Capítulo 120

Nengamento den e curá

DESPUES di a bandona Jesús den e hofi di Getsemaní i hui den miedu hunto cu e otro apóstolnan, Pedro i Juan a para den nan huimento. Kizás nan a alcanza Jesús ora nan a hibé na cas di Anás. Ora Anás a mandé cerca sumo sacerdote Caifás, Pedro i Juan a sigi na un bon distancia, aparentemente indeciso den miedu di perde nan mes bida i den preocupacion profundo tocante nan Maestro.

Yegando ne residencia espacioso di Caifás, Juan por a logra drenta den e curá, pasobra e sumo sacerdote a conocele. Sin embargo, Pedro a wordu lagá afó pará na porta. Pero pronto Juan a bolbe i a papia cu e portero, un mucha muher criá, i el a permiti Pedro drenta.

A haci friu ne tempo ei, i criá di cas i oficial dje sumo sacerdote a traha un candela di carbón di palu. Pedro a bai cerca nan pa cayentá su curpa mientras cu el a spera e resultado dje huzgamento di Jesús. Ei, den luz dje candela, e portero cu a laga Pedro drenta a haya un mihor bista di dje. El a bisa: “Abo, també, tabata cu Jesús e galileo!”

Molestiá pasobra nan a identifiqué, Pedro a nenga dilanti nan tur cu e sikiera a conoce Jesús. El a bisa: “Ami ni conocé ni no ta comprende loke bo ta papia.”

Anto, Pedro a sali i a bai cerca e porta. Ei, un otro mucha muher a tuma nota di dje i també a bisa esnan pará ei: “E homber ei tabata cu Jesús e nazareno.” Un biaha mas Pedro a nenga, hurando: “Mi no conoce e homber!”

Pedro a keda den e curá, forzando tanto posibel pa no keda destacá. Kizás ne momento ei cantamento di un gai den e scuridad di madrugá a sorprendele. Entretanto, e huzgamento di Jesús a sigi, evidentemente nan a tené den e parti dje cas ariba dje curá. Sin duda Pedro i otro hende sperando mas abao a mira bai i bini varios testigo cu nan a trece pa duna testimonio.

Rond di un ora a pasa desde cu nan a identifica Pedro pe último bez como un asociado di Jesús. Awor varios hende di esnan cu tabata para rond a bini cerca dje i a bisa: “Siguramente abo també ta uno di nan, pasobra, realmente, bo dialecto ta mustra.” Un hende dje grupo tabata di famía di Malco, kende su orea Pedro a kita. El a bisa: “Mi a mirábo den e hofi cuné, no ta berdad?”

Pedro a contesta cu vigor: “Mi no conoce e homber!” Realmente, cu maldicion i huramento ne asunto el a purba di convencénan di cu nan tur a haci equibocacion, en efecto, inbocando malu riba su mes si e no a papia e berdad.

Net ora Pedro a haci su tercer nengamento, un gai a canta. Ne momento ei, Jesús, cu aparentemente a sali riba balcón ariba e curá, a bira i a waké. Pedro a corda un bez loke Jesús a bisa solamente un poco ora promé den e sala djariba: “Promé cu gai canta dos bez, asta abo lo nengámi tres bez.” Aplastá cu e peso di su mes picá, Pedro a sali afó i a yora amargamente.

Con esei por a sosode? Di ki manera, despues di a keda tanto sigur di su fortaleza spiritual, Pedro por a nenga su Maestro tres bez lihé un tras di otro? Sin duda e circunstancia a coge Pedro inesperadamente. E berdad a wordu trocí, i Jesús tabata pintá como un criminal baho. Loke a parce bon a wordu hací parce malu, i hende inocente a parce culpable. Pues, debí ne presion dje ocasion, Pedro a perde su equilibrio. Di ripiente su sintimento propio di lealtad a wordu trastorná; i su miedu di hende a paralizé pa su tristeza. Nunca laga esei sosodénos! Mateo 26:57, 58, 69-75; Marco 14:30, 53, 54, 66-72; Lucas 22:54-62; Juan 18:15-18, 25-27.

▪ Di ki manera Pedro i Juan por a drenta den e curá dje sumo sacerdote?

▪ Durante cu Pedro i Juan tabata den e curá, kico a pasa den e cas?

▪ Cuanto bez gai a canta, i cuanto bez Pedro a nenga di conoce Cristo?

▪ Kico tabata e nificacion dje maldicion i huramento di Pedro?

▪ Kico a haci Pedro nenga di conoce Jesús?