Conociendo E Dios Berdadero—Kico Esei Ta Nifica?

1, 2. Segun Isaías 2:3, ki invitacion ta ser hací den e último dianan, i na ken?

ISAIAS su profecia emocionante encuanto e último dianan ta extendé un invitacion cu mester interesá hende di tur nacion. E invitacion ta pa yega na conocé e Dios berdadero personalmente: “I e hopi pueblonan lo bai i bisa: ‘Bin, laga nos subi n’e Ceru di SEÑOR, n’e Cas dje Dios di Jacob; cu E por instruí nos den Su camindanan i cu nos por cana den Su pasonan.’”a—Isaías 2:3.

² E profecia aki ta mustra cu den e último dianan, hende di hopi nacion mundialmente lo ser guiá na un fuente comun di instruccion pa yuda nan yega na conocé e Dios berdadero. Ki berdadnan nan lo siña cu ta sirbi pa uni nan den banchinan di berdadero pas?

3. Con un rasgo importante di Bijbel casi a bai perdí debí na tradicion?

³ Un rasgo sobresaliente di Bijbel, cu casi a bai perdí debí na tradicion, ta e establecimentu di un relacion cu Dios, nos Tata celestial i Creador, den e términonan di mas personal, dor di dirigí nos na dje na su nomber. Ken ta e persona cu tin un amigu kerí i stimá cu ta nenga di usa su nomber of sikiera mencion’é ora bo puntra p’e? Generalmente solamente un enemigu ta ser despreciá asina tantu cu bo ta preferá di no onr’é dor di ni sikiera mencioná su nomber. E relacion special cu a existí entre Israel di antigua i nan Dios—caminda nan tabata conoc’é pa nomber—ta ser expresá masha bunita dor dje salmista di antigua: “Pa motibu cu e ta dedicá na Mi lo Mi libr’é; lo Mi proteg’é, pasobra e conocé Mi nomber.”—Salmo 91:14.

Nos Mester Usa e Nomber Divino?

4, 5. Kico ta e nificacion di Dios su nomber?

⁴ Desde punto di bista di Bijbel, nunca tabatin ningun duda encuanto e nomber dje Dios berdadero. Ora Dios a papia cu Moises, splicando cu Dios lo a us’é pa guia e nacion di Israel for di esclabitud egipcio, Moises a haci un pregunta lógico: “Ora mi yega cerca e israelitanan i bisa nan ‘E Dios di boso tatanan a mandá mi cerca boso,’ i nan puntrá mi, ‘Kico ta Su nomber?’ kico lo mi bisa nan?” Dios a contestá: “Asina lo bo papia cu e israelitanan: E SEÑOR [hebreo, יהוה = YHWH = Yahweh, of, desde siglo 13 E.C., Jehova], e Dios di boso tatanan, e Dios di Abraham, e Dios di Isaac i e Dios di Jacob a mandá mi cerca boso: Esaki lo ta Mi nomber pa semper, esaki Mi denominacion [recordatorio, JP] pa tur eternidad.”—Exodo 3:13, 15, letra cursivo ta di nos.

⁵ E nomber aki ta yen di nificacion pa un persona cu ta papia e idioma hebreo. E ta bini for dje rais hebreo básico הוה, h·w·h, nificando “resultá di ser.” Sin embargo, e nomber ta den su forma causativo, Hiph·ʽilʹ, segun gramática hebreo. Pues e sentido básico no ta relacioná cu Dios su existencia eterno sino mas bien cu e ta causa cosnan resultá di ser of sosodé. Esaki ta specialmente berdad den un manera único encuanto su propósito. Mescos cu su propósito tabata pa libra su nacion scogí for di esclabitud egipcio, asina el a causa esei pa resultá asina. Ningun poder por a para den caminda di su boluntad expresá. Jehova ta e Dios cu ta causa su propósito ser cumplí. Pues e ta causa su mes pa bira e Cumplidor di su promesanan. Esaki tambe tabata berdad di su propósito pa libra su nacion for di cautiverio babilónico. Mescos ta berdad encuanto su propósito pa trece condicionnan paradísico n’e tera aki. Su nomber mes ta duna nificacion i un garantia na e promesanan aki.—Isaías 41:21-24; 43:10-13; 46:9, 10.

6-9. (a) Con nos sa cu Dios no ta prohibí e uso di su nomber? (b) Di ki manera i na ki tempu un prohibicion di usa e nomber di Dios a bira parti di hudaismo?

⁶ Pero e Dies Mandamentu no ta prohibí pa pronunciá Dios su nomber? Di ningun manera! Aunke hopi hende a interpretá e di tres mandamentu den e manera aki, tuma nota di loke e Encyclopaedia Judaica ta comentá: “Evitacion di pronunciá e nomber YHWH . . . a ser causá dor di un malcomprendementu dje di Tres Mandamentu (Ex. 20:7; Deut. 5:11) como nificando ‘Lo bo no tuma e nomber di YHWH bo Dios en bano,’ mientras cu realmente e kier men ‘Lo bo no hura falsamente den e nomber di YHWH bo Dios.’ ”⁵ Tuma nota cu e texto no ta prohibí ‘tumamentu’ of pronunciamentu di Dios su nomber. Sin embargo, asta si e tabata kier men tumamentu di Dios su nomber “en bano,” tuma nota di loke e léxico hebreo di Koehler i Baumgartner ta declará encuanto e palabra hebreo traducí “en bano” (hebreo, lash·shawʹʼ): “mencioná un nomber sin motibu . . . malusá un nomber.”⁶ Pues anto, e mandamentu aki no ta prohibí e uso dje nomber di Dios sino, mas bien, su maluso.

⁷ Pero kico dje argumentu cu Dios su nomber ta “muchu santu pa ser pronunciá?” Wel, no ta parce razonabel cu si Dios a considerá su nomber como muchu santu pa hende pronunciá, lo e no a revel’é na promé lugá? E echo mes cu den e texto original dje Scritura Hebreo, Dios su nomber personal ta aparecé mas cu 6.800 biaha ta mustra cu e kier pa hende conoc’é i usa su nomber. Leu di restringí e uso di su nomber pa prevení falta di respet, Dios repetidamente ta animá i asta ta manda su pueblo pa usa su nomber i pa haci’é conocí. Haciendo asina tabata evidencia di nan relacion íntimo cuné i tambe nan amor p’e. (Salmo 91:14) E profeta Isaías a mustra claramente loke Dios su boluntad ta den e asuntu aki ora el a declará: “Alabá e SEÑOR [hebreo, יהוה = YHWH = Jehova], proclamá Su nomber. Haci Su echonan conocí entre e pueblonan; declará cu Su nomber ta halsá.”—Isaías 12:4. Mira tambe Miqueas 4:5; Malaquías 3:16; Salmo 79:6; 105:1; Proverbio 18:10.

⁸ Si Jehova no tabata kier pa hende pronunciá su nomber, lo e por a prohibí esei explícitamente. Sin embargo, ningun caminda Bijbel ta prohibí e uso apropiado of e pronunciacion di su nomber. Hombernan fiel di tempu bíblico a usa su nomber libremente. (Génesis 12:8; Rut 2:4; 4:11, 14) En realidad, Dios repetidamente a condená esnan cu lo a pone su pueblo lubidá su nomber santu.—Jeremías 23:26, 27; Salmo 44:21, 22 (44:20, 21, NW).

⁹ Pero con e prohibicion aki a bira un parti di pensamentu hudiu, siendo cu asina claramente e no tabata un parti di Bijbel? Comentarionan di Dr. A. Cohen, un rabi i autor dje buki Everyman’s Talmud, ta mustra cu e tradicion a desaroyá gradualmente durante un periodo di hopi siglo. Dr. Cohen ta skirbi: “Den e periodo bíblico ta parce cu hende no a vacilá pa us’é den papiamentu diario. E agregamentu di Jah of Jahu na nombernan personal, cua a persistí entre e hudiunan asta despues dje exilio babilónico, ta un indicacion cu no tabatin ningun prohibicion contra uso dje Nomber di cuater-letter. Pero na principio dje periodo rabínico e pronunciacion dje Nomber a ser restringí na sirbishi di Tempel.” Encuanto desaroyonan mas aleu durante e periodo aki, e ta remarcá: “En bes di JHVH e Nomber a ser pronunciá como Adonai (mi Señor) den sirbishi di Snoa; pero tin un tradicion cu e pronunciacion original a ser transmití dor dje Sabionan na nan disipelnan periódicamente—un of dos bes cada siete aña (Kiddushin 71a). Asta e práctica ei a stop despues di un tempu i e manera di pronunciá e Nomber no ta conocí mas cu siguransa.”⁷ Esei tabata e efecto di “mandamentu di hende.”—Isaías 29:13; Deuteronomio 4:2; mira página 9, §15, 16.

Rekisitonan pa Esnan Cu Ta Carga e Nomber

10-14. (a) Kico Dios ta rekerí di esnan cu lo a carga su nomber? (b) Cua formanan di puresa ta ser rekerí di esnan cu ta deseá na agradá Dios? (c) Cua influencia stranhero pagano a laga un impresion profundo riba hudaismo?

¹⁰ Claramente, djis conocé of asta usa Dios su nomber no ta suficiente pa un persona agradá Dios. Cargando Dios su nomber como un di su adoradornan berdadero ta un privilegio único, manera e profeta Jeremías a proclamá: “Bo palabra a duná mi e deleite i goso di sa cu Bo nomber ta ligá na mi.” (Jeremías 15:16) Pero e gran privilegio aki ta trece cuné un responsabilidad pisá. Jehova a declará enfáticamente na reynan di nacionnan gentil: “Mi ta treciendo e castigu promé riba e stad cu ta carga Mi nomber.” (Jeremías 25:29) Ora Jehova a libra e nacion di Israel dje 70 añanan di cautiverio den Babilonia, el a spierta su pueblo caba mediante e profeta Isaías: “Kita, kita bai, no mishi cu nada impuru segun cu boso ta bai for di ei; mantené boso puro, segun cu boso ta sali for di ei, boso cu ta carga e vasnan dje SEÑOR [יהוה]!” (Isaías 52:11) Kico lo ta enbolbí awe den keda puro como adoradornan berdadero, como cargadornan dje nomber dje Dios santísimo, Jehova?

¹¹ Siguramente un persona cu ta deseá na agradá Dios den su adoracion lo tin cu keda puro den conducta, specialmente pa cu e normanan moral cu Dios mes ta establecé. Na contraste cu e normanan permisivo di sociedad djawe, e Scritura no ta laga ningun duda of lugá pa interpretacion ora e ta expresá Dios su condenacion di gañamentu, hortamentu, fornicacion, adulterio, homosexualidad, asesinato i tur forma di engaño. (Exodo 20:12, 13; [20:12-16, NW]; 23:1, 2; Levítico 5:1; 19:35, 36; 20:13) E Scritura ta condená no solamente e accion robes riba su mes sino tambe e pensamentu robes cu ta hiba na conducta robes.—Exodo 20:14 (20:17, NW); Levítico 19:17; Salmo 14:1-5; Job 31:1, 9-11.

¹² Ademas di puresa moral, puresa religioso siguramente lo ta rekerí di esnan cu ta carga Jehova su nomber. Repetidamente Jehova a spierta e nacion di Israel di antigua pa no ser influenciá dor di pensamentu, práctica i custumbernan religioso dje nacionnan bisiña, kendenan a adorá otro diosnan. En realidad, tabata a base dje condicion aki so—cu nan lo no a imitá e adoracion falsu dje nacionnan—cu nan lo por a keda den e Tera Primintí. (Levítico 18:24-30; Deuteronomio 12:29-31) No ta solamente idolatria cu tabata prohibí claramente sino tambe tur forma di práctica i creencia supersticioso, tal como astrologia, spiritismo, wakmentu di futuro, magia i reza na of puntra e mortonan, a ser prohibí.—Exodo 20:3-5; 22:17 (22:18, NW); Levítico 20:27; Deuteronomio 18:9-13; Isaías 8:19, 20; 47:13; Jeremías 10:2.

¹³ Estrechamente relacioná cu puresa religioso ta e asuntu di puresa di doctrina. E spiertamentu pa no imitá e moralidad i adoracion dje nacionnan rondó di nan a aplicá mas ayá cu solamente n’e tempu cu e nacion di Israel a tuma e pais over for dje cananeonan. Jehova a revelá berdad religioso na su pueblo. Nan so a adorá e Dios berdadero, Jehova. (Exodo 19:5, 6; Deuteronomio 4:32-37; Salmo 147:19, 20) Nan so a conocé e Dios aki personalmente i, siendo su testigonan, tabata den un posicion pa siña otronan tocante dje. (Isaías 43:9-12; Salmo 105:1) Na contraste, e custumbernan i prácticanan religioso di otro nacionnan a reflehá un falta básico di conocementu di Dios.—Isaías 60:2.

¹⁴ Apesar di su bon comienso, e nacion di Israel repetidamente a ser seducí dor di ideanan religioso stranhero. (Huez 2:11-13; 1 Rey 18:21; Jeremías 2:11-13; Ezekiel 8:14-18) Mientras cu e culturanan cananeo i babilónico a laga nan marca, e desafio di mas grandi cu hamas a yega di enfrentá hudaismo tabata durante e periodo di Helenisacion dor dje Imperio Griego.b Resumiendo e periodo extenso aki di influencia cultural griego, extendiendo for di siglo cuater P.E.C. te leu den e promé siglonan di Era Comun, e autor hudiu Max Dimont a remarcá: “Enrikesé cu pensamentu platónico, lógica aristoteliano i ciencia euclidiano, escolásticonan hudiu a acercá e Tora cu hermentnan nobo. . . . Nan a bai na agregá razonamentu griego na revelacion hudiu.”

Hende Tin un Alma Inmortal?

15-17. (a) Kico Bijbel ta siña tocante morto i e alma? (Mira cuadro, página 22.) (b) Ki speransa Bijbel ta ofrecé na esnan cu a muri?

¹⁵ E doctrinanan i creencianan religioso di hudaismo a ser influenciá durante e periodo aki? E Encyclopaedia Judaica ta admití francamente: “Probablemente tabata bou di influencia griego cu e doctrina di inmortalidad dje alma a drenta den hudaismo.”⁸ E Scritura Hebreo ta siña simplemente i claramente cu Dios originalmente tabatin intencion pa hende biba pa semper den salú perfecto riba e tera aki. (Mira página 11-12, §2-4.) Na Génesis 2:7 nos ta lesa: “E SEÑOR Dios a forma homber dje stof di tera i a supla den su nanishi e rosea di bida; i homber a bira un alma bibiente.” (JP) Tuma nota cu e texto no ta declará cu hende a ser duná un alma sino, mas bien, cu el a bira un alma. Dor di rebelá desobedientemente contra Dios, e promé homber, Adam, a ser sentenciá na morto. Pues anto, Adam, como un alma humano, a muri. Ningun parti di dje a sigui biba den un otro region. Pues, e concepto di un alma inmortal no ta un siñansa di Bijbel.c Bijbel ta bisa senciyamente: “E alma cu peca, lo e muri.”—Ezekiel 18:4, JP.

¹⁶ Loke e Scritura ta revelá tocante e condicion dje mortonan ta armonisá cu e siñansa bíblico cu e alma ta muri. Na Eclesiastés capítulo 9, versículo 5 i 10, nos ta lesa: “E bibunan sa cu nan lo muri. Pero e mortonan no sa nada . . . Pasobra no tin accion, ni razonamentu, ni siñamentu, ni sabiduria den Sheol [graf comun di humanidad], caminda bo ta bayendo.” (Compará cu Salmo 146:3, 4.) Morto a ser duná como un castigu dor di Dios. (Génesis 2:17) E ta lo contrario di bida, no un otro forma di bida. Siendo cu esaki ta berdad, nos no mester keda sorprendí pa descubrí cu ningun caminda e Scritura ta papia di un castigu ardiente di candela di fiernu (geh hin·nomʹ). Esaki tambe ta un concepto absorbá for di filosofia griego i doctrina pagano. Encuanto e creencia místico hudiu den reincarnacion The New Standard Jewish Encyclopedia ta declará: “E idea ta parce di a originá na India. . . . Den Kabbala [bukinan místico di hudaismo] su promé aparicion ta den e buki Bahir, i despues, for di Zohar padilanti, a ser aceptá comunmente dor di místiconan, hungando un papel importante den creencia i literatura hasídico.”⁹

¹⁷ Siendo cu morto ta lo contrario di bida i e alma no ta biba den un otro region, ki speransa tin pa esnan cu a muri? Dios su Palabra claramente ta siña cu despues dje restoracion di condicionnan paradísico na humanidad riba tera mediante e intervencion dje Rey Mesiánico nombrá dor di Dios, e mayoria dje mortonan lo ser trecí bek na bida. Hopi bes ta ser referí n’e siñansa bíblico aki como ‘e resureccion dje mortonan.’ Esnan resucitá lo incluí no solamente esnan cu a sirbi Dios fielmente sino tambe hopi miyones, asta biyones di hende cu nunca a ricibí un pleno oportunidad pa siña tocante dje i sirbi’é den berdad.—Daniel 12:2, 12 (13, NW, JP); Isaías 26:19; Job 14:14, 15.

18, 19. Pakico un persona mester yega na conocé e Dios berdadero i con e por haci esei?

¹⁸ E speransa bíblico aki di resureccion na bida perfecto riba tera no ta un motivacion poderoso pa hende di tur nacion busca i yega na conocé e Dios berdadero? Pero unda e berdadero fuente di instruccion for di Dios ta p’e último dianan aki, manera Isaías 2:2, 3 ta mencioná? Ken por instruí hende den Jehova su caminda, pa nan “por cana den Su berea”? Sea hudaismo of cristiandad por percurá tal instruccion, den lus dje informacion bíblico cu a ser considerá te awor?

¹⁹ Segun profecia lo tin un grupo di hende cargando Jehova su nomber den puresa, kende berdaderamente lo a sirbi tantu como su Testigonan como un fuente di lus spiritual n’e nacionnan.—Isaías 60:2, 3.

[Nota]

[Kuadro na página 20, 21]

DIOS SU NOMBER DEN BIJBEL—LOKE DIOS A BISA

“I Dios a bisa ademas na Moises: ‘Pues lo bo bisa n’e yunan di Israel: E SEÑOR [hebreo, יהוה = YHWH = Jehova], e Dios di boso tatanan, . . . a mandá mi cerca boso; esaki ta Mi nomber pa semper, i esaki ta Mi recordatorio te na tur generacion.’”—Exodo 3:15, JP, letra cursivo ta di nos.

“Despues di un ratu Boaz a yega for di Betlehem. El a saludá e cosechadornan, ‘E SEÑOR [יהוה] sea cu boso!’ I nan a respondé, ‘E SEÑOR bendicioná bo!’”—Rut 2:4.

“Alabá e SEÑOR [יהוה], proclamá Su nomber. Haci Su echonan conocí entre e pueblonan; declará cu Su nomber ta halsá.”d—Isaías 12:4, letra cursivo ta di nos; Salmo 105:1.

“Pasobra e ora ei lo mi haci e pueblo puro di habla, di manera cu nan tur ta invocá e SEÑOR [יהוה] pa nomber i sirbi’E di comun acuerdo.”—Sofonías 3:9, letra cursivo ta di nos.

“Basha Bo rabia riba e nacionnan cu no conocé Bo, riba e reinonan cu no ta invocá Bo nomber.”—Salmo 79:6, letra cursivo ta di nos.

DIOS SU NOMBER DEN TALMUD—LOKE HENDE A BISA

“A ser ordená cu un homber mester saludá su amigunan dor di mencioná e Nomber.”—Berakhot 9:5.

“Asina e [Sumo Sacerdote riba e Dia di Expiacion] a bisa: O JHVH, Bo pueblo, e Cas di Israel, a cometé maldad, a kibra ley, a peca dilanti Bo. Mi ta rogá Bo na e nomber JHVH . . . I ora e sacerdotenan i e pueblo cu a para den e Patio a tende e Nomber glorioso i reverencial pronunciá libremente for di boca dje Sumo Sacerdote, den santidad i puresa, nan a hinca rudia i a dobla nan mes riba tera, cayendo riba nan cara i sclamando: Bendicioná sea Su Nomber glorioso i soberano pa semper hamas.”—Yoma 6:2.

“Den e Santuario e Nomber a ser pronunciá manera e ta skirbí; pero pafó di su murayanan nan tabata usa un Nomber substituto.”—Sotah 7:6.

“Na principio e Sumo Sacerdote tabatin custumber di proclamá e Nomber na bos haltu; pero ora hende malbado a aumentá, el a proclam’é den un tono abou.”—The Jerusalem Talmud, Yoma 40d.

“[Entre esnan cu ta excluí for dje mundu pa bini ta] esun cu ta pronunciá e Nomber segun su letternan.”—Sanhedrin 10:1.

“Ken cu pronunciá e Nomber explícitamente ta culpabel di un picá cu pena capital.”—Pesikta 148a.

[Nota]

[Kuadro na página 22]

MORTO I E ALMA—KICO NAN TA?

LOKE E SCRITURA TA BISA:

“Anto e SEÑOR Dios a forma homber dje stof di tera i a supla den su nanishi e rosea di bida; i homber a bira un alma bibiente [neʹphesh].” (Génesis 2:7, JP, letra cursivo ta di nos.) Tuma nota cu hende no a haña un alma pero a bira un alma.

“Pero encuanto e palu di conocementu di bon i malu, bo no mester come di dje; pasobra manera bo come di dje, lo bo muri.” (Génesis 2:17) Tuma nota cu morto a ser mencioná n’e promé homber, Adam, solamente como un castigu pa desobedencia.

“Cu e sodó di bo wenkbrou lo bo haña pan pa come, te ora cu bo bolbe n’e tera—pasobra for di dje bo a ser tumá. Pasobra stof bo ta i na stof lo bo bolbe.”—Génesis 3:19.

“Den e ciudadnan dje delaster pueblonan ei, . . . lo bo no laga ni un alma [nesha·mahʹ] keda na bida.”—Deuteronomio 20:16.

“I nan a tum’é i a mata nan na fila di spada, . . . tur e almanan [neʹphesh] cu tabatin den dje; e no a laga ningun keda, . . . sino a destruy’é completamente i tur e almanan [neʹphesh] cu tabatin den dje.”—Hosué 10:37, JP.

“Nan a condená i a mata cu spada tur persona den dje. Ni un solo alma [nesha·mahʹ] a sobrebibí.”—Hosué 11:11.

“Mira, tur alma ta di Mi; mescos cu e alma dje tata, asina tambe e alma dje yu ta di Mi; e alma [neʹphesh] cu peca, lo e muri.”—Ezekiel 18:4, JP, letra cursivo ta di nos.

“E bibunan sa cu nan lo muri. Pero e mortonan no sa nada . . . Pasobra no tin accion, ni razonamentu, ni siñamentu, ni sabiduria den Sheol [graf comun di humanidad], caminda bo ta bayendo.”—Eclesiastés 9:5, 10.

LOKE E RABINAN A BISA:

“Den e di siete cielu, Araboth, tin wardá e spiritunan i almanan cu ainda tin cu ser creá.”—Hagigah 12b, Talmud.

“Hende ta haña un alma adicional bispu dje Sabat, cua ta ser kitá di dje ora Sabat terminá.”—Taanit 27b, Talmud.

“Pa 12 luna completo [despues di morto] e curpa ta sigui existí i e alma ta subi i baha.”—Shabbat 152b, Talmud.

“Bichinan ta mesun doloroso pa esnan morto cu un angua den carni di esnan bibu.”—Shabbat 13b, Talmud.

“Si un declaracion ta ser hací den nomber di un persona den e mundu aki despues di su morto su lipnan ta move den graf.”—Sanhedrin 90b, Talmud.

“Hudaismo ta ‘e religion cu ta sigurá inmortalidad dje alma despues di fayecimentu dje curpa.’”—The Kuzari 1:103, Judah Halevi, rabi di siglo 12.

[Plachi na página 23]

E vloer antigua aki di snoa na Tiberias, Israel, ta djis un ehempel dje grado den cua pensamentu i cultura griego a influenciá hudaismo. Tuma nota dje señalnan di zodiac cu nan nombernan skirbí na hebreo. E figura meimei ta e dios-solo Helios