E Karaitanan i Nan Buskeda P’e Berdad

“INVESTIGA e [Scritura] cabalmente i no dependé riba mi opinion.” E palabranan ei a ser expresá dor di un lider karaita di siglo ocho E.C. Ken e karaitanan tabata? Nos por siña algu balioso for di nan ehempel? Pa contestá e preguntanan aki, nos mester bai bek den historia na un controversia cu a dura hopi tempu i cu a hiba n’e movementu karaita.

Con e Controversia A Cuminsá?

Den e siglonan final promé cu Era Comun, un filosofia nobo a desaroyá den hudaismo. Esei tabata e concepto cu Dios a duna dos Ley na Ceru di Sínai, unu skirbí i unu oral.a P’e promé siglo E.C., tabatin conflictonan intenso entre esnan cu a defendé e siñansa nobo aki i esnan cu a rechas’é. E fariseonan tabata e promotornan, miéntras cu e saduceonan i e esenenan tabata entre e opositornan.

Meimei dje controversia andando aki, Jesus di Názaret a presentá como e Mesías primintí. (Daniel 9:24, 25; Mateo 2:1-6, 22, 23) Jesus a haña su mes confrontá cu tur e gruponan conflictivo ei dje hudiunan. Ora e tabata razoná cu nan, el a condená hacimentu dje palabra di Dios inválido pa motibu di nan tradicion. (Mateo 15:3-9) Tambe Jesus a siña berdadnan spiritual den un manera cu solamente e Mesías por a haci. (Juan 7:45, 46) Ademas, solamente e berdadero siguidornan di Jesus a duna evidencia di apoyo divino. Nan a bira conocí como cristiannan.—Echonan 11:26.

Ora e tempel di Jerusalem a ser destruí na 70 E.C., e fariseonan tabata e único secta religioso cu a keda intacto. Awor sin sacerdocio, ni sacrificio ni tempel, hudaismo farisaico por a inventá substitutonan pa tur esakinan, permitiendo tradicion i interpretacion reemplasá Ley skirbí. Esaki a habri caminda pa “bukinan sagrado” nobo ser skirbí. Promé a bini e Mishnah, cu su agregacionnan na i interpretacionnan di nan ley oral. Mas despues, otro coleccionnan di skirbimentunan a ser agregá i yamá e Talmud. N’e mésun tempu, cristiannan apóstata a cuminsá desviá for di Jesus su siñansanan. Ambos círculo a generá sistemanan religioso poderoso—autoridad rabínico na un banda i autoridad di iglesia n’e otro banda.

Debí na conflictonan hudiu cu Roma pagano i mas despues cu Roma “cristian,” e centro di hudaismo cu tempu a cambia pa Babilonia. Tabata ei cu e skirbimentunan dje Talmud a ser redactá den nan forma mas completo. Aunke e rabinan a afirmá cu e Talmud a revelá e boluntad di Dios mas completamente, hopi hudiu a sinti e influencia aumentante di autoridad rabínico i a anhelá p’e palabra di Dios ser entregá na nan mediante Moises i e profetanan.

Den e último mitar parti di siglo ocho E.C., e hudiunan na Babilonia cu a oponé autoridad rabínico i creencia rabínico den nan ley oral a respondé faborablemente na un lider studiá yamá Anan ben David. El a proclamá e derecho cu cada hudiu tabatin riba un estudio sin restriccion dje Scritura Hebreo como e único fuente di religion berdadero, sin tuma interpretacion rabínico of e Talmud na cuenta. Anan a instruí: “Investigá e Tora [e ley skirbí di Dios] cabalmente i no dependé riba mi opinion.” Debí n’e énfasis aki riba e Scritura, Anan su siguidornan a bira conocí como Qa·ra·ʼimʹ, un nomber hebreo cu ta nificá “lesadornan.”

Conflicto Entre e Karaitanan i e Rabinan

Cua ta algun ehempel di siñansa karaita cu a causa consternacion den círculonan rabínico? E rabinan a prohibí comementu di carni i lechi huntu. Nan a presentá esaki como e splicacion dje ley oral di Exodo 23:19, cu ta bisa: “Bo no mester herebé un lamchi cabritu den e lechi di su mama.” N’e otro banda, e karaitanan a siña cu e versículo aki tabata kier men simplemente loke el a bisa—nada mas, nada ménos. Nan a argumentá cu e restriccionnan rabínico tabata invento di hende.

Segun e interpretacion dje rabinan di Deuteronomio 6:8, 9, nan a afirmá cu hombernan hudiu tabatin cu haci oracion cu tefilin bistí, i cu nan mester a pone un mezuza riba cada kozijn di porta.b E karaitanan a haña cu e versículonan aki tabatin solamente un nificacion figurativo i simbólico i p’esei a rechasá tal reglamentunan rabínico.

Den otro asuntunan e karaitanan tabata muchu mas restrictivo cu e rabinan. Por ehempel, considerá nan punto di bista di Exodo 35:3, cu ta bisa: “Boso no mester cende un candela den ningun di boso lugánan di biba riba e dia di sabat.” E karaitanan a prohibí pa laga un lampi of un lus cendí asta si el a ser cendé promé cu Sabat.

Particularmente despues dje morto di Anan, e lidernan karaita frecuentemente a diferenciá di opinion riba e grado i naturalesa di cierto restriccionnan, i nan mensahe no tabata semper claro. E karaitanan a falta unidad pasobra nan no a reconocé ningun lider specífico pero a enfatisá lesamentu i interpretacion personal dje Scritura, na contraste cu autoridad estilo rabínico. Sin embargo, apesar di esaki, e movementu karaita a crece na popularidad i influencia muchu mas ayá cu e comunidad hudiu na Babilonia i a plama den henter Medio Oriente. Asta un centro karaita principal a ser establecé den Jerusalem.

Durante siglo nuebe i dies E.C., escolásticonan karaita a sobresalí den un estudio renobá dje idioma hebreo i a experenciá un sorto di época di oro. Nan a considerá e texto skirbí dje Scritura Hebreo como santu, no e tradicionnan oral. Algun karaita a bira copista cuidadoso dje Scritura Hebreo. Realmente, tabata e trabou interesante dje karaitanan cu a animá estudio masorético dje Scritura entre tur hudiu, garantisando e preservacion di un texto di Bijbel mas exacto awe.

Durante e periodo aki di crecementu rápido, hudaismo karaita a enbolbé su mes den trabou di misionero abierto entre otro hudiunan. Esaki a presentá un menasa claro pa hudaismo rabínico.

Con e Rabinan A Reaccioná?

E contratake rabínico tabata un guera intenso di palabra, adaptando astutamente i cambiando nan siñansa pa logra nan meta. Durante e siglo despues dje atake di Anan, hudaismo rabínico a adoptá diferente dje métodonan karaita. E rabinan a bira mas capas den cita e Scritura, incorporando estilo i método karaita den nan retórica.

E lider indiscutí dje guera verbal aki cu e karaitanan tabata Saʽadia ben Josef, kende a bira cabes dje comunidad hudiu na Babilonia den e promé mitar di siglo dies E.C. Saʽadia su obra principal, The Book of Beliefs and Opinions, a ser traducí na ingles dor di Samuel Rosenblatt, kende a bisa den su introduccion: “Aunke . . . e tabata e autoridad den su tempu riba e Talmud, [Saʽadia] ta haci comparativamente poco uso dje fuente aki di tradicion hudiu, aparentemente pasobra tabata su deseo pa derotá e karaitanan cu nan propio arma, kendenan a aceptá solamente e Ley Skirbí como válido.”

Siguiendo den e pasonan di Saʽadia, hudaismo rabínico cu tempu a gana mayor control i influencia. El a logra esaki dor di adaptá n’e Ley Skirbí net suficiente pa kita forsa dinámico for di argumentonan karaita. E golpi final a ser propiná dor di Moises Maimonides, e famoso escolástico talmúdico di siglo 12. Dor di su actitud tolerante pa cu e karaitanan cu kende el a biba na Egipto, i tambe su estilo escolástico convincente, el a gana nan admiracion i a debilitá e posicion di nan mes liderato.

E Movementu Karaita Ta Perde Empuhe

Awor faltando unidad i sin un contra-medida bon organisá, e movementu karaita a perde tantu empuhe como siguidor. Cu pasamentu di tempu, e karaitanan a cambia nan puntonan di bista i principionan. Leon Nemoy, un autor cu a skirbi en cuanto e movementu karaita, ta skirbi: “Aunke e Talmud a keda teoréticamente prohibí, hopi material talmúdico a ser incorporá na un manera scondí den práctica di ley i custumber karaita.” Básicamente, e karaitanan a perde nan propósito original i a adoptá hopi di hudaismo rabínico.

Ainda tin rond di 25.000 karaita na Israel. Un par di mil mas por ser hañá den otro comunidadnan, mas tantu na Rusia i na Merca. Sin embargo, teniendo nan propio tradicionnan oral, nan ta diferente for dje promé karaitanan.

Kico nos por siña for dje historia dje karaitanan? Cu ta un eror grave pa ‘haci e palabra di Dios inválido dor di tradicion.’ (Mateo 15:6) Pa ser librá for di tradicionnan pisá di hende ta rekerí conocimentu exacto dje Scritura. (Juan 8:31, 32; 2 Timoteo 3:16, 17) Sí, esnan cu ta busca pa conocé i haci e boluntad di Dios lo no dependé riba tradicion di hende. Mas bien, nan ta investigá e Bijbel diligentemente i ta aplicá e instruccion beneficioso dje Palabra inspirá di Dios.

[Notanan]

[Plachi na página 30]

Un grupo di karaita

[Rekonosementu]

For dje buki The Jewish Encyclopedia, 1910