Siñando pa Haña Disfrute den e Temor di Jehova
“Bini, boso yunan, scuchá mi; e temor di Jehova ta loke lo mi siña boso.”—SALMO 34:11.
1. Con temor lo ser kitá dor dje Reino di Dios, pero esei ta nificá tur sorto di temor?
TUR caminda hende ta anhelá pa libertad for di temor—temor di crímen i violencia, temor di desempleo, temor di malesa serio. Lo ta ki un dia magnífico ora e libertad ei bira un realidad bou dje Reino di Dios! (Isaías 33:24; 65:21-23; Mikéas 4:4) Sin embargo, no ta tur temor lo ser kitá e ora ei, tampoco nos mester purba eliminá tur temor for di nos bida awor. Tin temor cu ta bon i tin temor cu ta malu.
2. (a) Ki sorto di temor ta malu, i ki clase ta deseabel? (b) Kico ta temor piadoso, i con e textonan citá ta indicá esei?
2 Temor por ta un venenu mental, paralisando un persona su abilidad di razoná. E por debilitá curashi i destruí speransa. Un temor asina por ser experenciá dor di un persona cu ta ser menasá físicamente dor di un enemigu. (Jeremías 51:30) E por ser experenciá dor di un persona cu ta duna muchu importancia na haña e aprobacion di cierto hende cu ta influyente. (Proverbionan 29:25) Pero tin tambe temor cu ta saludabel, e clase cu ta impedí nos di haci cualkier cos descabeyá, di perhudicá nos mes. Temor piadoso ta incluí asta mas cu esei. E ta respet pa Jehova, un reverencia profundo p’e, combiná cu un miedu saludabel di desagrad’é. (Salmo 89:7) E temor aki di desagradá Dios ta brota for di aprecio pa su bondad amoroso i amabilidad. (Salmo 5:7; Oséas 3:5) Tambe e ta incluí ser conciente cu Jehova ta e Hues Supremo i e Todopoderoso, kende tin e poder pa imponé castigu, asta morto, riba esnan cu ta nenga di obedecé.—Romanonan 14:10-12.
3. Con temor di Jehova ta para na contraste cu esun asociá cu algun deidad pagano?
3 Temor piadoso ta saludabel, no perhudicial. E ta motivá bo pa para firme pa loke ta bon, pa no comprometé bo mes cu hacimentu di loke ta malu. E no ta manera e temor asociá cu e deidad griego Febo, describí como un dios malicioso cu ta inspirá teror. I e no ta manera e temor asociá cu e diosa hindú Kali, kende tin biaha ta ser describí como gustando dramamentu di sanger, usando cadaver, colebra i cabes di carpachi como adorno. Temor piadoso ta atraé; e no ta lanta rechaso. E ta relacioná cu amor i aprecio. Pues, temor piadoso ta atraé nos na Jehova.—Deuteronomio 10:12, 13; Salmo 2:11.
Pakico Algun Tin’e i Otronan No
4. Manera apostel Pablo ta describí, con humanidad a deteriorá, i kico ta e motibu pa esaki?
4 Humanidad como totalidad no ta ser motivá p’e cualidad di temor piadoso. Na Romanonan 3:9-18, apostel Pablo ta describí con leu hende a cai for di perfeccion original. Despues cu el a declará cu tur hende ta someté na picá, Pablo ta cita for dje Salmonan, bisando: “No tin ningun hende hustu, ni sikiera un.” (Mira Salmo 14:1.) Despues e ta duna detaye citando cosnan manera humanidad su negligencia den busca Dios, nan falta di bondad, nan abla engañoso, maldicionamentu i dramamentu di sanger. Cu ki exactitud esei ta describí e mundu djawe! Mayoria hende no tin interes den Dios ni den su propósitonan. Cualkier aparencia di bondad hopi biaha ta reservá pa ocasionnan ora tin algu pa saca ganashi for di dje. Gañamentu i abla obseno ta algu comun. Dramamentu di sanger ta ser presentá no solamente den noticia sino tambe den entretenimentu. Kico ta e motibu pa un situacion asina? Ta cierto cu nos tur ta desendiente dje pecador Adam, pero ora hende ta adoptá como nan moda di biba e cosnan cu apostel Pablo a describí, algu mas cu esei ta enbolbí. Versículo 18 ta splica kico e ta, bisando: “No tin temor di Dios dilanti nan wowo.”—Mira Salmo 36:1.
5. Pakico algun hende tin temor piadoso, miéntras otronan no tin’e?
5 Pero, pakico algun hende tin temor piadoso, miéntras otronan no tin’e? Senciyamente bisá, esei ta debí cu algun hende ta cultiv’é, pero otronan no. Ningun di nos a nace cuné, ma nos tur tin e capacidad p’e. Temor piadoso ta algu cu nos tin cu siña. Anto, pa e ta un forsa motivador poderoso den nos bida, nos tin cu cultiv’é.
Un Invitacion Atractivo
6. Ken ta extendé na nos e invitacion registrá na Salmo 34:11, i con e texto aki ta mustra cu temor piadoso mester ser siñá?
6 Un invitacion atractivo pa siña e temor di Jehova ta ser extendé na nos den Salmo 34. Esaki ta un salmo di David. I ken David a prefigurá? Nada ménos cu Señor Jesucristo. Un profecia cu apostel Juan a aplicá specíficamente na Jesus ta registrá den versículo 20 dje salmo aki. (Juan 19:36) Den nos dia, Jesus ta esun kende ta extendé un invitacion manera esun den versículo 11: “Bini, boso yunan, scuchá mi; e temor di Jehova ta loke lo mi siña boso.” Esaki ta mustra claramente cu temor piadoso ta algu cu por ser siñá, i Jesucristo ta excelentemente cualificá pa siña nos. Pa ki motibu?
7. Pakico Jesus specialmente ta un persona for di ken nos por siña temor piadoso?
7 Jesucristo conocé e importancia di temor piadoso. Hebreonan 5:7 ta bisa di dje: “Den e dianan di su carni Cristo a ofrecé súplica i tambe peticion na Esun cu por a salb’é for di morto, cu sclamacion fuerte i lágrima, i el a ser tendé faborablemente pa su temor piadoso.” Tal temor piadoso tabata un cualidad cu Jesucristo a manifestá asta promé cu el a ser confrontá cu morto na un staca di tormento. Corda, den Proverbionan capítulo 8, e Yu di Dios ta ser describí como e personificacion di sabiduria. I na Proverbionan 9:10, nos ta ser bisá: “E temor di Jehova ta e principio di sabiduria.” Pues e temor piadoso aki tabata un parti fundamental dje personalidad dje Yu di Dios hopi promé cu el a bini na tera.
8. Na Isaías 11:2, 3, kico nos ta siña tocante e temor di Jehova?
8 Ademas, en cuanto Jesus como Rey Mesiánico, Isaías 11:2, 3 ta declará: “Riba dje e spiritu di Jehova mester establecé, e spiritu di sabiduria i di comprendimentu, e spiritu di conseho i di poder, e spiritu di conocimentu i dje temor di Jehova; i lo tin disfrute dor di dje den e temor di Jehova.” Ki bunita esei ta ser expresá! E temor di Jehova no ta nada desagradabel. E ta beneficioso i constructivo. E ta un cualidad cu lo plama den henter e teritorio riba cua Cristo ta reina como Rey. E ta gobernando awor, i na tur esnan cu ta ser reuní como su súbditonan, e ta dunando instruccion den e temor di Jehova. Con?
9. Con Jesucristo ta siñando nos e temor di Jehova, i kico e kier pa nos siña tocante dje?
9 Pa medio di nos reunionnan di congregacion, asamblea i congresonan, Jesus, como Cabes nombrá dje congregacion i como e Rey Mesiánico, ta yuda nos comprendé claramente kico ta temor piadoso i pakico e ta asina beneficioso. Asina e ta purba profundisá nos aprecio p’e temor ei pa nos por siña haña disfrute den e temor di Jehova net manera e tin.
Abo Lo Haci e Esfuerso?
10. Ora nos ta asistí na reunionnan cristian, kico nos mester haci si nos kier comprendé e temor di Jehova?
10 Naturalmente, simplemente lesando e Bijbel of asistiendo na reunionnan den un Salon di Reino no ta bai garantisá cu nos lo haña temor piadoso. Nota kico nos tin cu haci si nos realmente kier comprendé e temor di Jehova. Proverbionan 2:1-5 ta bisa: “Mi yu, si bo ricibí mi dichonan i atesorá cu bo mi propio mandamentunan, pa asina bo presta atencion na sabiduria cu bo orea, pa bo por incliná bo curason na dicernimentu; si, ademas, bo sclama pa comprendimentu mes i bo duna bo bos pa dicernimentu mes, si bo sigui busk’é manera plata, i manera tesoro scondí bo sigui en busca di dje, den tal caso lo bo comprendé e temor di Jehova, i lo bo haña e conocimentu mes di Dios.” Pues, ora di asistí na reunion, nos mester presta atencion na loke ta ser bisá, haci esfuerso diligente pa concentrá i corda pensamentunan clave, pensa profundamente riba con e manera cu nos ta sinti tocante Jehova mester influenciá nos actitud pa cu conseho cu ta ser duná—sí, habri nos curason. E ora ei nos lo comprendé e temor di Jehova.
11. Pa cultivá temor piadoso, kico nos mester haci sinceramente i frecuentemente?
11 Salmo 86:11 ta hala atencion na un otro factor importante, esun di oracion. “Instruí mi, O Jehova, tocante bo caminda. Lo mi cana den bo berdad,” e salmista a pidi den oracion. “Unificá mi curason pa teme bo nomber.” Jehova a aprobá dje oracion ei, pasobra el a lagu’e ser registrá den Bijbel. Pa cultivá temor piadoso, nos tambe mester pidi Jehova den oracion pa su yudansa, i nos lo saca beneficio dor di haci oracion sinceramente i frecuentemente.—Lucas 18:1-8.
Bo Curason Ta Enbolbí
12. Pakico e curason mester ricibí atencion special, i kico esei ta incluí?
12 Tin algu mas cu nos tin cu tuma nota di dje na Salmo 86:11. E salmista no tabata pidiendo simplemente pa un comprendimentu mental dje temor di Dios. E ta mencioná su curason. Cultivacion di temor piadoso ta enbolbé e curason figurativo, cua ta rekerí atencion special pasobra esei ta e persona interior manera e ta ser manifestá den tur nos actividadnan di bida i e ta incluí nos pensamentunan, nos actitudnan, nos deseonan, nos motivacionnan, nos metanan.
13. (a) Kico por indicá cu e curason di un persona ta dividí? (b) Segun cu nos ta cultivá temor piadoso, pa cu cua meta nos mester traha?
13 Bijbel ta spierta nos cu e curason di un persona por ta dividí. E por ta traicionero. (Salmo 12:2; Jeremías 17:9) Kisas e ta motivá nos pa participá den actividadnan saludabel—bayendo reunionnan di congregacion i saliendo den e ministerio di veld—pero tambe e por gusta cierto aspectonan dje mundu su moda di biba. Esaki por stroba nos di traha berdaderamente cu henter nos alma den promové interesnan di Reino. Anto e curason traicionero por purba persuadí nos cu, tog, nos ta haciendo mes tantu cu hopi otro persona. Of talbes na scol of na nos lugá di trabou seglar, e curason por ser influenciá pa temor di hende. Como resultado, den e ambientenan ei nos por vacilá pa identificá nos mes como Testigo di Jehova i asta por haci cosnan cu no ta apropiado pa cristiannan. Sin embargo, despues, nos concenshi ta molestiá nos. Esei no ta e clase di persona cu nos kier ta. P’esei, huntu cu e salmista, nos ta pidi Jehova den oracion: “Unificá mi curason pa teme bo nomber.” Nos kier pa henter e persona interior, manera e ta ser manifestá den tur nos actividadnan di bida, duna evidencia cu nos ta “teme e Dios berdadero i ta warda su mandamentunan.”—Eclesiastes 12:13.
14, 15. (a) Ora Jehova a profetisá e restoracion di Israel for di sclabitud na Babilonia, kico el a primintí di duna su pueblo? (b) Kico Jehova a haci cu e meta pa inculcá e temor di Dios den curason den su pueblo? (c) Pakico Israel a desviá for dje camindanan di Jehova?
14 Jehova a primintí cu lo e duna un curason temeroso di Dios asina na su pueblo. El a profetisá e restoracion di Israel i a bisa, manera nos ta lesa na Jeremías 32:37-39: “Lo mi trece nan bek n’e lugá aki i haci nan biba den siguridad. I nan siguramente lo bira mi pueblo, i ami mes lo bira nan Dios. I lo mi duna nan un solo curason i un solo caminda pa nan temé mi pa semper, p’e bienestar di nan i nan yunan despues di nan.” Na versículo 40, e promesa di Dios ta ser reforsá: “E temor di mi lo mi pone den nan curason pa nan no desviá for di mi.” Na 537 P.E.C., Jehova a trece nan bek na Jerusalem manera el a primintí. Pero kico dje resto dje promesa ei?—cu lo e duna nan ‘un solo curason pa nan tem’é pa semper’? Pakico e nacion antiguo di Israel a desviá for di Jehova despues cu el a trece nan bek for di Babilonia, di manera cu nan tempel a ser destruí na 70 E.C., pa nunca mas ser reedificá?
15 Esaki no tabata debí na ningun fayo di Jehova su parti. Jehova siguramente a dal paso pa pone e temor di Dios den e curason di su pueblo. Pa medio dje misericordia cu el a demostrá librando nan for di Babilonia i restorando nan na nan patria, el a duna nan tur motibu pa mir’é cu reverencia profundo. Dios a reforsá tur esei cu recordatorionan, conseho i reprendimentu pa medio dje profetanan Ageo, Zacarías i Malakías; pa medio di Esdras cu a ser mandá na nan como maestro; pa medio di Gobernador Nehemías; i pa medio dje propio Yu di Dios mes. Algun biaha e pueblo a scucha. Nan a scucha ora nan a reedificá e tempel di Jehova riba insistencia di Ageo i Zacarías, i ora nan a manda esposanan stranhero bai den e dianan di Esdras. (Esdras 5:1, 2; 10:1-4) Pero mayoria biaha nan no a obedecé. Nan no tabata consistente tocante presta atencion; nan no a sigui ser receptivo pa conseho; nan no a mantené nan curasonnan habrí. E israelitanan no tabata cultivando temor piadoso, i como resultado, e no tabata un forsa motivador poderoso den nan bida.—Malakías 1:6; Mateo 15:7, 8.
16. Den ken su curason Jehova a inculcá temor piadoso?
16 Sin embargo, Jehova su promesa di pone temor piadoso den e curason di su pueblo no a faya. El a cera un pacto nobo cu Israel spiritual, e cristiannan ei na kende el a ofrecé un speransa celestial. (Jeremías 31:33; Galationan 6:16) Na 1919, Dios a restorá nan for di sclabitud na Babilonia e Grandi, e imperio mundial di religion falsu. Den nan curason el a inculcá firmemente e temor di dje. Esaki a trece beneficionan ricu pa nan i p’e “multitud grandi,” cu tin e speransa di bida como súbditonan terenal dje Reino. (Jeremías 32:39; Revelacion 7:9) E temor di Jehova a yega di ta den nan curason tambe.
Con Temor Piadoso Ta Ser Inculcá den Nos Curason
17. Con Jehova a pone temor piadoso den nos curason?
17 Con Jehova a inculcá e temor piadoso aki den nos curason? Mediante e obramentu di su spiritu. I kico nos tin cu ta un producto di spiritu santu? E Bijbel, e Palabra inspirá di Dios. (2 Timoteo 3:16, 17) Dor di loke el a haci den pasado, dor di su trato cu su sirbidornan awor na cumplimentu di su Palabra profético, i dor di profecianan di cosnan pa bini, Jehova ta duna un base sólido pa nos tur desaroyá temor piadoso.—Hosué 24:2-15; Hebreonan 10:30, 31.
18, 19. Con congresonan, asambleanan i reunionnan di congregacion ta yuda nos adkerí temor piadoso?
18 Ta notabel cu, manera Deuteronomio 4:10 ta mencioná, Jehova a bisa Moises: “Congregá e pueblo huntu na mi, pa mi por laga nan tende mi palabranan, pa nan por siña temé mi tur e dianan cu nan ta bibu riba e suela i pa nan siña nan yunan.” Di igual manera awe, Jehova a haci percuracionnan abundante pa yuda su pueblo siña tem’é. Na congresonan, asambleanan i reunionnan di congregacion, nos ta conta di nobo e evidencia di Jehova su bondad amoroso i su amabilidad. Esei ta loke nos tabata haciendo ora nos tabata studiando e buki E homber mas importante cu hamás a biba. Con e studio ei a afectá bo i bo actitud pa cu Jehova? Segun cu bo a mira e vários facetanan di nos Tata celestial su magnífico personalidad reflehá den su Yu, esaki no a fortalecé bo deseo pa nunca desagradá Dios?—Colosensenan 1:15.
19 Na nos reunionnan, tambe nos ta studia relatonan di Jehova su liberacion di su pueblo den pasado. (2 Samuel 7:23) Segun cu nos ta studia e buki bíblico di Revelacion cu e yudansa dje buki Revelacion—su gran culminacion ta cerca!, nos ta siña tocante visionnan profético cu ya a cumpli caba den e siglo 20 aki i tocante sucesonan inspirador di temor cu mester tuma lugá ainda. Relacioná cu tur actonan asina di Dios, Salmo 66:5 ta declará: “Boso bini, i mira e actividadnan di Dios. Su trato cu e yunan di hende ta inspirador di temor.” Sí, mirá corectamente, e actonan aki di Dios ta inculcá den nos curason temor di Jehova, un reverencia profundo. Asina nos por mira con Jehova Dios ta cumpli cu su promesa: “E temor di mi lo mi pone den nan curason pa nan no desviá for di mi.”—Jeremías 32:40.
20. Pa temor piadoso por bira profundamente inculcá den nos curason, kico ta ser rekerí di nos parti?
20 Sin embargo, ta claro cu temor piadoso no ta bini den nos curason sin esfuerso di nos parti. E resultadonan no ta automático. Jehova ta haci su parti. Nos mester haci nos parti dor di cultivá temor piadoso. (Deuteronomio 5:29) Israel natural a keda sin haci esei. Pero cu confiansa den Jehova, e israelitanan spiritual i nan compañénan ya caba ta experenciando hopi dje beneficionan cu esnan cu ta temeroso di Dios ta ricibí. Nos lo considerá algun dje beneficionan aki den e siguiente artículo.
Con Lo Bo Contestá?
◻ Kico ta temor piadoso?
◻ Con nos ta ser siñá pa haña disfrute den e temor di Jehova?
◻ Pa haña temor piadoso, ki esfuerso ta ser rekerí di nos parti?
◻ Pakico adkisicion di temor piadoso ta enbolbé tur aspecto di nos curason figurativo?
[Plachi na página 12, 13]
Studio diligente ta necesario pa comprendé e temor di Jehova