Kico Ta e Talmud?

“E Talmud ta indudablemente un dje produccionnan literario mas remarcabel di tur tempu.”—The Universal Jewish Encyclopedia.

“[E Talmud ta] un dje gran logronan intelectual di humanidad, un documento asina diki, asina ricu, asina difícil, cu el a tene mentenan briyante ocupá pa mas cu un milenio i mei.”—Jacob Neusner, erudito i autor hudiu.

“E Talmud ta e pilar central [di hudaismo] cu ta sostené henter e structura spiritual i intelectual dje bida hudiu.”—Adin Steinsaltz, erudito i rabi talmúdico.

PA SIGLONAN e Talmud tabatin indiscutiblemente un tremendo influencia riba e pueblo hudiu. Sin embargo, na contraste cu e expresionnan di elogio citá ariba, e Talmud a ser difamá i yamá “un laman di scuridad i lodo.” El a ser denunciá como un obra blasfemoso dje Diabel. Mediante decreto papal, bes tras bes el a ser censurá, confiscá i asta kimá na gran cantidad riba plenchinan público di Europa.

Exactamente kico e obra aki, cu a lanta asina tantu controversia, ta? Kico ta haci e Talmud único entre skirbimentunan hudiu? Pakico el a ser skirbí? Con el a yega di tin asina un impacto riba hudaismo? E tin nificacion pa e mundu no-hudiu?

Durante e 150 añanan cu a sigui despues dje destruccion dje tempel na Jerusalem na 70 E.C., academianan di sabionan rabínico rond Israel a busca cu urgencia un base nobo pa sigui cu custumbernan hudiu. Nan a debatí i a consolidá vários tradicion di nan ley oral. Edificando riba e fundeshi aki, nan a establecé límite i rekisitonan nobo pa hudaismo, dunando guia pa un bida diario di santidad sin un tempel. E cuadro spiritual nobo aki a ser describí den e Mishna, cu Huda ha-Nasi a compilá na cuminsamentu di siglo tres E.C.a

E Mishna tabata pará riba su curpa i no a busca hustificacion riba base di referencianan bíblico. Su método di consideracion i asta e estilo di su hebreo tabata único, distinto for dje texto bíblico. E decisionnan dje rabinan citá den e Mishna lo a afectá e bida diario di hudiunan tur caminda. En berdad, Jacob Neusner ta comentá: “E Mishna a duna Israel su constitucion. . . . El a exigí consentimentu i conformidad pa cu su reglanan.”

Pero kico si hende a cuestioná si e autoridad dje sabionan citá den e Mishna tabata realmente igual n’e Scritura inspirá? E rabinan lo mester a mustra cu e siñansanan dje tannaim (maestronan dje ley oral) hañá den e Mishna tabata na armonia perfecto cu e Scritura Hebreo. A lanta e necesidad pa mas comentario. Nan a sinti e necesidad pa splica i hustificá e Mishna i proba cu el a originá cu e Ley cu Dios a duna Moises na Sínai. E rabinan a sinti nan obligá pa proba cu e ley oral i skirbí tin e mésun nificacion i propósito. Pues, en bes di ta e palabra final riba hudaismo, e Mishna a bira un fundeshi nobo pa discusion i debate religioso.

Formacion di e Talmud

E rabinan cu a tuma e reto nobo aki tabata conocí como amoraim—“interpretadónan,” of “splicadónan,” di e Mishna. Cada academia tabata concentrá rond di un rabi prominente. Henter aña un círculo chikitu di erudito i studiante tabata tene discusionnan. Pero e sesionnan mas importante tabata ser tené dos bes pa aña, durante e lunanan di adar i elul, ora trabou di agricultura tabata slow i cientos of asta miles mas lo por a asistí.

Adin Steinsaltz ta splica: “E cabes dje academia tabata presidí, sintá riba un stul of matnan special. Den e promé rijnan, su dilanti, e eruditonan importante tabata sinta, incluso su coleganan of alumnonan sobresaliente, i tras di nan tur e otro eruditonan. . . . E órden di sinta tabata basá riba un hirarkia [segun importancia] minuciosamente definí.” Un porcion dje Mishna tabata ser recitá. Anto ta compará esaki cu material paralelo of suplementario cu e tannaim a recogé pero cu no tabata incluí den e Mishna. E proceso di análisis tabata cuminsá. Preguntanan a ser presentá, i contradiccionnan a ser analisá pa haña armonia interno entre e siñansanan. Nan tabata busca textonan for dje Scritura Hebreo cu a sirbi como prueba pa apoyá siñansanan rabínico.

Aunke e discusionnan aki tabata structurá cuidadosamente, nan tabata intenso, tin biaha turbulento. Un sabio citá den e Talmud a papia di “chispanan di candela” cu tabata bula entre boca dje rabinan durante un debate. (Hullin 137b, Talmud babilónico) Steinsaltz ta bisa esaki dje manera di proceso: “E cabes dje academia, of e sabio cu a duna e lectura, tabata duna su mes interpretacion di problemanan. Hopi biaha e eruditonan den e auditorio tabata bombardi’é cu pregunta usando otro fuente como base, e punto di bista di otro comentaristanan of nan propio conclusionnan lógico. Algun biaha e debate tabata masha breve i limitá na un contesta cu no a laga duda i cu tabata decisivo riba un cierto pregunta. Den otro casonan otro eruditonan tabata ofrecé solucionnan alternativo i tabata surgi un debate riba escala grandi.” Tur persona den auditorio tabata liber pa participá. Cuestionnan clarificá n’e sesionnan tabata ser transmití na otro academianan pa otro eruditonan repasá.

Tog, e sesionnan aki no tabata djis debatenan legalista interminabel. Asuntunan legal cu a trata cu regla i regulacionnan dje bida religioso hudiu ta ser yamá Halakah. E término aki ta bini for dje palabra básico hebreo “sigui” i ta indicá e ‘moda di biba cu un hende mester hiba.’ Tur otro asuntu—relatonan tocante rabi i personahenan bíblico, dichonan sabí, conceptonan di creencia i filosofia—ta ser yamá Haggadah, cu ta bini dje palabra básico hebreo “bisa.” Halakah i Haggadah a ser mesclá cu otro durante debate rabínico.

Den su buki The World of the Talmud (E Mundu dje Talmud), Morris Adler ta comentá: “Un maestro sabí tabata interumpí un discusion legal largu i difícil dor di cambia e tópico pa unu cu tabata ménos pisá i mas edificante. . . . Asina nos ta haña leyenda i historia, ciencia contemporáneo i folklor, splicacion bíblico i biografia, sermon i teologia mesclá huntu den loke, pa un hende cu no conocé e maneranan dje academianan, lo a parce di ta un mescla straño di dato no-organisá.” P’e eruditonan n’e academianan, tur cambio di tópico asina tabata pa un propósito i a ser relacioná cu e punto bou di discusion. Halakah i Haggadah tabata e blokinan di un structura religioso nobo den construccion den e academianan rabínico.

E Formacion di Dos Talmud

Cu tempu, e centro rabínico principal na Palestina a muda pa Tiberias. Otro academianan importante tabata situá na Séforis, Cesarea, i Lida. Pero e situacion económico den deterioro, e constante instabilidad político i finalmente e presion i persecucion for di cristianismo apóstata a pone cu un gran cantidad di hudiu a imigrá pa un otro centro di poblacion hudiu grandi den Oost, esta na Babilonia.

Pa siglonan, studiantenan a basha bini for di Babilonia pa Palestina pa studia bou di direccion dje gran rabinan n’e academianan. Un studiante asina tabata Abba ben Ibo, yamá tambe Abba Arika—Abba e largu—pero despues conocí simplemente como Rab. El a regresá Babilonia rond di 219 E.C. despues di studia bou di Huda ha-Nasi, i esaki a marca un punto crucial p’e importancia spiritual dje comunidad hudiu babilónico. Rab a lanta un academia na Sura, un área cu hopi hudiu pero tiki erudito. Su reputacion a atraé 1.200 studiante regular na su academia, i miles mas a asistí durante e lunanan hudiu di adar i elul. Rab su contemporáneo prominente, Samuel, a lanta un academia na Nehardea. Otro academianan importante a ser establecé na Pumbedita i Mehoza.

No tabata necesario mas pa biaha pa Palestina, pasobra hende por a studia cerca e gran eruditonan na Babilonia. E formulacion di e Mishna como un texto separá a prepará e caminda p’e independencia completo dje academianan babilónico. Aunke a desaroyá awor diferente estilo i método di studio na Palestina i Babilonia, comunicacion continuo i intercambio di maestro a conserbá e unidad dje academianan.

Pa fin di siglo cuater i cuminsamentu di siglo cincu E.C., e situacion a bira specialmente difícil p’e hudiunan na Palestina. Olanan di restriccion i persecucion bou dje autoridad creciente di cristiandad apóstata a hiba n’e golpi final, esta abolicion di tantu e Sanedrin como e posicion di Nasi (patriarca) rond di 425 E.C. P’esei e amoraim palestino a cuminsá consolidá den un solo obra coherente e resúmennan dje debatenan den e academianan pa sigurá nan conserbacion. E obra aki, compilá den purá den e parti final di siglo cuater E.C., a bira conocí como e Talmud palestino.b

Miéntras e academianan na Palestina tabata menguando, e amoraim babilónico tabata alcansando e top di nan abilidadnan. Abaye i Raba a hiba e nivel di debate na nivel di discusion complicá i sutil cu despues a bira e modelo di análisis talmúdico. Siguientemente, Ashi, cabes dje academia na Sura (371-427 E.C.), a cuminsá compilá i redactá e nótulonan dje debatenan. Segun Steinsaltz, el a haci esei “debí n’e temor cu, desorganisá manera nan tabata, e cantidad inmenso di material oral tabata den peliger di pasa pa olvido.”

E gran cantidad di material aki tabata mas cu un solo hende of asta un solo generacion lo por a organisá. E periodo dje amoraim a terminá na Babilonia den siglo cincu E.C., pero un grupo cu yama e saboraim, un término arameo cu ta nificá “e splicadónan” of “poseedónan di opinion,” a sigui cu e trabou final di redactá e Talmud babilónico te den siglo seis E.C. E redactornan final aki a trece huntu e miles di partinan fragmentá i e siglonan di debate rabínico, impartiendo un estilo i structura n’e Talmud babilónico cu a distinguié for di tur skirbimentu hudiu anterior.

Kico e Talmud A Logra?

E rabinan dje Talmud a busca pa proba cu e Mishna tabata for dje mésun fuente cu e Scritura Hebreo. Pero pakico nan kier a haci esaki? Jacob Neusner ta comentá: “E cuestion explícito tabata e posicion di Mishna. Pero ta resultá cu e curason dje asuntu tabata e autoridad dje sabio mes.” Pa reforsá e autoridad aki, nan a examiná, desafiá, splica i armonisá cada liña, tin biaha cada palabra, di e Mishna den un manera specífico. Neusner ta comentá cu den e manera aki e rabinan “a cambia e direccion di e Mishna di un caminda pa un otro.” Aunke e Mishna a ser creá como un obra completo riba su mes, awor el a ser analisá minuciosamente. Durante e proceso aki, el a ser recreá i redefiní.

E obra nobo aki—e Talmud—a sirbi e propósito dje rabinan. Nan a establecé e reglanan di análisis, i p’esei el a siña hende pensa manera rabi. E rabinan a kere cu nan método di studia i analisá a reflehá e mente di Dios. Estudio dje Talmud mes a bira e obhetivo, un forma di adoracion—uso dje mente supuestamente den imitacion di Dios. Pa futuro generacionnan, e Talmud mes lo a ser analisá via dje mésun método aki. E resultado? Historiadó Cecil Roth ta skirbi: “E Talmud . . . a duna [hudiunan] e marca característico cu a distinguí nan for di otro hende, i tambe nan facultad remarcabel di resistí cambio i nan coherencia como pueblo. Su forma di investigá mediante diálogo a haci nan huicio skerpi, i a duna nan . . . perspicacia mental. . . . E Talmud a duna e hudiu persiguí di Edad Medio un otro mundu den cua e por a scapa . . . El a dun’é un patria, cu lo e por a hiba cuné ora su mes tera tabata perdí.”

Dor cu el a siña otronan e pensamentunan dje rabinan, e Talmud siguramente tabatin influencia. Pero e pregunta pa tur hudiu i tambe no-hudiu ta esaki: Di berdad e Talmud ta reflehá e mente di Dios?—1 Corintionan 2:11-16.

[Nota]

[Kuadro na página 31]

E Dos Talmudnan—Con Nan Ta Compará cu Otro?

E palabra hebreo “Talmud” ta nificá “studio” of “siñansa.” E intencion di amoraim di Palestina i di Babilonia tabata pa studia, of analisá, e Mishna. Tur e dos Talmudnan (palestino i babilónico) ta haci esaki, pero con nan ta compará cu otro? Jacob Neusner ta skirbi: “E promé Talmud ta analisá evidencia, e di dos ta investigá proposicionnan; e promé ta keda completamente den e límitenan di su caso, e di dos ta surpasá nan masha leu mes.”

E redaccion mas intensivo i cabal cu e Talmud babilónico a haña a hacié no solamente mas grandi sino tambe mas profundo i mas penetrante den su moda di pensa i análisis. Ora hende ta mencioná e palabra “Talmud,” generalmente nan kier men e Talmud babilónico. Esaki ta e Talmud cu mas a ser studiá i comentá atrabes di siglonan. E opinion di Neusner ta cu e Talmud palestino “ta un obra di competencia,” i e Talmud babilónico “ta un obra di genio.”