Di Alumnonan Exitoso pa Misioneronan Exitoso

“AINDA mi no por kere cu nos tabatin e privilegio aki!” Will a bisa excitá, refiriendo n’e entrenamentu cu e i su esposa Patsy a caba di completá como alumnonan dje di 103 klas dje Scol Bíblico di Galad di Watchtower. Zahid i Jeni tabata di acuerdo. “Ta un onor pa nos pa ta aki,” nan a bisa. Tur e alumnonan a haci un bon trabou n’e scol. Awor nan ta ansioso pa cuminsá nan carera como misionero. Pero promé, n’e programa di graduacion dia 6 di september, 1997, nan a ricibí conseho amoroso cu lo yuda nan tin éxito den nan asignacion como misionero.

E presidente dje programa tabata Theodore Jaracz, un miembro dje Cuerpo Gobernante. El a señalá cu amigu i famianan for di Cánada, Europa, Puerto Rico i Merca—huntu cu e famia di Betel i representantenan di 48 sucursal di Sociedad Watchtower—tabata presente pa sigurá e alumnonan di nan apoyo i amor. Ruman Jaracz a comentá cu misioneronan cu iglesianan di cristiandad ta manda, hopi bes ta ser distraí for di nan trabou di misionero i a cuminsá sigui tras di actividadnan escolástico of a bira enbolbí den política. Na contraste, graduadonan di Galad ta haci loke nan a ser entrená pa haci. Nan ta siña hende Bijbel.

Despues Robert Butler dje oficina di Sociedad na Brooklyn a papia riba e tema “Haci Bo Caminda Exitoso.” El a splica cu aunke hende ta midi éxito den términonan di ganashi financiero of otro beneficio personal, loke realmente ta conta ta con Dios ta midi éxito. Jesus su ministerio tabata exitoso, no pasobra el a combertí hopi hende, sino pasobra e tabata fiel den su asignacion. El a trece gloria na Jehova, i el a permanecé sin contaminacion dje mundu. (Juan 16:33; 17:4) Esakinan ta cosnan cu tur cristian por haci.

“Sea Esclabo di Tur Persona,” Robert Pevy, anteriormente misionero den Oriente, a consehá. Apostel Pablo tabata un misionero exitoso. Kico tabata su secreto? El a haci su mes esclabo di tur hende. (1 Corintionan 9:19-23) E orador a splica: “Un graduado di Galad cu e actitud ei lo no mira e sirbishi di misionero como un clase di promocion den su carera, un trampolin na puestonan mas importante den e organisacion. Un misionero ta bai su asignacion cu un solo motibu—pa sirbi, pasobra esei ta loke esclabonan ta haci.”

Basando su conseho principalmente riba 2 Corintionan capítulo 3 i 4, Gerrit Lösch dje Cuerpo Gobernante a exhortá e alumnonan pa “Reflehá Mescos cu Spiel e Gloria di Jehova.” El a recordá nan cu e conocimentu di Dios ta manera un lus cu ta iluminá un cristian ora esaki habri su curason pa ricibié. Nos ta reflehá e lus ei dor di predicá e bon nobo i dor di mantené conducta excelente. “Tin biaha lo bo por sinti cu bo no ta sirbi,” el a admití. “Ora sintimentunan asina lanta, dependé riba Jehova, ‘p’e poder mas ayá di loke ta normal sea di Dios.’ ” (2 Corintionan 4:7) Ripitiendo e palabranan di Pablo registrá na 2 Corintionan 4:1, Ruman Lösch a haci e apelacion aki n’e alumnonan: “No entregá den boso asignacion di misionero. Mantené boso spiel limpi limpi!”

Karl Adams, un miembro dje facultad di Galad, a papia riba e tema interesante “Unda Jehova Ta?” E pregunta ta referí, no na Dios su localidad den e universo, sino n’e necesidad pa considerá Jehova su punto di bista i indicacionnan di su guia. Segun Ruman Adams, “bou di stres asta un persona cu a sirbi Jehova pa hopi tempu por perde esei for di bista.” (Job 35:10) Kico di nos tempu moderno? Na 1942, e pueblo di Dios tabatin mester di guia. E trabou di predicá tabata yegando su fin, of tabatin mas trabou pa haci? Kico tabata Jehova su boluntad pa su pueblo? Segun nan a studia e Palabra di Dios, e contesta a bira cla. “Promé cu aña 1942 a terminá,” Ruman Adams a declará, “plannan tabata cla p’e Scol Bíblico di Galad di Watchtower.” Un cos ta sigur: Jehova a bendicioná e trabou dje misioneronan cu e scol ei a manda.

Mark Noumair tabata e di dos instructor di Galad cu a papia. Den su discurso, titulá “Con Lo Bo Usa Bo Talento?” el a animá e alumnonan pa aplicá e entrenamentu cu nan a ricibí na Galad asina nan yega den nan asignacion nobo. “Haci esfuerso pa mustra interes den otronan,” el a bisa. “Sea interesá den e hendenan i nan cultura. Sea ansioso pa siña e custumbernan, e historia, loke e pueblo nativo ta considerá humorístico. Mas lihé bo siña e idioma, mas fácil lo bo adaptá na bo asignacion.”

Alumnonan Celoso Ta Haña Goso den e Ministerio

Ademas di dedicá nan mes na nan lesnan miéntras nan tabata na Galad, e alumnonan a ser asigná na 11 congregacion local. Den finnan di siman, nan a participá celosamente den e actividad di predicá. Wallace Liverance dje facultad di Galad a invitá vários di nan pa compartí algun di nan experencianan cu e auditorio. Nan goso tabata bisto segun cu nan a relatá e experencianan cu nan tabatin testificando na centronan comercial, den lugánan di parkeer, den teritorio di negoshi, riba caya i di cas pa cas. Algun di nan a busca maneranan pa alcansá hende di abla stranhero cu a biba i traha den e teritorio di nan congregacion. Miembronan dje di 103 klas a cuminsá i conducí por lo ménos dies studio di Bijbel durante e cincu lunanan di nan entrenamentu.

Misioneronan di Hopi Tempu Ta Compartí Secretonan di Exito

Despues di e parti dushi aki dje programa, Patrick Lafranca i William Van de Wall a invitá shete miembro di Comité di Sucursal pa describí e lesnan cu nan a siña den nan carera como misionero pa beneficio dje klas. Nan a amonestá e graduadonan pa considerá cu nan asignacion di misionero a bini di Jehova i pa ta dicididu pa pega na nan asignacion. Nan a papia dje efectonan positivo cu misioneronan entrená na Galad tabatin riba e trabou den otro paisnan.

Kico a yuda e miembronan aki di Comité di Sucursal sirbi pa décadanan como misioneronan felis i productivo? Nan a traha estrechamente cu e rumannan local i a siña for di nan. Nan a dedicá nan mes na siña e idioma asina cu nan a yega na nan asignacion. Nan a siña pa ta flexibel i pa adaptá na custumbernan local. Charles Eisenhower, un graduado dje promé klas di Galad i un misionero pa 54 aña, a compartí cincu “secreto” cu misioneronan exitoso a siña: (1) Studia Bijbel regularmente, (2) siña e idioma, (3) sea activo den e ministerio, (4) promové pas den e cas di misionero i (5) haci oracion regularmente na Jehova. E studiantenan a keda impresioná, no solamente cu e conseho práctico cu nan a ricibí, sino tambe cu e goso bisto cu e misioneronan experenciá aki tin den e sirbishi di Jehova. Manera Armando i Lupe a formul’é: “Nan ta contentu ora nan ta papia di nan bida.”

Despues dje entrevistanan, a resta un discurso so. Albert Schroeder, un miembro dje Cuerpo Gobernante, a scoge como su tema “Fiel Administracion dje Palabra di Dios Ta Revelá Hoyanan Precioso dje Berdad.” Ya cu Bijbel ta e buki di instruccion principal dje Scol di Galad, e alumnonan tabata interesá den loke Ruman Schroeder tabatin di bisa. El a señalá cu 50 aña pasá ora trabou a cuminsá riba e Traducción del Nuevo Mundo de las Santas Escrituras, e miembronan ungí dje Comité di Traduccion di Bijbel di Mundu Nobo no a busca aprobacion di hende, sino a dependé riba e guia di spiritu santu. (Jeremías 17:5-8) Sin embargo, recientemente algun autoridad a reconocé e norma haltu cu e Traducción del Nuevo Mundo a establecé. Den un carta dirigí na Sociedad, un erudito a skirbi: “Mi ta reconocé un publicacion di calidad ora mi mir’é, i boso ‘Comité di Traduccion di Bijbel di Mundu Nobo’ a haci un trabou excelente.”

Despues dje discurso aki, e alumnonan a ricibí nan diploma, i a anunciá nan asignacion n’e auditorio. E tabata un momento conmovedor p’e miembronan dje klas. Ora un representante dje klas a lesa un carta di aprecio, hopi su hemud a yena i tabata awa na wowo. Algun dje alumnonan tabatin años ta prepará pa trabou di misionero. Sabiendo cu e curso di Galad lo a ser conducí na ingles, un par a muda bai congregacionnan di abla ingles pa mehorá nan uso dje idioma. Otronan a muda bai caminda tabatin mas necesidad di pionero, sea den nan mes pais of den exterior. Tabatin otronan mas cu a prepará dor di lesa experencianan, haci investigacion of wak e video di Sociedad Hasta los cabos de la Tierra bes tras bes.

Will cu Patsy, mencioná na cuminsamentu, a keda masha impresioná cu e interes personal cu a ser mustrá n’e alumnonan. “Hende cu no tabata ni conocé nos tabata brasa nos i saca nos potret. Un miembro dje Cuerpo Gobernante a duna nos man i a bisa: ‘Nos ta orguyoso di boso!’” No tin duda, e alumnonan dje di 103 klas ta mashá stimá. Nan a ser bon entrená. E educacion cu nan a ricibí na Galad lo permití nan haci e transicion di alumnonan exitoso pa misioneronan exitoso.

[Kuadro na página 22]

Estadísticanan dje Klas

Cantidad di pais representá: 9

Cantidad di pais na cua nan a ser asigná: 18

Cantidad di alumno: 48

Cantidad di pareha casá: 24

Edad promedio: 33

Promedio di aña den e berdad: 16

Promedio di aña den e ministerio di tempu completo: 12

[Plachi na página 23]

E di 103 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan di robes pa drechi den cada rij.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Plachi na página 24]

Unda nos ta bai?