Ki Speransa Tin P’e Ciegunan?

JOHN MILTON a componé su obranan di poesia épico Paradijs Perdí i Paradijs Recobrá aunke e tabata completamente ciegu. Maske Helen Keller tabata tantu ciegu como surdu esei no a deten’é den su esfuersonan pa siña i yuda esnan cu tin deficiencianan físico. Sí, hopi hende ciegu ta enfrentá cu éxito e dificultadnan causá pa cieguedad. Pero lo tabata ki maraviyoso si tur hende por a disfrutá di bon bista! Kisas bo ta specialmente di acuerdo cu esei si bo tin un ser kerí of un amigu cu ta ciegu of cu tin mal bista.

Ta cierto cu den algun pais programanan di rehabilitacion ta siña hende cu mal bista e abilidadnan di bida diario. Braille i cachónan entrená pa guia hende ciegu ta yuda e ciegunan percurá pa hopi di nan necesidadnan. Sin embargo, hopi hende ta considerá cieguedad como e hendikep di mas temibel. Un escritor a afirmá: “Ser ciegu ta nificá perde acceso na e parti mas importante di nos mundu visibel.” N’e mésun tempu, hopi hende ciegu tin cu dependé mas i mas riba otronan.

Segun cu nos ta bira mas bieu, nos bista por bai atras como resultado di enfermedadnan manera degeneracion di macula (pérdida di vision central den ámbos wowo) i glaucoma (presion den wowo), i nos no por keda sin mencioná catarata. The New Encyclopædia Britannica ta bisa: “Ainda catarata ta haltu riba e lista di causanan di cieguedad den hopi pais na mundu, i esaki ta masha trágico debí cu e por ser curá asina fácil dor di medionan kirúrgico.”

Apesar di descubrimentunan nobo den oftalmologia (ramo di ciencia médico cu ta trata cu e structura, funcionnan i malesanan di wowo), e eliminacion di cieguedad ta parce leu den futuro. E mésun enciclopedia ta bisa: “Progresonan den e prevencion i e tratamentu médico i kirúrgico di cieguedad por ta di beneficio solamente pa un poblacion cu tin acceso na cuido médico. Tanten cu e normanan di nutricion i di higiena di un parti grandi dje poblacion di mundu no por ser mehorá, cieguedad evitabel lo keda na su nivel haltu actual.”[7]

Aunke antibióticanan i cirugia siguramente tin nan lugá den e bataya contra cieguedad, e speransa di un cura permanente tin di haber cu algu cu a sosodé casi dos mil aña pasá.

Curando e Ciegunan den Dia di Jesus

Visualisá un homber rond di 30 aña di edad canando riba un caminda di tera. Tendiendo cu e ta pasando ei banda, dos homber ciegu cant’i caminda ta sclama: “Tene misericordia di nos!” Aunke mirónes ta manda nan keda ketu, e dos hombernan ciegu ta grita asta mas duru: “Tene misericordia di nos!” E homber ta puntra bondadosamente: “Kico boso kier pa mi haci pa boso?” Nan ta contestá ansiosamente: “Laga nos wowonan ser habrí.” Awor imaginá bo: E homber ta mishi cu nan wowonan, i mesora nan ta ricibí nan bista!​—⁠Mateo 20:​29-34.

Ki un goso p’e hombernan aki cu anteriormente tabata ciegu! Sin embargo, cieguedad ta masha plamá. Esaki tabata djis un incidente. Pakico e tin cu merecé bo atencion? Pasobra tabata Jesus di Nazaret kende bondadosamente a duna e hombernan ciegu ei nan bista. Realmente, ademas di a ser ‘ungí pa declará bon nobo n’e pobernan,’ Jesus a ser ‘mandá pa duna un recuperacion di bista n’e ciegunan.’​—⁠Lucas 4:⁠18.

E hendenan a keda babucá dor dje curacionnan milagroso ei efectuá pa medio di Dios su poderoso spiritu santu. Nos ta lesa: “E multitud a keda asombrá ora nan a mira e mudanan papia i e cohonan cana i e ciegunan mira, i nan a glorificá e Dios di Israel.” (Mateo 15:31) Sin ningun costo of un exhibicion personal di su abilidadnan of buscamentu di su mes gloria den tal curacionnan, Jesus a resaltá Jehova Dios su amor i su misericordia. Sin embargo, Jesus tabatin compasion tambe pa hende spiritualmente ciegu i desampará cu tabata “soyá i plamá manera carné sin un wardador.”​—⁠Mateo 9:⁠36.

Pa interesante cu tal historia por ta, kisas bo ta puntra, Kico di awe? Siendo cu awe ningun persona ta cura hende manera Jesus a haci, e curacionnan ei tin un nificacion pa nos? Tin cualkier speransa p’e ciegunan? Lesa e siguiente artículo por fabor.

[Caption on page 4]