relato bíblico di cu Juan bautista tabata un homber husto cu a predica arrepentimento i cu Herodes a mata.—Mateo 3:1-12; 14:11.
13. Con Josefo ta apoya existencia di Santiago i di Jesús mes?
13 Josefo també a menciona Santiago, mitá ruman di Jesús, cu, segun e Bijbel, no a sigi Jesús na principio ma despues a bira un anciano prominente den Jerusalem. (Juan 7:3-5; Galatio 1:18, 19) Josefo a documenta e arresto di Santiago como lo sigiente: “[Sumosacerdote Anano] a reuni huez dje Sanedrín i a trece dilanti nan un homber yamá Santiago, ruman di Jesús cu tabata yamá Cristo, i cierto otro hende.”11 Skirbiendo palabra asina, Josefo a confirma además cu “Jesús, cu tabata yamá Cristo” tabata un berdadero persona histórico.
14, 15. Cua apoyo Tácito a duna e relato bíblico?
14 Otro skirbidor di antigua també a menciona cos skirbí den e Scritura Griego. Por ehempel, Evangelio ta bísanos cu e predicacion di Jesús den Palestina a resulta den hopi reaccion. Ora Poncio Pilato a sentencia Jesús na morto, sigidor di dje a keda confundí i desanimá. Pronto despues, e mesun disípelnan cu curashi a yena Jerusalem cu e mensahe di cu nan Señor tabata resusitá. Dentro di poco aña, cristianismo a plama den tur e imperio romano.—Mateo 4:25; 26:31; 27:24-26; Echo 2:23, 24, 36; 5:28; 17:6.
15 Testimonio di cu esei ta berdad ta bini di historiador romano Tácito, cu no tabata amigo di cristianismo. Skirbiendo pronto despues di aña 100 EC, el a conta di persecucion cruel di hende cristian di parti di Nerón i a agrega: “Cristo, e fundador dje nomber, a sufri e pena di morto durante e reinado di Tiberio, sentenciá pa Poncio Pilato e procurador, i e supersticion perhudicial tabata strobá pa un momento, solamente pa lanta di nobo, no simplemente den Hudea, e tera natal dje enfermedad, sino den e capital [Roma] mes.”12
16. Suetonio a menciona cua suceso histórico cu e Bijbel també ta menciona?
16 Den Echo 18:2 e skirbidor bíblico a menciona e echo di cu “[emperador romano] Claudio a manda pa tur hudío bandona Roma.” Historiador romano Suetonio di siglo dos també ta menciona tal expulsion. Den su obra titulá Claudio deificado, e historiador a bisa: “Siendo cu hudío a causa disturbio constantemente bao di instigacion di Cresto, [Claudio] a sácanan foi Roma.”13 Si Cresto ei ta referi na Jesucristo i si suceso den Roma a sigi modelo di loke a pasa den otro stad, anto multitud desordená realmente no tabata bao di instigacion di Cristo (esta, sigidor di Cristo). Mas bien, nan tabata e reaccion violento di hudío ne fiel actividad di predica di hende cristian.
17. Cua fuente di informacion cu Hustino Mártir a usa den e segundo siglo a apoya relato bíblico di milagro di Jesús i di su morto?
17 Hustino Mártir, skirbiendo durante siglo dos, a menciona e morto di Jesús: “Bo por determina cu tal cosnan a sosode den Acta di Poncio Pilato.”14 Además, segun Hustino Mártir, e mesun registro ta menciona milagro di Jesús, tocante locual el a bisa: “Bo por siña cu el a haci tal cosnan den Acta di Poncio Pilato.”15 Ta cierto cu tal “Acta,” of registro oficial, no ta existi mas. Pero evidentemente nan sí a existi den siglo dos, i Hustino Mártir a urgi cu confianza lector di dje pa úsanan pa comproba e berdad di loke el a bisa.
Evidencia arqueológico
18. Arqueología ta duna cua apoyo ne existencia di Poncio Pilato?
18 Descubrimento arqueológico també a ilustra of a confirma loke nos ta leza den e Scritura Griego. Por ehempel, na aña 1961 e nomber di Poncio Pilato tabata hayá grabá den piedra den resto dje teater romano di Cesarea.16 Te ne descubrimento, tabatin evidencia limitá so, fuera dje Bijbel mes, di existencia dje gobernante romano.
19, 20. Arqueología ta duna testimonio di cua persona bíblico cu Lucas a menciona (den Lucas i Echo)?
19 Den Evangelio di Lucas, nos ta leza cu Juan bautista a cuminza su ministerio “ora . . . Lisania tabata gobernante di districto di Abilene.” (Lucas 3:1) Algun hende a duda e palabra pasobra Josefo a menciona un Lisania cu a goberna Abilene i cu a muri na aña 34 PEC, hopi tempo promé cu e nacimento di Juan. Sin embargo, arqueólogo a descubri un inscripcion den Abilene mencionando un otro Lisania cu tabata tetrarco (gobernador di districto) durante e reinado di Tiberio, cu tabata goberna como César den Roma ora Juan a cuminza su ministerio.17 Esei por ta fácilmente e Lisania cu Lucas a menciona.
20 Den Echo nos ta leza cu Pablo i Barnabás tabata mandá pa haci trabao di misionero den Chipre i a conoce ei un procónsul yamá Sergio Paulo, “un homber inteligente.” (Echo 13:7) Durante siglo 19, cobamento den Chipre a descubri un inscripcion di fecha di aña 55 EC cu ta menciona net e homber ei. Arqueólogo G. Ernest Wright a bisa tocante dje: “Esei ta e único mencion cu nos tin dje procónsul fuera di Bijbel i ta interesante cu Lucas a dúnanos correctamente su nomber i título.”18
21, 22. Descubrimento di arqueología ta confirma cua costumber religioso mencioná den e Bijbel?
21 Ora Pablo tabata den Atenas, el a bisa cu el a mira un altar dedicá “na un Dios desconocí.” (Echo 17:23) Altar dedicá den latín na dios anónimo tabata descubrí den parti dje territorio dje imperio romano. Uno tabata descubrí den Pérgamo cu e inscripcion skirbí den griego, manera tabata e caso den Atenás.
22 Despues, ora Pablo tabata den Efeso, platero a oponele violentamente, pasobra nan a gana hopi placa trahando tempel i imagen dje diosa Ártemis. Efeso tabata yamá “wardador di tempel dje gran Ártemis.” (Echo 19:35) Na armonía cu esei, varios imagen di Ártemis di clei i di mármol tabata descubrí ne sitio di Efeso di antigua. Durante siglo 19, nan a descubri resto dje tempel enorme mes.
E sonido dje berdad
23, 24. (a) Unda nos ta haya e prueba di mas fuerte di cu e Scritura Griego Cristian ta bisa e berdad? (b) Cua calidad natural di Bijbel ta confirma e berdad di dje? Ilustra.
23 Asina, historia i arqueología ta ilustra, i te na un grado ta confirma, elemento histórico dje Scritura Griego. Pero, di nobo, e prueba di mas fuerte dje berdad di tal skirbimento ta den buki bíblico mes. Ora nos ta lézanan, nan no ta parce fábula. Nan tin e sonido dje berdad.
24 Entre otro cosnan, nan ta mashá francu. Corda loke tabata skirbí tocante Pedro. E ta detayá e fracaso bergonzoso di su camnamento riba awa. Anto, Jesús a bisa Pedro, un apóstol tanto respetá: “Bai djaki, Satanás!” (Mateo 14:28-31; 16:23) Además, despues cu Pedro a protesta vigorosamente cu aunque tur e otronan ta bandona Jesús, e nunca lo hacié, el a pega soño durante su warda djanochi anto a nenga su Señor tres bez.—Mateo 26:31-35, 37-45, 73-75.
25. Skirbidor di Bijbel a menciona francamente cua debilidad dje apóstolnan?
25 Pero, e Bijbel no ta saca na cla debilidad di Pedro so. E relato francu no ta tapa discusion dje apóstolnan tocante cua di nan tabata mayor. (Mateo 18:1; Marco 9:34; Lucas 22:24) Tampoco e no ta salta e cuenta dje mama di apóstol Santiago i Juan pidiendo Jesús duna su yiunan e puesto mas favorecido den su Reino. (Mateo 20:20-23) E “atake intenso di rabia” entre Barnabás i Pablo també ta ser documentá fielmente.—Echo 15:36-39.
26. Cua detaye dje resureccion di Jesús nan lo a inclui solamente si e tabata cierto?
26 Notable, també, ta e echo cu e buki di Lucas ta bísanos cu “hende muher, cu a bini cuné di Galilea,” tabata promé pa tende dje resureccion di Jesús. Esei ta un detaye mashá extraordinario den e arreglo social dje promé siglo cu homber a domina. Realmente, segun e relato, loke e muhernan tabata papia “a parce como co’i loco” pe apóstolnan. (Lucas 23:55–24:11) Si relato dje Scritura Griego no ta berdad, hende tabatin cu inventé. Pero, pakico hende a inventa un cuenta cu a menospreciá persona respetá asina tanto? Tal detaye lo tabata inclui solamente si nan tabata berdad.
Jesús—un berdadero persona
27. Cua testimonio un historiador a duna dje existencia histórico di Jesús?
27 Hopi hende ta considera Jesús pintá den e Bijbel como imaginacion idealista. Pero historiador Michael Grant a skirbi: “Si nos ta aplica ne Testament Nobo, debidamente, e mesun sorto di criteria cu nos mester aplica na otro skirbimento di antigua cu ta contene informacion histórico, nos no por rechaza existencia di Jesús no mas cu nos por rechaza existencia di un gran cantidad di persona pagano kende nan realidad como persona histórico nunca ta ser dudá.”19
28, 29. Pakico ta significante cu e cuater Evangelio ta presenta un cuadro armonioso dje personalidad di Jesús?
28 No solamente existencia di Jesús sino també su personalidad ta ser presentá den e Bijbel cu un sonido claro dje berdad. No ta fácil pa inventa un persona extraordinario, anto presenta un cuadro consistente di dje den tur e buki. Ta casi imposibel pa cuater skirbidor distinto skirbi tocante e mesun persona i consistentemente pinta e mesun cuadro di dje si e persona realmente nunca a existi. E echo cu e Jesús pintá den tur cuater Evangelio ta claramente e mesun persona ta evidencia convenciente dje berdad di Evangelio.
29 Michael Grant ta cita un pregunta mashá apropiado: “Di ki manera, den tur tradicion di Evangelio sin excepcion, ta sali un portret pintá notablemente firme di un homber hoven atractivo cu a pasa libremente rond den hende muher di tur sorto, incluyendo esnan claramente di mala fama, sin ningun indicacion di sentimentalismo, abnormalidad, of hipocresía, i toch, den cada caso a mantene un senciya integridad di carácter?”20 E único contesta tá cu tal homber realmente a existi i a comportele manera e Bijbel ta bisa.
Pakico hende no ta kere
30, 31. Pakico hopi hende no ta acepta e Scritura Griego Cristian como históricamente exacto apesar di tur evidencia?
30 Siendo cu tin evidencia invencible pa bisa cu e Scritura Griego ta berdadero historia, pakico algun hende ta nenga esei? Pakico hopi hende, aunque nan ta acepta algun parti di dje como e berdad, toch ta nenga di acepta tur loke e ta contene? Principalmente pa motibo cu e Bijbel ta informa di cosnan cu hende intelectual djawe no kier kere. Por ehempel, e Bijbel ta bisa cu Jesús a cumpli cu profecía i també a declara profecía. També e ta bisa cu Jesús a haci milagro i cu despues di su morto tabata resusitá.
31 Den siglo 20 dudoso aki, tal cosnan ta increíbel. Profesor Ezra P. Gould a bisa tocante milagro: “Tin un punto cu algun hende crítico ta kere cu nan tin razón di no acepta . . . [bisando cu] milagro no sa sosode.”21 Algun ta acepta cu Jesús por a efectua curacion, pero solamente dje tipo sicosomático, e ‘triunfo di mente riba materia.’ En cuanto otro milagro, casi tur crítico ta splícanan como inventá of como berdadero suceso cu tabata exagerá den e relato.
32, 33. Usando splicacion, con algun hende a purba di elimina e milagro di Jesús di alimenta e multitud grandi, pero pakico esei no ta lógico?
32 Como ehempel di esei, considera e ocasion ora Jesús a alimenta un multitud di mas cu 5.000 hende cu poco pan so i dos piscá. (Mateo 14:14-22) Heinrich Paulus, escolástico di siglo 19 a sugeri cu loke realmente a pasa ta lo sigiente: Jesús i su apóstolnan a háyanan den un multitud grandi cu tabatin hamber. Pues, Jesús a decidi di pone un bon ehempel pa hende ricu den nan. El a tuma e poco cuminda cu e i su apóstolnan tabatin i a compartié cu e multitud. Pronto, otro hende cu a trece cuminda a sigi su ehempel i a comparti nan cuminda també. Pa caba, tur e multitud a haya cuminda.22
33 Pero, si esei ta loke realmente a sosode, el a duna prueba notable dje poder di un bon ehempel. Pakico troce un relato asina interesante i significante pa hacié parce un milagro sobrenatural? Sí, tur esfuerzo asina pa splica milagro como algo no milagroso ta presenta mas problema cu nan ta resolve. I nan tur ta fundá riba un idea falso. Nan ta cuminza suponiendo cu milagro ta imposibel. Pero, pakico esei mester ta e caso?
34. Si e Bijbel realmente ta contene profecía exacto i relato di berdadero milagro, esei ta duna prueba di kico?
34 Segun norma di mas razonabel, tanto e Scritura Hebreo como e Griego ta berdadero historia, pero nan dos ta contene ehempel di profecía i di milagro. (Compara cu 2 Rey 4:42-44.) Pero, con ta para si tal profecía ta berdadero? I con ta para si milagro realmente a sosode? Anto Dios berdaderamente a inspira skirbimento dje Bijbel, i e realmente ta su palabra i no e palabra di hende. Den un otro capítulo nos lo considera e cuestion di profecía, pero láganos considera milagro promé. Ta razonabel den siglo 20 aki pa kere cu den siglo di antes milagro realmente a sosode?
[Komentario na página 66]
Pakico e Bijbel ta bisa cu hende muher a descubri promé e resureccion di Jesús si esei realmente no a sosode?
[Kuadro na página 56]
E fracaso di crítico moderno
Como un ehempel dje naturaleza insigur di crítico moderno di Bijbel, considera e sigiente palabra di Raymond E. Brown tocante Evangelio di Juan: “Na cabamento di siglo 19 i principio di siglo 20, investigador a pasa door di un periodo di duda extremo tocante e Evangelio aki. Nan a duna Juan un fecha mashá atrás, te ne segundo mitá dje segundo siglo. Como un producto dje mundo helenista, nan a kere cu su evangelio a falta totalmente algun balor histórico i tabatin poco relacion cu e Palestina di Jesús di Nazaret . . .
“No ta existi ningun opinion asina cu no a ser afectá pa un serie di descubrimento arqueológico, documentario, i textual inesperá. Tal descubrimento a guíanos pa desafiá inteligentemente opinion crítico cu casi a bira ortodoxo i pa reconoce ki swak tabata e base cu a apoya análisis sumamento dudoso di Juan. . . .
“E fecha dje Evangelio a ser reestablecí ne fin dje promé siglo of asta promé. . . . Kizás mas straño cu tur, algun escolástico asta ta tribi sugeri una bez mas cu Juan e yiu di Zebedeo sí tabatin algo cu ber cu e Evangelio”!3
Pakico mester parce straño pa kere cu Juan a skirbi e buki cu tradicion ta bisa cu el a skirbi? Solamente pa motibo cu esei no ta cuadra cu idea preconcibí di hende crítico.
[Kuadro na página 70]
Simplemente un otro atake contra e Bijbel
Timothy P. Weber a skirbi: “Loke crítica intelectual a haya a haci hopi hende gewoon decidi cu nan no por comprende nada [den e Bijbel] . . . . A. T. Pierson a expresa frustracion di hopi hende evangélico ora el a bisa cu ‘mescos cu romanismo, [crítica intelectual] casi ta kita e Palabra di Dios for dje pueblo común, suponiendo cu hende escolástico so por interpreté; mientras cu Roma ta pone pastor entre hende i e Palabra, crítica ta pone interpretador educá entre hende creyente i nan Bijbel.’”23 Asina crítica intelectual moderno ta ser denunciá como simplemente un otro atake contra e Bijbel.
[Plachi na página 62]
E altar ei den Pérgamo tabata aparentemente dedicá “na dios desconocí”
[Plachi na página 63]
Resto di loke na un tempo tabata e magnífico tempel di Ártemis, orguyo di hende efesio
[Plachi na página 64]
E Bijbel ta bisa onradamente cu Pedro a nenga di conoce Jesús
[Plachi na página 67]
E Bijbel ta conta francamente di un “atake intenso di rabia” entre Pablo i Barnabás
[Plachi na página 68]
E cuadro consistente cu e cuater Evangelio ta pinta di Jesús ta un prueba fuerte di cu nan ta berdadero
[Plachi na página 69]
E mayoría di crítico moderno ta kere sin prueba cu no tabatin milagro