Pedro A Nenga Hesus

Ora nan a arestá Hesus den Hòfi di Getsémani, su apòstelnan a haña miedu i a hui bai lag’é. Pero Pedro i “un otro disipel,” aparentemente apòstel Huan, a bira bèk i a bai buska Hesus. (Huan 18:15; 19:35; 21:24) Kisas, nan a alkansá Hesus ora e sòldánan tabata hibando e kas di Anas. Anto ora Anas a manda Hesus serka Sumo Saserdote Kaifas, Pedro i Huan a siguié na un distansia. Probablemente nan tabatin miedu di pèrdè nan bida i a la bes nan tabata preokupá pa loke lo por a pasa ku nan Señor.

Awor, komo ku Kaifas tabata konosé Huan, Huan por a drenta patio di Kaifas su kas. Pero Pedro a keda warda pafó te ora Huan a bini bèk i papia ku e kriá ku tabata na porta, kende a laga Pedro tambe drenta.

E anochi ei tabata hasi friu. P’esei, e hendenan ku tabata den e patio a sende un kandela i tabata para rònt di dje pa keinta nan kurpa. Pedro tambe a sinta huntu ku nan pa warda i ‘mira kon kos lo a kaba.’ (Mateo 26:58) Awor, komo ku Pedro tabata den klaridat di e kandela, e kriá ku tabata na porta por a mir’é mihó i a puntr’é: “Bo tambe no ta un disipel di e hòmber akí?” (Huan 18:17) Tabatin otro hende ku tambe a rekonosé Pedro i a bis’é ku e tabata un disipel di Hesus.—Mateo 26:69, 71-73; Marko 14:70.

E kos ei a molestiá Pedro mashá pasobra e no tabata ke pa e hendenan rekonos’é; el a asta bai na e entrada pa nan no wak e. Pues, Pedro a nenga ku e tabata huntu ku Hesus; el a bai asina leu di bisa: “Mi no konos’é ni mi no ta komprondé kiko bo ta papia!” (Marko 14:67, 68) El a asta kuminsá “maldishoná su mes i hura” ku e no konosé Hesus; ku otro palabra, e tabata dispuesto pa hura ku su palabranan tabata bèrdat i pa enfrentá kalamidat si e tabata gaña.—Mateo 26:74.

Mientrastantu, nan tabata trata Hesus su kaso, aparentemente den un sala ariba for di kua bo por a mira e patio kaminda Pedro i tur e otro hendenan tabata. Podisé nan a mira tur e testigunan ku a bini kas di Kaifas pa testiguá kontra Hesus drenta i sali.

Na Pedro su aksènt di Galilea, e hendenan a ripará ku e tabata gaña. Ademas, un di e hendenan ku tabata presente tabata famia di Malko, e hòmber ku Pedro a kap su orea kita afó. E famia akí a bisa Pedro: “No ta abo mi a mira den hòfi huntu kuné?” Ora ku pa di tres biaha Pedro a nenga esaki, gai a kanta nèt manera Hesus a profetisá.—Huan 13:38; 18:26, 27.

Podisé, nèt na e momento ei Hesus tabata den e balkon ku tabata riba e patio. El a bira wak Pedro stret den su kara; Pedro lo a sintié masha malu mes. El a kòrda loke Hesus a bis’é un par di ora promé den e kamber ariba. Bo por imaginá bo kon Pedro lo a sintié ora el a realisá kiko el a kaba di hasi? El a bai pafó i a yora amargamente.—Lukas 22:61, 62.

Kon e kos akí por a pasa? Kon Pedro, kende tabata asina sigur ku e tabata spiritualmente fuerte i leal, por a nenga su Señor? E hendenan tabata trose e palabranan di Hesus, i nan a husga Hesus inhustamente komo un kriminal. En bes di defendé Hesus, kende tabata un hòmber inosente, Pedro a bira lomba pa Esun ku “tin e palabranan ku ta hiba na bida eterno.”—Huan 6:68.

E insidente tristu akí ta mustra ku asta un persona deboto i ku tin fe por trompeká si e no ta bon prepará pa enfrentá prueba òf tentashon ku diripiente e por hañ’é kuné. Laga loke a pasa ku Pedro sirbi komo un lès pa nos tur ku ta sirbidó di Dios!