Yuda Hende Siegu Siña Tokante Yehova
1. Kon Hesus a demostrá kompashon na dos hende siegu?
1 Hesus tabata sa ku a ked’é djis un par di dia di bida. Miéntras ku e tabata sali for di e stat di Yériko dos limosnero siegu a grit’é: “Señor, . . . tene miserikòrdia di nos!” Aunke ku Hesus lo tabata preokupá pa motibu di e pruebanan ku lo el a bai enfrentá, el a para, yama e dos hòmbernan i kura nan. (Mat. 20:29-34) Kon nos por imitá Hesus i demostrá kompashon na hende siegu?
2. Kon nos por duna testimonio na un hende siegu?
2 Ofresé Yudansa: Si bo topa un hende siegu, introdusí bo mes i puntr’é si bo por yud’é. Kisas na promé instante e por ta un tiki deskonfiá debí ku hopi biaha hende sa probechá di nan. Sinembargo, si bo ta amabel i ta mustra berdadero interes kisas esei por trankilis’é. Tene na mente, tambe, ku tin diferente grado di sieguedat i no ta tur hende siegu mester e mesun yudansa. Despues ku bo yud’é, bo por bis’é ku bo gusta papia ku hende tokante Beibel. Puntr’é si bo por lesa un teksto di Beibel p’e, manera Salmo 146:8 òf Isaías 35:5 i 6. Si e por lesa braille, puntr’é si lo e ke un publikashon na braille ku ta bai tokante Beibel. Tambe bo por yud’é baha failnan di oudio for di jw.org. Si e tin un kòmpiuter ku tin un programa ku por lesa e palabranan ku ta aparesé riba pantaya, kisas e por benefisiá tantu di e artíkulonan komo di e publikashonnan ku e por download for di jw.org den formato RTF (Rich Text Format).—Wak e kuadro “Ora Bo Ta Yuda un Hende Siegu . . .”
3. Kon nos por buska hende siegu den nos teritorio?
3 Buska Hende Siegu den Bo Teritorio: Kasi nunka nos no ta topa hende siegu ora nos ta prediká di kas pa kas. Dikon? Pasobra mayoria di nan no ta sinti nan kómodo pa papia ku hende straño. P’esei, nos mester hasi hopi esfuerso pa “buska” nan i duna nan testimonio. (Mat. 10:11) Bo tin un kolega di trabou òf un kompañero di skol ku ta siegu? Awèl, papia kuné tokante e bèrdat. Si den bo teritorio tin skol pa hende siegu òf pa hende ku tin problema serio ku bista, ofresé pa trese algun di nos publikashonnan na braille pa e biblioteka. Bo konosé hende ku tin miembro di famia siegu? Den bo teritorio tin institushon ku ta yuda hende siegu òf lugánan di kuido kaminda tin hende siegu ta biba? Splika e miembro di famia, e resepshonista òf e direktor ku Testigunan di Yehova ta deseá di yuda hende siegu, i despues ofresé pa trese grabashonnan oudio òf literatura na braille. Kont’é di e promesa den Beibel ku Dios pronto lo kaba ku sieguedat pa semper. Tambe bo por mustr’é e vidio titulá “No sé qué haría sin ella” riba jw.org/es. Den e vidio ei un hòmber siegu ta konta kon kontentu e ta di tin un Beibel na braille. Pues, ora bo splika e motibu di bo bishita, kisas un kaminda por habri pa bo drenta den kontakto ku hende siegu.
4. Kiko nos ta siña for di e eksperensia di Janet?
4 Janet, un ruman muhé siegu, a bishitá un institushon kaminda tin hende siegu ta biba. El a kuminsá kòmbersá ku un señora yòn ku ta siegu. Janet a bis’é: “Hesus a kura hende siegu pa demostrá loke lo e bai hasi den futuro pa tur hende siegu.” Nan a trata Revelashon 21:3 i 4 huntu, i Janet a splik’é kon e Reino di Dios lo kumpli ku e promesa akí. E señora a keda ketu un ratu. Kaba el a bisa: “Nunka mi a skucha esaki for di boka di un hende siegu. Mayoria di hende ku por mira ta kere ku un hende ta siegu debí ku e òf su antepasadonan a hasi algu malu.” Janet a mand’é un e-mail ku e link pa e buki Beibel Ta Siña, i awor nan ta studia Beibel dos biaha pa siman.
5. Aunke nos no por kura hende siegu manera Hesus a hasi, ki bendishon nos lo haña ora nos mustra kompashon na nan?
5 Klaru ku nos no por kura hende siegu manera Hesus a hasi. Pero tin algu ku sí nos por hasi. E dios di e mundu akí a siega mente di hopi hende, inkluso esnan ku ta siegu literalmente. Nos por yuda nan komprondé e bèrdat ku tin den e Palabra di Dios. (2 Kor. 4:4) Hesus a kura e dos hòmbernan serka di Yériko pasobra el “a haña duele di nan.” (Mat. 20:34) Si nos tambe mustra kompashon na hende siegu, nos por disfrutá di e privilegio di yuda nan siña tokante Yehova, kende lo kita sieguedat pa semper.