Alegrá den Jehova i Sea Gososo

SEMPER ora finalisá un proyecto cu ta bale la pena cu éxito, esei ta un ocasion pa alegrá. E ceremonia di graduacion tené dia 13 di mart 1999, n’e Centro di Educacion Watchtower na Patterson, New York, sigur-sigur tabata un ocasion asina p’e 48 studiantenan dje di 106 klas dje Scol Bíblico di Galad di Watchtower.

E palabranan di apertura di Theodore Jaracz, miembro di Cuerpo Gobernante, graduado dje di shete klas di Galad i presidente dje programa di graduacion, a resaltá e texto di Salmo 32:11: “Alegrá den Jehova i sea gososo, boso, hustunan.” Pa splica di con e ocasion aki tabata motibu pa tur hende alegrá, el a bisa: “Durante ocasionnan manera esaki, nos ta alegrá pa motibu di loke Jehova ta logra mediante esnan di curason recto, incluso nos studiantenan di Galad.” Aunke ta e studiantenan a planea pa bin Scol di Galad i a haci esfuerso diligente pa por cualificá p’e sirbishi di misionero, ta Jehova ta esun cu a haci posibel pa tur cos yega na un final felis. (Proverbionan 21:5; 27:1) I esei, ruman Jaracz a enfatisá, ta e motibu pa “alegrá den Jehova.”

Entre esnan presente den e auditorio na Patterson tabatin miembronan di famia i huéspednan dje studiantenan, kendenan a bini for di 12 pais, pa presenciá e evento gososo aki. Miéntras cu e 5.198 personanan presente, i tambe e miembronan di famia di Betel na Brooklyn, Patterson i Wallkill conectá via telefon i television, tabata anticipá e programa cu lo a sigui, tabata bisto cu un spiritu gososo a prevalecé.

A Exhortá Nan pa Mantené un Spiritu Gososo

Ruman Jaracz a concluí su introduccion dor di introducí e promé dje cincu oradornan cu a prepará amonestacion bíblico animante, no solamente p’e graduadonan di Galad, sino tambe pa tur hende presente.

E promé orador tabata William Malenfant, graduado dje di 34 klas di Galad, kende ta sirbi awor como asistente dje Comité di Siñansa dje Cuerpo Gobernante. Relacioná cu su tema basá riba Eclesiástes 1:2, “No Ta ‘Tur Cos’ Ta Banidad!” el a plantia e pregunta: “Realmente Sálomon tabata kier men cu tur cos, den tur sentido dje palabra, ta banidad?” E contesta: “No. E tabata señalá na proyectonan di hende cu ta pasa por haltu dje boluntad di Dios, metanan cu no ta na armonia cu e boluntad di Dios. Tur e cosnan ei ta banidad.” Na contraste, adorá e Dios berdadero, Jehova, no ta banidad ni tampoco studia e Palabra di Dios, Bijbel, i siñ’é na otro hende. Dios no ta lubidá esfuersonan asina cu su sirbidónan ta haci. (Hebreonan 6:10) De facto, asta si esnan cu tin e fabor di Dios haña nan cu calamidad, nan lo “resultá di ta lorá den e sacu di bida cerca Jehova.” (1 Samuel 25:29) Esta un pensamentu consolador! Si tur adoradó di Jehova corda e puntonan aki, nan lo por mantené un spiritu gososo.

John Barr, miembro di Cuerpo Gobernante, a animá e klas di graduado cu su discurso “Haña Goso den Bo Asignacion di Misionero.” El a mustra cu e sirbishi di misionero semper tabata algu masha pegá na Jehova Dios su curason. “E tabata un parti integral di Jehova su expresion di amor pa mundu. El a manda su Yu unigénito na tera. Jesus tabata e misionero mas importante, e misionero principal.” Miéntras e graduadonan por a meditá riba e cambionan cu Jesus mester a haci pa su asignacion riba tera por tabata un éxito, e beneficionan di Jesus su sirbishi di misionero ta disponibel ainda pa tur cu kier beneficiá di nan. Manera ruman Barr a señalá, esaki ta asina pasobra Jesus tabatin goso den haci e trabou di Dios, i tambe el a stima e yunan di hende. (Proverbionan 8:30, 31) Ruman Barr a urgi e graduadonan pa keda den nan asignacion, no djis como un asuntu di perseverancia, sino pasobra nan tin goso den dje. El a suplicá e klas: “Dependé riba Jehova; nunca lo e no laga bo na caya.”—Salmo 55:22.

E siguiente orador, Lloyd Barry, un otro miembro dje Cuerpo Gobernante, a scoge e tema “Cana den e Nomber di Jehova pa Semper.” Ruman Barry a sirbi pa mas cu 25 aña como misionero na Hapon, despues cu el a gradua for dje di 11 klas di Galad. El a conta algun experencia dje promé-promé misioneronan, i el a describí e desafionan cu nan a haña nan cuné. Ki conseho práctico e tabatin p’e klas cu tabata gradua? “Riba tur cos, keda spiritualmente fuerte. Tambe, siña e idioma i conocé e cultura. Mantené bo sentido di humor. I ocupá bo cu e trabou; no cansa of entregá.” Ruman Barry a bisa e graduadonan cu den nan asignacion den estranheria, nan lo topa hopi hende cu ta cana den nomber di vários dios, i el a corda nan e palabranan di profeta Mikéas: “Tur pueblo, di nan parti, lo cana cada un den e nomber di nan dios; pero nos, di nos parti, lo cana den e nomber di Jehova nos Dios te na tempu indefiní, asta pa semper.” (Mikéas 4:5) E ehempel di ex-misioneronan sigur ta un motivacion poderoso pa tur sirbidó di Dios sigui cana den e nomber di Jehova i sirbié fielmente.

E siguiente orador riba e programa tabata e instructor di Galad, Lawrence Bowen. E tema di su presentacion a plantia e pregunta: “Kico Lo Bo Resultá di Ta?” El a mustra cu éxito den sirbishi di Dios ta dependé di fe i confiansa den Jehova. Un dependencia total riba Jehova a duna rey Asa un victoria rotundo riba un ehército enemigu cu a consistí di mas cu un miyon hende. Tog, profeta Azarías a cord’é riba e necesidad pa sigui dependé riba Jehova: “Jehova ta cu boso tanten cu boso proba di ta cuné.” (2 Crónicanan 14:9-12; 15:1, 2) Ya cu Dios su nomber, Jehova, ta transmití e idea cu e ta resultá di ta loke ta necesario pa cumpli cu su propósito—sea cu esei ta nificá ser un Percurador, un Protector of asta un Ehecutor—misioneronan cu ta dependé riba Jehova i cu ta traha na armonia cu su propósito, lo tin éxito den nan asignacion. (Exodo 3:14) Ruman Bowen a finalisá: “No lubidá nunca cu tanten bo ta haci Jehova su propósito bo propósito, lo e percurá pa bo bira loke ta necesario pa bo cumpli cu bo asignacion.”

E último orador den e parti aki dje programa tabata Wallace Liverance, ex-misionero i awor e secretario dje scol. Su discurso cu tabatin e título “Mantené e Palabra di Dios Bibu i Activo den Bo,” a hala atencion n’e mensahe of promesa infalibel di Dios cu semper ta move bai padilanti pa haña su cumplimentu. (Hebreonan 4:12) E ta influenciá bida di esnan cu ta permitié haci esei. (1 Tesalonicensenan 2:13) Con nos por mantené e palabra ei bibu i activo den nos bida? Mediante studio diligente di Bijbel. Ruman Liverance a corda e graduadonan dje métodonan di studio di Bijbel cu nan a siña na Galad, i esaki a incluí lesa e Palabra di Dios i splica su aplicacion. El a cita e palabranan di Albert Schroeder, un miembro di Cuerpo Gobernante kende tabata presidente dje comité cu a establecé e Scol di Galad mas cu 50 aña pasá: “Dor di usa e contexto, un persona por haña e forsa spiritual completo i exacto cu Dios ta haci disponibel den su Palabra.” Studia Bijbel den e forma ei ta mantené e Palabra di Dios bibu i activo.

Experencia i Entrevistanan Gososo

Despues dje discursonan, e studiantenan a deleitá e auditorio cu algun experencia gososo. Bou di direccion di Mark Noumair, ex-misionero i actualmente instructor na Galad, un grupo di studiante a relatá i tambe demostrá con nan a haci esfuerso pa duna testimonio den vários situacion. Algun tabatin oportunidad di cuminsá i conducí studionan di Bijbel cu hende den e teritorio dor cu nan tabata atento na nan circunstancia i expresionnan, i dor cu nan a mustra interes personal. Pues, e studiantenan tabata ‘presta atencion constante na nan mes i na nan siñamentu,’ i nan tabata realmente interesá den yuda otro hende gana salbacion.—1 Timoteo 4:16.

Tabatin hopi sugerencia útil, i e goso cu e sirbishi di misionero ta trece, tambe tabata bisto den un cantidad di ruman experenciá cu tabata ricibí entrenamentu n’e scol pa miembronan di comité di sucursal, tené n’e Centro di Educacion Watchtower. Ruman Samuel Herd i Robert Johnson, miembronan dje staf dje sede, tabatin entrevistanan animá cu representantenan dje sucursalnan di Sociedad na Bolivia, Zimbabwe, Nicaragua, República Centroafricano, República Dominicana, Papua Nueva Guinea i Camerun.

Despues dje experencia i entrevistanan, Gerrit Lösch, graduado dje di 41 klas di Galad, kende awor ta miembro di Cuerpo Gobernante, a duna e discurso final cu tabatin e tema cu ta pone bo pensa: “Bo Ta un ‘Persona Deseabel’?” Promé, ruman Lösch a corda e graduadonan cu hende no a gusta Jesus, e Yu perfecto di Dios; mas bien “hende a despreci’é i a evit’é.” (Isaías 53:3) P’esei anto, awe no ta un sorpresa cu den hopi parti di mundu hende ta considerá misioneronan como persona non grata, esta, personanan inaceptabel of indeseá. Di otro banda, durante Daniel su hopi añanan di servicio na Babilonia, tres bes mediante un angel, e Creador a yama Daniel un persona “masha deseabel.” (Daniel 9:23; 10:11, 19) Kico a haci Daniel asina? Ora el a ahustá su mes n’e cultura di Babilonia, nunca e no a comprometé principionan bíblico, e tabata onesto den tur cos, sin nunca usa su posicion pa logra bentaha personal i e tabata un studiante celoso di Dios su Palabra. (Daniel 1:8, 9; 6:4; 9:2) Tambe el a haci oracion regularmente na Jehova i tabata lihé pa duna Dios e gloria pa su logronan. (Daniel 2:20) Dor di sigui Daniel su ehempel, sirbidónan di Dios por bira personanan deseabel, no necesariamente pa mundu, sino pa Jehova Dios.

Na conclusion dje programa spiritualmente edificante, e presidente a lesa algun telegram i mensahe cu a bini di rond mundu. Anto, tur e 24 parehanan a haña nan diploma, i a anunciá e pais unda nan a ser asigná. Finalmente, un representante dje klas a lesa un carta dirigí na Cuerpo Gobernante i e famia di Betel, cu a mustra e aprecio cu e klas tabatin p’e entrenamentu i preparacion cu nan a ricibí e último cincu lunanan ei.

Ora e programa a caba, bo por a tende entre e multitud cu tabata sali “un alegria, sí, cu gradicimentu.”—Nehemías 12:27.

[Kuadro na página 27]

Estadísticanan dje Klas

Cantidad di pais representá: 10

Cantidad di pais na cua a asigná nan: 19

Cantidad di alumno: 48

Cantidad di pareha casá: 24

Edad promedio: 33

Promedio di aña den e berdad: 16

Promedio di aña den e ministerio di tempu completo: 13

[Plachi na página 25]

E di 106 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa drechi den cada rij.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.