LÈS 13
Religion Falsu Ta Alehá Hende for di Dios
Dios ta amor. Apesar di esei, hopi religion ku ta bisa ku nan ta adorá Dios ta hasi hopi kos malu. Kon esei por ta? Simplemente bisá, nan ta religion falsu. Loke nan ta bisa i hasi ta alehá hende for di Dios. Kon religion falsu ta alehá hende for di Dios? Kiko Dios ta pensa di loke religion falsu ta hasi, i kiko lo e hasi ku nan?
1. Kon e kosnan ku e lidernan di religion falsu ta siña hende ta alehá hende for di Dios?
E lidernan di religion falsu ta siña hende “mentira i no e bèrdat tokante Dios.” (Romanonan 1:25) Por ehèmpel, mayoria di religion no ta siña nan miembronan nòmber di Dios. Pero, Beibel ta mustra ku ta importante pa hende usa e nòmber di Dios. (Romanonan 10:13, 14) Ademas, ora un tragedia pasa, algun lider religioso ta bisa ku ta Dios su boluntat. Pero, esei no ta bèrdat. Dios nunka ta kousa maldat. (Lesa Santiago 1:13.) Lamentablemente, e mentiranan ku e lidernan religioso ta siña hende tokante Dios ta alehá hende for di Dios.
2. Kon e kosnan ku e lidernan di religion falsu ta hasi ta alehá hende for di Dios?
E lidernan di religion falsu no ta trata hende manera Yehova ta trata nan. Beibel ta bisa ku religion falsu su “pikánan a montoná yega te na shelu.” (Revelashon 18:5) Pa vários siglo, religion a mete ku polítika, a apoyá guera i a kousa òf tabata enbolbí den morto di míles di hende. Ademas, algun lider religioso ke hiba un bida luhoso i p’esei nan ta eksigí sèn for di nan miembronan. Loke e lidernan religioso ei ta hasi ta mustra ku nan no konosé Dios. P’esei, nan no tin derecho di bisa ku nan ta sirbi Dios.—Lesa 1 Huan 4:8.
3. Kon Dios ta sinti ora e mira loke religion falsu ta hasi?
Si e kosnan ku religion falsu ta hasi ta pone bo rabia, kon bo ta kere Yehova ta sinti? Yehova ta stima hende, pero e ta rabiá ku e lidernan religioso ku ta papia mentira tokante dje i ku ta trata e miembronan di nan iglesia malu. Yehova ta primintí ku lo e destruí tur religion falsu i ku “nunka mas” lo haña nan. (Revelashon 18:21) Sí, pronto Dios lo kaba ku tur religion falsu.—Revelashon 18:8.
KIKO MAS NOS POR SIÑA?
Laga nos wak kiko mas Dios ta pensa di religion falsu. Ademas, wak kiko mas e lidernan di religion falsu a hasi, i dikon esaki no mester stòp bo di sigui konosé Yehova.
4. No ta tur religion ta agradá Dios
Hopi hende ta kere ku Dios ta aseptá tur religion. Pero esei ta bèrdat? Lesa Mateo 7:13, 14. Despues, analisá e siguiente pregunta:
Kiko Beibel ta bisa tokante e kaminda ku ta hiba na bida?
Pasa e VIDIO. Despues, analisá e siguiente pregunta:
Beibel ta bisa ku Dios ta aseptá tur religion?
5. Religion falsu no ta reflehá e amor di Dios
E lidernan di religion falsu a hasi vários kos malu den nòmber di Dios. Un di e maneranan di mas notabel ku nan a hasi esei ta di enbolbé nan mes den guera. Pa wak un ehèmpel di esaki, pasa e VIDIO. Despues, analisá e siguiente preguntanan:
Kiko hopi religion a hasi durante Segundo Guera Mundial?
Kiko bo ta pensa di loke nan a hasi?
Lesa Huan 13:34, 35 i 17:16. Despues, analisá e siguiente preguntanan:
Kon bo ta kere Yehova ta sinti ora e mira hende ku ta bisa ku nan ta sirbié partisipá den guera?
Religion falsu a yega di hasi hopi kos malu i no ta obedesé Dios su mandamentu pa mustra amor. Abo a yega di mira esei? Menshoná algun ehèmpel.
Religion falsu no ta reflehá e amor di Dios
6. Dios ke yuda hende sali for di religion falsu
Lesa Revelashon 18:4.a Despues, analisá e siguiente pregunta:
Kon bo ta sinti bo awor ku bo a haña sa ku Dios ke libra hende ku a ser engañá pa religion falsu?
7. Sigui siña tokante e Dios berdadero
Bo mester laga e mal kosnan ku religion falsu ta bisa i hasi influensiá e manera ku bo ta mira Dios? Imaginá bo e siguiente esena: Un tata ta duna su yu hòmber bon konseho. Pero, e yu no ta hasi kaso di e konseho di su tata. E yu ta bandoná kas i ta hasi hopi kos malu. E tata no ta niun tiki kontentu ku e mal desishonnan ku su yu a tuma. Dikon no por kulpa e tata pa e kosnan malu ku su yu hòmber rebelde a hasi?
Awor, ta hustu pa kulpa Yehova pa e kosnan malu ku religion falsu a hasi i laga esei stroba bo di siña mas tokante Yehova?
LOKE HENDE SA BISA: “Mi no ta interesá den Dios pasobra religion a kousa hopi problema na mundu.”
Bo tambe ta pensa asina?
Dikon nos no mester laga loke religion falsu ta hasi influensiá e manera ku nos ta mira Dios?
RESÚMEN
Religion falsu ta alehá hende for di Dios pa medio di nan siñansanan falsu i e kosnan malu ku nan ta hasi. Dios lo destruí tur religion falsu.
Repaso
Kiko bo ta pensa tokante e siñansanan di e lidernan religioso falsu i e kosnan malu ku religion falsu ta hasi?
Kiko Yehova ta pensa tokante religion falsu?
Kiko Dios lo hasi ku religion falsu?
MAS INFORMASHON INTERESANTE
Wak den ki dos manera mayoria di religion ta desagradá Dios.
“Tur Religion Ta Yuda Nos Hala Serka Dios?” (artíkulo riba jw.org)
Dikon Yehova ke pa nos reuní huntu ku otro hende pa ador’é?
“Ta Nesesario pa Pertenesé na un Religion?” (artíkulo riba jw.org)
Un pastor tabata preokupá ku algun kos ku tabata sosodé den su religion. Pero e no a laga esakinan strob’é di siña e bèrdat tokante Dios.
“Kiko A Pone un Pastor Bandoná Su Iglesia?” (Spièrta! di febrüari 2015, na spañó)
Pa sientos di aña, religion a siña hende mentira ku a laga hende kere ku Dios no ta interesá den nos i ku e ta un Dios kruel. Wak e bèrdat tokante tres di e mentiranan ei.
“Mentira Ku Ta Alehá Hende for di Dios” (E Toren di Vigilansia di 1 di novèmber 2013)