Bo Bida—Kico Ta Su Proposito?

“Mi tabata dirigí mi curason cu sabiduria . . . te ora mi por a mira ki bon tabatin pa e yunan di humanidad . . . pa e cantidad di nan dianan di bida.”—ECLESIASTES 2:3.

 1, 2. Pakico no ta malu pa tin un interes razonabel den bo mes?

BO TA interesá den bo mes, no ta berdad? Esei ta normal. P’esei nos ta come tur dia, nos ta drumi ora nos ta cansá, i nos gusta ta huntu cu amigu i sernan kerí. De bes en cuando nos ta hunga wega, landa of haci otro cosnan cu nos ta disfrutá di dje, reflehando un interes balansá den nos mes.

² Un interes propio asina ta cuadra cu loke Dios a impulsá Sálomon pa skirbi: “Pa loke ta un hende, no tin nada mas mihó cu e come i en berdad bebe i laga su alma mira e bon pa motibu di su trabou duru.” Basá riba experencia, Sálomon a agregá: “Esaki tambe mi a mira, ami mes, cu esaki ta bin for dje man di e Dios berdadero. Pasobra ken ta come i ken ta bebe mihó cu ami?”—Eclesiástes 2:24, 25.

 3. Pa ki preguntanan confundidor mayoria hende no tin e contesta?

³ No obstante, bo sa cu bida ta mas cu come, bebe, drumi i haci bon. Nos tin nos dolornan, decepcionnan i preocupacionnan. I nos ta parce muchu ocupá pa meditá riba e nificacion di nos bida. Esei no ta e caso cu bo? Vermont Royster, ex-editor di The Wall Street Journal, despues cu el a tuma nota di hende su amplio conocimentu i abilidadnan, a skirbi: “Aki tin un cos curioso. Ora nos pensa tocante humanidad i su dilemanan i su lugá den e universo aki, nos no sa muchu mas cu tempu bida a cuminsá. Ainda nos a keda cu e preguntanan di ken nos ta i pakico nos ta existí i unda nos ta bayendo.”

 4. Pakico nos cada un mester kier ta capas pa contestá preguntanan cu tin di haber cu nos?

⁴ Con lo bo contestá e preguntanan: Ken nos ta? Pakico nos ta aki? I unda nos ta bayendo? Na juli di aña pasá, Sr. Royster a muri. Bo ta suponé cu pa e tempu ei el a haña contestanan satisfactorio? Mas relevante ainda, Tin un manera cu abo por haña nan? I con esakinan por yudá bo disfrutá di un bida mas significativo i mas felis? Laga nos mira.

Un Fuente Principal di Perspicacia

 5. Pakico nos mester acudí na Dios ora nos ta busca comprendimentu penetrante den preguntanan tocante e nificacion di bida?

⁵ Si nos cada un riba nos mes mester busca e propósito di nos bida, nos lo tin poco of ningun éxito, manera tabata e caso di mayoria hende homber i muher, asta esnan cu educacion avansá i hopi experencia. Pero nos no ta lagá pa nos cuenta. Nos Creador a percurá yudansa. Ora bo pensa riba dje, Dios no ta e mihó Fuente di perspicacia i sabiduria, siendo cu e ta “for di tempu indefiní pa tempu indefiní” i tin conocimentu completo dje universo i di historia? (Salmo 90:1, 2) El a crea hende i a observá henter e desaroyo di hende, p’esei e ta Esun na ken nos mester acudí pa perspicacia, no na hende imperfecto, cu nan conocimentu i percepcionnan limitá.—Salmo 14:1-3; Romanonan 3:10-12.

 6. (a) Con e Creador a percurá pa nos haña e perspicacia necesario? (b) Con Sálomon ta enbolbí den esei?

⁶ Aunke nos no por spera p’e Creador fluister den nos orea un revelacion riba e nificacion di bida, el a percurá un fuente di perspicacia—su Palabra inspirá. (Salmo 32:8; 111:10) E buki di Eclesiástes ta particularmente balioso al respecto. Dios a inspirá su escritor, di manera cu “e sabiduria di Sálomon tabata hopi mas grandi cu e sabiduria di tur e orientalnan.” (1 Reynan 3:6-12; 4:30-34) “E sabiduria di Sálomon” a impresioná un monarca cu a bishit’é asina tantu cu el a bisa cu ni mitar no a ser contá i cu esnan cu a scucha Sálomon su sabiduria en berdad lo tabata felis.a (1 Reynan 10:4-8) Nos tambe por gana perspicacia i felicidad for dje sabiduria divino cu nos Creador a percurá pa medio di Sálomon.

 7. (a) Kico Sálomon a concluí tocante mayoria actividad bou di shelu? (b) Ki ehempelnan tin di Sálomon su evaluacionnan realístico?

⁷ Eclesiástes ta reflehá e sabiduria cu Dios ta duna, locual a afectá Sálomon su curason i celebro. Teniendo e tempu, recursonan i perspicacia pa haci esei, Sálomon a examiná “tur loke a ser hací bou di shelu.” El a mira cu mayoria di esei “tabata banidad i un corementu tras di bientu,” loke ta un evaluacion inspirá cu nos mester tene na mente ora nos ta pensa tocante nos propósito den bida. (Eclesiástes 1:13, 14, 16) Sálomon tabata franco i realístico. Por ehempel, meditá riba su palabranan hañá na Eclesiástes 1:15, 18. Bo sa cu den transcurso di siglonan hende a purba vários forma di gobiernu, algun biaha tratando sinceramente pa resolvé problemanan i mehorá calidad di bida di hende. Sin embargo, cualkier un di nan realmente a corigí tur e cosnan “trocí” dje sistema imperfecto aki? I tal bes bo a mira cu mas grandi un persona su conocimentu ta, mas profundamente e ta realisá cu den un bida corticu, ta imposibel pa corigí cosnan completamente. Tal realisacion ta causa frustracion pa hopi hende, pero no necesariamente pa nos.

 8. Ki ciclonan a existí pa hopi tempu?

⁸ Un otro punto pa considerá ta e ciclonan ripititivo cu ta afectá nos, manera e salimentu i bahamentu di solo of movementu di bientu i awa. Nan a existí den e dianan di Moises, Sálomon, Napoleon i nos bisawelonan. I e ciclonan ta sigui. Di manera similar, “un generacion ta bai, i un generacion ta bini.” (Eclesiástes 1:4-7) For di un punto di bista humano, poco cos a cambia. Hende di antigwedad i dje tempu actual tabatin casi e mésun actividad, speransa, ambicion i logronan. Maske entre humanidad, algun individuo a traha un nomber notabel of tabata sobresaliente den bunitesa of abilidad, unda e persona ei ta awor? Morto, i probablemente a pasa pa olvido. Esei no ta djis un punto di bista demasiado negativo. Mayoria hende ni sikiera sa nomber di nan bisawelonan ni no por bisa unda nan a nace i ser derá. Bo por comprendé pakico Sálomon di un manera realístico a mira cu empeñonan i esfuersonan humano ta banidad.—Eclesiástes 1:9-11.

 9. Con adkiriendo un comprendimentu penetrante i realístico den humanidad su situacion por yuda nos?

⁹ En bes di frustra nos, e perspicacia divino aki den humanidad su situacion básico por tin un efecto positivo, impulsando nos pa evitá di duna balor ekibocá na metanan of empeñonan cu pronto lo disparcé i pasa pa olvido. E perspicacia divino aki tin cu yuda nos evaluá loke nos ta haciendo cu nos bida i loke nos ta purba alcansá. Pa ilustrá, en bes di abstené completamente for di placer, nos por haña goso den comementu i bebementu balansá. (Eclesiástes 2:24) I, manera nos lo mira, Sálomon ta yega na un conclusion masha positivo i optimista. Den poco palabra, su conclusion ta cu nos mester apreciá profundamente nos relacion cu nos Creador, kende por yuda nos haña un futuro eternamente felis i yen di propósito. Sálomon a enfatisá: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende.”—Eclesiástes 12:13.

Propósito en Bista dje Ciclonan di Bida

10. Den ki manera Sálomon a compará animal cu hende?

¹⁰ E sabiduria divino reflehá den Eclesiástes por yuda nos considerá mas aleu nos propósito den bida. Con asina? Den e sentido cu Sálomon a enfocá realísticamente riba otro berdadnan cu kisas poco biaha nos ta pensa ariba. Un di nan ta enbolbé similaridadnan entre hende i bestia. Jesus a compará su siguidornan cu carné, sin embargo, hende generalmente no ta gusta pa ser compará cu animal. (Juan 10:11-16) Tog Sálomon a bini cu cierto echonan innegabel: “E Dios berdadero ta bai selectá [e yunan di humanidad], pa nan por mira cu nan mes ta bestianan. Pasobra tin un fin en cuanto e yunan di humanidad i un fin en cuanto e bestia, i nan tin e mésun fin. Manera esun ta muri, asina e otro ta muri; . . . di manera cu no tin superioridad di hende riba bestia, pasobra tur cos ta banidad. . . . Nan tur a yega di existí for di stof, i nan tur ta bolbe na stof.”—Eclesiástes 3:18-20.

11. (a) Con e ciclo di bida típico di un animal por ser describí? (b) Kico bo ta haña di un análisis asina?

¹¹ Pensa riba un animal cu bo ta gusta wak, tal bes un klipdas of un conenchi. (Deuteronomio 14:7; Salmo 104:18; Proverbionan 30:26) Of imaginá bo un eekhoorn; tin mas cu 300 sorto rond mundu. Con su ciclo di bida ta? Despues cu e nace, su mama ta cuid’é i aliment’é pa algun siman. Pronto e ta haña lana i por sali pafó dje neshi. Bo por mir’é core rond siñando con pa busca cuminda. Pero hopi biaha e ta parce di hunga so, disfrutando di su vigor como animal yong. Despues di a crece pa un aña asina, e ta busca un partner. E ora ei e mester traha un neshi i cuida yu. Si e haña suficiente bèshi, nechi i simia, e famia di eekhoorn por crece bira gordo bunita i haña tempu pa haci nan neshi mas grandi. Pero den solamente un par di aña, e animal ta bira bieu i ta bira un víctima mas fácil di accidente i malesa. Cu mas o ménos dies aña e ta muri. Tin variacionnan chikitu entre diferente sorto di eekhoorn, pero por lo general, esei ta su ciclo di bida.

12. (a) Realísticamente mirá, pakico e ciclo di bida di hopi hende ta manera esun di e animal comun? (b) Kico nos por pensa ariba, e siguiente biaha cu nos mira e animal cu nos tabatin na mente?

¹² Mayoria hende lo no tin obhecion contra e ciclo ei pa un animal, i nan apénas ta spera cu un eekhoorn tin un propósito racional den bida. Sin embargo, e bida di hopi hende no ta diferenciá mashá for di esei, no ta berdad? Nan ta nace i ta ser cuidá como baby. Nan ta come, crece i hunga como hóben. Pronto despues nan ta adulto, ta haña un partner i ta busca un lugá di biba i un manera pa percurá cuminda. Si nan logra, nan por crece bira gordo i rek nan cas (neshi) den cua nan ta lanta yunan. Pero e décadanan ta pasa lihé, i nan ta bira bieu. Si no ta promé cu esei, nan por muri despues di 70 of 80 aña yená cu “afan i cosnan perhudicial.” (Salmo 90:9, 10, 12) E siguiente biaha cu bo mira un eekhoorn (of otro animal cu bo tabatin na mente), considerá e echonan ei cu ta poné bo para pensa.

13. Ki fin ta resultá di ta cierto pa tantu animal como hende?

¹³ Bo por mira pakico Sálomon a compará e bida di hende cu animal. El a skirbi: “Pa tur cos tin un tempu señalá, . . . un tempu pa nace i un tempu pa muri.” E último fin ei, morto, ta similar pa hende i bestia, “manera esun ta muri, asina e otro ta muri.” El a agregá: “Nan tur a yega di existí for di stof, i nan tur ta bolbe na stof.”—Eclesiástes 3:1, 2, 19, 20.

14. Con algun hende ta purba cambia e ciclo comun di bida, pero cu ki resultado?

¹⁴ Nos no tin cu considerá e evaluacion realístico aki como pensamentu negativo. Ta cierto cu algun hende ta purba cambia e situacion, manera dor di traha mas duru pa por haña mas rikesa material cu nan mayornan tabatin. Tal bes nan ta sigui mas aña di educacion pa percurá pa un nivel di bida mas haltu, miéntras cu nan ta purba amplia nan comprendimentu di bida. Of nan por concentrá riba ehercicio of programanan di dieta pa haña mihó salú i un bida un poco mas largu. I e esfuersonan aki por trece cierto beneficio. Pero ken por ta sigur cu e esfuersonan ei lo resultá exitoso? Asta si nan ta mes, pa cuantu tempu?

15. Ki evaluacion franco dje bida di mayoria hende ta na su lugá?

¹⁵ Sálomon a puntra: “Ya cu ta existí hopi cos cu ta causa hopi banidad, ki bentaha un hende tin? Pasobra ken sa cuantu bon un hende tin den bida pa e cantidad dje dianan di su bida bano, ora e ta pasa nan manera un sombra? Pasobra ken por bisa hende kico lo sosodé despues di dje?” (Eclesiástes 6:11, 12) Siendo cu morto ta caba relativamente lihé cu un persona su esfuersonan, tin realmente hopi bentaha den lucha pa gana mas cos material of den sigui añanan largu di educacion na scol principalmente pa haña mas posesion? I siendo cu bida ta asina corticu, i ta pasa bai manera un sombra, hopi hende ta comprendé cu no ta sobra tempu pa redirigí nan esfuersonan riba un otro meta humano ora nan sinti cu nan a fracasá den alcansá nan meta; un hende no por ta sigur tampoco kico lo pasa cu su yunan “despues di dje.”

Ta Tempu pa Traha un Bon Nomber

16. (a) Kico nos mester haci cu animalnan no por haci? (b) Ki otro berdad mester afectá nos pensamentu?

¹⁶ Diferente for di animal, como hende nos tin e capacidad pa meditá, ‘Kico ta e nificacion di mi existencia? E ta djis un ciclo fiho, cu un tempu pa nace i un tempu pa muri?’ Relacioná cu esei, corda e berdad den Sálomon su palabranan tocante hende i bestia: “Nan tur ta bolbe na stof.” Esei ta nificá cu morto ta caba definitivamente cu un hende su existencia? Wel, Bijbel ta mustra cu hende no ta poseé un alma inmortal cu ta sigui biba despues cu un persona muri. Hende ta alma, i e alma cu ta peca ta muri. (Ezekiel 18:4, 20) Sálomon a elaborá: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto, tampoco nan no tin salario mas, pasobra e recuerdo di nan a ser lubidá. Tur loke bo man haña pa haci, hacié cu bo forsa mes, pasobra no tin trabou ni formacion di proyecto ni conocimentu ni sabiduria den Sheol, e lugá unda bo ta bayendo.”—Eclesiástes 9:5, 10.

17. Eclesiástes 7:1, 2 mester pone nos meditá riba kico?

¹⁷ En bista di e echo inevitabel ei, considerá e declaracion aki: “Un nomber ta mihó cu bon zeta, i e dia di morto ta mihó cu e dia cu un hende nace. Mihó bai na e cas di luto en bes di bai na e cas di bankete, pasobra esei ta e fin di tur humanidad; i esun na bida mester tuma esei na pechu.” (Eclesiástes 7:1, 2) Nos mester ta di acuerdo cu morto ta “e fin di tur humanidad.” Ningun hende tabata capas di bebe un panacea, tuma un combinacion di vitamina, sigui un dieta of haci un ehercicio cu a resultá den bida eterno. I generalmente “e recuerdo di nan a ser lubidá” no hopi tempu despues di nan morto. Pues pakico un nomber ta “mihó cu bon zeta, i e dia di morto ta mihó cu e dia cu un hende nace”?

18. Pakico nos por ta sigur cu Sálomon a kere den e resureccion?

¹⁸ Manera a ser mencioná, Sálomon tabata realístico. E tabata sa di su antepasadonan Abraham, Isaac i Jacob, cu siguramente a traha un bon nomber cerca nos Creador. Siendo bon familiarisá cu Abraham, Jehova Dios a primintí di bendicioná e i su simia. (Génesis 18:18, 19; 22:17) Sí, Abraham tabatin un bon nomber cerca Dios, i a bira su amigu. (2 Crónicanan 20:7; Isaías 41:8; Santiago 2:23) Abraham tabata sa cu su bida i e bida di su yu homber no tabata simplemente parti di un ciclo sin fin di nace i muri. Definitivamente bida tabatin mas aden cu esei. Nan tabatin e prospecto sigur di biba atrobe, no pasobra nan a poseé un alma inmortal, sino pasobra nan lo ser resucitá. Abraham tabata convencí cu “Dios por a lanta [Isaac] asta for di morto.”—Hebreonan 11:17-19.

19. Ki perspicacia nos por adkerí for di Job pa loke ta e nificacion di Eclesiástes 7:1?

¹⁹ Esei ta un clave pa comprendé con “un nomber ta mihó cu bon zeta, i e dia di morto ta mihó cu e dia cu un hende nace.” Mescos cu Job promé cuné, Sálomon tabata convencí cu Esun cu a crea bida humano por restor’é. E por trece bek na bida hende cu a muri. (Job 14:7-14) Fiel Job a bisa: “Lo bo [Jehova] yama, i mi mes lo contestá bo. Pa e obra di bo mannan lo bo sinti un anhelo.” (Job 14:15) Pensa riba esei! Pa su sirbidornan leal cu a muri, nos Creador tin “un anhelo.” (“Lo bo kier mira e obra di bo mannan un biaha mas.”—The Jerusalem Bible.) Aplicando e sacrificio di rescate di Jesucristo, e Creador por resucitá hende. (Juan 3:16; Echonan 24:15) Claramente, hende por ta diferente for di simpel animal cu ta muri.

20. (a) Ki ora e dia di morto ta mihó cu e dia di nacementu? (b) Con e resureccion di Lázaro mester a afectá hopi hende?

²⁰ Esaki ta nificá cu e dia di morto por ta mihó cu e dia cu un hende nace, si pa e tempu ei un persona a establecé un bon nomber cerca Jehova, kende por resucitá esnan fiel cu ta muri. E Sálomon Mayor, Jesucristo, a proba esei. Por ehempel, el a lanta bek na bida e fiel homber Lázaro. (Lucas 11:31; Juan 11:1-44) Manera bo por imaginá, hopi di esnan cu tabata testigo di Lázaro su binimentu bek na bida a ser afectá profundamente, poniendo fe den e Yu di Dios. (Juan 11:45) Bo ta kere cu nan a sinti cu bida no tin propósito, cu nan no tabatin ningun idea ken nan tabata i unda nan tabata bayendo? Al contrario, nan por a mira cu nan no tabatin nodi di ta simpel animalnan cu ta nace, biba pa un tempu i despues muri. Nan propósito den bida tabata directamente i estrechamente ligá cu conocé e Tata di Jesus i haci Su boluntad. Kico di abo? E consideracion aki a yudá bo mira, of mira mas claramente, con bo bida por i mester tin un berdadero propósito?

21. Ki aspecto di haña nificacion den nos bida nos lo kier examiná ainda?

²¹ Sin embargo, un propósito berdadero i significativo den bida ta nificá muchu mas cu pensa tocante morto i biba atrobe despues di esei. E ta enbolbé loke nos ta haciendo cu nos bida riba un base diario. Sálomon tambe a clarificá esei den Eclesiástes, manera nos lo mira den e siguiente artículo.

[Nota]

Bo Ta Corda?

◻ Den ki maneranan animal i hende ta comparabel cu otro?

◻ Pakico morto ta enfatisá cu hopi esfuerso i actividad humano ta banidad?

◻ Con e dia di morto por ta mihó cu e dia di nacementu?

◻ E echo cu nos tin un propósito significativo den bida ta dependé di ki relacion?

[Plachinan na página 10]

Con bo bida ta hopi diferente for di esun di animalnan?