Protehá Bo Famia di Influencianan Destructivo

1-3. (a) For di cua fuentenan influencianan destructivo cu ta menasá famia ta bini? (b) Ki balansa mayornan tin mester pa protehá nan famia?

BO TA cerca di manda bo yu homber chikitu scol, i awa ta cayendo duru. Con bo ta atendé e situacion? Bo ta lagu’é core sali pafó sin ningun regenjas of paraplú? Of bo ta bistié cu asina tantu paña protectivo cu apénas e por move? Naturalmente, bo no ta haci ningun di dos. Bo ta dun’é net loke ta necesario pa e keda secu.

² Den mésun manera, mayornan mester haña un manera balansá pa protehá nan famia for di influencianan destructivo cu ta basha riba nan for di hopi fuente—e industria di entretenimentu, e medionan di comunicacion, e muchanan su pareunan, i tin biaha asta di scol. Algun mayor ta haci poco of nada pa protehá nan famia. Otronan, mirando casi tur e influencianan di pafó como perhudicial, ta asina restrictivo cu e yunan ta sinti como si fuera nan ta ser strobá den nan desaroyo. Ta posibel pa haña un balansa?

³ Sí, ta posibel. Bayendo den extremo ta ineficas i por hiba na desaster. (Eclesiástes 7:16, 17) Pero con mayornan cristian ta haña e balansa corecto den protehá nan famia? Considerá tres área: educacion, asociacion i recreo.

 4. Con mayornan cristian mester considerá educacion?

⁴ Mayornan cristian ta duna gran balor na educacion. Nan sa cu educacion ta yuda muchanan lesa, skirbi i comunicá, como tambe resolvé problemanan. Educacion mester instruí nan tambe con pa siña. E abilidadnan cu muchanan ta adkerí na scol por yuda nan tin éxito apesar dje desafionan dje mundu djawe. Ademas, un bon educacion por yuda nan realisá trabou di calidad superior.—Proverbionan 22:29.

5, 6. Con muchanan na scol por ser exponé na informacion trocí tocante asuntunan sexual?

⁵ Sin embargo, tambe scol ta trece muchanan huntu cerca otro muchanan—di cua hopi tin puntonan di bista trocí. Por ehempel, considerá nan punto di bista riba sex i moralidad. Na un scol secundario na Nigeria, un mucha muher cu tabatin relacion sexual cu diferente hende tabata consehá su compañeronan di klas tocante sex. Nan tabata scucha ansiosamente na dje, maske su ideanan tabata yen di cos sin sentido cu el a saca for di literatura pornográfico. Algun dje mucha muhernan a bai experimentá cu su conseho. Como resultado,un mucha muher a sali na estado sin ta casá i a muri di un aborto causá dor di dje mes.

⁶ Ta tristu pa bisa, pero algun dje malinformacion tocante sex na scol, ta bini no di muchanan, sino di maestronan. Hopi mayor ta keda perturbá ora scolnan ta siña muchanan tocante sex sin presentá informacion riba normanan i responsabilidad moral. Un mama di un mucha muher di 12 aña di edad a bisa: “Nos ta biba den un área hopi religioso i conservativo, i tog den e scol secundario local mes, nan ta parti condon n’e muchanan!” E i su esposo a bira preocupá ora nan a haña sa cu nan yu muher tabata hañando proposicionnan sexual for di mucha hombernan di su mes edad. Con mayornan por protehá nan famia for di tal influencianan robes?

 7. Con malinformacion tocante sex por ser combatí n’e mihó manera?

⁷ Ta mihó pa protehá e muchanan for di cualkier mencion di asuntunan sexual? No. Ta mihó pa bo mes siña bo yunan tocante sex. (Proverbionan 5:1) Ta cierto cu, den partinan di Europa i Nort América, hopi mayor ta evitá di papia tocante e tópico aki. Mescos, den algun pais africano, mayornan rara bes ta considerá sex cu nan yunan. “No ta parti dje cultura africano pa haci esei,” un tata na Sierra Leona ta bisa. Algun mayor ta kere cu dor di siña muchanan tocante sex e ta duna nan ideanan cu lo hiba nan na cometé inmoralidad! Pero kico ta Dios su punto di bista?

8, 9. Cua informacion excelente riba asuntunan sexual ta ser hañá den Bijbel?

⁸ Bijbel ta haci cla cu no ta nada bergonsoso pa papia over di sex den un contexto apropiado. Den Israel, a ser bisá n’e pueblo di Dios pa reuní huntu, incluyendo nan “chikitunan” pa tende e lesamentu na bos haltu dje Ley di Moises. (Deuteronomio 31:10-12; Hosué 8:35) E Ley ta mencioná francamente un cantidad di asuntu sexual, incluyendo menstruacion, emision di sémen, fornicacion, adulterio, homosexualidad, incesto i relacion sexual cu bestia. (Levítico 15:16, 19; 18:6, 22, 23; Deuteronomio 22:22) Despues di lesamentunan asina mayornan sin duda tabatin hopi di splica na nan yunan curioso.

⁹ Tin pasashinan den e di cincu, seis i di shete capítulo di Proverbionan cu ta transmití conseho amoroso di un mayor riba e peligernan di inmoralidad sexual. E versículonan aki ta mustra cu inmoralidad por tentá bo tin biaha. (Proverbionan 5:3; 6:24, 25; 7:14-21) Pero nan ta siña cu inmoralidad ta malu i tin consecuencianan desastroso, i nan ta ofrecé guia pa yuda hóbennan evitá camindanan inmoral. (Proverbionan 5:1-14, 21-23; 6:27-35; 7:22-27) Ademas, inmoralidad ta ser poní na contraste cu e satisfaccion di placer sexual den su lugá apropiado, dentro di matrimonio. (Proverbionan 5:15-20) Ki un excelente patronchi di siñansa pa mayornan sigui!

10. Pakico dunando yunan e conocimentu piadoso tocante sex no mester hiba nan na cometé inmoralidad?

¹⁰ Acaso siñansa asina ta hiba yunan na cometé inmoralidad? Al contrario, Bijbel ta siña: “Mediante conocimentu e hustu ta ser rescatá.” (Proverbionan 11:9) Bo kier rescatá bo yunan for dje influencianan dje mundu aki? Un tata a bisa: “For di tempu cu e muchanan tabata hopi chikitu, nos a purba di ta completamente franco cu nan ora ta trata di sex. E manera ei, ora nan tende otro muchanan papia tocante sex, nan no ta curioso. E no ta ningun gran misterio.”

11. Con por siña yunan progresivamente tocante asuntunan íntimo di bida?

¹¹ Manera a ser mencioná den capítulonan anterior, educacion sexual mester cuminsá trempan. Ora di siña muchanan chikitu nomber di partinan di curpa, no ignorá nan partinan privá como si fuera esakinan di un manera of otro ta bergonsoso. Siña nan e nombernan corecto pa esakinan. Segun tempu ta pasa, lesnan tocante privacidad i límitenan ta esencial. Preferiblemente ámbos mayor mester siña e yunan cu e partinan aki dje curpa ta special, generalmente no pa otronan mishi cuné of ser exponé na nan, i nunca mester papia di nan den un manera malu. Segun muchanan ta crece bira grandi, nan mester ser informá en cuanto con un homber i un muher ta bini huntu pa concibí un yu. Pa ora nan mes curpa cuminsá drenta pubertad, nan mester ta bon na altura caba dje cambionan pa ser sperá. Manera a ser considerá den Capítulo 5, tal educacion por yuda tambe pa protehá muchanan contra abusu sexual.—Proverbionan 2:10-14.

12. Cua puntonan di bista trocí hopi bes ta ser siñá na scolnan?

¹² Mayornan mester ta cla pa contrarestá otro ideanan falsu cu por ser siñá na scol—filosofianan mundano manera evolucion, nacionalismo of e idea cu ningun berdad ta absoluto. (1 Corintionan 3:19; compará cu Génesis 1:27; Levítico 26:1; Juan 4:24; 17:17.) Hopi funcionario di scol sincero ta duna importancia excesivo na educacion avansá. Aunke e asuntu di educacion adicional ta un decision personal, algun maestro ta kere cu esei ta e único caminda pa cualkier éxito personal.a—Salmo 146:3-6.

13. Con muchanan cu ta bayendo scol por ser protehá di ideanan robes?

¹³ Si mayornan kier contrarestá siñansanan robes of trocí, nan mester sa precis ki instruccion nan yunan ta ricibiendo. Pues mayornan, corda cu boso tambe tin huiswerk! Demostrá un berdadero interes den e educacion di bo yunan. Papia cu nan despues di scol. Puntra kico nan ta siñando, kico nan gusta mas tantu, kico nan ta haña mas difícil. Repasá e asignacionnan di huiswerk, notanan i resultadonan di “proefwerk.” Trata na cera conocí cu nan maestronan. Laga e maestronan sa cu bo ta apreciá nan trabou i cu bo kier yuda den cualkier manera cu bo por.

14. Pakico ta vital pa yunan piadoso scoge bon amigunan?

¹⁴ “Di unda bo a sali cu e cos ei?” Cuantu mayornan no a haci e pregunta ei, hororisá pa algu cu nan yu a bisa of haci i cu absolutamente no ta parce di ta un característica dje yu? I cuantu bes e contesta tin di haci cu algun amigu nobo na scol of den e becindario? Sí, compañeronan ta afectá nos profundamente, sea cu nos ta yong of bieu. Apostel Pablo a spierta: “No sea gañá. Mal asociacion ta daña custumbernan útil.” (1 Corintionan 15:33; Proverbionan 13:20) Hóbennan en particular ta sensibel pa presion di nan pareunan. Nan tin e tendencia di ta insigur tocante nan mes i tin biaha por sinti nan dominá pa un deseo di agradá i impresioná nan amigunan. Ki vital e ta, anto, pa nan scoge bon amigunan!

15. Con mayornan por guia nan yunan den scoge amigunan?

¹⁵ Manera tur mayor sa, yunan no semper lo scoge bon; nan tin mester di algun guia. No ta un asuntu di scoge nan amigunan pa nan. Mas bien, segun cu nan ta crece, siña nan dicernimentu i yuda nan mira cua cualidadnan nan mester balorá den amigunan. E cualidad principal ta un amor pa Jehova i pa haci loke ta corecto den su bista. (Marco 12:28-30) Siña nan stima i respetá esnan cu ta poseé onrades, bondad, generosidad, diligencia. Durante e studio di famia, yuda e yunan reconocé cualidadnan asina den personahenan bíblico i pa despues busca e mésun cualidadnan den otronan den e congregacion. Pone e ehempel dor di usa e mésun criterio den scoge bo propio amigunan.

16. Con mayornan por vigilá nan yunan su scogementu di amigu?

¹⁶ Bo sa ken ta e amigunan di bo yunan? Pakico no laga bo yunan trece nan cas di manera cu bo por cera conocí cu nan? Bo por puntra bo yunan tambe kico otro muchanan ta pensa dje amigunan aki. Nan ta conocí pa ta demostrá integridad personal of pa hiba un bida dobel? Si e último ta e caso, yuda bo yunan razoná riba pakico tal asociacion por perhudicá nan. (Salmo 26:4, 5, 9-12) Si bo nota cambionan indeseabel den bo yu su comportacion, bistí, actitud of papiá, kisas bo mester papia cuné tocante su amigunan. Bo yu kisas ta pasando tempu cu un amigu cu ta eherciendo un influencia negativo.—Compará cu Génesis 34:1, 2.

17, 18. Ademas di spierta contra mal asociacion, ki yudansa práctico mayornan por duna?

¹⁷ Sin embargo no ta suficiente pa djis siña bo yunan evitá mal amigunan. Yuda nan haña bon amigunan. Un tata ta bisa: “Nos tabata purba semper pa haña un reemplaso. Pues ora scol tabata kier nos yu homber den e tim di futbol, ami cu mi esposa a sinta cuné i a considerá pakico esei no tabata un bon idea—pa motibu dje compañeronan nobo cu lo ta enbolbí. Pero e ora ei nos a sugerí pa busca un par dje otro muchanan den e congregacion i hiba nan tur n’e parke pa hunga bala. I esei a resolvé e problema.”

¹⁸ Mayornan prudente ta yuda nan yunan haña bon amigunan anto disfrutá di recreo saludabel cu nan. Sin embargo, pa hopi mayor, e asuntu aki di recreo ta presentá su propio desafionan.

19. Ki ehempelnan bíblico ta mustra cu no ta un picá pa famianan pasa bon?

¹⁹ Bijbel ta condená diberticion? Siguramente cu no! Bijbel ta bisa cu tin “un tempu pa hari . . . i un tempu pa bula rond.”b (Eclesiástes 3:4) Dios su pueblo den Israel di antigwedad a disfrutá di música i bailamentu, wega i charadanan. Jesucristo a asistí na un fiesta grandi di casamentu i “un bankete grandi di recepcion” cu Mateo Levi a haci p’e. (Lucas 5:29; Juan 2:1, 2) Claramente, Jesus no tabata un kibradó di goso. No laga harimentu i diberticion nunca ser considerá como picá den bo famia!

20. Kico mayornan mester tene na mente ora di proveé recreo p’e famia?

²⁰ Jehova ta “e Dios felis.” (1 Timoteo 1:11) Pues adoracion di Jehova mester ta un fuente di goso, no algu cu ta causa un falta di goso den bida. (Compará cu Deuteronomio 16:15.) Muchanan di naturalesa ta entusiasmá i yen di energia cu por ser expresá den hungamentu i recreo. Recreo bon scogí ta mas cu diberticion. E ta un manera pa un mucha siña i madurá. Un cabes di famia ta responsabel pa percurá pa su famia su necesidadnan den tur cos, incluyendo recreo. Sin embargo, balansa ta necesario.

21. Ki trampanan ta existí den recreo awe?

²¹ Den e “último dianan” trabahoso aki, sociedad humano ta yen di hende cu ta “stimador di placer mas bien cu stimador di Dios,” net manera a ser profetisá den Bijbel. (2 Timoteo 3:1-5) Pa hopi hende, recreo ta e cos principal den bida. Tin asina tantu entretenimentu disponibel cu esei fácilmente por tuma e lugá di cosnan mas importante. Ademas, hopi diberticion moderno ta presentá inmoralidad sexual, violencia, abusu di droga i otro prácticanan gravemente perhudicial. (Proverbionan 3:31) Kico por ser hací pa protehá hóbennan for di entretenimentu perhudicial?

22. Con mayornan por entrená nan yunan pa tuma decisionnan sabí en cuanto recreo?

²² Mayornan mester pone límite i restriccionnan. Pero mas cu esei, nan mester siña nan yunan con pa husga cua recreo ta perhudicial i pa sa cuantu recreo ta di mas. Tal entrenamentu ta tuma tempu i esfuerso. Considerá un ehempel. Un tata di dos yu homber a ripará cu su yu mayor tabata scuchando cu basta frecuencia un emisora di radio nobo. Pues coriendo den su truck pa bai trabou un dia, e tata a sintonisá e mésun emisora. De bes en cuando e tabata para i nota e letranan di cierto canticanan. Mas despues el a sinta cu su yu hombernan i a considerá loke el a tende. El a haci preguntanan di punto di bista, cuminsando cu “Kico boso ta pensa?” i a scucha cu pacenshi na nan contestanan. Despues di razoná riba e asuntu usando e Bijbel, e mucha hombernan a bai di acuerdo pa no scucha e emisora ei.

23. Con mayornan por protehá nan yunan for di entretenimentu insaludabel?

²³ Mayornan cristian prudente ta chek e música, programanan di television, videonan, bukinan di ‘comics,’ weganan di video i películanan cu ta interesá nan yunan. Nan ta wak e pintura riba e kaft, e letranan i e empake i nan ta lesa evaluacionnan crítico di buki den corant i ta wak propaganda di películanan. Hopi mayor ta keda di shok na algun dje “entretenimentu” dirigí na muchanan awe. Esnan cu ta deseá di protehá nan yunan for di influencianan impuru ta sinta cu e famia i considerá e peligernan, usando e Bijbel i publicacionnan basá riba Bijbel, manera e buki Loke hovenan sa puntra—Contesta práctica i artículonan den e revistanan Toren di Vigilancia i Spierta!c Ora mayornan pone límitenan firme, siendo consistente i razonabel, generalmente nan ta mira bon resultadonan.—Mateo 5:37; Filipensenan 4:5.

24, 25. Cua ta algun forma di recreo saludabel cu famianan por disfrutá di dje huntu?

²⁴ Naturalmente, prohibiendo formanan di recreo perhudicial ta solamente parti dje bataya. Loke ta malu mester ser contrarestá dor di loke ta bon, sino yunan lo drif bai den un curso robes. Hopi famia cristian tin cantidad incontabel di recuerdonan caluroso i felis di a disfrutá huntu di recreo—bai picnic, haci caminata, bai kampeer, hunga wega i deportenan, haci biahenan pa bishitá famia of amigunan. Algun a haña cu simplemente lesa na bos haltu huntu pa relahá ta un gran fuente di placer i consuelo. Otronan ta disfrutá di conta relatonan humorístico i interesante. Tambe otronan a desaroyá hobinan huntu, por ehempel, traha cos di palu i otro obranan di man, como tambe toca instrumentonan musical, pinta, of studia Dios su obranan di creacion. Muchanan cu siña disfrutá di diberticionnan asina ta ser protehá for di hopi entretenimentu impuru, i nan ta siña cu recreo ta enbolbé mas cu simplemente sinta pasivamente i ser entretené. Participá hopi bes ta mas dibertido cu observá.

²⁵ Reunionnan social tambe por ta un forma recompensador di recreo. Ora nan ta bon supervisá i no ta extremadamente grandi of ta rekerí muchu tempu, nan por duna bo yunan mas cu solamente diberticion. Nan por yuda profundisá e lasonan di amor den e congregacion.—Compará cu Lucas 14:13, 14; Hudas 12.

26. Ora ta trata di protehá e famia for di influencianan insaludabel, cua ta e cualidad di mas importante?

²⁶ Sin duda, protehando bo famia for dje influencianan destructivo dje mundu ta rekerí hopi trabou duru. Pero tin un cos cu, mas cu tur otro cos, lo haci éxito posibel. Esei ta amor! Lasonan di famia, estrecho i amoroso lo haci bo hogar un refugio sigur i lo promové comunicacion, loke ta un proteccion grandi for di mal influencianan. Ademas, cultivando un otro clase di amor ta asta mas importante—amor pa Jehova. Ora tal amor ta yena henter e famia, ta mas probabel cu e yunan ta crece odiando e solo idea di desagradá Dios dor di sucumbí na influencianan mundano. I mayornan cu ta stima Jehova di curason lo busca pa imitá su personalidad amoroso, razonabel i balansá. (Efesionan 5:1; Santiago 3:17) Si mayornan haci esei, nan yunan lo no tin ningun motibu pa mira adoracion di Jehova como djis un lista di cosnan cu nan no ta permití pa haci of como un moda di bida cu ta falta diberticion of harimentu, for di cua nan kier scapa mas pronto cu ta posibel. Mas bien, nan lo mira cu adorando Dios ta e moda di bida di mas felis i significativo i satisfaciente posibel.

27. Con un famia por vence e mundu?

²⁷ Famianan cu ta keda uní den sirbishi felis i balansá na Dios i cu ta haci esfuerso di henter curason pa keda “sin mancha i sin culpa” for dje influencianan corupto dje mundu aki, ta un fuente di goso pa Jehova. (2 Pedro 3:14; Proverbionan 27:11) Famianan asina ta sigui den e pasonan di Jesucristo, kende a resistí tur esfuerso dje mundu di Satanas pa contamin’é. Cerca e fin di su bida humano, Jesus tabata capas pa bisa: “Mi a vence e mundu.” (Juan 16:33) Cu bo famia tambe vence e mundu i disfrutá di bida pa semper!