Gamaliel—El A Siña Saul di Tarso

E MULTITUD a bira ketu ketu. Djis un ratu promé, nan casi a mata apostel Pablo. Conocí tambe como Saul di Tarso, el a ser rescatá dor di trupanan romano i awor a confrontá e pueblo for di un trapi cerca dje tempel den Jerusalem.

Haciendo seña cu su man p’e hendenan keda ketu, Pablo a cuminsá papia na hebreo, bisando: “Hombernan, rumannan i tatanan, tende mi defensa dirigí na boso awor. . . . Mi ta un hudiu, nací na Tarso di Cilicia, pero educá den e stad aki na pia di Gamaliel, instruí conforme cu e rigor dje Ley di nos antepasadonan, siendo celoso pa Dios mescos cu boso tur ta awe.”—Echonan 22:1-3.

Cu su bida na peliger, pakico Pablo a cuminsá su defensa bisando cu el a ser educá dor di Gamaliel? Ken tabata Gamaliel, i kico tabata enbolbí den ser siñá dor di dje? E entrenamentu aki a influenciá Saul asta despues cu el a bira e apostel cristian Pablo?

Ken Tabata Gamaliel?

Gamaliel tabata un fariseo bon-conocí. E tabata nietu di Hillel e Anciano, kende a funda un dje dos divisionnan principal den hudaismo farisaico.a Hillel su método di siña a ser considerá mas tolerante cu esun di su rival, Shammai. Despues dje destruccion dje tempel di Jerusalem na 70 E.C., e hudiunan a preferá Bet Hillel (e Cas di Hillel) mas cu Bet Shammai (e Cas di Shammai). E Cas di Hillel a bira e expresion oficial di hudaismo, ya cu tur e otro sectanan di hudaismo a disparcé cu e destruccion dje tempel. E decisionnan di Bet Hillel hopi bes ta e base pa ley hudiu den e Mishna, cu a bira e base p’e Talmud, i Gamaliel su influencia aparentemente tabata un factor principal den e dominacion di Bet Hillel.

Gamaliel tabata asina respetá cu e tabata e promé cu a ser yamá raban, un título mas haltu cu rabi. De facto, Gamaliel a bira un persona asina altamente respetá cu e Mishna ta bisa di dje: “Ora Raban Gamaliel e anciano a muri, e gloria dje Tora a caba, i puresa i santidad [literalmente “separacion”] a perecé.”—Sota 9:15.

Siñá dor di Gamaliel—Den ki Manera?

Ora apostel Pablo a bisa e multitud den Jerusalem cu el a ser ‘educá na pia di Gamaliel,’ kico e tabata kier men? Kico tabata enbolbí den ser un disipel di un maestro manera Gamaliel?

Relacioná cu tal entrenamentu, Profesor Dov Zlotnick dje Seminario Teológico Hudiu di Merca ta skirbi: “E exactitud dje ley oral, pues su confiabilidad, ta dependé casi completamente riba e relacion maestro-disipel: e cautela cu e maestro ta ehercé den siña e ley n’e disipel i e determinacion dje disipel pa siñ’é. . . . P’esei, disipelnan a ser instá pa sinta na pia dje eruditonan . . . ‘i bebe nan palabranan cu sed.’”—Avot 1:4, Mishna.

Den su buki A History of the Jewish People in the Time of Jesus Christ (Un Historia dje Pueblo Hudiu den e Tempu di Jesucristo), Emil Schürer ta tira lus riba e métodonan dje maestronan rabínico di promé siglo. E ta skirbi: “E rabinan mas famoso hopi bes a reuní rond di nan un gran cantidad di hóbennan anhelando instruccion, cu e propósito di haci e hóbennan conocé cabalmente e ‘ley oral’ hopi diversificá i abundante. . . . E instruccion a consistí di un entrenamentu continuo i persistente dje memoria. . . . E maestro tabata plantea dilanti su alumnonan vários pregunta relacioná cu e ley pa nan dicidí riba dje i a laga nan contestá e preguntanan ei of e mes a contestá nan. Tambe tabata permití p’e alumnonan haci e maestronan pregunta.”

Desde e punto di bista dje rabinan, loke tabata den wega p’e alumnonan tabata mas cu meramente ricibí un grado académico transitorio. Esnan cu tabata studia bou di maestronan asina a ser spiertá: “Ken cu lubidá un solo cos di loke el a siña—Scritura ta carga esei na dje como si fuera e ta un asuntu di bida of morto.” (Avot 3:8) E elogio di mas grandi a ser duná na un alumno cu tabata manera “un pos di pleister, cu no ta laga ni un gota di awa sali.” (Avot 2:8) Esei tabata e clase di entrenamentu cu Pablo, n’e tempu ei conocí na su nomber hebreo, Saul di Tarso, a ricibí for di Gamaliel.

E Berdadero Nificacion dje Siñansanan di Gamaliel

Conforme cu siñansa di fariseo, Gamaliel a promové creencia den e ley oral. Asina el a pone mayor énfasis riba e tradicionnan dje rabinan cu riba e Scritura inspirá. (Mateo 15:3-9) Segun Mishna, Gamaliel a bisa: “Busca pa bo mes un maestro [un rabi] i libra bo mes di duda, pasobra bo no mester duna demasiado diesmo cu reimentu.” (Avot 1:16) Esaki a nificá cu ora e Scritura Hebreo no a bisa explícitamente kico pa haci, un persona no mester a usa su mes razonamentu of sigui su concenshi pa tuma un decision. En bes di esei, e mester a busca un rabi cualificá cu lo a tuma e decision p’e. Segun Gamaliel, solamente den e manera aki un persona lo a evitá di peca.—Compará cu Romanonan 14:1-12.

Sin embargo, Gamaliel tabata generalmente conocí pa un actitud mas tolerante i liberal den su decisionnan religioso legal. Por ehempel, el a mustra consideracion pa hende muher ora el a dicidí cu lo e “permití un esposa bolbe casa riba e testimonio di un solo testigo [dje morto di su esposo].” (Yevamot 16:7, Mishna) Ademas, pa protehá hende muher divorciá, Gamaliel a introducí un cantidad di restriccion pa emití un carta di divorcio.

E spiritu liberal aki tambe ta ser mirá den Gamaliel su trato cu e promé siguidornan di Jesucristo. E buki di Echonan ta conta cu ora otro lidernan hudiu a busca pa mata e apostelnan di Jesus cu nan a arestá pa motibu di ta predicá, “un cierto homber a lanta den e Sanedrin, un fariseo yamá Gamaliel, un maestro di Ley respetá pa tur e pueblo, i a duna ordu pa saca e hombernan afó pa poco tempu. I el a bisa nan: ‘Hombernan di Israel, presta atencion na boso mes en cuanto loke boso ta pensa di haci tocante e hendenan aki. . . . Mi ta bisa boso, No mete cu e hendenan aki, sino laga nan pa nan cuenta; . . . di otro manera, boso kisas lo ser hañá luchador realmente contra Dios.’” Nan a haci caso dje conseho di Gamaliel i e apostelnan a ser poné den libertad.—Echonan 5:34-40.

Kico Entrenamentu na Man di Gamaliel A Nificá pa Pablo?

Pablo a ser entrená i educá dor di un dje maestronan rabínico di mas importante dje promé siglo E.C. Sin duda, e echo cu e apostel a mencioná Gamaliel a pone e multitud den Jerusalem presta atencion special na su discurso. Pero el a papia cu nan di un Maestro hopi mas superior cu Gamaliel—Jesus, e Mesías. Awor tabata como un disipel di Jesus, no di Gamaliel, cu Pablo a dirigí su mes n’e multitud.—Echonan 22:4-21.

E entrenamentu na man di Gamaliel a influenciá Pablo su siñansa como un cristian? Probablemente, e instruccion rigoroso den Scritura i ley hudiu a resultá útil pa Pablo como maestro cristian. Sin embargo, Pablo su cartanan divinamente inspirá cu ta ser hañá den Bijbel claramente ta mustra cu el a rechasá siñansanan fundamental di Gamaliel su creencia farisaico. Pablo a dirigí su compañeronan hudiu i tur otro hende, no n’e rabinan di hudaismo of na tradicionnan cu hende a traha, sino na Jesucristo.—Romanonan 10:1-4.

Si Pablo a sigui como un disipel di Gamaliel, lo el a disfrutá di gran prestigio. Otronan for dje círculo di Gamaliel a yuda determiná e futuro di hudaismo. Por ehempel, Gamaliel su yu homber Simeon, kisas un alumno compañero di Pablo, a hunga un papel principal den e lantamentu hudiu contra Roma. Despues dje destruccion dje tempel, Gamaliel su nietu Gamaliel II a restorá e autoridad dje Sanedrin, mudand’e pa e pueblo di Yavneh. Huda Ha-Nasi, nietu di Gamaliel II, tabata esun cu a compilá e Mishna, cua a bira e buki fundamental di creencia hudiu te cu nos dia.

Como alumno di Gamaliel, Saul di Tarso kisas por a bira masha prominente den hudaismo. Sin embargo, relacioná cu un carera asina, Pablo a skirbi: “Loke tabata ganashi pa mi, esakinan mi a considerá como pérdida pa causa di Cristo. Sí, en cuanto esei, ami en berdad tambe ta considerá cu tur cos ta pérdida pa causa dje balor sobresaliente dje conocimentu di Cristo Jesus mi Señor. Pa causa di dje mi a sufri pérdida di tur cos i mi ta considerá nan como un monton di basura, pa mi por gana Cristo.”—Filipensenan 3:7, 8.

Dor di bira lomba pa su carera como fariseo i bira un siguidor di Jesucristo, Pablo a haci aplicacion práctico dje conseho di su ex-maestro pa tene cuidou pa no ser “hañá luchador realmente contra Dios.” Dor di stop su persecucion dje disipelnan di Jesus, Pablo a stop di bringa contra Dios. Mas bien, birando un siguidor di Cristo, el a bira un dje “colaboradornan di Dios.”—1 Corintionan 3:9.

E mensahe di cristianismo berdadero ta sigui ser proclamá dor di Testigonan di Jehova celoso den nos dia. Mescos cu Pablo, hopi di e proclamadornan aki a haci cambionan dramático den nan bida. Algun asta a entregá careranan prometedor pa por tin un mayor participacion den e actividad di predicacion di Reino, berdaderamente un obra “di Dios.” (Echonan 5:39) Ki felis nan ta di a sigui e ehempel di Pablo en bes di esun di Pablo su ex-maestro, Gamaliel!

[Nota]

[Plachi na página 28]

Como apostel Pablo, Saul di Tarso a proclamá e bon nobo na hende dje nacionnan