Pakico ta Tanto Fácil pa Gaña?

NINGUN hende ta gusta ser víctima di gañamento. Sin embargo, hende rond di mundo ta gaña otro pa varios motibo. Un encuesta publicá den un buki na inglés E dia América a papia e berdad, di James Patterson i Peter Kim, a mustra cu 91 porciento di americano ta gaña cu regularidad. E autor a bisa: “E mayor parti di nos ta haya cu ta duro pa pasa un siman sin gaña. Un hende di cada cinco no por resisti ni sikiera un dia—i nos ta papia tocante mentira exprés i premeditá.”

Gañamento ta un costumber común den casi tur aspecto di e bida djawe. Lider político ta gaña e pueblo i otro político. Bez tras bez, nan ta presenta na television i ta nenga cualkier conexion cu proyecto escandaloso den locual nan realmente tabata profundamente enbolbí. Sissela Bok, den su buki na inglés Gañamento—decision moral den bida público i privá, ta bisa: “Den ley i periodismo, den gobierno i ciencia social, gañamento ta automático ora hende ta kere cu ta necesario, es decir, hende cu sa gaña i cu també tin tendencia pa traha regla dje wega.”

Mencionando gañamento político na América, Common Cause Magazine di Mei/Juni di 1989 a bisa: “Watergate i Vietnam siguramente a competi cu Iran-contra den e asunto di gañamento di gobierno i desconfianza di público. Pues, kico a haci e añanan di Reagan tanto probechoso? Hopi hende a gaña, pero poco a corda malai.” P’sei, e pueblo tin bon motibo pa no confia lider político.

Den relacion internacional, tal lider ta haya cu ta difícil pa confia otro. Platón, e filósofo griego, a bisa: “Gobernante di gobierno . . . por ta permití di gaña pe bienestar dje gobierno.” Den relacion internacional ta manera e profecía bíblico den Daniel 11:27 ta bisa: “Ne mesun mesa, mentira ta loke nan ta sigi papia.”

Den e mundo di comercio, gañamento tocante producto i servicio ta un costumber general. Cumprador tin cu firma contrato cu cautela, percurando pa leza tur cos skirbí cu letter fini. Algun país tin agencia regulatorio den e gobierno pa proteha e pueblo di propaganda comercial falso, for di mercancía perhudicial cu ta ser presentá como beneficioso i inocente, i di fraude. Apesar di tal esfuerzo, e pueblo ta sigi sufri pérdida financiero debí na comerciante gañador.

Pa algun hende, gañamento ta tanto fácil cu e ta bira costumber. Otronan en general ta papia e berdad, pero bao di presion nan ta gaña. Mashá poco ta nenga di gaña den tur circunstancia.

Mentira ta ser yamá “1. un declaracion of accion falso, specialmente efectuá cu intencion di gaña . . . 2. cualkier cos cu ta duna of tin intencion di comunica impresion falso.” Nan intencion ta di haci otronan kere algo cu e mentiroso sa no ta berdad. Usando mentira of mitá di berdad, mentiroso ta purba di gaña hende cu tin derecho di sa e berdad.

Motibo di Mentira

Hende sa gaña pa varios motibo. Algun hende ta kere cu nan ta obligá di gaña tocante nan capacidad pa nan progresá den e mundo competidor aki. Otro hende ta purba di tapa error of culpa cu mentira. Otronan ainda ta falsifica raport pa duna impresion cu nan a haci trabao cu nan no a haci. Anto tin hende cu sa gaña pa daña nomber di otro, pa evita bergüenza, pa tapa mentira di antes, of pa defrauda hende di nan placa.

Un hustificacion común pa mentira ta cu e ta proteha otro hende. Algun ta considera esei como un mentira chikito pasobra nan ta kere cu e no ta causa daño na ningun hende. Pero, loke nan ta yama mentira chikito realmente no ta causa daño?

Considera Efecto

Mentira chikito por establece modelo cu por hiba ne costumber di gañamento cu por enbolbe asunto mas serio. Sissela Bok a comenta: “Tur mentira cu nan ta yama ‘chikito’ no por ta pasá por halto tanto fácilmente. Den e promé lugar, e inocencia di mentira ta fácil pa desmentí. Loke mentiroso ta yama inocente of asta beneficioso no por ta asina den e bista di hende gañá.”

Mentira, maske ki inocente nan por parce, ta destructivo di bon relacion humano. Credibilidad dje mentiroso ta destrozá, i por wel tin un kibramento permanente di confianza. E famoso autor, Ralph Waldo Emerson, a skirbi: “Tur violacion dje berdad no ta solamente un sorto di suicidio pe mentiroso, sino ta un puñal den e salud dje arreglo social humano.”

Ta fácil pa mentiroso papia mentira tocante otro hende. Aunque e no ta duna prueba, su mentira ta cria duda, i hopi hende ta keré sin haci investigacion di su declaracion. Asina e nomber di hende inocente ta ser dañá, i nan tin cu wanta e carga di duna prueba di nan inocencia. P’sei, ta un frustracion ora hende ta kere e mentiroso en bez di e hende inocente, i esei ta destrui e relacion dje hende inocente cu e mentiroso.

Ta fácil pa mentiroso desaroya e costumber di gaña. Un mentira generalmente ta resulta den un otro. Thomas Jefferson, un político na principio dje nacion americano, a bisa: “No tin un bicio tanto malicioso, tanto lastimoso, tanto despreciabel; i ken cu ta permiti su mes papia e promé mentira, ta haya cu ta mas fácil pa papia esun di dos i di tres, te cu al fin i al cabo esei ta bira un costumber.” Esei ta e camina pa colapso moral.

Pakico ta Fácil pa Gaña

Gañamento a cuminza ora un angel rebelde a gaña e promé muher, bisando cu lo e no muri si e desobedece su Creador. Esei a resulta den daño incalculable na tur e raza humano, infectando nan tur cu imperfeccion, enfermedad i morto.—Génesis 3:1-4; Romano 5:12.

Dje tempo di Adam i Eva desobediente, e influencia traicionero dje tata di mentira a crea un clima den e mundo di humanidad cu ta stimula gañamento. (Juan 8:44) Esaki ta un mundo decadente den locual e berdad ta relativo so. E revista The Saturday Evening Post di September di 1986 a bisa cu e problema cu gañamento “ta toca comercio, gobierno, educacion, diverticion, un gewoon relacion diario entre otro ciudadano i beciña. . . . Nos a acepta e teoría di relativismo, e solo mentira grandi cu ta bisa cu no ta existi berdad absoluto.”

Esei ta e punto di bista di mentiroso biciá, cu ta falta compasion pa hende cu nan ta gaña. Gañamento ta fácil pa nan. Esei ta nan moda di biba. Pero otronan cu no ta mentiroso di costumber por gaña un bez den miedu—miedu di descubrimento, miedu di castigo, etc. Esei ta un debilidad dje carni imperfecto. Con un determinacion di papia e berdad por reemplazá tal tendencia?

Pakico Papia e Berdad?

E berdad ta e norma cu nos Gran Creador a pone pa tur hende. Su Palabra skirbí, e Bijbel, ta bisa den Hebreo 6:18 cu “ta imposibel pa Dios gaña.” Esei ta e mesun norma cu su Yiu, Jesucristo, a defende ora e tabata e representante personal di Dios riba tera. Jesús a bisa lider religioso hudío cu kier a maté: “Awor boso ta buscámi pa mata, un hende cu a bisa boso e berdad cu mi a tende di parti di Dios. . . . I si mi bisa cu mi no conocé, lo mi ser mescos cu boso, mentiroso.” (Juan 8:40, 55) El a pone ehempel pa nos pasobra “e no a comete picá, ni gañamento no tabata hayá den su boca.”—1 Pedro 2:21, 22.

Nos Creador, cu tin e nomber Jehova, ta odia gañamento, manera Proverbio 6:16-19 ta bisa claramente: “Tin seis cos cu Jehova en berdad ta odia; sí, siete cu ta repugnante pa su alma: wowo halzá, lenga falso, i man cu ta drama sanger inocente, un curazón cu ta fabricá proyecto perhudicial, pia cu ta lihé pa corre cerca maldad, testigo falso cu ta lanza mentira, i ken cu ta manda contencion entre rumanan.”

E Dios di e berdad ta exigi pa nos biba di acuerdo cu su norma pa nos recibi su aprobacion. Su Palabra inspirá ta mándanos: “No papia mentira cu otro. Kita e personalidad bieu cu práctica di dje.” (Colosense 3:9) Hende cu ta nenga di kita e costumber di gaña no ta aceptabel pe; nan lo no recibi su don di bida. Realmente, Salmo 5:6 ta bisa francamente cu Dios “lo destrui esnan cu ta papia mentira.” Revelacion 21:8 ta bisa además cu e recompensa di “tur mentiroso” ta den e “segundo morto,” locual ta destruccion eterno. Pues, nos aceptacion dje punto di bista di Dios di gañamento ta dúnanos un motibo fuerte pa papia e berdad.

Pero, kico nos mester haci den un situacion unda e berdad por crea un situacion bergonzoso of rencor? Mentira nunca ta e solucion, pero tin bez cu keda sin bisa nada sí. Pakico papia mentira cu por solamente daña bo credibilidad i resulta den desaprobacion divino?

Den miedu of den debilidad humano, hende por ta tentá pa busca refugio den mentira. Esei ta e camina mas fácil of bondad erróneo. Apóstol Pedro a sucumbi na tal tentacion ora el a nenga tres bez di a conoce Jesucristo. Despues, su gañamento a duelé den su curazón. (Lucas 22:54-62) Su berdadero arrepentimento a move Dios pa pordoné, locual a sali na cla despues ora e tabata bendicioná cu hopi privilegio di sirbishi. Arrepentimento cu un decision firme di no gaña mas ta e camina cu ta resulta den pordón divino pe hacimento di loke Dios ta odia.

Pero, en bez di busca pordón despues di a gaña, conserba un bon relacion cu bo Creador i mantene bo credibilidad cu bo próhimo door di papia e berdad. Corda loke Salmo 15:1, 2 ta bisa: “O Jehova, ken lo ser un invitado den bo tent? Ken lo biba den bo ceru santo? Ken cu ta camna liber di falta i ta practica husticia i ta papia e berdad den nan curazón.”